46

Недяляньберьф Поргов изь няфне пря райкому. Тифтень-кафтонь ши эрясь сембода лафча артельхнень эса. Эрь вастса марса коммунисттнень мархта «люпштась» сёронь урядамать лангс. Аф весть сашендовсь эстейнза щакшнемс комбинезононц и лездсь механизаторхненди.

Сась куду аньцек ёткшиня, и то поздна илять. Варвара Степановна васьфтезе кяжияфста:

— Баняське кельмось ни... Тяни шинек-венек кармат эряма паксяса, што ли? Тячи юкстайть баняв самацень, а ванды, пади, моньге юкстасамак... А мяляфтсак, што ванды эряви молемс Асять пяли?

— Деряй, ванды надияфнеме молемс? — кеподезень лафтунзон Поргов.

— Кали юкстайть ни? Вдь исяк тонць корхтать Чуйкинть мархта, надияфтоть, мольхтяма недляшиста. Ломаттне кармайхть учема. Ватт, козонга тят ворьгоде!

Поргов кармась шутендама: арась рьванц инголи и, кода командиронди, макссь честь:

— Есть козонга аф ворьгодемс! — тоса кундазе Варвара Степановнань лафтуда, варжаксть сельмозонза: — Варюша, тят сюце‚ тонь ули ни секретарень работаса опытце, вов и лезтт тейне, штоба мои афолень тапаря...

Варвара Степановнать аф лямняда лямбоськодсь шамац.

— Кодама лезкс вешат монь эздон? Райкомса мондедон опытнай ялгат улихть... и то аф кизефнесайть...

Поргов шарьхкодсь, што ня валхне азфт аф стак, синь анокс арьсефт. И абондозь кизефтезе рьванц:

— Варюша, корхтак сяда видеста.

— Мон, конешна, эздот аф виздян, видеста азса. Озать секретарень машинати и сембонь юкстайть, бта аньцек тя машинась тейть и эрявсь. Варламов фкя пяли мяндезе дугать‚ а тон омбоце пяли кармать ни мяндемонза. Лиякс мярьгомс, юкстайть райкомть. Мяляфтк, Борис, што тон тяни аф эмстеэсса работат. Кочкадязь секретарькс, ётафтоть бюронь фкя заседания и кадыть райкомть: киньге мархтонга ашеть корхне. А вдь бюронь члеттне и райкомонь работникне ёрасазь кулхцондомс од секретарьснон, ёрасазь содамс од задачаснон.

Поргов кувакаста таргазе ваймонц:

— Задачатне, Варюша, аф панкт, пиземда меле аф шачихть. Коста мон сявсайне ся од задачатнень? Монць содаса, што тевсь районца эряви вятемс лиякс, эряви полафтомс минь сембе киньке-яноньке. А кода? Мезьста ушедомс? Няйса, што тейне тя тевсь стака...

Варвара Степановна няйсы, што кольсь-каладсь мирденц мялец, вадердазень фталу сонь шяярензон, озась ваксозонза:

— Борис, тон мяляфтсак, весть тейне мярьготь, што Варламов работай аф коллективнай ёньца, а ськамонза кулхцондсы аньцек Салмовть?.. Ся афкукс ульсь, и пяк кальдяволь. А тон? Мезе полафтсь пинкстот?

Поргов кулхцондсь и изь кашторда.

— А мес эстокиге ашить аза?

— Нинге ашить поздна. Тердить кабинетозт сембонь и азк, што ётай шитнень тонь ламоль тевдот.

— А мон видеста азса, што тейне нинге аф савтови.

— Ся тевсь тонь, — весялгодсь Шиндина, — азк, кода маштат.

* * *

Недляшиня Поргов тусь райкому и кода ведьс ваясь. Варвара Степановнати савсь звонямс, штоба эряскодоль Асять пяли. Поргов кадозень тевонзон.

Колхозонь зоотехникть Волкова Асять квартирац ащи аф ичкозе правлениять эзда. Сяс и васенда синь сувасть Чуйкинти. Ся азозе, што Волковась тусь ветфельдшерть мархта паксяв, тоса мезе-бди лиссь фкя траксснон мархта, и сонць эстокиге сявозень Волковать квартиразонза.

Асять вейхкса кизоса цёранять — Борькась содазе Порговть, кундазе сонь кядьта и азондозе бабанцты, што тя самай сонь ся знакомаец, кона максозе тейнза пеельнять.

— Тинь содатада ни фкя-фкянь? — дивандазевсь Варвара Степановна.

Борькась няфтезе Варвара Степановнати сиянь калнякс ащи пеельнянц.

— А вов, няйсак! Тянь тейне тёска-щенязе максозе! Киньге тяфтама пеельняц аш!

Асять тядяц, кодгемоньшка кизоса бабась, сараскакс тапордсь мргаса, мезе-бди аноклась, и апак лотксек азондсь стиренц колга. А стирец ашель и ашель.

Порговть и Чуйкинть мольсть ни мяльсна учендомс и срхкасть пруду эшеляма. Срхкась мархтост Борькаське. Но вов ульцяса кулевсь машинань сигнал.

— Сай‚ — пшкядсь Чуйкин, — сигналсь монь машиназень.

Бабась лиссь стиренц васьфтема и, маряк, азозе, што пялост конакт.

А сяс Ася эрязста сувась куду, нюрьхкяняста шумбракстсь и кяшсь кроватенц ваксста ширмать фталу, штоба полафтомс щамонзон.

А мзярда Ася щась-карясь, Варвара Степановна няфтсь Порговть лангс:

— Знакомондак, Ася, тя самай монь мирдезе.

Ася васенда ёрась венептемс кяденц, тоса лофташкодсь крфазь-крфай шамац и ёрдазь-ёрдавсь Поргов кргазонза.

— Боря! Борис! — эводиень вайгяльса пшкядсь сон, новольсть кяденза и маштсть ёженза, прась.

— Анфиса! Анфиса! — трнаты вайгяльса пшкядсь Поргов и Анфисань, кода шабанянь, кандозе кроватенц лангс.

Аф Анфисань тядяц, аф цёраняц, аф Чуйкин — кивок Шиндинада башка эстокиге ашезе шарьхкоде, мезе тиендеви Порговть и Анфисань ёткса. Аньцек сонь, Шиндинать, седиенц люпштазь, кода шямонияф клещаса, пркштадсть сельмоведенза и валонь апак аст ласькозь лиссь кудста. Мельганза эрязста лиссь Чуйкинцьке.

Мзярда Анфиса панжезень сельмонзон, авардембачк мзолгодсь:

— Боря, тон живоят?! — и меки конезень сельмонзон, летнязевсь.

Поргов сюдердазень Анфисань парьхцикс ляпе шяярензон, нюрьхкяняста пшкядсь:

— Да, Анфиса, живоян... Панжить сельмотнень.

Кроватть песа ащесь бабась и авардсь. Вакссонза тихольдсь ёмла Борискясь.

Аф лама пингта меле Анфисась тага варжактсь Порговть шамас. Снавкс кеворсть шаманц келес сельмоведенза. Кундазе Порговть кяденц и пштедезе эсь щеказонза. Кивок мезевок изь корхта.

— А мон вдь, Боря, калмайхтень тонь, — бта куфкстсь Анфисась и вадердазе Порговть шамаста рубецть. — А сон, ванат, кода лиссь.

Шабац кенярдсь, што тядяц вельмось, эрязста нежедсь тейнза, путозе прянц тядянц мяштьс и ванць Порговть лангс, бта сон ульсь муворсь тядянц инкса. Анфиса палазе сонь.

— Боря, содасак тя кие? — Анфисась няфтсь Порговть лангс. — Тя тонь аляце. Муськ аляцень. Вага сон.

Шабась ванць Порговть лангст и пеедезевсь:

— Тя монь знакомаезе, Боря щенязе. Сон макссь тейне пеельня.

— Тя аляце, гуляняй, аляце.

— А мярьготь, монь алязе танкист, герой? Мярьготь, кулось сон войнаса?

— Мон чаянь, кулось, а сон шиса и ёфси вакссот эряй, — сельмоведьбачк азондсь Анфисась.

Уназевсь вальмяти ала машина.

— Боря, коса Варвара Степановна? Мес кадыть?

Аньцек кенерсь Поргов лисемс ширмать фталда, кудти сувась Чуйкин; Порговть пилес азозе, што Варвара Степановнась тусь куду. Кучсесь мельганза машина, но изь оза, стаки тусь ялга, апак лотксек аварди.

Кати кулезе Анфисась, мезе корхтась Чуйкин, кати стак, но аварьгодсь кайги вайгяльса.

— Степан Степанович, азк, деряй, мон виноватан, што тяфта лиссь?

Чуйкин ащесь кияксть кучкаса и ашезе сода, мезе отвечамс, саворне мярьгсь:

— Да, тя ва штука!

Нежедсь Порговти Борьканясь и пштедсь алянц ваксс, ёрась няфтемс, што мувсь аляц. Поргов фатязе шабать кядезонза, кеподезе вяри, и кодак васедсть шамасна, кармась палсемонза. Палсезе шаманц, пилензон, сялдасканц, сонцень шудесть сельмоведенза.

Шабась нинге сяда смелкстомсь, кафта кядьса кундазе алянц щекада.

— А мес, аляй, тон авардят? Тяни мархтонк кармат эряма, да?

Поргов мезевок изь отвеча. Борискясь ашкодозе сонь кргада и тага кизефнесь:

— Тяни, аляй, аф туят? И машинацевок ляды‚ да?

Сембе ванцть шабать лангс и нинге сяда пяк авардсть. Борискясь тяни шарфтсь тейст:

— А мон аф карман авардема! — ськамонза весялаль сон, — аляй, тонга аф кармат авардема, да?

— Монга аф карман‚ — саворне азозе Поргов и тага палсезе цёранц.

Чуйкин ащесь шуфтомфста, ашезе сода, кодама валхт тяни ладяйхть ня ломаттнень горяснонды.

Поргов нардазень сельмоведензон, нинге весть палазе цёранц. Анфисась стясь и лиссь ширмать фталда.

— Тяни мезе кармайхть корхтама ломаттне? — сельмоведьбачк кизефнесь Анфисась. — Ванк, мезе лиссь.

— Мезе кельгост, корхтаст, мон аф пелян, — кеме вайгяльса азозе Поргов и палазе Анфисать.

— А коса Варвара Степановна? Мес нолдасть? — кизефтезе Чуйкинонь. — Боря, — шарфтсь Порговти, — архт куду. Мес нолдасть Варать?

Машинась аердсь. Анфисась марязе прянц стане жа, кода и фронца, мзярда явсь кельгома Борисонц мархта, но эста прважазе, кода мирденц, надиясь: курок васедихть и кармайхть эряма марса. Тяни жа прважазе сонь Шиндинати, эсь ялганцты. Сон ламос ванць машинать мельге паксяти, но няйсь аньцек пуль мар. Меки шоподсь тейнза шись, маштсть ёженза. Чуйкин кандозе куду.