ПЯШКОТЬФ МЯЛЬХТЬ

I

Тя ульсь аф лама кизода инголе, коста кеветие кизоса Машась паксяса тядянц мархта нусть розь. Шись ульсь пяк опана. Сенем менельть эса тифтетькшнесть кафта-колма туця пакшкат, конат фкя-фкянь йотазь уйсть и, бта эрьготьфт, вешсть кяшема васта. Пси, нльне лангстот панарсь арай начка муськомкс ливозть эзда. «Вага кда тяни умать ваксс Мокша ляйть, да комотемс тейнза тя псить эзда», — думондась Машась. Сонцень шить эзда пидеф конястонза цифтордсь ливозсь псить эзда, а мячкакс покаряв щеканянза якстерьготфт, бта ащесь сон тол ваксса. Обедонь пингти самс синь нузь исяконь ушетф цятворка умаснон, конань лангсоль розьсь — сире атянь шяярьхть. Ушедсть нума иля розь ума. Сон ащесь Кярналашмоть вакска, а пец токась Музыкану эшиняти. Машась вийхца нусь розь, сяс мес пяк сизесь. Сон учсь обедонь пингть, коста тядяц ваймафтсы, и аф ламос сонь лангстонза валги аерксу сизефсь.

Сась обедонь пингсь. Сяда пяк кармасть налхксема лакай шить лученза. Паксяса ломаттне кармасть ярхцсема. Стиренц мархта ушедсть ярхцама и Василеряське. Кшида сускомда меле синь мадсть розь крескятнень эшксс. Аф ламода меле кулевсь ни, кода крнась Маша. Сонь келукс ащи ронгонянц жаднайста ашкодозе кунара, ни учф танцти удомась.

Ашезь матодов Василерясь. Тя колмогемонь вете кизоса авать эса шокшсь ризфсь, конань эзда арась сон бабакс. Солась стамеднай кушакокс ащи шамац, кичкоргодсь тарвазкс ингольдень виде ронгоц. Сонь эздонза удоманц панезь арьсематне.

— Вага кодама эряфсь аляфтома, — арьсесь эсь пачканза. Лятфтась гражданскяй войнаса шавф мирденц Василить. Сонь кувака и аф ламода рябой шамац ащесь лажнай авать инголе. — «Восподи боже мой, маряк мон грешникан, маряк монь судьбазе тяфтама»... — авардсь сон уды стиренц ваксса, и шудерьксокс шудесть сельмеведенза шаманц кувалмова, конатнень фалу старандась нардамс эсь кодаф уля руцянц мархта.

Кармась кепсевома розь уматнень эзга ломанень прятне.

— Стяк, стирьняй, ату шись илядь малати ни шарсь, — шерьфтозе Машать.

Машась стясь. Кармасть нума. Аньцек кенерсть нумс пулфшкань, кода вдруг синь лоткафтозень кати-мезень увф. Сембе нуйхне кепсезь пряснон и абондозь ванондсть сембе ширева. «Бта туцятка аш, — эводезь мярьгсь Василерясь. — Осподи, ванфтомасть всякай кяжи духта... Шкабавас кормилец, тонць старандак грешникнень инкса», — пульзясь и озондсь шинь стяма шири.

Тя пингть кулевсть вайгяльхть: «Ираплан! Ираплан! Вона, вона»!.. Машась кеподезе прянц и ванць менельти.

— Вона, вона, тядяй! — няфтезе сурса Машась. Василерясь ванкстсь и аф ламда меле тага кармась нума. Машась келептезе кургонц и колай ванць менельть эзга уи самолетть мельге. Сонь нльне кядьстонза прась тарвазоц и пезсь нярец модати.

— Нук ни, — пшкядсь тядяц, — вона «казаняце» иляткшни!

Машась кармась нума, а прянц кепсеманц стаки ашезе када снярс, мзярс самолетсь ашезь кяшендев фталу. Сон крхкаста думондазевсь эсь пачканза. Аф ламда пизьгону шаманц ланга кармась шудеме ливозсь. Сонь кяроманц эзда тошналгодсь седиец.

— Сьоксесь сай — монга молян учильщав, а сяда меле... а меле карман нармоттнень лаца лиендема менельге.

Лама сон арьсесь нумстонза эсь пачканза. Арьсематнень мархта ашезе маря, кода валгсь шись. Весь кармась келептемост равжа пацянзон.

Нуйхне срхкасть куду. Самстост эрь ломанць эсь инксонза азондсь обедта меле няйф «ирапланть» няеманц колга.