IV

Велень эряфсь, бта шямоню металл, каяф котелс одукс шяняфтомс. Тянь мархта машфтовихть вековой шямоттне и календави од эряф. Тя календамать инкса велеса мольсь вишке классовай тюрема.

Ся пингть, мзярда «Ленинонь знамяц» колхозсь аноклась лисемс паксяв, велеса кемоньшка куд Хламов Никитть вельде йорасть кеподемс колхозть каршес и лисемс колхозста. Хламов Никитсь ингольдень офицер. Империалистическяй войнаса сон получась кафта крестт «Георгиевскяйхть» и кафта медальхть. Войнать аделамдонза меле сон арьсесь арамс эсь волостезост «оцю» баяркс. Но сонь мяленза ашесть пяшкодь советонь властть саманц мархта. Вага мес сон, «георгиевскяй кавалерсь», ваны пинекс советонь властть лангс, вага мес сон тя тунданя атявозенц Сафрон кулакть мархта думондасть план сяземс видема кампаниять, а сянь мархта и машфтомс, синь валснон коряс, совсем колхозть прахонцка.

* * *

Апрель ковонь фкя шовдаваня, коста нинге аньцек кеподсь шадоть омба бокста якстерь кумаць лаца шись, Кузьма Андреичсь, — колхозонь председательсь (сон жа и партячейкань секретарьсь), эрязста мольсь колхозонь правлениять шири, кона ащи аф пяк ичкозе Мокша ляйть эзда. Меленця кудть креленцяса ульсть алят. Кузьма Андреичень пилес кулевсть синь корхтамасна, сяс сон мольсь тейст.

— Шумбрат эрятада! — мярьгсь алятненди.

— Шумбрат тоньцке, Кузьма Андреич.

И тусть тяса од корхтамат.

— Кизось пара, пожалы, ули, — корхтазевсь Егор Матвеич атясь. — Ваность конашка шадось! А?!. Паксяса ловда ламоль. Ловонь чушмотне бта панттольхть. Сясы лама ведьтовок.

Аф ичкозде Мокшеть кувалмос летьке, аера вармась каннесь алятнень пилес эйхнень шумснон, конац тиендевсь синь фкя-фкянди цятыемстост.

— Ванода, ванода эйхне срхкасть, — инголькиге приметазь тяза саф иттне.

Эйхнень самаснон мархта ведсь сядонга пяк кассь, и сон йорясь пря берякненди.

— А вдь синь синнелезь ба тя меленцять? — пшкядсь кати-кие алятнень йоткста.

— Коста синневи, меленцясь путф стама вастс и стама расчетса, што тейнза оцю эй аф сай, а кда и саль, сембе сяка сон аф срафтови: вантакать инголенза кодама кемот эень кирдихне, — мярьгсь Егор Матвеич.

— Видеце, Егор Матвеич.

— Тя сембе тяфта, — ушедсь Кузьма Андреич — райколхозсоюзста получандаме отношения самс сортовой видьмонкса. Иван, Палю, Кузя, Семен Ефимыч, аряда правленияв, макстама документт и срхкада станцияв.

Синь мархтост колхознай правленияв срхкасть сембе тяса ащихне. Вдруг правлениять ширде кулевсь шум, а шумть йоткса и вайгяльхть: «Вона, вона, сай!..»

Шарьхкодсь Кузьма Андреичсь, мезе тиевсь. Сон прясонза кивчядсь: «срхкафтсть тев поганай пинетне». Пачкодсть правленияв. Коста сувасть правленияв, аватне лоткасть шумондамда. — Местема саде тинь? — мзелгодозь корхтазевсь председательсь, старандамок аф няфтемс потмонь волнениянц.

Аш кашт моли.

Кармасть рахсеме кой-кона алятне: «Дай-ка, Андреич, локша, тяста синь, штоба кочкярясна тиякстиге афольхть тока?...»

Аватне тага кармасть шумондама, венепнесть заявленият.

— На, колхозу аф молян: вете идьне аф трявихть, — и уркстсь Микулть Проса. Сяка шовор, эсь павазонцты, сувась сонь мирдец, Митясь. Эцесь, кинге лангс аф ванозь, аватнень йоткс и ряфцедезе кядте Просань кенькшти.

— Виде, виде, тяфта и эряви. Авать мельге молят — ава и улят, — кирдезе Егор Матвеич Митять ширенц.

— Ожу, Митя, аф тяфта тиемс эряви, — кармась валом и спокойнаста корхтама Кузьма Андреич. — А тон мярьк: «Иттне аньцек колхозса трявихть, и кодане нинге! А тинь, аванят, ва мезяма: тяда кулхцонда ся ломаттнень, конатненди колхозсь — оржа пеель, сяс мес аньцек колхозть вельде синь, минь вяроньконь потяйхне, машфтовихть прокс кода класс. Арда куду, кодама лисема тинь вештяда — курок листяма ни паксяв. Аноклада модамарень путома ни»!

Партячейкань секретарьть корхтамда меле кой-как синь лиссть правленияста шумондазь.

— Тя может пяк кальдявс вятемс, — думондазевсь эсь пачканза Кузьма Андреич. Сон вишкста лиссь правленияста и тусь вельсоветть шири.

* * *

Вельсоветса Кузьма Андреичсь васьфтезе Машать. Вельсоветонь председательсь тяса ашель, а тусь Боркову Бодровть мархта важнай тевонь колга. Машась сонь учсесы тяса.

— Мон йорань и тейтьке ласькондемс, а тон тонць сать, — мярьгсь Машась аф пяк кайгиста, пцтай тошказь, сяс мес перяфть омба пялькссонза ульсть ниле-вете посторонняй ломатть. — Тевсь тяфтама: мон кулине Агруть эзда, што Хламов Никитсь атявозенц Сафронть мархта йорайхть сяземс видемать. Синь, няить, кучсть авань партия тейть. Арда, кле, кда заявлениятнень аф примасазь и алашатнень сбруйхнень аф макссазь, то илять сембонди лисема цянкса.

— Да, черт возьми, арсыхть киньконь лангс инекуйхне, — досаднайста мярьгсь Кузьма Андреич. Сон думондазь, алу прянь нолдазь, йотась тияксть кувалмос кафксть меки-васу, лоткась, курмоштазе вию клоконц и увереннайста азозе: — но сембе сяка, кода тяст путне пилькснон минь киньконь лангс, сембе сяка сяськихне ульхтяма минь! Синь жа улихть маштфт аф тячи — ванды. Пувордазень равжа аф оцю усанзон, мольсь вальмять малас, ванкстсь инголи вальмава (учсь вельсоветонь председательть эса и Бодровть эса), а сяльде Машать лангс.

— Виде штоли, Бойкова ялгась?

— И аньцек тяфта ули, Кузьма Андреич, — отвечась каршезонза Машась бойкаста. Тя пингоне пяк эрязста, пцтай ласькозь, сась вельсоветонь председательсь — Гришин — и Бодровскя. Синь, маряк, Боркоса кулезь «Ленинонь знамяц» колхозу аватнень якамаснон колга. Но тейст нинге ульсь аф содаф, кодама подлай ломанень, кинь тя тевсь. Машась тейст азондсь сяконь, мезе корхтась инголи Кузьма Андреиченди. Аф кадомок тя политическяй пяк важнай тевть кувака ящикс, синь тяникиге жа арьсезь сявомс мархтост участковай милиционерть и куроконе молемс Хламовть и Сафронть арестовандама.