III

Шитне шудесть шитнень мельге, кофневок эряскодсть фкя-фкянь мельге, а сянь мархта и аськолдасть колма кизотневок сянь эзда сявомок, мзярда Машась нумста васенцеда няйсь, кода лийсь паксять вельфке самолет. Тя пингть пяк няевсь велень эряфть полафтомац, а тяфта и Машать эряфонц полафтомац. Тя сьоксеть Машась кармась якама изба-читальняв. Кармась сон кулхцонткшнема тоса газетат, докладт. Фкя илядне азозь тейст, што ули изба-читальняса открытай комсомольскяй собрания аф союзнай одломаттнень мархта. Машась ялганзон мархта сась тя собранияти. Сон озась ужети кувака скомня пети и кулхцондсь комсомольскяй ячейкань секретарьть Бодров Гришать корхтаманц комсомолонь уставть и программать колга. Докладонц песа сон тернезень цьоратнень и стирьхнень сувамс комсомолу.

Машать седиец кармась сидеста тотнама. Йорась молемс корхтайти и мярьгомс: «Монь ули мялезе...», но мрдафтозе эсь аф смелай шиц. «Мекпяли», — арьсесь эсь пачканза.

Машати инголи молемс и мярьгомс: «Монга максан заявления» — ашезь сав: пуромксса кармасть корхтама иля кизефксонь колга. Стясь президиумонь шра ваксста ащихненди аф содаф рузавакс наряжаф ава. Сон аф ламда якстерьгодозь шуваня вайгяльса корхтазевсь мокшекс. Азондсь сянь колга, што панжеви ликбез, коса кармайхть тонафнема илять-илять сембе сьормас афсодайхне. Ня валхне кенярьфтезь Машать и сон эсьтейнза апак учт мзелгодсь.

* * *

Недяляда меле састь учф шинза минь стиреньконь. Сон кармась илять-илять якама школав, конанц панжезь тяка ульцяти. Тя шиня Машась васьфтезе Бодровть. Тейнза Машась азозе, што сонь ули мялец сувамс комсомолу.

— Да, эряви сувамс комсомолу, — корхтазевсь Бодров. — Мон изба-читальняса лама корхтань тянь колга; кда эсолеть, то содасак, мезе стамсь комсомолсь, кинь тоза примосихть, кодамот комсомолецть васенцекс и пяк эрявикс обязанностенза. Тейть аньцек прибаван сянь, што кда суват, кучтядязь тонафнема сяда тов...

— Обязательна, обязательна, максан заявления, — кенярдезь отвечась Машась Бодровть каршес, и синь явсть и тусть эсь кигаст.

Омбоце шиня Маша сьорматфтсь комсомолец Андрейть кядьста заявления комсомолу сувамать колга. Эх, эста мезе ульсь! Тядяц, кодак кулезе тянь, кудста йорязень Машать щамонзон, крьвястсь ладопт и шарозе корамняфтома пирьфснон, сонць озондсь «Михаил Архангелонди», штоба ся «ванольхце» юрхта вастонц тя «напастиять» эзда...

... Тяка ковня тага фкя события тиевсь Машать эряфса: сон, кода и сембе комсомолецне, сувась велеса одс пуроптф колхозти. Машать тядяц, Василерясь, явсекшнесь недялянь перьф. Явсесь сяс, мес стиренц колхозу сувамац сязезе сонь сотксонц велеса сире бабатнень мархта, кинь цьорасна или стирьсна нинге ашесть сува колхозу; явсесь сон сяс (а тя сембода главнайсь), мес велеса сембонди содаф Аксю бабань, кулак Данилть тядянц корхнеманза шорсесть сонь седиенц: кармай бта тона шиса вечна палома юрнай толса или нолсема кяльса якстерьс эжтьф пачалкнень.

Василерять петневсь седиец аньцек эста, мзярда партийно-комсомольскяй активсь эсь агитациянц вельде сувафтозе колхозу велеть пяледа ламонц и кемоста тюрьсь кулакнень каршес. Кулакневок ашезь кадонда эсь тюремаснон: синь тяни салава вятсть пяляз агитация колхозть каршес.

* * *

Кувака, начка, шовда сьоксень и якшама тялонь иляттнень Машась йотафтозень ликбезу яказь.

Кемоста эсь лангсонза работась макссь оцю сатфкст тундань шитнень самс: сон тонадсь парста лувома и сьормадома. Тундань шитнень кенярдемаснон лаца кенярькшни тяни сон. Думондай и афи верондазеви, што сон арась сьормас содайкс. Сон смелайста тяни моли клубу и луви тоса газетт, азонды и лиятнендиге. Но сон шарьхкодьсы, што лоткамс тяконь лангс — значит лоткамс знаниять куцеманц инь алда турксканц лангс, сяс сон пяк йорась молемс тонафнема школав. Сон оцю мяльса прафтоль тонафнемати.