43

Омбоце шиня Кочурин стясь рана. Николинть кучезе эмтеэсу, Порговти, а сонць марса Варламовть мархта срхкась тона эмтеэсонь зонаста колхоснень ванома. Но тумдост инголе сон ёрась ваномс кой-кодама тефт райкомса. Васендакиге аназе райкомть работань планонц, мезе арьсеф тиемс райононь колхоснень эзга ЦК-ть Пленумонц решениянзон пяшкодемаснон инкса.

Варламов васенда аф ламос арьсезевсь, бта сразу ашезе сода, мезе кизефнесь обкомонь секретарсь. Меколи тердезе помощниконц и мярьгсь вешемдонза планть.

Помощникоц пяле частшкда меле мярьгсь:

— Коданга аф муса. Улема, планць пропагандань отделса, а сят сембе колхозсот.

— А мон арьсень, кядялот кирдьсак ся документть, — мярьгсь Кочурин. — Азость, мзяра семинар ётафтоде тядде парторганизациянь секретарьхнень мархта? — Кочуринонь полафтсь шамац.

Варламов тянь прьметазе и абондозь кармась суронзон мянцема:

— Весть тернеськ ЦК-ть решениянзон ванома, — мяндезе пря суронц, — омбоцеда пуропнеськ тундань видемань карша, азонтфтольхть тейст задачатне, — мяндезе кучкань суронц. — Колмоцеда тяса ульсть сёронь урядамда инголе, мзярда кочксеськ колхозонь председательхнень, — мяндезе лемфтома суронц.

Кочурин мезе-бди сёрмадсь записной книжказонза.

— Ульсь обкомть тяфтама решенияц, — пшкядсь сон, — штоба тинь молеледе Зубавинскяй району экскурсияс.

— Якаме, — эрязста фатязе Варламов. — Пцтай ведьгемонь ломань ульсь тоса.

— Тонць якать?

— Монць аш. Тевда районца лама. Ломаттнень мархта якась Степашкин.

— Кодама практическяй план тиеде экскурсияда меле?

Варламов якстерьгодсь. Кочурин поладозе:

— Мезе тоста цебярь сяводе эсь районозонт?

— Тяфтама план ашеме тие, — виденцясь Варламов. — Но минь...

Кочурин путозе зепозонза записной книжканц.

Илять, мзярда Кочурин сась тона эмтеэсста, сембе райкомонь секретарьхне и Зобов тертьфтельхть райкому. Кочурин тифтень-тифтень корхнесь мархтост. Тяда меле меки ламос ульсть Варламовть мархта кафонест.

Тяни Кочуринти лац няевсть районцтонь тефне, а синь пачкаст, кода ваномаса, няевсь и районнай эрь работникське.

Мекольдень кафта ветнень, кода сась тяза Кочурин, райкомса толсь ашезь мадонда. Палсть толхт райцентрань лия учреждениятнень эзганга: сембе руководительхне ащесть эсь вастоваст. Тошксесть эсь ётковаст Кочуринть саманц колга синь рьвасновок.

Райкомонь эрь кабинетса работасть: фкяти эрявсь тяштемс справка, омбоцети объяснения, колмоцеть Варламов кошардозе колхоснень эзда сводкат.

Кочурин срочна звонясь Саранскяи: корхнесь обкомонь ляды секретарьхнень мархта. Азондозе тейст сембонь, мезе няйсь и кульсь районца коммунисттнень и колхозникнень эзда, корхтась сянь колганга, кода Варламов ськамонза сявсь районть лангс социалистическяй обязательстват, и мезе тянь эзда лиссь. Ламос корхнемда меле сембе марса арьсезь: ванды ётафтомс райкомонь пленум и ваномс эсонза сембе кизефкснень.

Тяфта и ульсь тиф.

— Фёдор Михайлович, кодама повесткась кармай улема ванды? — кизефтезе Варламов.

— Тинь коласть социалистическяй соревнованиянь тевса партийнай принципть. Кадк пленумсь азсы тянь колга эсь валонц.

Варламовть бта крьвястезь.

— Пади, сяда видеста азсаськ: сурста потяф обязательстватнень колга?

Кочурин пеедезевсь и ётафтозе секретарьхнень ланга ванфонц:

— Ванода тинць. Кода сяда пара, стане и тяштесть. — Но эстокиге лоткась пеедемда и азозе, што аш месть, мезе аф эряви, арьсекшнемс. Сонь койсонза, сяда виде ули тяштемс, кода азозе сон.

Сембе согласиндасть.

Ся шинь шобдавась райкомса ушедсь рана. Кочуринть самс пуромфтольхть ни райкомонь сембе секретарьхне и отделонь заведующайхне. Работасть сембе кабинетова телефоттне: пачфнесть куля райкомонь члеттненди пленумть колга, кажнайти мярькфоль аф поздамс.

Кочуринти апак учентт сувась Митричсь. Шумбракстсь и кармась азондома, кода сон тушендсь мастерскойста и кодама ложнай каготт сон сёрмадсь Порговть лангс, мзярда «Мазы пакся» колхозса синневсь тракторсь.

— Мянь тнярс виздян Порговть шамас варжакстомазень, — сельмоведеньбачк азозе Митричсь.

— Мезе ёрат монь ширден?

— Эняльдян тейнть, анайнть Варламовть кядьста ся каготтнень, конатнень мон эста дурак прясон тиине инженерть лангс, валхтость шамастон кернять, озафтость седиезень.

— Анайть тонць‚ — мярьгсь Кочурин, — тяфта жа виде ваймоса азк тейнза, и макссыне.

— Кизефнине‚ а сон корхтай: тейнза эрявихть. А тейне прязе юмафтомс, што ли?

Кочурин няезе, конашкава седи ваксста Митричсь азондозе эсь эльбятьксонц, кода эняльдсь сон. Тердезе Варламовть.

— Тон содасак, кодама документт анай райкомста тя ломанць? — няфтсь Митричть лангс.

— Тя ломанть сисем вармат прясонза! — кяжда мярьгсь Варламов, панжезе сейфть, лихтезень Порговть лангс сёрматкшнеф документтнень и путозень Кочуринть инголи:

— Нада, кода кельгода, стане и проверясть ня факттнень.

Митричсь няезень эсь кядьсонза саразкс почеряф тяшнефнень, кенярдсь, бта шабань трнатозевсть кяденза.

— Вов нят документтне, — мярьгсь сон Кочуринти.

Кочурин лувозень синь. А Митричсь ся пингть тага весть азозе, што тракторть синнезе Каргин, да и сявок аф шуму.

Кочурин кизефтезе Варламовть:

— Мезенди нятнень кирнесайть сейфса?

Варламов тись пеедикс:

— Кандозень синь Салмов, стак ащемда путыне тоза, — и венептезень Митричти. Ся весялгодсь, цють аф пильгозонза сюконясь, азсь спасиба Кочуринти и лиссь.

Кочурин мярьгсь тердемдонза Порговть, конань мархта нинге изь васьфне, и аназень Варламовть кядьста Степашкинть, Леховть, Порговть и Шиндинать партийнай учетнай карточкаснон...

* * *

Пленумса Варламов докладсонза критиковандазень и райкомонь работникнень, мес синь тисть оцю эльбятькс социалистическяй соревнованиять организовандамста. Пефтомксть лятьфнезе эсь прянц.

Кочурин приметазе, што пленумса аш Поргов, и тяштсь сёрманя Степашкинти, эняльдсь, штоба сонь терделезь.

Поргов сась пленуму, мзярда Варламов аделазе ни докладонц. Трибунаса ульсь васенце ораторсь — Валдаев. Сон кармась шнамонза райкомть и васендакиге Варламовть руководстванц, што Варламов ялгась, кле, пяк чуткай колхозонь председательхненди.

— Всякай эрси‚ — мярьгсь сон и варжакстсь моркшть шири, коса ащи Кочурин‚ — лияста нльне моньге, кода сире председателень, уркснесамань, но Варламовть уркстомацка максси тейнек польза.

Валдаевть ашезе када сяда тов корхтама Варламов, мярьгсь, што тячи аф тянь колга эряви корхтамс.

— Мон эста аф содаса, мезень колга эряви корхтамс, — мярьгсь Валдаев‚ — но азса, што кда аф тонь руководстваце, Степан Иванович, минь афолинек сата ня сатфкснень.

— Конатнень? — кизефтезе Кочурин.

— Минь райононьке республикаса содаф.

Залса рахазевсть. Тя сядонга пяк кяжияфтозе Варламовть, сон уркстозе Валдаевть:

— Лоткак болтандамда!

Пленумонь члеттненди из шарьхкодев, мезе лиссь синь секретарьснон мархта? Мес сон карай эсь сельмонзон эса?

Сявсь вал Салмов. Сон азондозе, мезе тись синь эмтеэссна партиянь райкомть руководстванц вельде, кода эрь шиня заботендай эмтеэсть работанц колга сонць Варламов. Лятьфтазе сяньге, што Поргов ёфси сёронь урядамань карша кармась тиема тракторхненди профилактическяй ремонт, и кда аф Варламов и обкомонь представительсь, то колхосне тянемс афольхть ушеда сёроть урядамонза.

Кочурин пшкядсь:

— Но вдь машинатне сякокс савсть петемс? Мзяра пинге стак кирневсть комбайнатне тракторхнень сюнеда?

Салмов, кода корож, кафта шири варжакстсь и пееньбачк азозе:

— Тяфтама случай ульсь, но минь эстокиге примаме мерат.

— А кда кулхцондолесть Порговть, тиеледе ремонт сонь планонц коряс, тя афоль лисе, — тага пшкядсь Кочурин.

Салмов нинге мезе-бди ёрась азомда, но ювадсь лангозонза Варламов, и сон валгсь трубинаста.

Райкомонь секретарсь Степашкин азондозе, кода эвондась республиканскяй газетаса статьясь синь районцнон колга, сюцесь марнек бюроть эса, мес социалистическяй соревнованиять синь ушедозь аф народть инициативанц коряс, а райкомть кабинетстонза. Зобов изь кирде и пшкядсь залть келес:

— Мес корхтат сембе бюроть колга? Бюронь члеттне вдь статья ашесть тяшне?!

Кармась корхтама Сараевась:

— Мес тяфтапт райкомсонк порядкатне? Минь, колхозонь руководительхне, нльне пельхтяма тяза саманьконь...

— Корхтак сяда видеста, — кие-бди пшкядсь залста. — Узерть ули лемоц!

— Тянь сембе содасасть‚ — поладозе Сараевась, — мон корхтан Степан Ивановичень колга. — И кармась азондома, кода Варламов аш мезенксонга сонь, Сараевать, сюцезе тозеронь видемать инкса, аф весть тейнза сатсь электростанцияснон и артезианскяй эшить инкса.

Варламов ливоськодсь, якстерьгодсь, апак лотксек шарфнезе суронзон ёткова якстерь карандашенц. «Сембе няфтезь пряснон! — арьсесь сон. — Ванцаськ, кода кармайхть моньфтемон работама!» — мезе-бди тяштсь инголенза ащи кагод листс и анась вал. Сембе ванцть лангозонза и учсть, мезе кармай корхтама. Но сон корхтама изь карма, а лувсь эсь эздонза заявления, коса тяштсь, што сон пяк сяряди, козонга аф пчкяй седиец; эняльди, штоба нолдалезь работаста.

Мзярда аделазе заявлениянц и озась вастозонза, сембе варжакснесть то Варламовть, то Кочуринть лангс, ёразь шарьхкодемс, кода тянь лангс ваны обкомонь секретарсь. А сон стясь, ётафтозе ванфонц ломаттнень ланга и спокойнайста мярьгсь.

— Сембе кулесть секретарентень заявлениянц?

Кивок ашезь отвеча: фкясь комафтозе прянц, омбоцесь козкстась, колмоцесь мезе-бди тошкась ялганцты.

Кочурин кизефтезень бюронь члеттнень, мезе арьсихть синь.

Тага кивок изь отвеча.

— Мон кизефнеса сембе пленумть: кулесть ялгать заявлениянц?

Вастстонза стясь Валдаев:

— Давайте нолдасаськ, — мярьгсь кайгиста сон, — но мезе карматама соньфтемонза тиема? Кие вятьсы районть?

Кочурин путозе Варламовть эняльдеманц голосованияс. Салмовда башка сонь нолдаманц инкса голосовандасть сембе.

Пленумть вятемонза кармась Кочурин. Сон ашезь карма ламос корхнема, а нюрьхкяняста мярьгсь:

— Эряви кочкамс од секретарь.

Варламов ащесь кельме ведьса валфокс. Сельмованфсонза няевсь: «Нинге стряндатада и аф весть сюконятада инголен!»

Сявсь вал Чуйкин:

— Мон аф содаса, можна ли кочкамс секретарькс ломань, кона аф райкомонь член?

Кочурин отвечась:

— Тя тевсь райкомонь члеттнень. Кда синь мяльсна, то могут кочкамс и аф райкомонь членга.

Чуйкин поладозе:

— Ялгат, надиян, тинь сембе содасасть минь эмтеэсстонк главнай инженерть, Поргов ялгать?

Залса кеподсть аплодисментт.

— А тинь содасасть сонь? — кизефтезень Кочурин райкомонь члеттнень.

— Содасаськ! — сембода инголи ювадсь Валдаев. — Цебярь ули секретарсь!

Кочурин тага пшкядсь сембонди:

— Тинь тяда эряскода. Тона эмтеэсть зонаста райкомонь члеттне содасазь сонь?

Фталда стясь кодама-бди сире ломань и азозе:

— Цебярь пайгть вайгялец ичкози кулеви. Минь содасаськ Поргов ялгать.

Голосованияда инголе стясь вастстонза Салмов:

— А содасы ли Поргов партийнай работать? — кизефтсь сон.

— Поргов работась фкя пингоня райкомса отделонь заведующайкс‚ — отвечась Кочурин. — Нинге кодама предложеният улихть?

Сембе залсь ювадсь:

— Порговть! Порговть!

Поргов ащесь ёфси кенкшть маласа и толкс палсь шамац.

Кочурин предложениять путозе голосованияс. Фкяньбес кеподезь кядьснон Порговть инкса. Голосовандась Варламовське. Тяда меле Порговть сувафтозь райкомонь составти и кочказь бюронь членкс.

Кочурин тердезе Порговть президиуму.