V

Тя 1933 кизонь сьоксеть топодсть ровна кафта кизот, кода Машась тядянц — Василеря бабать мархта — эряйхть павазу и козя эряфса: макссесть Машати казьня — ваз, кона арась ни траксокс; ниле пяльде нежетьф ташта кудснон вастс путфтсть од куд ниле оцю вальмя мархта. Од кудсь валда, ару; Василерять эсь валонзон коряс, шра лангсост тяни сембе ули, нармонь лофцта башка. Тяни Василерясь азонткшни оцю спасиба козя, марстонь эряфть инкса. «Мзярдонга афолень няй тяфтама пара, кда аф колхозсь, — корхтай сон смелайста. — Спасиба и спасиба тяфтама пара, козя и весяла эряфть тииенцты. Катк сон ламос и ламос эряй белай светса».

* * *

Машать и Андрейть кучезень первичнай комсомольскяй организациясь рабфаку тонафнема.

Августть мекольдень шинзон фкя шовдаваня сембодонга рана иля ломаттнень коряс Василерять кудонц турбаста лиссь цють-цють няеви ул качамня, конац и пцтай аф няемга сраткшнесь кожфкава — тя коське пенгаса уштозе бабась пянакудснон, штоба улель сяда оцю нарф ямксонь пачань пидемс. Василерясь лядыкс шить йоразе танцтиста топодемс андомс эсь стиренц; Машась тячи туй ни ошу рабфаку тонафнема.

— Ватть, ватть рябой пяльде, тят пеле — рябой мирде аф сави, — шутендась бабась.

Пачада ярхцамда меле аноклазь арьзяняс сембонь, мезе эрявсь сявомс Машать мархта.

Сашендсть тума минутатне. Василерясь йорась крьвястемс ладопт, но стирец вежливайста вжнафтозе: «Ай ни тон, тидяй, нинге сире обуцятнень эзда ашеть ява, а пинге ни!» Но Василерясь тага эсьтейнза мусь тев: «Стирькай, тумстост ломаттне озсихть, эряви озамс — сяда удалай кисот-янцот, тонафнемасот, шумбра шисот». И штоба ваномс тидянц мяленц, коронц, аф обижамс тума лангс, Машась кулхцондозе тидянц и тиезе сонь мярькфонц.

Аф ламда меле синь колмонест — Андрейть мархта — мольсть ни кигя оцю кить шири, коса Машати и Андрейти озама автомашинас и — станцияв.

Молемста Василерясь корхтай: «стирняй, тонафнек лацкас. Кудть мяльсот тяк кирде, кудстонь тевть инкса тят лажна: кши ули, ули лофца-вай, ули мезь и кучемска мельгат». Синь пачкодсть оцю кити. Озасть кить крайс тюже, коське, сьоксень мзярдонга апак лятть нарть лангс и учсть автомашина. Машась ванкстсь кругом паксять келес, кона курок-курок ляды ськамонза, шава; курок усксазь ни тинги лядыкс пинем и сура крандаснень, конатнень сотнемстост работась и сонцень, Машать, звенацка; аньцек илядыхть таргамс модамарьхне. Ацергоды Машать седиец, коста лятфтасы, кода йотась сонь йомла пингоц тяса. Пара мялезонза, лятфтамок мекольдень пингть, колхозу сувамда меле пингть. Ва тя самай паксяса сонь звенац, коса ащесь звенарькс, колмоце кизось лисендсь инголи моликс паксянь работаса. Сонь звенац ударнайкс арась нинге манамба, васень кизоть. Эста Машась получась казненди ваз. Вов мес тяни, мзярда тейнза сави тумс тяста, сави явомс паксять эзда, ужялькс арай кадомс тейнза тя родной марстонь оцю паксясь.

Ичкозде кить кувалмос вармась кандсь синь пилеснонды автомашинань увнама. Машась тяса лятфтазе эсь йомла пингонц, мзярда кульсь васенда тяфтама шум, но тя шумсь аф автомашинаннель, а самолетонь. Василерять апак учт кармасть лисема сельмеведенза и кенярдемать эзда и аф оцю ризфкять эзда. Машатьке сонь лангозонза ванозь колавсь седиец — кода мля, вдь нинге васенцеда сон туй шачфты-касфтыенц — тядянц эзда, ялганзон эзда, кельгома велеть эзда, родной колхозть эзда. Но сон тянь ашезе няфте, а нинге бассесь тидянц эса: «Карман кучсеме сьормат, праздникста, сисемце ноябрьста, может сатама васечнема». Тя пингть Андрейсь, кона ащесь бокса и заняфоль эсь тевсонза, Василерять сельмеведензон тумаснон няемда меле шаштсь тейст и тожа кармась бассема.

— Стирьце козовок аф юмай, козонга аф кадса, — шутендась сон, сонць аф ламода пеедсь синь лангозост, низелдомок акша пеензон. Уле сельмонза сонь налхксть. «Ну и ламбама ваймот, — думондась эсь пачканза. — Мярьгат кие содасы коза прважасы стиренц!».

Автомашинась ардсь прокс малазост. Сяс мес Андрейсь инголькиге кеподезе кяденц, машинась лоткась. Машась и Андрейсь прощандасть бабать мархта и комотсть автомашинати. Машинась срхкась. Василерясь ламос ащесь фкя вастса и яфиезе кяденц машинати мянь кяшевмозонза. Василерясь кигя меки срхкась куд пяли. Думондась эсь пачканза куду самста «Ну, и эряф! Ва коса райсь, ату попне васькафнесть... Сиренятненди почет, а оттнень кисна кели: мезькс йорат улемс — арак, аньцек инголи тонафнек. Эх, шовда ши, чиста тон кирдьфнить монь кядстон стирезень, тнярс кати коса улель ни. Ялганза, кона инженер, кона учитель, а Катянясь аделай врачень учильща». И Василерясь баба куду самс сюдозе сире, оцязоронь правать, коста аватнень нльне ломанькска ашезь лувонда. Сон каясь сельме оттнень лангс.

* * *

Рабфакса Машати савсь путомс лама вий, штоба сатомс эсь ялганзон, конат тяда инголе аделасть начальнай школать. Лятфнесы сон, кодама стакаль немецень кяльть тонадомац. Сувась преподавательсь, кармась алфавитть тонафтомонза, а сяльде — валхнень, конатнень вайгяльсновок ашесть кунцев: сонь аф тонатфтольхть тянди пиленза. Аф сяда тьождя рузонь кяльть и математикать тонафнемасна. Но сон сявсь эсь лангозонза обязательства соцдоговорсонза, аф аньцек сатомс ялганзон, но и йотамс кой-кинь синь эздост, арамс ударницакс. Упорнай работац эсь лангсонза и ударник, отличник ялганзон лезкссна парста аделафтозь кядьстонза рабфаконь васенце курсть.

Йотасть кизонь каникулхне, ушедсь тага тонафнема кизось. Ковда меле Машась макссь заявления летнай школав примаманц колга. Машать пяшкотьсть мяленза, конат нинге шачсть прязонза йомлакс пингстонза: комиссиясь примазе сонь учлетокс производстваста (школаста) апак тук.

1936 к. Саранск