II

Машати ся кувака пингть, мзярда ни мутендаф седи стирть ялганза кармасть эрь шовдаваня курхтонь-курхтонь якама школав, сонь коза сатсь виец, лездсь тядянцты работаса. Лама пяердсь сянкса сельме ведьта, мес сон пельсь илядомда ялганзон эзда и тя сьоксеть.

Весть, шавшиста сась Дол велеста щеняц и щакац алашаснон мархта, и таргазь синь модамарьснон. Машать лангста велясь оцю панда.

— Тяни ни молян ванды школав! — кенярьфнесь сон эсь прянц. Поздна илядьти тячи шарозень сембе ялганзон и наголь кизефнесь синь эсост, примасазь ли сонь тяни школав.

— Приматядязь, мля месентядязь, мярьгат тядязе ашемань кучсе; чай учительсь содатанза: аш аляце, — кулендсь Машась седиень пети пара валхт.

Ве... Машась кодавок ашезь матодов. Сонь пряц вельф пяшкотьф арьсемада ванды школав молемать кувалмова: вага сонь сьормадсазь, кармай эрь шовдаваня ялганзон мархта якама, аделасы школать и моли ошу летнай школав.

Тяка мяльхнень мархта сон и матодовсь, мзярда ни ушедсть сидеста кукоряма атекшне сьоксень шовда веть. Машать арьсеманза ашезь када сонь и онцтонзовок: сон ялганзон мархта школаса.

Сувась учительсь и кармась Машать эса кизефнема. Ялганза и мярьгихть Машати: «Маша, стяк, минь тяфтапт вдь тяса правиланьке...» Машати отвечамс учительти ашезь сав — сонь стяфтозе тядянц кяжи вяйгялец: «Стяк ни, пяк ламос удат!»

Эрязста комотсь Машась вастстонза, куроконе карьсесь, штазе шаманц и озась ярхцама. Ярхцамода меле сон кизефтезе пелезь тядянц: — «Тядяй, молян учильщав.?» Вона Катяняське якай.

— Мезь, мезь? Мон няфтян тейть учильща!..

Машась крьвязсь аф учема мяльс аф туф ответонь кулемста. Сон афи марясы, кода кармасть сидеста лисендема сельме веденза равжа сельмонянзон эзда и кода синь кармасть шудема аф оцю шудерькскакс шаманянц эзга.

Василерясь фатясь пешуфта и кармась стиренц эса пикссема.

— Ах, совозьфтема стирь! Вона лапатнень таргайть да ушедт кштирдема. Няйсайть вдь нюрьксихть парьхцикс ащи иляназонь коморхне. Кие мля галыш лангцень щасы?! Кизотне сайхть — сявице кивок аф ули.

Ня Василерять нярьхкамазокс сяпи валонза мрдафтозь Машать арьсеф планонц эзда. Эрь шине кштирдемстонза сонь пряц пяшкотькшнесь всякай арьсемада. Арьсематнень йоткса оцю васта заньци тонафнемась, конанди ашезе нолда «сокор» тядяц.

— Вага кда улель жив алязе, монь кучелемань, а тяни... Кда миньге эрялеме Мазовкань коммунать лаца, пади молелень тонафнема. Тоса, стирьмай, оцюфне работайхть, йомлатне сембе тонафнихть тозк эсь школасост...