40

Варламов тячи весяла. Тейнза звонясть обкомста и азозь, што областной газетаса печатлафт фкя районцтонь социалистическяй обязательстват. Тяни учихть вайгяль синь районцтост. Варламов кенярдсь. Эрявсть куроконе кочкамс и кучемс обязательстватне обкому, кадк синьге лемдьсазь газетаса. «Кода тяст шаронда, а сире секретарьхнень вакска аф ётнесазь, — арьсесь сон, — тага мумазь. Морось, кода няеви, лиянди аф кукафтови? Эх, мах максонь, — пеедезевсь сон‚ — мярьгомаль, кадк звоняльхть Зубавинскяй райкому, ванолеськ, кодама обязательстват ся районць сяволь ба эсь лангозонза?! А то кукурузаса шнафтыхть пря! А кшинянкса тяза звоняйхть, Варламовти!»

Варламов мярьгсь помощниконцты, штоба иляденди колхозста тердемс райкому кой-кона работникнень и мумс Салмовть. Сонць шиньберьф ётась вете-кота колхоз, ванозень синь розьснон и тозерснон, анокс арьсесь, мзяра центнер получайхть синь сёра. Сон надиясь, што тяни обязательна звопяй тейнза сонць Кочурин.

Шинь валгома малати сизефста мрдась райкому. Шоферти азозе, штоба ардоль алга киге, лугатнень ланга: тячи мялец эшелямс Мокшеса. Веть тячи сави лама тейнза работамс, сяс аф лишнай ули свежайгофтомс теланц.

Кенярдсь шоферске. Кодак лиссь кись Мокшеть крайс, сяколь сонь басняц: Мокшеть сембода мазы вастоц тяса. Афкукс, тяса ляйсь керсь лугатнень лангс «Д» букванди шарфты килькш, конань фкя крайганза таргазь-таргаф туста вирь.

Варламов лоткафтозе машинать: срхкасть эшеляма. Синь ширестост беряксь ульсь маце, ведсь шудесь вишкста, потмаксса няевсь акша шуварня. Тона бокса, вирть крайге, беряксь крута, ведське пяк крхка и няевсь ёфси афи шудикс. Шуфттнень цильфсна бта ваномань лангса няевсть. Тяда цебярь эшеляма васта аф курок муят!

Варламов аньцек кенерсь каямс панаронц, каршестост вирьса кулевсть стирень и цёрань вайгяльхть: вирть алга фкя-фкянь мельге ласькондихть кафта од ломатть: налхксихть «кунцинякс».

— Шяйтаттне кандозь, мяряльятнень, — сюцесь Варламов и янгась эшелямань мялец. Сон озась машинать ваксс и учендсь, мзярда лиси ведьста шоферсь. «Да эшелямска аш мзярда ни, — петнезе мяленц, — шуфттне кяшезь ни шить...»

Шоферсь уендсь мянь тона беряку, а мзярда лиссь, щась-карясь, азозе Варламовти:

— Ся ласькондихне ульсть Степашкин и тинь Веранте.

Варламов эводсь:

— Месть тон? Коста тяза токади Вераньке?

— Коськост кядне, синь. Эсь сельмонень мархта няине.

— А нинге кие мархтост?

— Кивок аш. Тя синь кафонест шумнайхть вирть келес.

— Ляйть тона бокса жолякодсь ведсь, и аф лама пингта меле кулевсь Степашкинть эчке вайгялец:

— Вера! Веруся! Кундак! — сон чёпафнесь, тарксесь ракат и ёрязень беряку. Вера ласькондсь ёряф ракатнень мельге и рахась: пельсь сявомс кядезонза.

Варламов шуфтомсь вастозонза, лофташкодсь шамац. Васенда ёрась ювадемс тейст, уркстомс Верать, тоса кашкомф вайгяльса мярьгсь шоферти:

— Куроконе куду!..

Юмасть-арасть Варламовть весялшиц и вандыень статьять колга арьсеманза. Ардсь машинаса, кода салама вастста ворьгоди. Сельминголенза ащи Верац, кайги пилесонза сонь шабань вайгялец. Варламов вестенге ашезе куленде, штоба сонь сятяв стирняц тяшкава кайгиста рахсель да нинге Степашкинонь мархта.

Варламов аф кирдемшка кяжиясь Василиса Михайловнать лангс. «Мезенди сон нолдазе шабать тяшка вастс Степашкинть мархта? Кие Степашкинць? — кизефнезе эсь прянц. — Деряй, ся пялязсь, Васютась, аф содасы, што Степашкин куцю ведьс ляпияфтолемань, кда максольхть тейнза прават?...»

Сон анокс арьсесь, кода и мезе кармай корхтама рьванц мархта... «А может, Степашкин рахсесь ни шабать лангса? Эста мезе тиемс?» — Бта праможень пиза унась пряц, бта куйхть потясть седиенц эса.

Варламов аньцек сувась кабинетозонза и эстокиге звонясь куду, но каршезонза кивок изь отвеча. Тердезе шоферонц и азозе, штоба сон куроконе туль стиренц инкса.

Ламос кабинетозонза киньге изь прима, мезевок изь моль прязонза. Сельминголенза сембе нинге ащесть вирть краец‚ Вера и ракань ёряй Степашкинць. Тага звонясь куду, и тага кивок ашезь отвеча. «Кодама сельмоса тяни варжаксты шамазон Степашкин? Мезе сон ёрай монь семьязень эзда? Мезенди эрявсь тейнза кяльготнемс монь шабазень?» — арьсемат и арьсемат...

Пяле частта меле Василиса Михайловна кудсоль ни.

— Мезе тиендиви кудсонк? — кяженьбачк кизефтезе Варламов.

Василиса Михайловна рахазевсь:

— Тязонга сельмотне кенерсть ни няемс?

— Мезенди нолдайть кудста шабать? — нинге сяда кяжиясь сон. — Тон содасак, косоль Верась?

— Содаса, содаса! — машнесь Василиса Михайловна. — Пожалуйста, тят пичедь кудонь тефнень инкса. Верась тосоль, косолень монць.

Варламов сускозе кяленц: ашезе сода, мезе азомс, кодама валса сюцемс рьванц.

— Мес тон крьвязеть? — седиге пшкядсь Василиса Михайловна. — Минь семьянек якаме вири. Роман Романович тонафнезе Верань задачань решандама, тон вдь содасак, што Вера аноклай институту. Содасак? А тоса аф ламос ласькондсть фкя-фкянь мельге. Ну, мезе тиевсь мархтост?

— Может, аф содасак, кие тя Роман Романовичсь?

— Саят куду и азсак! — Василиса Михайловна путозе трубкать.

Кабинету сувась шофероц и азозе, што колмоцьке шабанзон и Василиса Михайловнать васьфтезень ки лангса и ускозень куду.

— А Степашкин коса?

— Ся ашель ни. Сон, мярьгсть, озась кодама-бди машинас и тусь эсь вастозонза, коза уполномочендаф.

Шоферть лисемда меле сувасть Варламовть тертьф ломаненза, конатненди сон эрязста азозе, штоба яволезь эсь ётковаст сембе колхоснень, звоняльхть председательхненди, и кадк эрь председательсь меле звоняй райкому, эстейнза.

Меколи лядсть кафоннест Салмовть мархта. Варламов панжезе сяряди потмонц: азондозе сембонь, мезе няйсь Мокшеть берякса. Аньцек мзярда сон эшендсь, кармасть арьсема план: кодама обязательстват социалистическяй соревнованияса сявомс районть лангс сёронь урядамать пингста. Сон ёрасыне вандыкиге кучемс обкомонь васенце секретарти обязательстватнень.

Мярькф — и тиф.

Варламов фкя частста кеподезе марнек районть.

— Давай васендакиге корхтатама Чуйкинть мархта, — мярьгсь Варламов Салмовти. — Ванцаськ, кодама обязательстват сяви инголе моли колхозсь. — Эстокиге вешфтезе телефонца Чуйкинть, кармась мархтонза корхтама: — Азк, лувить тячиень газетать? Лувить. Няить, кодама канкст сявсть лангозост ломаттне? Няить. А минь тонь мархтот тожа коммунисттама, эряви тянь колга арьсемс. Ашеть арьсе нинге? Давай тячикиге арьсек, а ванды шобдавакиге, котошка частса, звоняк тейне и азсак эсь валцень. А меле кучат каготкя.

Чуйкин аф сразу путозе трубкать. Сон кармась кизефнема, кодама обязательстват эрявихть сявомс.

— Аф тячи шачеть, — уркстозе сонь Варламов, — арьсесть, мзяра шиста урядасасть розть, кедихнень, кодама шинди пяшкодьсак государствати сёронь ускома планцень. Вообщем, панчк газетать и ванк‚ кодама обязательстват сявсть эсь лангозост ломаттне. Ну и тонга арьсек, эздост тят лядонда. Ульхть шумбра!

Якстерьгодсть корхтамста Варламовть щёкапрянза. Путозе телефононь трубкать: кяжиясь Чуйкинть лангс.

— Ха, васенда сон кизефтьсыне колхозникнень, меле корхтай бригадиронзон мархта, а меле ни сяви обязательстват? — яфодезе кяденц: — Тянь мархта ям аф пидеви.

— Да, васенда целай фунт канцёр шулгонды, а меле ни азсы валонц, — поладозе Салмов.

Цингоргодсь телефонць — звонясь Валдаев. Кодак Варламов азондозе, мезенкса тердезе сонь телефонти, ся семботь шарьхкодезе и азозе, што ванды кота частса сонць сай райкому и уски обязательстват.

Варламов путозе телефононь трубкат, весялгодсь:

— Вов тя — аля! Молодец Валдаевсь! — аф ламос ащемда меле поладозе: — Минь лияста пеетькшнетяма лангсонза, кой-кие нльне сялды эсонза, а сон минь валоньконь каршес сюрот мзярдонга аф стяфни.

— А мон кунара ни тяфтамкс сонь содаса, — изь ляд Салмовське. — Сай лездомаце тя ломанти... Да, Степан Иванович, а коса минь Зобовоньке?

Варламов яфодезе кяденц:

— Тага мусь кодама-бди тев эстейнза. Токнень перьф лоткась шаромда, повсть прязонза зерносушилкатне. Коста-бди мусь Растрыгинскяй сушилкань схема и, кода нарвама, озась ся схемать лангс.

Салмов рахазевсь, мялезонзоль, кода Варламов корхтась Зобовть колга.

— Шять, Порговоньконь тага сотозе пула пезонза?

— Порговсь тяни аф ялга тейнза, аф лисенди «Якстерь тяште» колхозста. Содасак, тоса месенди? Исяк сатыне паксяса, механизаторхнень мархта кундасть коста-бди свежай калхт и ярхцайхть ухада, ётксост сире Бугров атяське.

Салмов сюворгодсь:

— Няйсак, месенди! Бригадатнень эзга кафкса тракторхт лиссть стройста, а сон калхт кунци.

— Кода стане кафкса тракторхт? Кодама бригадава?

Салмов азондозень.

— Марнек лоткась работамда, мезевок аф тиенди, — пеняцясь Салмов Порговть лангс. — Мон аф весть корхнень тейнть, Степан Иванович, што прясонза фкя: сатомс куроконе авторитет, а тоса... Вдь мезе сон тиенди? Фкя колхозти максы таштста кочкаф молотилка, омбоцети комбайна, колмоцети пети ташта мотор, нилецеса щай сонць комбинезон, сяви кядезонза ключт и работай. А мезенкса старандай? Эци ломаттнень потмос!..

— Да-а! — Варламов путозень кядензон шрать лангс, пушкстсь: — Тон вов мезе. Дай тейне каготкя, документ, няфтьк сонь тевонц. И пароль содамс, мзяра ярмак карьхцяф механизированнай токнень тиемстост и мезе синь макссть.

— Мон кунара ни азыне, Степан Иванович, што сон монь и тоньге мезькска аф путсамазь.

— Монь?! Ну, тя уш тон...

Сувась кабинету Шиндина и азозе, што Степашкинть тона эмтеэсста музе; но сон, Степашкин, атказась кочксемс кодамовок обязательстват колхоснень эзда: ня тефнень, кле, тиеньдьсазь аф кафта частста, обязательстватнень примсесазь синць колхозникне.

Варламов крьвязсь. Сон сялгозень Шиндинань лангс сельмонзон и ювадсь:

— Мон аф шабан, аш месть монь тонафтомс!

Шиндина шарьхкодезе, што ня валхне азфт аф аньцек Степашкинть адресс и аф аньцек тячиень тевонкса, а сембода пяк сяс, мес мекольдень пингть секретарьхне кармасть няфнемост эсь принципиальностьснон, аф фалу ванцть Варламовть кургс.

— Ладна, арда сембе куду, — мярьгсь Варламов и стясь вастстонза. — Монць карман звоняма председательхненди.

Мзярс ащесь райкомса Варламов, содасы сонць. Но омбоце шиня обедашкада прважась обкому пакет и озадонь седихть звонясь Кочуринти, што синь районцновок сявсь социалистическяй обязательстват.

Ётасть ниле шит, и газетаса лиссь Варламовть статьяц. Сонь фамилиянц мархта серцек ащихть Салмовть, Валдаевть и тона эмтеэссонь зонаста фкя колхозонь председателень фамилиясна. Статьять эса лама корхтаф ЦК-ть Пленумонц решениянзон колга, а меле азф, што районца сембе колхосне августть кемоньце шинц самс урядасазь розьснон, а комозце числать самс — сембе кедиснон и пяшкодьсазь государствать максома планцнон.

Варламов лувозе статьять педа-пес и пароль мялезонза. Телефон вельде музе Салмовть и азозе радостенц.

— Тяни давай люпштак, — мярьгсь сон директорти, — максф валоньке эряви кирдемс, а то Федор Михайлович пряньконь аф вадердасыне.

Салмов ашезе юкста Варламовти азомс лямбе валнят нльне телефон вельденга: тонь, кле, обкомса содатядязь, деряй, лиять статьяц тяфтама курокста лисель газетаса. А меколи азсь ётть.

— Статьясь эряволь ба пачфтемс агитаторхнень ведьде сембе колхозникненди и механизаторхненди.

— Тя тев азоть! — кенярдсь Варламов. — Тянкса тон, афкукс, алят!

И обед малати макссь телефонограмма колхосненди, коса гразязень предсетательхнень и парторганизациянь секретарьхнень: кда колхозсь сязьсыне статьяса азф обязательстватнень, синь колгаст тевсь кармай ванондома райкомонь бюроса. Телефонограммать алу путозе аф аньцек сонцень, но и Зобовть фамилиянцка.