44

Кафта шит Поргов примась райкомонь тефнень эса. Варламов корхтась мархтонза кржа, аньцек пееньбачк отвечакшнесь, мзярда кизефнезе Поргов. Тефнень максомста Варламовти савсть няфтемс обкомста кучф райкомонь бюроти ваномс Порговть эсь материалонзон, конатнень сон кучсезень Москуву и обкому эмтеэсса машинатнень кальдяв производительностьснон колга. Сейфса кирнеф материалхнень Варламовда башка кивок ашезе няенде. Кодак аделавсть тефнень примамасна, Поргов няфтезень синь Степашкинти и Зобовти, и арьсефоль тянь колга пуроптомс бюронь заседания. Тяка жа заседанияти тертьфтольхть «Якстерь тяште» колхозонь руководительхне, сяс мес обкомста звонясь, што ся колхозса тиеви опорно-показательнай животноводческяй хозяйства.

Сяда стакаль анокламс эмтеэсть колга кизефкссь. Поргов мярьгондсь Степашкинти тердемс тракторнай бригадань бригадирхнень и участковай механикнень.

— Тя кармай улема митинг, — азозе эсь мяленц Степашкин. — Кадк Салмов тии отчет бюронь члеттненди, а меле решениять пачфтьсаськ механизаторхненди. Ванцаськ, кода Салмов кармай прянц вятема.

Степашкинть арьсемац васенда изь ту Порговть мяльс.

— Аф кяжень пандома ли срхкать? — кизефтезе сонь.

— Кда корхтамс кяжень пандомать колга, то тя тейть ладяй, монь лямозон сон салхт из кайсе. А тейть сатсь эздонза.

— Но мон аф кяжиян лангозонза.

— Тейньге аш месть кяжиякшнемс.

Поргов согласиндась, но азозе, штоба аф лятьфнемс Салмовти ингольдень тевонза.

Бюроса Салмов кодамовок доклад ашезь тий. Сон кармась пеняцяма:

— Минь эмтеэсоньке работай аф сяда кальдявста лиятнень коряс. А тинь ёрасамасть сивомс, кода и сивость Варламовть, — и кармась гразяма.

Степашкин хоть и надияфтсь Порговти аф кяжиямс, но тяни макссь предложения: валхтомс Салмовть работаста.

Савсь тиемс перерыв, башка корхтамс бюронь члеттнень мархта. Поргов сонць ашезь ёра согласиндамс Степашкинть предложениянц мархта. Но Зобов мярьгсь:

— Зря аш месть пингсь ётафнемс, голосованиясь няфтьсы...

Салмовть валхтозь работаста и эмтеэсонь директоркс путозь Бугров Алексейть.

Бюрода меле Поргов лядсь ськамонза, ламоль апак тик тевда. Колмоце шись ни апак ваттольхть сёрматне и материалхне. Секретарть помощникоц кандсь сёрма мархта папка, лангу таргась фкя сёрма и телеграмма. Сёрмась тяштьфоль Порговть кудозонза, но почтаса содазь ни, коса тяни сон работай, кандозь райкому.

Поргов ванозе обкомста кучф телеграммать. Тоса азфоль: «Варламовти максови путевка курорту. Эряви срочна тумс Москуть ланга, сявома тоста путевкать».

Поргов эстокиге звонясь Варламовть квартиразонза. Телефонти ламос кивок изь нежетькшне. Меле сявозе трубкать Василиса Михайловнась и кенярдсь, кодак кулезе Порговть вайгяленц. Сон азозе саворне трубкати, што Варламов изь мярьге тернемда сонь телефонти.

— Кода кундаф офта ащи, — жалбась Василиса Михайловнась‚ — аф содасы, ков тиемс прянц. А мон кенярдень, кадк ваймяй малость. Тинь звонцеда, Борис Константинович, тясть кадонда сонь.

Меколи нежедсь сонць Варламов. Поргов азозе, мес поздна звоняй, и кизефтезе, кона порада шобдава кучемс станцияв молемс машина. Варламов мторгодсь каршезонза и путозе телефоннай трубкать.

Бта начка пракста лаподевсь Порговть копорезонза. И тя аф сяс, мес обжавсь, а кода-бди аф пара ульсь Варламовть инкса. Партиянь обкомса ашезь юкста сонь, заботендасть колганза, сатсть путевка, а сон кона кода тийсь, няфтезе кяженц.

Аф лама пингта меле звонясь сонць Варламов.

— Спасиба. А машинать, кда можна, кучк сисем частса шобдава. Спасиба тейть, — тага пшкядсь кодама-бди синтьф вайгяльса.

— Тянь аф мон тиине: Кочурин ашензе юкста.

— Кулине, Салмовть валхтость? — меле кизефтезе Варламов. — Пади, рана кяж панттада аляти? Партийнай оргаттнень эса тяфта аф тиендихть! — И путозе трубкать.

Мезе-бди сусксь Порговть седикуцюнязонза. Мезьда пельсь сон, ся и лиссь. Изь са мялец сяда тов работама. Путозе зепозонза эсь лемозонза кучф сёрмать и тусь куду. Мольсь шобда ульцятнень эзга, и прястонза исть тушенда Варламовть валонза: «Партийнай оргаттнень эса тяфта аф тиендихть!»

Пингсь ульсь пяле веда меле ни, но Варвара Степановнась изь уда: учендсь мирденц эса. Ужинонь срхкафтомста азондозе, што Ася ялгац кучсь сёрма: ня шитнень сай куду.

— Сон содасы минь рьвяяманьконь?

— Аф. Васьфтьсаськ, и кадк няйсы. Тердьсаськ пялонк. Обязательна сон туй мялезт, пара авась, ёню.

Ужнамда меле Поргов таргазе зепстонза сёрмать и максозе рьванцты лувомс. Сёрмать кучезе Зина. Варвара Степановна пеедезевсь. Сонь лядьсь мялезонза, што тя стирнясь ёразе тонафтомс Порговть авань эзда аф пелемати.

Зина сёрмадсь: «Работан Саранскяйса, од заводса, но срхксян тонафнема, пчеловодческяй школав. Тоса тонафнихть минь ширень ломатть, синь и тердихть эсон тоза. Аст ётть, Борис Константинович, кода тиемс? А лангозон кивок тяда кяжия. Поклон Варвара Степановнати. Эряда павазуста».

— Нинге Галя тяни сай тейть, — сёрмать путомста пшкядсь Варвара Степановна. — Бугровть мархта синь тевсна нинге изь ладяв. Тяни Галя сонць панци ни мельганза, а ся, бта кяжи бука, нежедезень сюронзон и афи шарфни Галять лангс мяльге.

— Тяфта и эряви! — кода-бди кяжедезь пшкядсь Поргов. — А то Галя цёрать эзда ленгат ватксесь.

— Аньцек самдот инголе звонясь тейне. Азыне, што Алексейнь путозь эмтеэсонь директоркс. Галя аф азомшка кенярдсь... — Варвара Степановна аф ламос арьсесь и поладозе: — Борис, пади, корхтат Бугровть мархта? Галя тяни аф ся чивож стирсь... Корхтат, Борис?

— Тонь койсот, ванды тердемс райкому Бугровть и корхтамс мархтонза аф тевонь колга, а тонафтомс, кода рьвяямс, тяфта, што ли?

— А мес тяшкава кяжиста ванат лангозон? — обжавсь Варвара Степановна. — Мон вдь аф мярьгондян ванды тердемс сонь: мук лия ётка. Тон вдь тонць кардайть Бугровть Галять мельге панцемда. Ужяль тейне Галя...

Поргов надияфтсь корхтамс. Меле кафцьке весялгодсть, Варвара Степановна нльне палазе; Поргов сявсь кядезонза газета, но лувомс рьвац ашезе када.

— Боря, тейне сави тумс работаста, мярьгихть, миртть-рьват азорондайхть райкомса.

Поргов аньцек тяни шарьхкодсь тянь колга и арьсезевсь.

— Кда тячи аф тон улелеть секретарень шрать ваксса, бюроса монга корхталень Салмовть колга. А тон зря сонь аралайть, — саворне пшкядсь Варвара Степановна.

— Тонга кяж пандат? Аф пара тяфта, — и Поргов азондозе рьванцты, кода корхтась телефонца мархтонза Варламов, кодамоль сонь вайгялец.

— А тон чаят, Варламов аф кармай пейнь порема? Сон вдь шкайкс лувондозе эсь прянц. Заявлениявок пленумса макссь сянкса, штоба минь сембонь эвфтемс, учсь, сюконятама пильгозонза. Ашеть шарьхкоде, што ли? Тяни кармай учема, мзярда районць юмай-арай синьфтемост.

Варвара Степановна корхтамста рахась, но Порговть бта эрьхтезь ня валхне.

— Может, афкукс, Варюша, тейне аф сафтови тя тевса? Мон работань ошень райкомса, а тяса тевсь ёфси лия.

— Э-э, тят шарфне ломаттнень эзда, тят ара Варламовть лаца шкайкс — и туй тевце.

Поргов кулхцондсь рьванц эса и сяда пяк арьсезевсь партийнай работать колга.

«Тят ара Варламовть лаца, — повсть прязонза ня валхне, — а кодамкс эряви улемс? Ну, мярьктама, аф карман корхтама, што мон отвечан районть инкса, аф карман юватькшнема ломаттнень лангс колхозса. А полафты ли тянь эзда тевсь районца? Тёждялгоды ли ломаттнень эряфсна? Чуйкин станяк жа кармай саворне касфнема хозяйстваснон, Лехов кармай сяда лама строяма, срхкай пангонь салыяфтома, а Валдаев сяда сидеста кармай сувсема райкому лезксонь анама. Вов кода полафты тевсь колхоснень эса. А лядыкссь кармай улема станяк жа, кода и Варламовть пингста».

Порговть мяльс тяни лядьсть Белкинть валонза: «Кудбряньконь вельхтямс аф сатнихть шужяреньке. Сембе ломаттнень фкя пизем начфнесыне, фкя мани косьфнесыне».

«Мезенди монь кочкамазь васенце секретарькс? Мезе учихть ширден райононь коммунисттне? — нинге сембе исть кадов прястонза арьсематне. — Мянь тнярс мон парста кирдине кядьсон гайкань ключнень, содайне, мезе тиеви эрь машинать мархта. Но тяни, маряк, аф тянь учихть ширден? Да, аф тянь! — отвечась эсь потмостонза тревожнай вайгял. — А мезе?»

Тя «мезть» каршес Поргов ответ изь мушенда. Веньберьф и омбоце шиня ашезе кадонда покойс тя кизефксь. Бта урма прась сонь потмозонза. Шобдава кодак сувась работама вастозонза, тердезе Степашкнинть, ёрась панжемс потмонц сянди тя «мезть» колга. Но Степашкин сонць эряскодсь жалбамс Порговти.

— Мзярда лоткай Варламов азорондамда райкомса? — эстокиге лофташкотф шамат кизефтезе сон.

Поргов изь уча тяфтама кизефкс, отвечась аф сразу.

— Минь аньцек колмочесь корхтаме мархтот, Роман Романович, — тянь колга саворне отвечась сон. — А тон тячи оду няфнесак Варламовть лангса эсь властцень.

— Райкомста эряви юрнек машфтомс варламовщинась, — нинге сембе изь сютямкшне Степашкин.

— Кодама варламовщина муть? Мезьса обжанзе Варламов?

— Мес апак кизефтть сон сявозе райкомонь машинать?

Поргов пеедезевсь, нинге весть няезе Степашкинть лофтана шаманц и тяни озафтозе каршезонза:

— Машинать максыне мон, — и азозе, мезенди эрявсь Варламовти машинась.

Степашкин бта салфтома сусксь: ашезе сода, мезе азомс, визделгодсь эсь валонзон эзда. Няемс, сонць шарьхкодезе, што Порговть видец, сон, афкукс, кяж панды Варламовти сянь ингольдень пря вятеманц инкса.

— Тейть машина эряви? — кизефтезе Поргов.

Кумацекс арась Степашкинть шамац, шабакс пиндолдсть сельмонза, ашезе сода, мезьста ушедомс азондоманц.

— Саранскяи эряволь молемс. Ванды шобдавакиге меки саян...

— Мезе тоса тиевсь?

— Ломань эряви прважамс, пединституту тонафнема.

— Синь Верасна туй? — пеедезевсь Поргов. — Прважак, прважак.

Степашкин визделгодсь, кеподезень Порговть лангс сельмонзон.

— Тят пель, тят. Кизефнемот аф карман, — стаки пеедсь сон. — Архт, прважак, анасаськ од директорть машинанц.

— Тонга содасак, што ли? — меколи кизефтезе Степашкин.

— Ёрат кирдемс ведть сифтемса, а Зобов свадьбас аноклай ни. Архт, архт, уск машинаса.

— Сярятькстсь атясь, — азозе Степашкин, кодак кулезе Зобовть лемонц. — Тяза самста васьфтине рьванц, сай аптекаста, врач тернесть веть. Пупайхть мяштезонза арасть, ваймоц аф тарксеви.

— Сярятьксть? — нльне эводсь Поргов. Сон ёрась тячи мархтонза молемс колхоснень ланга, эрявсь кой-мезе корхтамс мархтонза ся кизефкснень колга, конат исяк и тячи ашезь кадонда покойс.