37

Кунара ни ашельхть тяфтама пси шит, кодапт ащесть тя кизонь июльста. Кодак няфти пря шись шобдава и мянь мадомозонза туця пакш аф тихтетькшни менельти. Аньцек веть полафневи погодась: коста-бди кеподи варманя, пани тяза коволнят, рангозеви атямсь. То фкя, то омбоце велеть вельхксса почердай кой-мзяра путерькскя, и шобдавати тага штави-нардави менельсь.

Аф озадонь седихть васьфнезь тяфтама шобдаватнень колхозникне. Сире атятне учсезь, мзярда ина кармайхть шулкодема пиземонди пакарьсна, сяда оттне ванцть пинеснон мельге, аф кармайхть ли кеворькшнема кить лангса. Вярьге лиендсть пзьгататне, конат тожа няфнезь, што пизем аш месть учендомс.

Варламов лоткась верондама барометрти. Эрь шиня сай кабинетозонза, чакасы приборть лангста клянцекть, а стрелкась бта педсь фкя вастс, фалу няфни «Ясно». Кда улель тяни Варламовть правац погодать лангса, тячикиге нолдафтоль пизем, эшеньфтельхце паксять, штоба тяшкава афоль эряскода кенеремс розсь. Но тянди сонь виец изь сата, псить эзда розсь кенерсь пингта инголе, а кой-кона колхосне нинге исть кенере анокламс сонь урядаманцты. Варламовти савсь ладямс районцтонь сембе тефне природать капризонзон коряс: эряскофтомс сёроть урядамац. Райононь сембе партийнай активсь ульсь кучф колхозга уполномоченнайкс. Тя ульсь Варламовть сембода оцю надияма вастоц эрь оцю тевть ётафтомста.

Омбоце шиня обедта меле Поргов азозе мастерскойнь рабочайхненди, мезе эряви тиемс маластонь пингть, и эрязста, кода мярьгсь Варламов, тусь «Якстерь тяште» колхозу. Нинге ичкозде Карга велеть эзда сон няезень колхозть одс строяви ниле кардонзон. Поргов мольсь тоза. Фкя кардть ваксс марафтольхть водопроводнай трубат. Карттнень эзда паксять ширес таргавсь кувака канава, конань тона песонза кафта вышкат. Поргов шарьхкодезе, што нят колхозть одс шувф артезаинскяй эшиенза. Сембе стройкать келес панжамкс пульхксть колхозникне: финцне алашаса усксесть доскат, шочкт, омбонцне шувсть карттнень перьф канават водопроводонди. Плотникне лаксесть и кепсесть карттнень пряс слегат и шочкт.

Поргов шумбракстсь ломаттнень мархта, кизефтезе председательснон. Колхозникне няфтсть вышкатнень ширес, азозь, што Лехов тоса латци водопроводнай трубат.

— Комсомолецнень мархта марса тонафнетяма од профессияс, — весяласта васьфтезе Лехов. — Ёратама арамс водопроводчикокс.

Канавать потмоса работасть ниле комсомолецт. Поргов содазе ёткстост Сараев Васянь.

— Шумбрат, слесарь-водопроводчик! — пшкядсь тейнза Поргов.

Вася видемсь, пеедезевсь:

— Ёратама минць тиемс...

— Кда ёратада, то обязательна тисасть! — петезень мяльснон Поргов. — Ня орёлхнень мархта манельста ковть валхтсасть.

Лехов кармась шнамост комсомолецнень, што цёратне, афкукс, орёлхт: мезе няфтят, эстокиге тонадсазь. Тоса шарьхкодсь, што Поргов сась аф кардснон ванома, а лия тевонкса, пшкядсь:

— Комбайнатнень ваксса нинге ашелеть?

Поргов азозе, што нинге косонга ашель, и сонць кизефтезе:

— Кода молихть тефне паксяса? Коса Белкин?

— Пцтай сембе розеньке прафтф ни, — фалендась Лехов. — Тоса азорондай сире Бугровсь. — И штоба афолезе уркста сонь Поргов, мес сонць тя пингть аф паксяса, поладозе: — Сон вдь монь заместителезе, и мярьгсь тейне, штоба мон паксянь тефнень инкса афолень пичеде. Ну и атя! Панда веляфты ськамонза! А Белкин школаса работай, столярничендай. Тоза панчтама идень сад. Аде, суватама школав.

Школати молемста Лехов стряндась, што сон нинге ашезе няенде Порговть сяда меле, кода ся рьвяясь, пшкядсь:

— Да, Борис Константинович, поздравляндате! — кемоста люпштазе кяденц. — Пара, што семья пуропнят, тяни тязк ни лядат?

Пачкодсть школати. Сонь фкя песонза работасть Белкин и нинге фкя плотник. Перьфкаст целай мар инзетькс: фкя-фкянь лангс марафтольхть алня пильгоня моркшт и озаманят.

Школаста лиссь Елена Петровна — панчфу платьяса, ланганза сенем фартук, илештьф кядьсонза кирдсь пуру левошт.

— Идень сад, Борис Константинович, ёратама панжемс, — весяласта пшкядсь сон.

— Значит, од кудонь бозас сатама, — пеедезевсь Поргов. — Пара, што панчтада идень сад, тя пяк эряви вели.

Поргов и Лехов азозь Белкинти, штоба аделальхце тевонц и куроконе молель колхозонь правленияв. Синць тусть инголи. Молемста Лехов азондозе‚ кода Белкин агитировандазе сонь рьванц арамс идень садти заведующайкс:

— Моннесь ламос атказакшнесь, мярьгсь, аф содасы тя тевть. А Белкин и корхтай: «Моньге тядязе ашемань шачфта артиллеристокс, а молень фронту, содасак, конашка пушка макссть тейне ялганень мархта? Узерь, корхтай, тожа кода эряви ашень кунце кядензон, а кда эрявсь — арань плотникокс».

Поргов мзолгодсь, лядьсь мялезонза, кода сонць корхтась Белкинть мархта, мзярда васенцеда сась тя колхозу. Но Леховти тянь ашезе азонда, аньцек мярьгсь:

— Молодец Белкин, машты агитировандама.

Белкин сатозень синь нинге молемста. Кой-мзярс калякондамда меле Поргов озазе, што райкомсь веши лоткафтомс карттнень строямаснон и сембе ломаттнень кучемс паксянь тевс.

— А мезе тоса сембонди тиендемс? — кеподезень лафтувонзон Лехов. — Нльне тинголангса аш работа. Эк, кодама механизированнай ток тиеть тейнек. Сембоц ниле ломатть работайхть, а сёрось сонць моли утому.

— А паксяса?

— А мезе паксяса? Нинге кафта-колма ши, и розсь ули урядаф.

Белкин эсь шура корхтафсонза тожа кармась шнамонза токть. Поргов эстокиге полафтозе корхтамать:

— Ся комбайнась, конань кучеськ меле, работай?

— Сон инь надияма вастоньке, — азозе Лехов. — Ужели тя комбайнась тиф сятнень эзда, конатнень минь мархтот няеськ палакснень потмос ёрдафста?

— Сон... Эрьда-ка арттама ваномонза...

И колмоцьке тусть машинаса паксяв комбайнатнень ванома. Ётамбачк ванозь колхозть кукурузанц. Ингольдень галош паксясь, кодамокс Поргов няезе, мзярда ванозе комиссиясь, тяни заняфоль бта сянгяря вирьса. Лехов кармась азондома, што аф кунара сашендсь тяза Чуйкин, якась кукурузань паксять кувалмова и лотксек тяшнесь блокнотозонза.

— Мон чаянь, академик якай паксяванк, — рахазевсь Лехов. — Чудной Чуйкин ломанць. Кядьстон пефтома кизефнесь, мзярда кукурузать видеськ, мзярда наземондаськ, мзярда оду лазондынек ряд ёткнень.

— А омбоце шиня тага ниленест сашендсть‚ — пшкядсь Белкин. — Парторганизациянь секретарьсна, кафта звеньевойхть и агрономсна. Синь тожа ламос шарондсть паксять перьф.

Поргов шназе Чуйкинть:

— Сон кода меш. Ся эрь панчфста нектар кочкай, а тя эрь тевста опыт сяви... Вов кодамкс эряви улемс председательти.

Тяста синь тусть комбайнатнень малас. Ичкоздень вирнять эзда сявомок и мянь велети молемс таргавсь колхозть розь паксяц. Нуф ряттнень ёткова, бта котфонь кодай якстерь унжа, шашнесь комбайнась. Мзярда малаткшнесь ни, Лехов азозе, што тя машинаса работай Бугровть унокоц, Митькась.

— Мон содаса сонь‚ — азозе Поргов. — Тя самай сон эняльдсь кучемс целинав?..

Колхозонь руководительхне шнасть комбайнерть эса, пяк лац, кле, работай. Но кодак нежедсть малати, комбайнать пряста валгсь лия, ёфси од цёра.

— А коса сонць? — нльне эводсь Лехов.

Цёрась шарьхкодезе, кие ся «сонць», пшкядсь:

— Ваймяй.

Белкин и Лехов абондсть. Вдь аньцек шта шнасть комбайнерть эса, а тяни ватт, мезе лиссь: сась уполномоченнай, а сон шинь кучкать мадсь удома, машинать кадозе пцтай аф опытнай помощниконцты.

Комбайнерть помощникоц шарькодсь, што Леховть и Белкинть аф мялезост ся, мес аш тяса комбайнерсь, кармась азондома, што шить машинась моли парста, тёждяста, сяс сон тяляй комбайнерфтома, а илять и веть кармай работама Митькась.

— Кода веть? — дивандазевсь Поргов.

— А минь ветенге работатама. Бугров атя кошардомазь. Васенда кафта вет мархтонк работась сонць, а меле кошардомазь минь.

— А ляды комбайнерхне работайхть веть?

— А кода мле. Мес синь, или аф стамот жа машинасна? — азозе цёрась и сяда смелста варжакстсь главнай инженерть лангс.

— Ну и кода моли веть машинась?

— Тяфта жа, кода и шить. Тячи шобдава, виде, шинь стяма ёткть кафтошка част шорясь расась, а меле, кодак кеподсь шись, тага работай.

Поргов кенярдсь, фатязе цёрать кяденц, кемоста люпштазе и мярьгсь:

— Спасиба тейнть, спасиба! Тинь содасасть, мезе тиеде! Тинь сембонди моронь кукафтыкс араде! Молодецтада!

Помощниксь весялгодсь, толнякс крьвязсть сельмонза, нльне кармась фалендама:

— Тя паксять минь сразу сандьсаськ, а меле ётатама тозерти. Ну, мон туян, — няфтсь комбайнать шири.

Машинась уназевсь и срхкась вастстонза. Поргов, Лехов и Белкин вельхтявсть розь ювса, кона тюжаза качамкс лиссь комбайнать сортировканц эзда.

Мзярс Поргов корхнесь помрщникть мархта, Лехов и Белкин ащесть вакссонза, бта свидетельхть, а тяни весялгодсть, синьге эсь ётковаст кармасть шнамонза комбайнерть помощниконц: «Тя шабать эзда лиси цебярь комбайнер!»

— Аляка лефкс, — мярьгсь Белкин, — литай сонць Ляксейсь. Тя содасак, кинь цёрась? — кизефтезе Порговть. И сонць жа азозе: — Ся Марфать‚ конань кудонц петеськ. Ёжу шабась, ёжу. Бугров атя содасы, кодапт кочкамс механизаторкс, тя вдь сон ёрасы нолдамс тевс цёрокшть, няйсак, путозе работама эсь уноконц мархта. Нинге колма тяфтапт тонафты, сембонь алясна шавфт войнаса, сембонь путозень работама эсь цёранзон мархта, а сёксенда кучсыне тонафнема механизациянь школав.

Поргов кенярдсь Бугров атять инкса.

— Ванат, кодама ломатть улихть велесонт? — корхтась сон Леховти. — Вов кодама седи шави атять мяштьса!

— Атясь пара, — эстокиге пшкядсь Белкин, — сон вдь сонць ётась пяк стака ки. Коллективизациянь кизотнень пингста кулакне кафксть сонь плхтазь кудонц, цють ашесть пал шабанза. Васенцеда плхтазь, мес сон сембода инголи сувась колхозу, а омбоцеда, мес сувась партияв.

Бугров атянь сатозь тинголангса. Поргов кемоста люпштазе казяма кяденц:

— Оцю тев тиеть комбайнатнень работаса и мезевок аф каштордат, Семен Прокофьевич.

— А мезе азондомс и кинди? — аф смендазь отвечась Бугров и шарфтсь Леховти: — Монь койсон, Илья Борисович сембе машинатне эрявихть кучемс элеватору сёронь усксема: утопне пяшксет.

— А комбайнатнень эзда мезьса усксемс?

— Тяза кильдемс сембе алашатнень. А то вов уполномоченнайське кармай сюцема.

— Да, да, — фатязе Поргов. — Сёрось эряви прважамс, а то Варламов каяфтсы кеденьконь...

Кодак Поргов лятьфтазе Варламовть, Бугров эстокиге кизефтезе сонь:

— Борис Константинович, мес тяфта райкомса тинь арьсесть тишеть колга? Мезенди меки кочкасть колхозникнень кядьста кемонь проценттнень?

Поргов азозе:

— Мон тянь колга мезевок аф содан. Но вдь закон ули: кемонь проценттне явомс колхозникненди.

— Закон ули, — пшкядсь Лехов, — а Варламов кучсь тяза телефонограмма, штоба явф тишеть кочкамс меки.

— И тинь кочкасть?

— А кода жа? Варламов тейне звонясь нинге телефонца, азозе, штоба васенда кочкамс коммунисттнень кядьста, ну и кочкаськ...

Поргов меки мрдась комбайнатнень вень работаснонды:

— Ванды или омботь илять пуроптсаськ тяза лия колхозонь комбайнерхнень, кадк ванцазь тинь работантень. Тя ули пяк оцю тев сембе колхосненди...