38

Мотороремонтнай заводонь партийнай бюрось райкому кучсь кафта коммунистт, штоба проверямс Леховть лангс кучф сёрмать, конань эса тяштьфоль аф аньцек Леховть кальдяв работанц колга, но и апрякавсь заводонь партийнай организациясь, мес кучсь кальдяв коммунист колхозонь председателькс. «Леховсь, кле, розарясы колхозть, рахсефтьсы ломаттнень инголе рабочайнь честть».

Заводонь парткомть секретарец тя сёрмать получамда меле корхнесь обкомса, и тоса мярьгсть кучемс району коммунист, ваномс, кода работай Лехов и мес тяфтама сёрма тяштьф лангозонза.

Проверяма кучфтольхть парткомть секретаренц заместителец, сире рабочайсь-пенсионерсь Макар Евсевьевич Золотушкин, кона лама кизода инголе макссь Леховти рекомендация партияв сувамста, и заводонь завкомть председателец, войнань инвалидсь Тимонин, конань кядяла Лехов нинге шабакс тонафнесь заводса работама. Ня кафцьке ломаттнень инголе кассь Лехов рядовой рабочайста цехонь начальникокс.

Заводонь представительхне васенда сувась райкому и примафтольхть кода эряви. Варламов ламос кизефнесь заводонь тефнень колга, тоса мярьгсь:

— Пади, меки сявсасть Леховонтень? Минь нинге фкя тяфтама штуканьке ляды.

Золотушкин ашезе шарьхкоде, афкукс корхтай райкомонь секретарсь или рахси стак ащемда, но изь карма ламос арьсекшнема, сонць кизефтезе Варламовть:

— Омбоцесь тожа председатель?

— Мезень председатель? Чиноц стама, што кядьса афи сатови: эмтеэсса главнай инженер. Сон ськамонза тейнек саты, а тинь сявость эсь ялгантень, тейнзонга ули пара и тейнеконга аф кальдяв.

Золотушкин арьсесь педа-пес куляксамс «омбоцеть» колга.

— Интереснай ломанць‚ — азондсь Порговть колга Варламов, — эрь недляня эвондай од планоц, мезе да мезе муй стама, конань сюнеда сави нервничендамс. Пцтай фкя песта керфт тиннеть мархта... — сон панжезе сейфонц, таргась тоста папка и путозе Золотушкинть инголи. — Ня каготтне тинь представителентень лангс сёрматфт, лувость.

Золотушкин сельмовок изь шарфта папкать лангс, саворне отвечась туста усанзон пачка:

— Пади, васенда минь мольхтяма колхозу, тоса ванцаськ Леховоньконь кинзон-янонзон? — и варжакстсь аф райкомонь секретарть лангс, а ялганц ширес, бта сонь кизефнезе тянь колга.

Варламов приметазень Макар Евсевьевичень малость якстерьготф сельмонзон, кафцьке сельмужензон эзда кафта шири явф мянькснень, пяк алу тозердаф кургужензон. Кати атять строгай ликоц, кати сонь валонза бта палы цятка путсть Варламовонь потмос.

— Колхозса тяконь жа азсазь! Ня документтне тоста кучфт. — Сон стясь и аф содамшкас полафтозе вайгяленц: — Леховть коласть тинць. Мезенди тейнза максость автобусть?!

— Максоськ аф тейнза, а колхозти‚ — пшкядсь Тимонин.

— Мон аф корхтан, што зепозонза путость. Но кизоньберьф арни лангсонза, ускси стирьхть и синь мархтост юмафтозе ёненцка; сембе мазы стирьхненди тиевсь женихокс. Тапарясь мархтост. Ня шитнень сонь сюнедонза колхозста тусь целинав инь цебярь доярканьке.

— А Леховть рьвац, Елена Петровна, содасы тянь? — станяк спокойнайста кизефтезе Золотушкин.

— Кода аф содасы! Велеса, содасасть, кода эрси! Тяса кшняк, а велеть омбоце песонза тейть ювадихть: «Ульхть шумбра!» Елена Петровна, беднайсь, визькснень эзда кадондозе Леховть, тушендсь ошу...

Мзярда Варламов азондсь Леховть колга, Золотушкин апак лотксек шерьфнезень усанзон: то вадерязень синь, то кепсезень вяри, меколи изь кирде и нинге сяда саворне, но аф спокойнайста азозе:

— А мон лиякс содаса тя тевть. Минь парткомсонк корхнемста Елена Петровна кальдяв валня изь аза Леховть колга, сон ёфси лия азондсь... Ну, саты, а то минь сплетнянди ётаме, тяфта корхнихть аньцек кувака кяль аватне. Азость, парторганизация тоса ули?

— Парторганизация ули. — Варламов яфодезе кяденц. — А мезе тии тейнза ся партийнай организациясь? Лехов секретарнек-коммунистонек шарфнесыне суронзон перьф. Мезе кельги, сянь и тии. Тунда сявсь да рамась рысак, арни лангсонза, кода баяр.

— Рысакть арнемс и рамсесазь, — шутендась Тимонин. — Озонкшнемс, што ли, лангозонза?

Ня валхне нинге сяда пяк крьвястезь Варламовть. Но сон маштсь прянц вятема, отвечась Тимонинти тожа пеедезь. Золотушкин тага лоткафтозень шуткаснон:

— Минь тага аф сянь колга корхтатама. Ну, рысаксь кадк ули рысак, пади, и зря рамазе, сявость и мифтость жуватать. Но мезе корхтайхть Леховть тевонзон колга тостонь коммунисттне? Кизефнесть синь?

— Деряй, весть корхнефоль? — Варламов озась вастозонза, няеви, што тага исть ту мялезонза упрямай атять валонза. — Кие аньцек эздонк тоза изь яка, мезе аньцек ашеме корхне Леховти. Мзярда сембе колхоснень эса анокласть сёронь урядамати, тоса эсь ётковаст тише кармасть явондома. Мусть туфтал: кемонь процентт сявихть. Савсь максомс указания, штоба кочкамс тишеть меки. Или вов тага: кизефнеса Леховть, мзяра пеелем и тарваз аноклаф нумати? Лехов аф содасы.

— А мезенди синь? Пеелепнень? — кизефтезе Тимонин.

— Кода мезенди? А кда машинатне аф кармайхть работама, розсь эряви прафтомс? А Лехов бта нинге заводса работай, механизаторскяй настроенияса эряй. А мекольдень пингть, содасасть, мезе тись? Сявсь и апак кизефнек ушедсь животноводческяй городоконь строяма, кеподсь банкаста ярмакт, сатсь миньфтемонк вирь и кармась строяма.

— А, деряй, тя кальдяв? — пшкядсь Золотушкин. — Мон содаса, заводстонк макссть тейнза водопроводнай трубат.

— Тя кальдяв, пяк кальдяв! Сразу кармась строяма ниле картт. Колхозть нолдасы шуди ведь ланга.

— Тяфта можна кажнай хозяйствать колга арьсемс, — Леховть ширес арась Тимонин. — А мезе корхтави партиять сентябрьскяй Пленумонц решениянзон эса? Тоса мярьгондеви строямс...

— Милайняй, —эстокиге фатязе Варламов, — деряй, сразу сембонь тиемс? Партиясь мезе корхтай? Тейнек эряви сёра и сёра. А сай пинге, кошардсамазь партиясь кардонь строяма. Эста афолеме карма строяма, да мярьгихть. А синь мезе тиендихть?.. Леховть колга минь улихть стама материалоньке, конатнень коряс можна тевть шарфтомс ёфси лиякс, тердемс бюров и сявомс партийнай билетонц.

Тага шерьхкозевсть Золотушкинть усанза:

— А кодама преступлениянкса?

Варламов кяженьбачк стясь вастстонза и, кода фалу тиенькшни, шашфтозень ингольденза каготтнень, карандашть:

— Ашень ёра азондомс кой-кона тевонзон, штоба синь афольхть пачкоде заводонь партийнай организацияти, но, вдна, савихть. Аф кунара сонь судендазе народнай судсь...

— Мезенкса? — сембе ронгоц трнатозевсь Золотушкинонь.

— Тинь содасасть, што советскяй судсь стак аф судендакшни ломатть. А сонь судендазь пцтай вредительстванкса, — Варламов азондозе, кода Лехов видесь тунда тозер. — Фактически, тя вредительства, колмогемонь сисемце кизоня тянкса... Сяда башка, кельгома ялгат, Лехов тяштсь сёрма Москуву, вешсь, штоба тракторхнень мимс колхосненди. И бта располох эрьхтсь районть келес... Кемоньшка ши пульхкоме сёрманц перьф. А Цекась анай ответ, кизефни минь мяленьконь. Так вов, аньцек тянкса панемаль партияста...

Варламов изь кенерь аделамс азондоманц, Золотушкин лоткафтозе:

— Киньге кучтада мархтонк колхозу?

Обедта меле заводстонь ялгатнень мархта тусь сонць Варламов. Сувасть колхозонь правленияв. Тяса васьфтезь аньцек Белкинть и счетоводть. Синь азозь, што Лехов тусь вири: ёрай сатомс пичень шочкт.

— Мезе тага сась прязонза? — рахазевсь Варламов, сонь мялезонзоль, што токадсть стама ёткть, мзярда Лехов кадозе колхозть сёронь урядамста.

Белкин варжакстсь аф содаф ломаттнень лангс, кармась азондома:

— Карттнень вельхтямс аф сатни шифероньке, ёратама тиемс стружкат.

— Ме-е-зе? — таргазе вайгяленц Варламов и варжакстсь Золотушкинть лангс. — Няйсасть, мезе тиенди тинь мудрай представителенте? Ломатть урядайхтъ сёра, шинек-венек заботендайхть, штоба куроконе пяшкодемс государствать инголе васенце заповеденьконь, а сон арни вирьге, шуфтт дубовай. Вов фалу тяфта.

Золотушкин кизефтезе Белкинть:

— Заводста машинат састь тейнть лездома?

— Састь, — нюрьхкяняста отвечась Белкин и ункстазень конакнень пильгста пряс.

Варламов аньцек тяни лятьфтазе, што ашезень аза, коста састь ня ломаттне, и азозень Белкинти.

Кодак кулезе счетоводсь Ефимкась, кона тя пингс комадонь прят работась кагодонзон вельхксса, кит саф ломаттне, кеподезе прянц, стясь вастстонза и нежедсь шумбракстома васенда Золотушкинти, тоса Тимонинти:

— От души рад привествовать моданьконь лангса минь уважаемай председателеньконь сире ялганзон. Думаю, што тинь погостите аф фкя ши тяса? А что касается квартиры и продуктов, то сембонь беру на себя.

Мзярс Ефимкась конакненди азондсь цебярь валхт, Варламов кизефтезе Белкинть, кода работайхть комбайнатне. Золотушкин тожа шарфтсь Белкинти:

— Ну, мезе тихтяма? Карматама учема? Или...

Белкин азозе, што Лехов сай аньцек веть. Но счетоводсь ашезень када ламос арьсема, шоворсь корхтамаснонды:

— Если не хотят синь ваймамс, то мон готов няфтемс эсь хозяйстваньконь.

— Мезе шта ёратада няфтемс? — пеедезевсь Варламов. — Пади, рысаконтень кильдьсасть и карматада конакнень арнефтомост?

— Прошу прощения, — обжавсь Ефимкась. — Мес, Степан Иванович, тяфта корхтат минь колганк? А хотя ба ушедсаськ сянь эзда, што кильдсаськ рысаконьконь, озафтсаськ синь и васенда прокатнем механизированнай токозонк. Ну, а меле, допустим, прокатнемся кукурузаньконь лангс. Содасасть, мезе тяни творится ся паксясонк? Моря тоса, аф кукуруза! Тя видева сон‚ — крганц туркс ётафтозе кяденц. — Ну, а тоста можна молемс животноводческяй городоньконь ванома. Можем няфтемс артезианскяй эшиньконь, водопроводоньконь. Тинь няесть, мезе тоза тиф? Колхозоньке лисенди на большую дорогу.

Варламов изь карма учема, мзярда сон аделасы корхтаманц, пшкядсь:

— Пади, нинге Мокша ляйнтень няфтьсаськ?

Счетоводсь изь абонда:

— Ляйсь аф минь, Степан Иванович, тя дарсь природать, а мон хочу похвалиться сянь мархта, мезе сотворил умом и телом колхозсь Леховть пингста.

Белкин ащесь и мзолдсь счетоводть пялес рузонь, пялес мокшень валонзон лангс, но сембода пяк тусь мялезонза Ефим Михайловичень спорямац, пяк парста ладясть баснянза Варламовть пингста. Макар Евсевьевич кулхцондсь и кенярькшнесь: пара валхт кульсь Леховть колга.

Вальмять алу лоткась Салмовть машинац. Кодак сувась сон правленияв, эстокиге кармась кизефнемост инжихнень: кинь синь и местема састь. Няевсь, што сонь тяза самац аноклафоль.

Варламов тага кизефнезе Белкинть, мзяра гектар урядасть розьда, мзяра сёра ускстсь государствати. Кодак кулезень цифратнень, нльне эводсь:

— А коса жа тяляф сёронте? Мес кржа ускоде государствати?

Белкин азозе, што сёрось мараф утому, аф кенерькшнихть ускомс элеватору. Варламов шарфтсь Золотушкинти:

— Кульсасть, мезе азонды парторганизациянь секретарсь? Пцтай сембе розьсна урядаф ни, а зёрнать кирдьсазь утомса, государствати пцтай мезевок аф усксихть, а Лехов сявсь кафта машинат и тусь вири. Тя вдь антигосударственнай практика. Тянкса партияста панцекшнихть. А коса Поргов? Сон тяса уполномоченнай.

— Сон тусь Пичекуру‚ — аф сменадазь азозе Белкин. — Тоса мезе-бди тиевсь фкя тракторснон мархта, звонясь Офтин.

— Няйсасть? — сядонга кяжиясь Варламов. — Сяцка тусь тяста, а минь надиятама лангозост. Вов фалу тяфта и работайхть.

Золотушкин и Тимонин мезевок исть кашторда, аньцек кулхцондсть Варламовть и Белкинть эса.

— Паксянь тевоньконь колга, Степан Иванович, тяда пичеде, синь молихть лац-ряц. Тоза аф Лехов, аф Поргов — аф эрявихть. Сёрось пцтай урядаф, а государствати заданияньконь ня шитнень тожа пяшкодьсаськ.

— Сейчас ванца, кода молихть тевонте‚ — гразясь Варламов, — может, сафтада тердемс райкому, минь тоса курок азсаськ, кода молихть тевонте. Вов тейнть кафта шит срок, тя пингть пяшкодесть планонтень. Аф тисасть тянь — пеняцяда эсь лангозонт. Тяфта азк Леховтиге.

Белкин содазе, што кафта шиста коданга аф пяшкодеви планцна: аф сатыхть машинасна, но Варламовть каршес корхтама изь карма, содазе, што тя пингть тейнза перечендамс аф эряви.

— Шарьхкодить заданиять? — тага кизефтезе Белкинть и шарфтсь рабочайхненди: — Ну, ялгат, мархтонт тяза ляды Салмов. А рысакснон лангс тяда озсе, кда мяленте ванфтомс прянтень-пильгонтень. Салмовть ули машинац, а якада сонь мархтонза, — шутендась тумстонза Варламов. — Аряда, ванцаськ марса токснон.

Токть ванома Салмовть машиназонза озась счетоводське.

Току тя пингть усксть паксяста сёра. Сембе исть кашторда, ванцть, кода сёрось куци элеваторхнень вельде и видеста туй утопненди. Марнек токть лангса шарсть Бугров атяда башка аньцек ниле ломатть.

Золотушкин и Тимонин фкя-фкянь ётазь кизефнезь Варламовть токть работанц колга. А сон мокнась-мякнась, но кода эряви мезевок изь азов: сон сонць тя токть лангс сась васенцеда. Азондыкс арась Салмов. Сон фалендась, што токть тиезе МТС-нь главнай инженерсь и тяфтама токта зонаса кота ни‚ што сембе детальхне тефт мастерскойса.

Варламов яфодезе кяденц, озась машиназонза и тусь.

А Белкин и Салмов мянь шоподемс усксезь инжихнень колхозть паксява и хозяйстванц эзга. Аньцек поздна илять Золотушкин и Тимонин васьфтезь Порговть и Леховть. Синь пингстост правленияв тертьфтельхть колхозонь сембе коммунисттне партийнай собранияв. Золотушкин лувозе Леховонь лангс райкомста кучф сёрмать.

Лехов ащесь аф кула, аф живой, вестенге ашезень кепсе сельмонзон. Сон виздсь колхозонь коммунисттнень и заводста саф ялганзон эзда. Ваномок Золотушкинть и Тимонинть шири, Лехов лятьфтазе кунардонь партийнай собраниять заводса‚ мзярда сон ульсь примаф партияв. Эста тяфта жа ащесть президиумса Золотушкин и Тимонин, и корхтамаське ульсь сонь колганза. Но эста шназь сонь работанц, а вов тячи кати кармайхть верондама ни тейнза, кати аф? Вов тянкса шавсь сон седиец.

Собранияса пцтай сембе коммунисттне корхтасть Леховть колга, азондозь сонь тевонзон, но кивок ашезе апряка кальдяв работанкса.

Меколи сявсь вал Бугровсь. Сон сурса гразявсь Суксовть лангс:

— Тя тонь кяльсь, тон пачфтить заводу Леховть колга сембе дрязгатнень.

Салмов изь кирде и азозе, што заводу тяштезе сёрмать аф Суксов: сёрмась официальнай, кучф райкомста.

— Ну, райкомстиге токась сонь кялец, — кяжедсь Бугров. — Тя минь ингольдень председателеньке, — шарфтсь Золотушкинти и Тимонинти. — Прась кургстонза потясь, вов и пичеди тянкса. Аньцек Леховть пингста кармась тиевома порядка колхозсонк, ломань рядс араме...

Срхксесь корхтама Леховть колга Салмовське, но сон аньцек кенерсь азомс, што Лехов моли райкомть линиянц каршес, коммунисттне шумназевсть, што тя сембе васькафнема. Салмов озась.

Золотушкин и Тимонин шарьхкодсть, што колхозонь коммунисттне аф стамот, кода корхтась колгаст Варламов: кивок киньге аф шарфнесы суронзон перьф. И кизефтезь коммунисттнень Леховть судендаманц колга.

— А протоколоньконь ашезе няфне тейнть Варламов? — кизефтезень синь Белкин. — Тя тевть минь ванондоськ партийнай собраниясонк. Кда эряви, мон няфтьса протоколоньконь.

Тимонин тяштезе блокнотозонза, штоба кизефтемс тянь колга Варламовть и ваномс коммунисттнень протоколснон.