42

Аньцек срадсть райкомста колхозонь председательхне, эстокиге срхкась пиземня. Васенда сон мольсь сёксень пиземкс, бта сифтембачк, а пяле веда меле валсь кода эряви. И пцтай изь лотксе шиньберьф. Варламов ащесь райкомса, звонясь райононь то фкя учрежденияти, то омбоцети, сюцезень ся руководительхнень, конат исть ту колхозу веть председательхнень мархта. Сон эсь прянц марязе пяк кальдявста: колмоцеда ни озафтозь пси пачкалга лангс. Васенда оцю эльбятькс тись тишеть урядамста кемонь проценттнень мархта, сяда оцю эльбятькс нолдась тракторхнень петемаса, мзярда сялдозе Порговть планонц, и нинге сяда шонгаргодсь пильгалонза модась газетав статьять сёрмадома меле. Сон бта ськамонза лядсь райкомса. Тяни надиясь аньцек Салмовть лангс, ся шарьхкодьсы и верондай сонь, эрь валонцты.

«Ну и ну! — арьсесь сон, — васенда няфнезь пряснон сятяв сараскакс, и мон, дураконясь, кода нарвай, касфтонь эсост, тонафтыне работама. А синь, ня лефкскятне, кармасть нарвайть сельмонзон пупстыема. Ну и ну!.. Тонць виноватат‚ Степан Иванович, тонць! Лама максоть тейст воляда!»

Мекольдень пингть Варламов кяжиель, но сонцьке ашезе сода, кинь лангс: кати эсь лангозонза, кати од секретарьхнень — Степашкинть, Алексеевть и Шиндинать лангс, конат молихть каршезонза. Сембода оцю кяжть сявозе эсь лангозонза, мес эсь пингстонза ашезень кер пацяснон од кадратнень. «Но ожуда, тинь нинге карматада содамонза, кие Варламовсь! Мон нинге аф весть няфтьса тянь тейнть!»

Сон эрь шиня ётнесь вете-кота колхозга, кафксть-колмоксть звонцесь эмтеэсненди: кизефнезень зональнай секретарьхнень, кода молихть тефне мельгаст кемокстаф колхоснень эса и мастерскойса. Варламов фалу анцесь синь кядьстост кодама-повсь «даннайхть». Сембода пяк ванць райцентрань эмтеэсса тракторхнень нолдамаснон мельге, пчкясь, шинек-венек работафтольхцень мастерскойхнень. Но мезе изь тиенде, сякокс бюроса корхтамда меле недляста нолдафтольхть сембоц кафкса тракторхт. Виде, Поргов соньфтемонза корхтась тона эмтеэсонь руководительхнень мархта, и тоста макссть сёронь урядама пингти кота тракторхт. Валхтфтольхть лия работаста сембе тракторхне и путфтольхть комбайнатнень усксема. И комбайнатне ашесть аще тевфтома. Варламовть озась седиец, няезе, што колхоснень эса тевсь ладявсь. Сон нолдазе колхозста Порговть, кона меки сембе тевть мастерскойса сявозе эсь кядезонза. Салмовти тага ашель мезе тиендемс и савсь тумс колхозу уполномоченнайкс.

Весть апак тертть, апак кизефтть Салмов сась колхозста, мольсь Варламовти и обжафста азозе:

— Мон аф содаса, Степан Иванович, директорсь эмтеэсса мон или Поргов?

— Мезе тага тись?

— Поргов кенярдсь, што лядсь вастозон, кармась азорондома эсь лацонза: примазень работама мастерской слесарькс Бугров Алексейть и Каргинть, звонясь Саранскяи, тердсь тоста кафта передвижной мастерской мархта слесарьхть и сембонь кенерсь ни арафнемс вастоваст работама, — ваймонь апак тарксек азондсь директорсь.

— Мезевок ашень шарьхкоде, Карп Максимович. Кодама Бугров? Кодама Каргин? Тят эряскада, азондк сембонь лац-ряц.

— Бугровть, кона ворьготсь «Мазы паксяста», ингольдень бригадироньконь, тяни меки сявозе и путозе слесарькс. И самай ся Каргинть, кона ворьготькшнесь целинав дояркать мельге, Ленать мельге...

— Ну?..

— Тяни сась меки, корхтайхть, панезе тоста дояркась. Недля симондсь Карга велеса, иредьстоньбачк тядянц панезе кудста, бабать васенда музе эсьурма, а тяни радимоць таргазе, ащи кулома лангса. Вов сонь и сявозе Поргов омбоце слесарькс.

— А «летучкатне» мзярда састь?

— Колмоце шись ни кода работайхть, — станяк эрязста азозе Салмов. — Тяни марнек республикать келес срафтсамазь. Мзяра визькс кармай улема! Ой-ой-ой!..

— Воля максоть тейнза, — аф ламос арьсемда меле пшкядсь Варламов. — Тонць шумуват тя тевса, брат. Тувоть нолдайть... — и кайги вайгяльхть рахазевсь.

— Мес нолдайне? Мон кунаркиге корхнень, што Поргов — карьерист. Тейнза эряви тяса мундир сатомс, а меле токсек сонь!

Аф ламос кафцьке ащесть апак каштортт: арьсесть эсь потмоваст.

— Содасак мезе, Карп Максимович? — кизефтезе Варламов. — Урядасаськ паксятнень, пяшкодьсаськ государствать инголе сёронь мима планоньконь, и тяфта шарфтса тевть районца, што тошна кой-кинди кармай улема. Ванан-ванан, синь сембонь китнезевсть прякедьсна, савихть сеендемс аф ламода!

Салмовть пиндолгодсть шееронь сельмонянза.

— Пади, прважасайне тяста передвижкатнень, кадыть туйхть, коста састь, а? И нятненге, «слесарьхнень», — сялдазть ланга.

Варламов тага аф ламос арьсесь.

— Бугровть и Каргинть мзярс тяйть токсе, тят эряскода. А передвижкатнень колга Порговть тердьса и кизефтьса, мес аф кулхцондсамазь.

Салмов озадонь седихть срхкась колхозу:

— Тевда, товда тоса лама, Степан Иванович!

* * *

Аделсевсь ни августське, а тевда районца нинге пефтомоль. Варламов нльне сонцьке юкстазень сявф обязательстванзон. Сембонди няевсь, што районца лама колхозга аф пяшкодеви сёронь мима планць нльне васенце сентябрти. Варламов пяк изь шумна, но люпштась сембонь лангс, аньцек кода маштсь, сембе ширде ёрась няфтемс эсь прянц «од» работникненди: Степашкинти, Шиндинати и Алексеевти. И вов звонясть тейнза обкомста: «Ванды Сире ошу моли Кочурин». Сяка илядня Варламов пуроптозень бюронь члеттнень и азозе, кинди мезе эряви тиемс Кочуринть пингста.

— Васендакиге, юкстасть эсь ётковань сембе спорямантень, — мярьгсь сон. — Тяда лихне кудста сорхт, Фёдор Михайлович ня тефнень аф кельгсыне. Ванды райцентрав ляды ськамонза Зобов, а минь сембе тутама колхоснень ланга, эсь вастованк. Мзярда мольхтяма минь Фёдор Михайловичень мархта колхозу, содасть, кие и мезень колга тоса кармай корхтама мархтонза, а то токади кодама-кодама кргапарю ломань и лаподи тейнза мезе повсь.

Варламов арьсезе семботь. Сон ашезе юкста сяньге, кие моли Кочуринть мархта колхозу, кда мезе-мезе лиси эсь мархтонза.

— Пади, бюро ётафты. Кие содасы, мезе сон ёрай тиемс районцонк, — азозе сон. — Бюроса корхтама тяда эряскода. Тясть юксне: «Азф валсь аф кирьхкс, меки аф кундасак», — корхнихть русне.

Ёнень азомда меле сяка жа веня сембе срхкасть колхозу, а сонць Варламов ламос гайфнесь колхосненди, сембонди пачфнезе Кочуринть саманц колга кулять.

Поздна илять тердезе кабинетозонза Салмовть, канфтозень сянь кядьста Порговть сембе докладноензон, конатнень инженерсь тяшнезень тракторхнень петемаснон и лия тевонь колга.

Салмов венептсь фкя докладной, коса Поргов азондозе колхоснень эзга модать, што фкять эса сон шувару, а омбоцеть эса сёвоню, калгода, а сяс анась ладямс колхоснень эзга тракторхненди аф фкя лаца горючайнь норма, штоба куроконе прибавамс горючайнь нормать «Пичень кура» колхозстонь тракторнай бригадати. Сяка жа докладнойса азондозе, штоба убавамс тя нормать колма колхозга.

— Ну, а тон мезе тиеть?

Салмов сюнерьгодсь:

— А содасак, коста ёразе кирьфтамс нормать? Чуйкинть колхозстонза. Архт, кирьфтак тоста горючайть, эста Чуйкинть ззда прянь пчкамавок аф кармат содама!

— И мезьса аделавсь тевсь?

— Мезьса? Путыне докладнойнц и ащи. А мезе нинге тиемс?

— Но кда пачкоди тя Кочуринти, сон пряда аф вадердатанза. Мярьги: аф сявондьсасть мяльс специалисттнень вайгяльснон, сяс и кальдявста моли тевонте.

Тяда меле Варламов тертьфтезе кабинетозонза райпотребсоюзонь председательть и макссь тяндиге «задания».

— Ванды и омботь столовайса кадк фалу улихть свежай калхт. Тяк юкста, ванды завтракама карматама кемоньшка частста.

— А кие сай?

— Ломань. Тихть тоса порядка, ватт, афолемазь визделгофта тонь пьяницатне.

А омбоце шиня, кодак няфтезе прянц шинясь, Варламов лиссь районть границазонза и лоткафтозе машинанц оцю кить лангс. Кить фкя бокованза таргавсь розь пакся, кона нинге апак нуколь, а омбоцеть — сура. Сон мярьгсь шоферти, штоба ваноль, коста кармай сама Кочурин, а сонць тусь суроть потмова. Мольсь и сяка тев варжакснесь фталу. Пачкодсь суроть пезонза, но шоферсь кодамовок сигнал изь макссе. Мрдась меки, а обкомонь секретарсь стаки изь няев. Озась межать лангс и нувазевсь. Аньцек колма-ниле частта меле ичкозе пиндолгодсь легковой машина. Варламовонь сидеста кармась шавома седиец, сон тага тусь суронь умать кувалмова, тарксесь юрнек сери долгат: ёразе няфтемс Фёдор Михайловиченди, кода касы синь суросна. Тянь эзда и ушедсы сонь мархтонза корхтаманц.

Тя пингть пачкодсь малазонза Саранскяйста сай машинась... Варламов марязе, конашкава сидеста пиксы седиец: вов сейчас лоткай машинась, и лиси каршезонза Фёдор Михайлович... Машинась макссь сигнал и бурякс ётась Варламовть вакска, вельхтязе сонь пульса. Сон ашезе сода, мезе тиемс, пинге учемс или тумс? Путозе сура пулфкять машинати, коса ащесть ни тяфтама пулфкат — розень и люкшянь, и газета потмос марафтольхть од модамарьхть.

— Месть, нинге карматама учема? — кизефтезе сонь шоферсь.

Таргазень зепстонза Варламов частонзон, ванозе пингть и ашезь веронда часттненди, варжакстсь шить лангс и пшкядсь:

— Аф ламос эряви учемс. Улема, Кочурин коса-коса кирдевсь.

Шоферсь мезевок изь отвеча, шаркстсь машинать фталу и мадсь эшкскяти, путозень прянц алу кафцьке кядензон. Варламов ашезе сода, ков тиемс эсь прянц. Пси шить алда, пчкясь, сонга кяшель, но пельсь: кафцьке нувазевихть и аф няйсазь, кода сай Кочурин. Сяс васенда сон эцесь апак нук розть потмос, но курок тоста лиссь, тага тусь суроть малас, якась мековасу и апак лотксек варжакснесь кить кувалмос, кона бта тяйня лентаня таргавсь сянгяря сёротнень потмова.

Учсть ламос. Шись ётась ни машинать омбоце бокозонза, шоферти савсь полафтомс вастоц, но кить кувалмова сяка кивок изь няев. Варламов марязе, что пяк сярятькстсь пряц и ашезе сода, мезьста: шить псинц эзда или мес апак удок. Аф ламос шарондсь-тись машинать перьф, стяфтозе шоферть и мярьгсь срхкамс «Возрождения» колхозу. Сон ёразе ваномс, кода тоса анокласть обкомонь секретарть васьфтемонза, ведь тейст нинге исяк ульсь азф, што колхозозост Кочурин обязательна сай. Мзярда машинась куцсь веле пестонь пандонять пряс, Варламов лоткафтозе сонь и нинге весть варжакстсь оцю кить кувалмос, аф няеви ли тоста машина.

Колхозонь правленияса Чуйкин ашель. Счетоводсь аф эряскодозь путозе кядьстонза ручканц и цють аф тошказь азозе:

— Мон, чандан, синь тусть сускома.

— Кит?! — абондсь Варламов. — Кочурин?..

— Ну да, сон шобдава ранакиге сась. Ванондозень сембе паксятнень. Мусайть. Синь огороднай бригадирть пялот.

Бригадирть вальманзон ала ащесь Чуйкинонь машинац. Варламов сувась куду. Кочурин пеедезь васьфтезе сонь, тердезе мархтост свежай помидорда ярхцама.

Варламов анась азоравать кядьста кружка шапама лофца. Лофцсь цебярь: кельмоня, туста, да нинге кружкав повсь пачашка пеезь.

— Павазуват, — шутендась Кочурин, — мон пцтай сяканя лофца сивонь и пеезь пакшкявок изь пова.

— Тя вдь ломанць минцень, — шутендась азораваське, — сяс тейнза и кадыне пеескять.

— Деряй, содасамак? — варжакстсь Варламов бабать лангс.

— Содате, цёрай, тон весть паксяса сюцемасть минь, аватнень.

— Тя коса стане?

— А мяляфтсак? — аф виздезь корхтась бабась. — Парень кормань кочкомста, вов коса.

Варламов якстерьгодсь. Штоба бабась афоль лаподе нинге мезе-мезе, Чуйкин сонць кармась кизефнемонза Варламовть, коста тяза сась, коста кулезе, што тяса Кочурин ялгась.

— Аньцек чакоргоды тонь ортаце, а мон ни содаса, кие сувась пялот, — фалендась Варламов. — Фёдор Михайлович, ськамот сать? — шарфтсь сон обкомонь секретарти.

— Ули ялгазе, да коза-бди юмась.

— А кие?

— Агрономть, Прокопычть‚ содасак?

— Ся аф оцюнять? — Варламов кафцьке кядензон мархта няфтсь кувака усат.

— Да, да, Николин.

— Кие сонь аф содасы! — пеедезевсь Варламов — Мон ёт мяляфтса‚ сон работай министерстваса. Аф весть тяса ульсь...

— Райононтень сон лац содасы — шназе Кочурин агрономть.

— Республикаса сон содасы эрь колхозть, — азозе Варламов, — а кда педи мезьс-мезьс, кода кумбарав, аф явфтови.

Чуйкин аньцек кенерсь азомс, што Прокопычсь тусь ялганц, пчеловодть, пяли, эстокиге вальмалу лоткась сенем машина. А минутада меле куду сувась серес аф оцю, ведьгемонь кизошкаса ломань. Сон нинге кенкш лангса вадердазень тюжя кувака усанзон. Тяйняне шамац и кувака шалхкоц бта нарошна оржаптфтольхть.

Агрономсь кодак няезе Варламовть, эстокиге кизефтезе:

— А коса од инженеронте? Ускить тяза сонь? — и шарфтсь Кочуринти: — Тон, Фёдор Михайлович, содасак главнай инженерснон? Корхтайхть, пря вий алясь. Кулине, рьвяяфтость тяса сонь? — меки кизефтезе Варламовть.

Варламов азозе, што Порговть тяза ускоманц колга мезевок аф содай.

— А мон исяк звонянь эмтеэсу и мярьгонь, штоба сон саль мархтот тяза, — пшкядсь Николин. — Сон пяк эряви: марса ванолеськ тя колхозть перенцты орошениянь тиема планонц.

Чуйкин азозе, што орошениянь платтнень Поргов прважазень эсь заводозост, тоста анась лезкс; пачфтезе обкомонь секретарти, што инженерть мархта синь арьсесть нолдамс ведь видеста колхозонь перети. Ужяль аньцек, Поргов тя тевса сонць аф специалист.

Николин таргась полевой сумкастонза документт и азозе, што министрсь мярьгсь тейнза проверямс Порговть чертежензон и сёрманц мастерскоезост од цехонь строямать колга.

— Минь тяда оцю кизефксоньке улихть, конат эрявихть ваномс Фёдор Михайловичень пингста, — мярьгсь Варламов и варжакстсь обкомонь секретарть лангс.

— Наверна, запасной частьт анатада? — чипордазе сельмонц Николин.

Варламов из му, мезе отвечамс оржа кяль агрономти, и кизефтезе Кочуринть: эряви ли вешемс Поргов? Кочурин мярьгсь, што Порговть мархта агрономсь нинге кенерихть васедемс, и кизефтезе Варламовть:

— Тон содасак, Степан Иванович, мезе веши обкомть ширде Чуйкин? Пиленень почкафтозень: «Пяк пара, кле, улель, кда минь строялеме тяза пеньковай и крахмальнай завотт».

Варламов эрязста варжакстсь Чуйкинть лангс и кеподезень лафтунзон:

— Пеньковайть колга эряви ладняс арьсемс. Вдь эста, Фёдор Михайлович, кошардсамасть каньфонь витцема. И содасак, мзяра сави видемс?

Чуйкин таргазе зепстонза резинкаса карксаф записной книжканц, панжезе и кармась азондома, што велеряйхне колхозда инголе витцесть каньфта колмоксть сяда лама, мзяра видендеви тяни.

— Каньфонь касфнема машттама! — аделазе корхтаманц Чуйкин.

Обкомонь секретарсь тяштезе Чуйкинть эняльксонц блокнотозонза.

Варламов пеедезевсь:

— Маряк, тага васетькшнеть Порговть мархта? — и кармась азондома Кочуринти, што кодак васедихть Чуйкин и Поргов, то обязательна кодама-кодама план сай прязост. — А мон кулине, Степан Степанович, арьседе строямс кодама-бди лия завод? Полас бта сувафтость Леховтьке. Тяфта, што ли?

— Кие ся Леховсь? — кизефтезе Кочурин.

— Ся самай тридцатитысячниксь, конань колга сашендсть заводста, — азозе Варламов. — Ся Порговть мархта кармась строяма механизированнай ток. И Чуйкинцьке изь ляда эздост: кафта недялят козонга пря изь няфне — шинек-венек строясь.

— Строясть токонтень? — кизефтезе Чуйкинть.

— Строяськ. Пара ток тиеме.

— А мезенди ся токсь тейть? — апряказе Варламов. — Тинь народонтень мархта кафтонь-крда сяда лама сёра токфтомонга урядатада. Мезенди карьхцяйть артельнай ярмакнень?

Чуйкин якстерьгодсь:

— А тон содасак, што минь ванфтоме ни кафта тёжятть трудоши?

— Аряда, ванцаськ токснон! — пшкядсь Николин.

Кочурин согласиндась.

Колхозонь токть лангса работасть сембоц ниле ломатть: кафта ават и кафта алят.

Ламос апак каштортт сембе шарондсть токть перьф, кивок киньге ашезе кизефне и мезевок изь азонда. Кочурин пшкядсь:

— Кизефтьсайнек аватнень, синь азсазь, пара или аф тя машинась.

Сят нардазь руця пезост пулюяф шамаснон и нежедсть. Мельгаст нежедсть мотористсь, сон жа токонь заведующайсь, и кладовщиксь.

— Минь вов корхтатама эсь ёткованк, — пшкядсь тейст Кочурин, — мезенди эрявсь тинь председателентенди тиемс тя машинать? Мзяра ярмак наваде тяза?

Отвечамда инголе кафцьке алятне таргазь кисетснон, ашкодсть цигаркат, варжакстсть фкя-фкянь лангс, и кладовщиксь сонць кизефтезе Кочуринть:

— Тон простиндамак, аф содатядязь, кият ломанць? Ну, азк, мезенди тейть максозь тя легковой машинать? Якалеть да якалеть ялга колхоснень ланга.

Сембе рахазевсть, а сембода пяк рахась Кочурин. Сяльде сон кизефтезень аватнень:

— Маряк, тяфта сяда тёждя?

— Деряй, аф! — мярьгсь сяда сире авась. — Бывала пуроптама тяза колмогемоньшканек и кяденьконь таргавомс ваннесаськ сёроть. А тяни няйсасть: сонць, кормилецсь, моли вастозонза...

Кочурин прощандась ломаттнень мархта, озафтозе ваксозонза Варламовть и азозе, штоба сон няфтельхце кить «Якстерь тяште» колхозу.

Ётасть кемоньшка километра, и кись лиссь «Якстерь тяште» колхозть розь паксянц ваксс. Пефтома таргавсть шужярень копнатне, ичкозде няемок, бта шужярень веленя ащесь тя вастса. Кить маласа колхозникне капас марасть шужярь. Кочурин лоткась ваксозост и кизефтезень синь, мзяра нуф розьдост.

— Сембе нуф‚ — азозь колхозникне. — Тяни машинатне ётасть тозерти.

Велеса вешезь Леховть и Белкинть, ванозь артельть хозяйстванц. Пяк тусь Кочуринонь мяльс колхозть кукурузац. Сон нльне таргась кемоньшка нетькс и путозень машиназонза. Пефтома кизефнесь Леховть и Белкинть эса, кода и мезе ёрайхть тиемс, кодапт синь сяда товолдонь планцна. Кочуринть мяльс тусть Леховть планонза жуватань кардонь строямать колга и апряказень азорхнень, мес тя «городоксь» строяви маласа велеть эзда:

— Ётай сембоц кемонь, кеветие киза, и веленти валови электричестваса, эрь кудти сувай радио, велеса тихтеди кинотеатранте, культурань кудонте, велеть перьф кеподихть садонте, ня артезианскяй эшихнень эзда ведсь сувай куттненди. А тяка ёткть ёфси нярялонт кармайхть ащема жуватань карттне. Арьсетяда, спасиба тянкса азыхть колхозникне?

— Сон киньге изь кизефне: ушедсь строяма, — сувафтозе валонц Варламов.

— А тинь ашесть няе или ашесть куле, што ли? — уркстозе сонь Кочурин.

— Минь тя вастти сотомазь корматне, — пшкядсь Лехов, — тяста аф ичкозет лугатне и паксятне.

— А ломаттнень вакссот жувататне — тя мезевок аш? Пади, тяза сави парк тиемс, аф жуватань картт, тянь колга ашеде думанда?

Белкин кулхцондсь и пеедсь, бта ёфкс кульсь велеснон сай пингонц колга. Приметазе тянь Кочурин и эстокиге шарфтсь тейнза:

— Мон шарьхкодень, мезе арьси монь валнень колга партийнай руководительсь: обкомонь секретарсь кода Манилов, цёфксонь кулхцондома срхкась.

— А тейне мярьгондсть ни тяфта‚ — пеедезевсь Лехов.

Кочурин лапазе Леховть лафтунц:

— Кадк корхтайхть. Корхтайхть сят, конат тингта ичкози аф няихть. А минь, коммунисттне, содасаськ, ков мольхтяма и мезе тихтяма ванды, омботь и комсь кизода меле... Монь койсон, тяниёк велеть и карттнень ёткс эрявихть озафнемс шуфтт и сад, кадк сянгяря стенась кяшсыне тинь эльбятьксонтень...

— Лехов пяк эряскодсь тя тевса, — пшкядсь Варламов, — и фалу тяфта тиенди: васенда апак кизефнек, апак арьсек тисы тевть, тоса кяшендить грехонзон.

— Мес апак кизефнек? — изь кирде Лехов.

— А кинь кизефнеть? — машнезевсь Варламов.

— Сембе стройкатнень колга ули колхозникнень решениясна и сембе решенияньке кемокстафт райисполкомса.

— Ах, райисполкомса, — яфодезе кяденц Варламов и нинге мезе-бди ёрась азомда, но шоворсь корхтамазост Николин:

— Мон аф шарьхкодьса, мезень колга спорятада? Карттне строяфт пяк цебярьста‚ — сон шарфтсь Кочуринти: — Монь койсон, вов тяза и эряви тиемс опорно-показательнай пункт жуватань раштафтомаса. Тяза эрявихть максомс племенной вазнят и буканят, а аф лама кизода меле, содасак, мезе кармай тяса улема?

Кочурин аф ламос арьсезевсь и согласиндась агрономть мархта, мярьгсь сяньди, штоба сон тяштельхце тянь эстейнза, и кодак молихть Саранскяи, эстокиге арьсемс тя кизефксть.

— Кода тон ванат тянь лангс, Степан Иванович? — кизефтезе Варламовть.

Райкомонь секретарсь аньцек кеподезень лафтунзон и мезевок изь аза. Кочурин сяда лама изь карма кизефнемонза, шарфтсь Белкинти, кизефтезе, можнат ли илять пуроптомс колхозонь коммунисттне.

— Мес мле, пожалуйста, — азозе Белкин. Сонь пароль мялезонза‚ што председательсна тяфтама смелста корхтай Варламовть мархта обкомонь секретарть пингста.

Кочурин кизефтезень, содасазь ли коммунисттне Золотушкинть и Тимонинть докладнойснон, конань синь тяштезь партиянь обкомть лемс.

Белкин и Лехов варжакстсть фкя-фкянь лангс и азозь, што синь кодамовок докладной аф содайхть. Эста обкомонь секретарсь кизефтезе Варламовть, кинди сон няфнезе ся докладнойть.

— Аньцек колма-ниле шида инголе получаськ, — азозе Варламов. — Нинге киндинге ашеме кенере няфтемс. Фалу заняфтама.

— А эсь бюросонт ваность?

— Аш нинге, аф ётка, сёрось...

— Сёрось сёра, — аф ламода кяжиясь Кочурин, — а тя тевсь должен молемс эсь киганза!

Кочурин сембонь пингста азозе Николинонди, кодама цифрат и материалхт эрявихть сявомс колхозонь тефнень колга, а сонць иляденьберьф, мянь собраниять панжемс, якафтсь Белкинть мархта: кизефнесь, куляксась... А правленияв мрдамстост кизефтезе Порговть колга.

Белкин изь эряскода корхтама: пельсь аф азови сембе, мезе содай.

— Монь вдь аф стирезень срхкан максомс Порговти, — пеедезевсь Кочурин, — корхтак видеста.

— Тейньге сон аф кум, — смелкстомсь Белкин, — а учителькс можна лувомс. Лиякс мярьгомс, аф Варламовти эряволь улемс секретарькс, а Порговти. Тя ломанць сембе тевонзон тиендьсыне лямбе кядьса, арьсесыне оцю седиса. Эрь ломанть седиенцты панжемат муй... — Сувасть правленияв...

Партийнай собраниясь мольсь активнайста и ламос. Коммунисттне азондозь сяньге, мезенкса и кода судендафоль синь председательсна.