39

Илядель ни. Шиндинать кабинетозонза сувась Сараева и смелста озась моркшенц ваксс. Варвара Степановнась абондсь, кодак няезе Сараевать шаманц: то лофташкоды, то якстерьгоды.

Сараева кунара ни ёрась васедемда Шиндинать мархта и панжемс тейнза горяскотф потмонц.

— Мезе-мезе тиевсь колхозса? — эвотьфста кизефтезе Шиндина.

Сараевать васенда налхкозевсть сельмонза и эстокиге тусть сельмоведенза.

— Кали тейть сашендыхть аньцек эста, мзярда колави комбайна или трактор? А вдь тракторда башка ломаттнень улихть горясна и радостьсна. Синь мархтост кинди ина молемс?

Шиндина вестенге ашезе няенде Сараевать тяфтамокс. Фалу сон ульсь весяла, корхтась виде ваймот, мярьгат мзярдонга тя ломанть изь коленде седиец. Тячи жа сон горяскотф. Шиндина шарьхкодсь, што аф колхозонь тевонь колга сась Сараева. Пшкядсь:

— Мес зря корхтат, Галя? Тейне аф аньцек тракторонь тявонкса сашендыхть ломаттне. Лияста беглай механизаторонь мархтонга сашендови корхнемс и аф аньцек корхнемс, но и ласькондемс мельганза.

Сараевать бта пупазь ня валхне. Сонь изь шарьхкоде, што Шиндина корхтась Каргинть колга, а сембонь сявозе эсь лангозонза. Сялгозень Шиндинать лангс сельмонзон и ашезе сода, кодама валса отвечамс. Тейнза-арам, Шиндина ёразе сингордамс Бугров Алексейть инкса, кона недляда инголе тусь колхозста Лухоминскяй эмтеэсу и работай тоса слесарькс. Сараева сяшкава кяжиясь, што юкстазе Шиндинать секретарень вастонцка, кармась корхтама, кода ульцяса:

— Рахсят? Сатыть павазцень и чаят, кати кият тяни тон? Пади, нинге рана, Варвара Степановна, юкстайть стирькс пингцень? Вдь нинге аф содасак, кирдеви павазце коморсот или аф. А то сяви и лийкстай эздодот!

Шиндина марязе, кода шамазонза, прязонза эрьхтсь вероц, зойнязевсть пиленза. Сон шарьхкодезе стане: Сараева сась тяза сялондома Порговть инкса... И аф кирдемшка крьвязсь седиец:

— Пади, мирдезень явома сать? Пади, арьсят — сон пачк ащи мархтот? Мон кунаркиге содасайне тонь дейкатнень, шарьхкотькшнине, мезень лангс пейхть порят. Но мяляфтк, мезевок аф лиси. Поргов тяни монь!

Сараевать мярьгат пачк керозь, сон лаподезень моркшть лангс кядензон, путозе ёткозост прянц и шабакс урякодсь:

— Тядякай-авакай! — и бта кшнинь кядьса фатязь сонь кргапаренц. Сидеста-сидеста шерьхкозевсть лафтунза.

Ёжень маштомс кяжиясь Шиндинаське. Сон марязе прянц наругафста да нинге эсь кабинетсонза. Стясь вастстонза, нежедсь шобда вальмяти, шарфтозе копоренц моркшенц шири. Пиленза исть куле, сельмонза исть няе, мезе тиендевсь кабинетсонза. Аньцек марязе, кода пилеваксонзон эса норхциясть санонза.

Сараева кеподезе прянц и сембе нинге авардезь эстейнза пшкядсь:

— Мес сембе обжайхть эсон? Кинь кинц мон перяйне?

— Ломанень паваз ёрат нельгомс, — отвечась Шиндина копорьбяльде ащезь. — Акат-сазорхт унжань котфт кодатада Порговть перьф, пейнь суксокс каратада эсонза. Аньцек мезевок аф лиси!

— Варвара Степановна, мес тяфта корхтат? Киндиге аф эряви тонь павазце, — сельмоведьбачк корхтась Сараева. — Эряк-раштак, кода маштат, но кадомасть моньге эряма, тяда рахсе монь горязень лангса. Алексейда башка тейне кивок аф эряви.

Алексейнь лятьфтамда меле, бта оноц сязевсь Шиндинать, ужялькс арась Сараева. «Кали мон зря обжайне Галянь?» — арьсезевсь, и лангу лиссть сельмоведенза.

— Мон, Галя, лангсот ашень рахсе, — сютямфста пшкядсь Шиндина. — А кда корхтат Алексейть колга, тянь тиезь моньфтемон.

— Сембе содасть. Сембе вихца прважасть тяста Алексейнь‚ — и тага урякодсь.

Шиндина эрязста нежедсь Сараевати‚ кундазе сонь лафтуда и муворувонь вайгяльса эняльгодсь:

— Простиндамак, Галя. Мон ашень шарьхкоде... зря обжайхтень. Виноватан. Ну лоткак! Лоткак! — каясь стаканц ведть. — На сипть и лоткак авардемда.

Сараева нинге сяда пяк аварьгодсь. Ков обжаф ломанть сяда ужяльдьсазь, тов сяда лафчеми сонь седиец.

— Галя, простиндамак, — Шиндина шашфтсь стул, озась ваксозонза. — Мон ашихтень шарьхкоде. А Бугровть колга мон содан аньцек сяконь, што сон тусь бригадиркс вастста сярядеманц сюнеда. Жалбась, что кодама-бди пря урма музе, Бунчиксь макссь справка тейнза. Да вдь тонценьге кизефнедязь: валга изеть аза эста.

— Мезе мон? Мон дураконян и сяка. Лияста эстейне аф радан, — корхтась Сараева и сялгозень сельмонзон фкя вастс: мезе-бди аф ламос арьсесь. — Монць юмафтыне павазозень...

— Кельгсак сонь?

— Кельгса, пяк кельгса! — станяк, фкя вастс ванозь, отвечась Сараева.

— А мяляфтсак, мезе азоть тейне сонь колганза? Мярьготь, што седисот «октябрь». Юкстайть? Тя тонцень валсь.

— Афкукс монцень. Да, деряй, тон аф содасак: стирень седись — аньцема, фалу ару. Седице рязы, а трватне пеедихть.

— А мес шобдаста якат-шяят?

— Мирде вешендян, — васенцеда пеедезевсь Сараева, — аньцек тят пель, аф тоннеть эса. Мрдафтость меки Алешказень. Няйсак, соньфтемонза шары пря учакс арань, шаран, а тевс аф кярьмодеван. Азк, кода тиемс?

— Тяни вов няйса, што кельгсак сонь, — пеедезевсь Варвара Степановнаське.

— Мон монць аньцек тяни кармань содамонза, што кельгса. Мзярда тусь, бта юмаезе юмась, кши паморькс потмозон аф моли.

— А кода вдь инголе тиендеть мархтонза!...

— Тиендень. Всякай тиендень, беднайнять, мархта. А сон кирдсь. А мезе тиян? Стамка монь обуцязе, дураконян. Сон панци мельган, а монь седиезе котькоди, рахсемазе сай лангозонза. Тяни ни стане аф карман тиендема: кадса ся обуцязень. Кодак васедян мархтонза, монць паласа...

— Мрдафтоманц колга ванды кой-кинь мархта корхтан, пади, мезевок лиси.

— Ниле кядьса-пильгса карман шашнема инголет, аньцек идек тоста Алешазень, — шабакс тиевсь Сараева. — Тямак када павазфтома. А Порговцень колга мезевок тят арсе, — якстерьгодсь Сараева, — аф ламняда дурачендань и сяка. Седисон ёфси ашине кирде, — виде ваймот азозе. — Аньцек сельме кайсень лангозт. Зинаньконди тожа азыне эстокиге: «Поргов тейть, глупай стирня, аф ялга. Месенди мархтот инженерсь?» А тяни, няк, мянь Саранскяи ворьгодсь тяста...

— Мзярда? — кати дивандазевсь, кати кенярдсь Шиндина.

— Эстокиге, кодак кулезе свадьбантень. Ёрай арамс инженеркс или врачекс. Эста, корхтай, сяда курок муян эстейне сяда цебярь Поргов, — и кайги вайгяльхть рахазевсь. Сон эрязста прощандась и кярьмодсь кенкш килети.

Шиндина лоткафтозе:

— Ожука, Галя, а кда тяфта тихтяма: тердьсаськ тяза Бугровть, азсаськ, што тон молят мархтонза ЗАГ-су? Эста вожиясонга сон аф кирдеви тоса!

Ответонь вастс Сараева кярьмодсь Шиндинати и тангодста-тангодста палазе.

— Ну, эста ватт, Галя, каба сире Бугровсь пилькнень афольхцень синде. Сон кяжиясь лангозт пяк, тон атять мянь седиезонза пачфтить.

— Кулендине, содаса, — нинге сембе рахась Галясь. — Кда лиси тевоньке, васенда анан прощения сире Бугровть кядьста, сон вдь мянь тнярс афолемань няй светть лангса, пчкяль туркс сязелемань.

Кафцьке весялатольхть, юкстазь ни сялондомаснон. Шиндина прважазе Сараевать и радовандась кати Сараевать инкса, кати тяфта ужяльдезе Алешать.