45

Поргов тусь «Пиче кура» колхозу, звонясь тоста тракторнай бригадань бригадирсь и местема-бди тердезе Порговть. Ётамбачк сувась Леховти: эрявсь ваномс, кода моли жуватань карттнень строямасна, вдь синь пяк эрявсть эряскофтомс. Строительстваса сон васьфтезень Леховть, Белкинть. Лехов няфтезе телеграммать, коса азфоль, што ня шитнень тяза сайхть Саранскяйста лездома кафта зоотехникт и агрономсь Николин.

Шобдавакиге тясоль ни Шиндинась. Тяза сась лездома, и марса од заведующайть, Тимкинть, мархта арьсесть, мезе коза эряви.

Поргов изь кирде, и колмоцьке тусть механизированнай токть ванома. Тоса понжафтсть люкшя.

Сире Бугровсь шарсь тяльмонц мархта.

— Борис Константинович, — шарфтсь Порговти, — ков тисаськ люкшяньконь?

Поргов ашезень шарьхкоде валонзон.

— Сёронь максома планоньконь государствати пяшкодеськ, а колхозти тя зёрнась аф эряви.

— Тифтемс — аш тяфтама драньканьке. Люкшясь выгоднай максомс государствати, панды лац инксонза. А минь, эк, аф тяфта тиенттяма.

— Учеледе. Государствати афолесть пяшкоде планонтень тозерса и розьса.

— Корхнень эста Варламовти, — кяжиясь атясь‚ — но, деряй, тейнза мезе азоват? Сон сяконь содась: «Куроконе пяшкодесть планть». Вов и лиссь тевоньке меки понай пиксокс. — Бугров тага кармась тяема тяльмоса. — Содасак, мзяра ярмак сяволеме люкшять лангс? А тяни тю-тю.

Лехов и Белкин исть кашторда, ашесть шорсе атяти.

— А тона кизотнень кода тиенькшнеде?

— Аф сяка, што ли? Эстонга ульсь Варламов. Сай кизотнень сехтьсаськ люкшять, фкявок зерна аф виттяма. Мезенди сон тейнек? Эрь кизоня лядонды толкфтома.

Порговть тяцка токазе седиенц. Сон содазе, што районца люкшяда видеф лама, нинге апак урядакт суротневок, а государствати максома планць пцтай пяшкотьф. Кафцьке крупяной культуратне лядыхть эстейст колхосненди. А ков тнярть тиемс?

Поргов кяжияфоль. Сон изь тарксе, но тяни озась Бугровть и Белкинть ваксс, сявсь Леховть кядьста папироса и таргась. Апак каштортт, ащесь и таргась.

— Мярьктяда‚ тяни аш ни райкомса Варламовоньке? — колазе сетьмоть Бугров. — Круталь сон ломанць, круталь. Мархтонза весялаль работамась, — бта эстейнза корхтась сон, нльне саворне пеедсь.

Пеедезевсь Белкинцьке Леховть мархта.

— А мес, аф стане, што ли? — кизефтезень синь Бугров. — Мон эстейнза Варламовти тянь азса. Аф лац тиенькшнесь сон, лишнайксть сюцекшнесь ломаттнень лангс. А сюцемаса лама аф тият. Нльне алашаське ювадезь аф паневи, сяви да и кашанды. А вдь ломанць сяс и ломань. Тон азк ломанти тевть, няфтьк, кода тиемс, кадк ванцы сельмоса, щупасы кядьса, а меле ни кошардк тиема, вов тя тев. Няйсасть, кодама парста лиссь кукурузаньконь мархта? Састь, няфтезь ломаттне, кода тиемс. Тиеськ, и тяни вона кодама видефсь. А вдь тяфта можна эрь тевса тиемс. Тяни минь ломаненьконь лангс аш месть сюцемс.

Тусь Порговть мяльс атять корхтамац. Нльне прязонза озасть сонь валонза: «Няфтьк тевть, кадк ломанць ванцы сельмоса и щупасы кядьса». Парста азфт! Пяк парста!

— Да вага сон штукась, — Бугров няфтсь механизированнай токть лангс. — Сать, няфтить, минь тиеськ. И ванат, мезе лиссь? А кда салеть и пешкодолеть лангозонк, кошардолемасть тиема. А минь мезе тиелеме? Ашайка. Ашеськ сода, кода тиемс. Вов вдь кода ащи тевсь.

— Мярьгат, парста работай токсь? — кассь мялец Порговть.

Атясь кеподезень Порговть лангс сельмонзон:

— Пяк парста. Тя токть ваксса нинге сяда киза работалень заведующайкс и афолень сизе.

— Нинге и кармат работама. Мзяра тейть кизода? — кизефтезе Поргов тумстонза.

Бугров комафтозе прянц и арьсезевсь:

— Матри, сизьгемонь топоди. Тяфта, наверна, кафта недляда меле сизьгемонь ули. Шачень кемгафтувоце сентябрьста. Кизотне молихть, аф няевихть, кода ётайхть, — жалбась атясь. — Бта ёфси аф кунара секретареньке ульсь шаба, — няфтсь Белкинть лангс, сонць пеедсь, и туста усанзон пачк пиндолдсть акша пейнза. — А тяни сонга сиретькшни ни. Пингсь моли.

Кулемок Бугровть кизонзон, Поргов меразе атять пильгста пряс и нльне сельмс каясь сонь таза шинц лангс. Тумстонза тердезе шири Белкинть:

— Кемгафтувоце сентябрьста шачсть Бугров, тяфта азозе?

Ся аньцек шукадезе прянц, изь шарьхкоде, мезенди кизефнесы тянь Поргов.

— Давайте праздновасаськ сонь шачема шинц, а?

— Тя пара улель, — кенярдсь Белкин, — сон тянь стоит.

— Вов мезе тихть: корхтак тянь колга коммунисттнень мархта, и кда синь согласнайхть, то анокласаськ тя шить. Атять инкса тифтень рюмка вина сиптяма.

Белкин озафтозе сяда алу картузонц прястонза, бта аноклась стака тевонь тиема.

— А показательнай фермань колга лиси тев? — Поргов кизефтезе меколи Белкинть. — Инголе ашеме корхтав мархтот, тя тевть кеподезе партиянь обкомсь, аф минь.

— Мон содаса, — азозе Белкин,— тянь колга Кочурин корхтась, мзярда сашендсь колхозозонк. А лисемать лиси. Лехов туркс сязеви, а тисы. Тяни сон бта оду шачсь. Ёрасы сатомс «Возрождениять». Корхтай, кадк Чуйкин кармай сашендома минь пялонк экскурсияс.

Поргов тусь. Кумоста озасть прязонза Бугровть валонза: «Няфтьк ломанти, а сон тисы»... Да, опытнай и показательнай хозяйстватне! Синь вельдест няфтемс, кода касфтомс сёра, жуватат! Нльне кенярдсь Поргов, мусь ответ эсь кизефксонзонды. «Карматама тонафнема минць и тонафтсаськ колхозникнень!» — азозе эстейнза Поргов.

«Пиче кура» колхозть правлениянц пяшксель ломаньда, сембе таргасть и кати-мезень колга спорясть. Няемок Порговть, сетьмость, аердсть куд кучкаста, и моркшть ваксс лядсь ськамонза Офтин. Сон нинге мезе-бди кяжиста пшкядсь колхозникненди и шумбракстсь Порговть мархта.

Порговть тя колхозса ашезь сода, ванцть лангозонза и учсть, мезе кармай корхтама мархтонза Офтин.

— А мон кемоньшкаксть звонянь тейть, Борис Константинович, — кенярдсь Офтин, — тапарясь минь сембе тевоньке.

Ломаттне кармасть эсь ётковаст тошксема, а сяда смелхне шумбраксть Порговть мархта кядьта.

— Мзярда маштыхть минь колхозсонк безобразиятне, секретарь ялгась? — пшкядсь фкя сире ломань.

— А мезе тага?

Азондома кармась Офтин:

— Исяк правленияса Валдаевть валхтозь работаста, путомазь вастозонза монь. Но Валдаев путозень зепозонза печатть, шкапнень эзда панжематнень, и счетоводть мархта тусть вири. И вов эрявихть тиемс накладнойхть эмтеэсу горючайнькса, элеватору сёра мархта, а панжематне и печатсь ашет.

Порговти чуднойкс арасть тястонь тефне, а сембода пяк дивандась, кода валхтозь колхозникне Валдаевть. Сон ванць жалбайхнень лангс и шуткас азозе:

— Тяни тинь Валдаефтома кулотада вачеда!

— Куломать аф кулотама, а тевфтома кирдьсамазь, — нинге сембе жалбась Офтин. — Вов колмоце шись горючайфтома ащихть комбайнаньке.

— А мезенкса валхтость? — Поргов кизефтезень колхозникнень.

— Миндедонк кальдяв колхоз аш районца, — лама вайгяльхть пшкядсть. — Саты, шароме Валдаевть перьфке Варламовть пингста, а тяни аш ни тоса шкаец-тряец, и крафтоськ!

— Сон вдь колмонь ши ашезь лисенде работама, — сембе нинге азондсть колхозникне, — ломатть урядазь ни сёроснон, а минь спорсетяма...

Поргов мярьгсь, штоба тячикиге путольхть правленияв лия счетовод, а накладнойхть тяштельхть кядьса, эряви звонямс злеватору и эмтеэсонь директорти Бугровти, штоба верондальхть печатьфтема.

— Кодама Бугровонди? — дивандазевсь Офтин.

Поргов азозе, што Салмовть валхтозь, директоркс путозь Бугров Алексейть. Офтин кенярдсь, бта Салмовть валхтомац сембода пяк эрявсь тейнза, Офтинти.

— Тейнек эряволь ба фкя комбайна, — эняльгодсь Офтин.

Поргов эстокиге звонясь Леховти, и ся надияфтсь тячикиге максомс аф фкя, а кафта комбайнат.

Колхозникне кенярдсть: тяни синьге урядасазь сёроснон!

Лия колхозс тумстонза Поргов звонясь Степашкинти, штоба тяштель и сяволь мархтонза Саранскяи Бугров атять лангс характеристика, азондозе, мезе эряви тиемс Верховнай Советса.

Степашкин кенярдсь атять инкса.