41

Райкомть перьф машинат, кильтьф алашат, мотоциклат и велосипетт. Тяза тертьфтольхть сембе комсь котува колхоснень эзда председательхне и партийнай организациянь секретарьхне. Варламов располох эрьхтсь районть келес: исть пяшкодев областной газетаса печатлаф обязательстватне. Кемгафтува ши ётась августста, а розть пцтай пялец нинге стяда.

Бюроть заседаниянц панжемда инголе Варламов путозе тяка жа кизефксть ваномс бюронь члеттненди и райкомонь работникненди. Тяза тертьфоль Порговське. Варламов корхтась аф лама, азоза што тяфта тевсь аф туй, апряказень сембонь, мес киньге аф сяряди пряц районца тефнень инкса. Варламов вешсь сембонь ширде азомс эсь мяльснон.

Сембе ащесть нолдаф прят, кивок ашезень кепсе сельмонзон Варламовть лангс.

— Давайте корхтада!

Кабинетса тага аш кашт моли.

— Давайте корхтатама райисполкомть и кафцьке эмтеэснень работаснон колга, — поладозе Варламов‚ — а то синь бта пятна лангса ащихть, ёрайхть молемс пристяжкаса.

Корхтай стаки ашель.

Варламов колмоцеда стясь вастстонза:

— Мон аф содаса, мес бюронь члеттнень аф сярядихть седисна тя визьксть эзда? — сяда кяжиста пшкядсь Варламов. — Значит, минь, коммунисттне, аф машттама эсь валоньконь кирдема? Тяфта, што ли, Поргов ялгась? — мес-бди кизефтезе инженерть, хоть и сон бюроса аф член.

— Мес аф машттама? — отвечась ся. — Минь азсаськ, мезе шорси.

— Да, минь ёратама содамс, Борис Константинович, мес аф работай тракторнай паркть пялец? Анокат или аф тянкса ответонь кирдемати? — Варламов эстокиге кармась пеняцяма сембонди: — Тейнек аф шарьхкодеви Порговть прянь вятемац. Васенда ёрась калафнемс тракторхнень, арьсесь кодама-бди план, а мзярда минь и обкомста представителесь азоськ, што сёронь урядамань карша тяфта кивок аф тиенькшни, што колхосне лядыхть тракторфтома, эста сон ёфси лоткась тракторхнень мельге ваномда, тя бта аф сонь тевсь. Но тя нинге аф сембе. Сон тяштсь обкому сёрма, бта райкомсь обжазе, а обкомста саф инструкторсь ашезе шарьхкоде сонь. Жалобац — тя нинге кржа, сон эсь сёрмасонза анась обкомть ширде лезкс, штоба кодама-кодама эмтеэсста кучельхть тяза передвижной мастерской мархта кафта-колма бригада тракторонь петема. Тя мезе тяфта, Поргов ялгась, тиендят? Кие тейть мярьгсь визделгофнемс районнай партийнай организацияньконь? Пади, тинь заводсонт тяфта тиендихть: инксонт работайхть ломатть? Но тяса тевсь лия. Тяса минь кошарттядязь тракторхнень инкса отвечама тоньцень. Тон главнай инженерат и содак эсь тевцень.

Кабинетса кивок нльне сурбенц изь шерьфте. Аньцек Салмов апак лотксек шарфнезн прянц: то Варламовть, то Порговть лангс, пчкяль, сонга кярьмодель инженерть сюцема.

Анась вал Поргов и кармась корхтама спокойна:

— Эрь производстваса машинатнень и оборудованиять инкса отвечай главнай инженерсь. Тяфта тиендеви, Степан Иванович, минь заводсонк, тяфта должен тиендевомс эрь предприятияса и эмтеэсса. А трахторне лоткасть колхозга сяс, мес тинь ашесть шарьхкоде мон эняльксозень синь петемаснон колга. Монь планозень коряс сембе тракторхне кунаркиге улельхть ни петьфт, тейст эрявсь тиемс сембоц профилактическяй ремонт. А тяни синь лиссть стройста. Весть мархтот корхтаме авариять колга. Вов и тиевсь авария.

Поргов валонзон азондозень аф эряскодозь, ёрась, штоба сембе ладняс шарьхкоделезь сонь.

— Тон уркснесамак монь, Степан Иванович, — тага ушедсь сон, — мес мон анань лезкс. А мезе ина тиемс? Мон содайне, што тракторхне фкя-фкянь мельге лоткайхть и эсь вийсонк курокста сембе аф нолдавихть. Мезень визькс, кда сайхть и лездыхть тейнек? Ну, эльбядеме минь и сяка. Уроконди арай тя тейнек! — меколи мярьгсь сон.

Варламов эстейнза васта изь мушенда. Сон учсесь, сянь, што Поргов кармай анама прощения, азсы, што шинек-венек кармайхть работама и нолдасазь сембе тракторхнень. А Поргов кармась райкомть тонафтома, кодама-бди уроконь колга корхтась.

— Кодамовок лезкс тейнть аф сай! — нинге сяда кяжиста мярьгсь Варламов. — Монь кизефнемазь обкомста, и азыне, што синьфтемостка тисаськ сембонь. Вов тячи приматама решения колгат‚ — сурса няфтсь Порговть лангс, — и кошарттядязь шинек-венек работама, штоба кафта-колма шида меле тракторхне работальхть, кда ёратада ванфтомс партийнай билетонтень.

— Минь зря ашеськ ванонда эста бюроса Порговть докладноенц и планонц, — саворне, бта аньцек Варламовти, азозе Степашкин.

— Тон ашелеть, минь ванондоськ, — Варламов шарфтсь Степашкинти. — Нльне кафксть ванондоськ: весть минць, а меле, мзярда сашендсь тяза обкомонь инструкторсь, сонга целай недяля пульхкясь Порговть кагодонц перьф.

— Борис Константинович, мзяра тракторда лоткась? — кизефтезе Степашкин.

— Кемгафксува, — Порговть вастс отвечась Салмов, — кемгафксува машина аф работай.

Тяка жа цифрать азозе Порговське. Степашкин шуказе прянц.

— Да, тевсь стака. Степан Иванович, пади, зря атказать лезксть эзда?

— Аф содаса, кода тон, Роман Романович, а монь шамазе аф кернянь, сельмоне аф кевнянь: виздян анамс лезкс, мзярда минцень ломаненьке мезевок аф тиендихть. Да нинге ули главнай инженероньке...

— Мон уполномоченнаян, тямасть лув инженеркс, — Поргов бта урняса сялгозе Варламовть.

— Сембе партактивсь кучф уполномоченнайкс, — уркстозе сонь Варламов, — а тевсна сембонь молихть, фкявок учреждения изь лотка работамда!

— Ся верна‚ — пеедезевсь Поргов‚ — корхнихть: солдатсь уды, а службац моли. Но минь тевсонк аф тяфта, няк, тракторхне сявсть и лоткасть.

Сембе шарьходезь, што Порговсь аф шутендась, а кяжедсь. Сон надияй эсь видешинц лангс и содасы, што тракторхнень инкса Варламов мезевок аф тии тейнза!

Шарьхкодезе или аш тянь Варламов, киндинге изь содав. Сон пшкядсь Салмовти:

— Мзярда петьсасть тракторхнень? Мзярда лоткатада маштыксса шавомдонк? — и озась вастозонза.

— Нинге ниле-вете шит сави маятамс‚ — апак арьсек азозе Салмов‚ — тяни монцьке шинек-венек аф лисендян мастерскойста, Степан Иванович.

— Так вов, давайте, нолдасть, нолдасть скандалфтома. Тонга‚ Варвара Степановна, тят уль эмстеэсса свидетелькс, илештить кяттнень и работак!

Кода шарьхкодевсь, Варламовть озась седиец, и мрдась социалистическяй обязательстватнень сяземаснон колга корхтамати. Сон ётафтозень Чуйкинть лангс сельмонзон, кизефтезе:

— Давай, азонк, Степан Степанович, кодама обязательстват сявондсь тинь колхозонте и мезе тиеде?

Чуйкин кармась азондома ёфси лия цифрат и лия срокт сятнень коряс, кодапт сявсь районть лангс эсь статьясонза Варламов.

— Норак, норак! — лоткафтозе сонь Варламов. — Коста сявить ня цифратнень? Мес синь лият?

Чуйкин пеедезевсь.

— Вов и работак тяфтама ломаттнень мархта! — тись дивандайкс Варламов. — Мон вдь тейть звонянь Салмовть пингста. Тон мярьготь... «шарьхкодихтень»...

Поргов Варламовть кядьста анась пря тумс. Мзярда сон лиссь, и лядсть аньцек синць бюронь члеттне, Чуйкин стясь вастстонза и пяк смелста кизефтезе Варламовть:

— А кие максозень ся цифратнень, конатнень тон сёрмадыть эсь статьясот?

Сембе варжакстсть Чуйкинть лангс. Варламов мезевок изь отвеча, пезфтазень председательть лангс сельмонзон и ламос ванць. Шерьхксь вастсонза Салмовське, бта оржа пеель путфоль алонза. Варламовть пряс мешвеленякс эцесть кодама-повсь мяльхть. Васенда сон ёрась кода эряви сюцемс Чуйкинть, ювадемс лангозонза, кадк сон озай бюроть вятема, кли аф авторитет тейнза райкомонь васенце секретарсь. Но изь юваде. Тоса ёрась ювадемс сембонь лангс, штоба сембе стяльхть и стяда кулхцондолезь, мезе сон тейст кармай корхтама. И тага изь юваде. Маряк, шарьхкодезе, што Чуйкин тяфта корхтай сяс, мес обязательстватнень ванома ашезень пуропне бюронь сембе члеттнень, мес ськамонза тиезе тя тевть.

Варламов саворне, нльне муворунь вайгяльса пшкядсь:

— Деряй, монь, Степан Степанович, аш праване райкомть лемста азомс вал областной партийнай комитетти?

Чуйкинть вастс стясь Степашкин, но аф отвечась, а сонць кизефтезе Варламовть:

— Мон аф содаса, Степан Иванович, местема тячи пуроптоськ колхозонь председательхнень...

— Кода местема? — абондсь Варламов. — Кизефтьсаськ кажнайть, кода пяшкодезь обязательстватнень.

— Кодама обязательствань колга тинь корхтатада? Мон няйса, кажнай колхозть улихть сонцень обязательстванза и синь лият тоннетнень коряс.

Варламов ёрась эстокиге отвечамс, но повсь кялец. Сон стясь, шашфтозень ингольденза каготтнень и карандашнень, мезе тиенькшни, мзярда кяжияй, и отвечась трнаты вайгяльса:

— Лисенди стане: мезе мон тяштень газетаса — ся бта вармась ёрдаф кулуфт? Тяфта, што ли, Роман Романович?

Степашкин отвечась тожа стяда:

— Сембе, кие тяса, аф исяк шачеме и содасаськ, Степан Иванович, кода сявондевихть социалистическяй обязательстватне.

Степашкинть валдонза меле сетьмось кабинетсь. Аньцек пяк кайгиста чакасть стенастонь часттне, пяк валдста цифтордсть люстрать эзда электрическяй лампочкатне, пяк лофтанаста няевсть стенатне. Сембе, кие ульсь кабинетса, ванцть Варламовть лангс, кона бта юмафтозе прянц.

Шиндина ащесь кувака шрать ваксса, шавсь сонь седиец. Тейнза арась ужялькс Варламов. Шиндинати няевсь Варламов ёмланяста, но кассь сельминголенза кшнинь сейфсь, конань эса ащихть райононь коммунисттнень учётнай корточкасна. И мес-бди сонь прязонза сась стама мяль: вов веляй стака сейфсь и люпштасы алонза Варламовть. Варвара Степановнань коськсь курга потмоц, пельсь лишнайксть таргамс ваймонц.

А кабинетсь сембе нинге марявсь шавокс. Сембе учсть, штоба кие-кие колальхце тя «шавашить».

Варламов ашезе сода, мезе тиемс. Ёрась мезьс-мезьс кярьмодемс, но мезевок изь пов кядялонза. Нльне сембе кенярдсть, мзярда пшкядсь Зобов:

— Ну, хоть совещания давайте ётафттама!

Ня валхне бта тол крьвястсть комнатаса, конань эса мольсь сембонь мяльсна ащекшнемс.

— Кда пуроптфт ни ломаттне, то давайте корхтатама мархтост, — согласиндась Степашкин.

Райкомонь работникне ащесть вастоваст и марязь пряснон пикссефокс. Степашкинць, штоба сяда ламос аф визделготкшнемс, кизефтезе Варламовть:

— Степан Иванович, кодама колхоз сембода инголе моли сёронь урядамаса?

Варламов комась районнай сводкати и сизефста азозе, што сембонь коряс ламода ичкози тусь «Якстерь тяштесь».

— Кадк Лехов и азондсы, кода тянь синь сатозь, — тага пшкядсь Степашкин. — Тя сембонди пара ули кулемс.

— Тоса аф Леховть лангса тевсь, — бта атямаци гагазевсь Салмов, — тейнза тянь сембонь тиезь эмстеэсонь работникне. Тоса уполномоченнайсь Поргов, сон и ладязе комбайнатнень вень работаснон.

Степашкин рахазевсь:

— Тон, Карп Максимович, кода толда пелят Леховть эзда. Ну, тердесть меки Порговть, кадк сон азондсы од методть.

Салмов эстокиге звонясь мастерскои, афкукс ёразе меки тердемс Порговть, но тоста отвечасть, што сон тусь ни колхозу.

— Мусак тяни Порговть‚ — пшкядсь Чуйкин, — сон содасы тевонц, шинек-венек илештьфт кяденза: работай алясь!

— Минь тяфтама тяни тевоньке, сонць шумусь, — шнафтсь пря Салмов. — Поргов — главный инженер.

Тяни ни ащезь кирде Шиндинаське:

— Подборщикнень вень работаснон ладязе аф Поргов, а Бугров атя. Поргов аньцек пачфтезе тя методть кой-кона колхосненди.

— Ну и пара, — азозе Варламов, — молодец тянкса.

Бюронь члеттнень эзда кие-бди мярьгсь: «Мезень молодец, кда киньге изь терне свадьбазонза...»

Варламовське весяласта пшкядсь:

— Урядасаськ сёротнень и сембе пуроптама пялост свадьбас. А тяни тердесть сей председательхнень и секретарьхнень.

Мзярда сят пуромсть, Варламов панжезе совещаниять (бюронь заседяниять вастс) и меки кяжиста кармась корхтама:

— Бта апак ватть шары читорды минь тевоньке районца. Ёратама кулемс, мес тяшкава кальдявста урядави сёрось? Кинь эзда ушедсаськ?

Степашкин пшкядсь:

— Леховть!

Лехов азондозе, што вень работать вельде розьсна урядаф, тозерсна лятьф и ня шитнень тожа ули урядаф. Варламовть пароль мялезонза, што сявф обязательстватнень Лехов надияфтсь пяшкодемс пингта инголе.

Ингольдень рядса ащесь Валдаев. Шиндина кизефтезе сонь, кода арьси пяшкодемс сявф обязательстванзон. Валдаев апак стяк отвечась:

— Лувк газетаса минь статьяньконь, тоса сембе азф!

Шиндина лихтезе газетать и мярьгсь:

— Вага тонь статьяце. Тяса азф, што сёроть пяленц урядасасть раздельнайста. А мзяра лафетада колхозсонт? Фкявок аш? Максоть вал августть кемонце шинцты нумс колхозса сембе розть, а мзяра нуде? Колмогемонь кота процент!..

Валдаев перязе Шиндинать:

— Мон тейтьке аф весть корхнень: максода тейнек механизаторскяй кадрат.

— А мон коста сяван? Механизаторхне вдь сенди шяйса да эмтеэсть пирьфса аф касыхть. Содасак тянь? Синь эрявихть анокламс! И главнайсь — ванфтомс. А тон мезе тиендят? Эсь велестот аш фкявок тракторист, аш, а тяста кучфнень эзда тядде нилетне тусть ни. Может, азсак, мес?

Валдаевть вастс пшкядсь Варламов:

— Статьять минь тяштеськ марса. Марса минь и критиковандамасть, Варвара Степановна.

Валдаев анась вал и кармась корхтама, кода оратор:

— Областной газетаса печатлаф статьясь арась боевой программакс минь колхозоньконди! Тя статьять мархта газета минь максоме эрь колхознай кудти. Правленияса сонь путфтоськ рамкас и клянць алу.

Васенда рахазевсть фтала, а тоса кармасть рахама сембе. А Валдаев апак лотксек азондсь, мезе тиендихть колхозса статьять мархта, коза сёрматф соньге фамилияц.

Кати-мзярс корхталь ба Валдаев, кда афоль рахазев Варламовське. Валдаев варжакстсь вакссонза пеедихнень лангс и озась.

Сёронь урядамать колга корхнематнень аделазень Варламов. Сон мярьгсь, штоба сембе председательхне куроконе кучельхть райкому рапортт сёронь урядамать аделаманц колга.

Меколи катфтольхть вейхкса председательхть и вейхкса секретарьхть, конатнень колхозсост апак урядак ащесь лятьф тишесь. Председательхне парондсть пря, што апак урядак тишесь кальдяв, што тяни аш ни ётка, сёрось сяда питни... Но кивок эздост ашезе аза, што тишесь лядсь сяс, мес Варламов и Зобов валхтозь урядамда кемонь процентонь пандомать.

Зобов пшкядсь Варламовти:

— Степан Иванович, пади, кеветиень процент максомс колхозникненди лядыкс тишеть урядамда? А то юмай тишесь, народсь тяни заняф сёроть перьф.

Колхозонь председательхне варжакстсть фкя-фкянь лангс, пеедезевсть.

Фкя председательсь ашезь кирде, пшкядсь Зобовти:

— Кемонь проценттнень тонць меки сявить, а тяни корхтат кеветиень колга. Надияфтода хоть кемонь, ито аф кенерьхтяда стряндамс, кода веть урядасазь тишеть.

Зобов варжакстсь председательть лангс:

— Тон кодама сявомань колга корхтат?

— Тинць тяфтама телефонограмма кучседе. Юкстасть? — кизефтезе Степашкин. — Ули предложения ся телефонограммать лувомс вреднайкс и кадк, кие кучезе, ся и меки сявсы.

— Виде‚ — фатязе Алексеев.

— Тинь тяда эряскод, тяда! — пшкядсь Варламов. — Телефонограммать кучемда инголе мон вдь кизефнине обкомть, тоса тяфта мярьгсть.

— А минь приматама решения, и Фёдор Михайлович согласиндай мархтонк.

Тяфта ульсь и арьсеф. Варламовть телефонограмманц меки сявоманц инкса голосовандась Зобовське.