36

Корхнихть: псись кшни шяняфты, кельмось моря эйндафты. А кельгомась? Кие содасы кельгомать, аньцек сянди содавсь Порговть потмоц. Мзярда сашендсь тяза сонь тядяц, эста сембе тевсь корхтафоль рьвяяманц колга. Пцтай свадьба тифоль Шиндинатнень кудса. Аньцек ашельхть, кода корхнихть, казнет. Порговть тядяц палазень цёранц и сай пингонь рьвянянц, азозе тейст, штоба мирнайняста и шумбраняста эряльхть.

А тяни Шиндина бта дразнясь Порговть эса, кодама повсь туфталса тарксезе рьвяямаснон.

Тячи илять колхозста самда меле Поргов мольсь Шиндинатнень пяли, ёрась виде ваймот корхтамс свадьбаснон колга. Мекольдень шитнень сон марязе прянц стане, бта сонь седиец явошфтф кафтова. Варафтома изь сатне тейнза кожфсь, бта изезе эжне сонь шись. Шинек-венек, ков афоль моль, коста афоль са: мады ли удома, стяй ли вастстонза — фалу ёразе кулемс Варать вайгяленц, няемс сонь мазы серай сельмонзон. Варафтома работамста бта ашель види кядец, ярхцамста бта ашель куцювоц, ваймамста ашель ацаф вастоц. Коса ба афоль уль, мезе ба афоль тиенде, прясонзоль аньцек Варюшась, арьсесь аньцек сонь колганза.

И вов Пелагея Афанасьевна тейнза азозе:

— Вара аш кудса...

Порговть инголе мес-бди шобдалгодсть кудонь стенатне, циннязевсть пиленза. Пелагея Афанасьевна тага мезе-бди азсь тейнза, но сон мезевок изь куле, аньцек мярьгсь:

— Тага аш?

Пелагея Афанасьевна чаясь, мезе-мезе тиевсь овонц мархта, и эрязста максозе стиренц сёрманянц. Поргов кенярдсь, кодак лувсь аньцек фкя вал: «Учемак». И эстокиге лиссь саду. А седиец пиксось сидеста-сидеста.

Поздна илять сась Шиндина. Сонь пароль мялезонза: ученды эсонза Бориссь. Палазе и озась ваксозонза.

— Коза юмсеть?

— Кафта шит савсь возсемс тонь залёткацень инкса, — пеедезевсь Шиндина.

Порговть трнатозевсь ронгоц.

— Шарьхкодеть, кинь колга корхтан?

— Мезевок ашень шарьхкоде? Кодама залётка?

— Ну, тяк срмосе коняцень, тяк, — Шиндина лапазе Порговть щёканц, — тя мон стак. Кулить, мезе тись Каргин? Кодак омбоце шиня пачкодсь тейнза, што Лена тусь целинав, кадозе паксять кучкас тракторонц и тусь Карга вели. И коза, чаят, мольсь? Сувась видеста тонь ялгацень, Федять, пяли и тоса кармась шумнама, шавозень клоконзон моркшезост, пешкодсь: «Коза тиесть монь рьвязень?»

— Ёрдамаль Федяти ся анелькссь кудстонза и сяка.

— Ёрдамать ашезе ёрда, но Федять рьвац, Анна, кармась рахсема лангсонза, мезе-бди азсь «святоша» тядянц колга. Ся тусь тоста куду и кармась шумнама кудса. Кафта шит апак лотксек симондсь, авардсь и тядянцка панезе кудста. Исяк Сараевась звонясь тейне, анай лия тракторист, работамс аш кинди тракторть эса. Молень Каргав, муйне Каргинть. Сон моньге сюцемань, бта мон салаване прважайне Ленанц.

— А сон, афкукс, салава тусь. — Поргов азондозе, кода Лена авардсь тумстонза.

— Каргин сембонь содасы, тейтьке сатсь. Корхтай, Поргов явоштозе эздонза Ленань, бта тонга кельгсак сонь...

— Сяс, маряк, и тонга залеткакс тейне лувсак?

— Мон аф Ленать, сон мельгат изь панце.

— А кие панцесь?

— Бта тонць афи содасак? — пеедезевсь Шиндина. — Кие веньберьф мархтот ащесь Карга велень правленияса? Кие кудсот кроватцень вельхксс повфнезень авань муськомонзон?

Поргов крьвязсь. Сон пельсь, што Шиндина корхтасы Сараевать мархта, панжезь фкя-фкянди потмоснон.

— Минь тоса план тиеме, а сяда лама...

— Ну, ся ладна, — Шиндина сонць идезе Порговть, — Карга велеть мон стак лятьфтайне. А кудцень мельге ватт. Зинась срхкси мархтот лядомс удома, сон надияй, што тяни тонафтонзе ни аватнень эзда аф пелема, — и кайгиста рахазевсь.

Поргов келептезень сельмонзон, коданга ашезе шарьхкодь, мезень колга корхтай Варвара Степановна, трнатозевсь вайгялец:

— Мон эста кизефнине Зинать, мезенди кандозень эсь щамонзон. Сон мярьгсь: «Урядайне тонь муськопнень и эстейнге гладендань...» А удомать колга тон, Варюша, пяк ни... Сон аф стама стирнясь.

Шиндина пеедембачк педа-пес азондозе‚ кода Сараеватне акат-сазорхт корхнесть сонь колганза и кода Зина ёрась тонафтомс Порговть авада аф пелема.

— Тон чаят, стак Зинась повфнезень кудозт цебярь платьянзон и парьхциень комбинациянзон?

Порговське пеедезевсь и полафтозе корхтамать:

— Ну, а кода Каргинць? Мезе тяни тиенди?

— Сяс и тячи кучсемань тоза Варламов. Ускине меки «Мазы паксяв», мярьгсь, тяда меле аф кармай симондема. Но кати-мезе лиси, пяк ни шави пря Ленать инкса. Да, ужяль цёрась.

— Пара, хоть Каргинть инкса пичеди седице, — апряказе Поргов.

— Борис, тон тага сяконь колга?

— Мес сяконь колга? Мон ёфси лиянь колга: ванды аде ЗАГ-су!

Шиндина абондсь. Сон хоть и учсь: курок или аф Поргов тянь азсы, но аньцек аф тячи. Сяс нльне марязе, кода кельмось телац, кода пря боксонза шавсть саттне. Сон комафтозе прянц и пцтай тошказь кизефтезе:

— Мес ванды?

— А мес аф ванды?

Шиндина тага ламос изь кашторда, мянцезень суронзон. Поргов кундазе кавлалда:

— Аде пялонт, и корхтатама тядяцень мархта!

— Мон содаса, мезе сон азы‚ — станяк абонфста корхтась Варвара Степановна, — мярьги: кадость тя тевть сёксети.

— Аде, монць карман корхтама. Аньцек тон тят уль вероскакс. Аде.

Варвара Степановна изь атказав. Сон сонць изь стрянда, кода стясь вастстонза и мольсь ряцок Порговть мархта. Мзярда сувась кудозост и ваномаса няезе эсь лофтана шаманц, бта маштсь эрьгац и ашезе сода, коза арамс.

Поргов озась шраснон ваксс. И аньцек лиссь кухняста Шиндинать тядяц, озафтозе сонь эсь каршезонза.

— Мон, Пелагея Афанасьевна, сань стирцень кудалама, — смелста мярьгсь Поргов. — Бславамасть.

Шиндинать тядяц пяк кельголезе Порговть, тядякс корхнесь эрь мезне мархтонза, а тяни мес-бди трнатозевсть сонь суронза, и якафтозень кафцьконь ланга сельмонзон, ашезе сода, мезе азомс.

— Эрь, мезе кда, — и аф ламос ашемда меле, поладозе: — Кода Вара...

— Минь саме тонь кизефтемот, Пелагея Афанасьевна‚ — сяда смелста пшкядсь Поргов.

Варвара Степановна ащесь ширеса и мезевок ашезь кашторда, бта аф сонь колганза мольсь корхтамаське. Тядяц варжакстсь лангозонза кизефтезь и мторгодсь:

— Минь тянь колга нинге ашеме арьсекшне, мезевок ашеме анокла. А кда кадомс сёксети?

Поргов ащесь эсь валонзон лангса:

— А мезе анокламс? Ванды мольхтяма ЗАГ-су, а свадьбать арьсесаськ марса ни, сяда меле. Варюша, кода тон ванат? Кода тон арьсят свадьбат колга?

— Аде тяштьфттяма, — пшкядсь Варвара Степановна и лиссь кухняв.

Пелагея Афанасьевна изь карма споряма.

Омбоце шиня синь якасть ошень Совету и обедама састь Шиндинатнень пяли, кода миртть-рьват. Эсост учендсть ни Шиндинатнень раднясна и Зобов. Тяфта апак арьсек, апак аноклак тиевсь свадьба.

Райкомста киньге ашесть терне, пельсть Варламов эзда, сон нинге мярьги, што свадьбась шоряй урядамати.

* * *

Порговть рьвяяманц колга кулясь ёндолкс кфчядсь ошкять келес. Мзярда сон мольсь мастерскои, васенцекссь сувась тейнза Митричсь, кемоста люпштазе Порговть кяденц и поздравляндазе:

— Законным браком, Борис Константинович!

Поргов ашезь кенерь мярьгомс «спасиба», Митричсь поладозе:

— Директорсь тердензе, маряк, ёрай корхтамда машинатнень колга... Содак, што исяк илять «Маяк революции» и «Маяк коммуны» колхоснень эса лиссть стройста тифтень трактор. Мес-бди подшипниксна кольсть. Тяса колмоцьке комбайнатне петьфт, тонць ванцайть синь, и можнат кучемс колхозу: кадк райкомса азсазь, коза.

Поргов кизефтезень тракторхнень номерснон и ванозе профилактическяй ремонтонь планонц. Планть коряс кафцьконди эрявсь тиемс предупредительнай ремонт. Тяни сон пельсь: фкя-фкянь мельге кармайхть синневома тракторхне.

Поргов якась куду, щась лангозонза костюм и мольсь Салмовти. Ся тожа васенда поздравляндазе Порговть рьвяяманц мархта и‚ кати шутендазь, кати афкукс, апряказе, мес ашезе терне сонь свадьбазонза; тоса азозе, што илятъ синь кафцьконь тердезень Варламов райкому, улема, бюрос. И кизефтезе, содасы ли сон, што исяк синневсть кафта тракторхт.

Поргов азозе:

— Митричсь кучсь ни тоза участковай механикт, и курок монцьке молян.

— А местема? Райкомса ня тракторхнень колга мезевок аф содайхть. Аноклак бюроти.

— А мезе анокламс?

Салмов ноласта азозе:

— Обкомонь инструкторсь мезе-бди проверясь, мон кода эряви аф содаса тевть, колхозса шинек-венек вояван, но сон вдь эсь мархтот корхтась?

— Монь мархтон мезевок лац-ряц ашезь корхта.

— Ну вот, и монь мархтонга мезевок исть корхта. А тракторхнень петемаснон колга мезе корхтамс? Синь инголенга лотксесть и петневсть и тянинге сяка: савихть петнемс. Аф тонь планцень коряс петемс, так синць тракторхне няфтьсазь, мзярда эрявихть петемс. Няйсак, кафта тракторхне няфтезь ни эсь пряснон.

— Но вдь профилактическяй петемась и тя, мзярда машинатне лисихть стройста, аф сяка. Тя вдь тиевсь авария, — спорясь Поргов.

— Мон содаса, тейне тянь тяк азонда и аш мезенди азондомс Варламовтиге. Кли ни Варламов изь мярьге токсемдост тракторхнень, то лучи тихть сонь лацонза. Варламов эряви содамс.

Поргов сяда тов споряма изь карма.

Инженерть пряста шиньберьф изь лисенде бюрось, ашезе сода, мезе эряви анокламс. Надиясь, обедамста кизефтьсы Шиндинать, сон, маряк, содасы, мезе кармайхть ванондома бюроса, но сявок ашель ни кудса, кадсь тейнза сёрманя: «Варламов кучемань колхозу». «А кода жа бюрос?», — арьсезевсь Поргов и кармась лятьфнемонза, мезе мархтонза корхтась обкомонь инструкторсь. Сон оду ванозе профилактическяй ремонтонь планонц и сяда лама ашель мезе анокламс.

Илять, мзярда сон сувась Варламовть кабинетозонза, тоса Салмовда и Варламовда башка ашель фкявок бюронь член. Мельганза сувась обкомонь инструкторсь, и эстокиге Варламов азозе:

— Тейнек эряви ётафтомс экстреннай заседания, — варжакстсь инструкторть лангс. — Ванцаськ партиянь обкомть представителенц выводонзон. Мон корхтан Порговть жалбанц колга, конань сон тяштезе лангозонк Саранскяи, — «жалбанц» и «лангозонк» валхнень таргазень кувакаста, но вежлявста.

Ушедсь «экстреннай» бюрось. Васенда корхтась обкомонь инструкторсь. Сон азондозе, што проверязе Порговть докладноенц и мезевок страшнай изь му: тракторхне сембе вастова работайхть.

— Корхнень Салмовть мархта, — мольфтезе азондоманц инструкторсь, — сонга надияй машинатнень лангс. Конешна, Поргов ялгась ёрась тиемс цебярь тев, ваномс анокс сембе тракторхнень, но тя эряви тиемс аф тя пингть, а сёксенда, мзярда сембе сёрось ули мараф утому. Нинге мон ёран азомс, кда Степан Ивановичень вастса улель аф опытнай ломань, кона эсь пингстонза афоль шарьхкоде, афольхце лоткафта петемать, тячи корхталеме лиякс, тракторхнень пялесна ащельхть ба калафнефста. Вов коза вятель Поргов ялгать планоц.

Поргов шарьхкодсь, што нят валхне аф сонцень инструкторть, а тястонь: или Салмовть, или Варламовть. Но сон кирдсь, мезевок изь кашторда.

Кабинету сувась Чуйкин. Варламов озафтозе сонь ваксозонза и азозе, штоба ся кулхцондоль, мезе азонды обкомонь инструкторсь. Инструкторсь Чуйкинонь пингста кой-кона валонзон азозень оду, штоба ся шарьхкоделезень сонь выводонзон Порговть докладноенц колга. Меколи сон кармась корхтама Порговть шири:

— Минь аф мярьктяма, што Поргов — инженерсь аф опытнай, мекланкт, тя ломанть кядьста мезевок аф мяни, мон тяфтама вывод тиень эстейне, Степан Иванович, — шарфтсь Варламовти. — Но мезе сон ёрась тя планть тиемста — аф содаса, тянь кадк азсы сонць. Мезенди сон ёразень калафтомс нильгемонь тракторхнень?

Поргов кеподезень инструкторть лангс сельмонзон.

— Тя монь кизефнесамасть?

— Да, тонь.

Поргов стясь вастостонза.

— Кизоньберьф кодамовок ремонт машинатненди ашель, а ремонтфтома работамс лангсост аш кода.

— Но вдь синь сембе работайхть? Изь эряв тяфтама ремонт, кодама ёрать тиема?

— А мон корхтан: эряви‚ — кяжиста отвечась Поргов. — Тон содасайть техникать мельге якамань правилатнень?

— Ну вот, корхтак мархтонза, — инструкторсь шарфтсь Варламовти. — Сразу няеви, кие Поргов ялгась.

Варламов лоткафтозе корхтамда инструкторть и мярьгсь:

— Поргов, кода инженер, пяк опытнай, тевонц кельгсы. Тянь, Василий Иванович, минь азсаськ, коса кельк.

— Монга мезевок аф корхтан колганза‚ — пшкядсь инструкторсь, — наверна, эсь койсонза ашезь ёра коламс тракторхнень, но... лисенди тяфта...

Варламов кеподезень лафтувонзон, пеедезевсь:

— Лисенди, маряк, Борис Константинович, стане, кода корхтай обкомть представителец. Но, монь койсон, Поргов ялгась тянь сембонь сявсы мяльс и тяда меле эсь работасонза аф кармай эльбятькшнема. Коса эряви, кармай минь кизефнемонк. Опытнай ломатть тяса улихть, ули кинь кизефтемс. Салмов ялгась ня тефнень содасыне. Сак райкому, монга лездан любовай пингть.

Салмов ащесь креслать лангса и кафцьке пяли шарфнезе прянц, апак лотксек мзолдсь, кой-коста, кода попугай, Варламовть мельге азондозень сяка валхнень.

Поргов тага стясь вастстонза.

— Озада корхтак, озада, — мярьгсь тейнза Варламов.

Поргов изь оза, кармась кизефнемост бюроса ащихнень:

— А надиятада, што тракторхне тяни аф лоткайхть?.. Аф ляттама ли машинафтома сёронь урядама пингста?

Учсь, кие мезе тейнза азы.

Варламов, Салмов и инструкторсь варжакстсть фкя-фкянь лангс, и няевсь, киндинге изь смекав сразу, мезе отвечамс. Сембонь инкса пшкядсь Варсламов:

— А минь кулхцондсаськ, мезе азы тянь колга сонць главнай инженерсь.

Варламов и Салмов учендсть: Поргов всякай лаца кармай аралама прянц и эсь планонзон. Но лиссь аф стане:

— Пелян, што сёронь урядамста мрдатама тя корхтамати. Но эста кяжде лама кармай улема, кодамовок актса и протоколса аф кяшевихть пряньке колхозникнень эзда.

Порговть валонза кати эвфтезь Салмовть, кати кенярьфтезь. Сон эрязста шарфнезе сембонь ширес прянц: ашезе сода, кати пеедемс, кати кяжиямс. Няемс, сон кенярдсь сяс, мес Поргов ашезень аза лоткаф кафта тракторхнень, а тянь эзда сон пельсь. Тяни Салмов ванць Варламовть кургс и учсь, мезе азы ся.

— Минь аф тячи шачеме, сяс и аф пельхтяма, — шутканьбачк азозе Варламов и шарфтсь инструкторти, — Василий Иванович, решения эряви сёрмадомс?

Инструкторсь азозе, што решенияфтома аш кода, тейнза эряви максомс тянь колга обкомса отчет.

— Тяфта и тисаськ: решения тяшттяма сяда меле, — и кизефтезе Порговть: — Борис Константинович, кода молихть тефне «Якстерь тяште» колхозса?

Аньцек тяни стясь вастстонза Чуйкин. Няемс, сон мезевок изь шарьхкоде корхнематнень эзда, сяс кизефтезе Варламовть:

— Степан Иванович, а тракторхнень петемост карматама или аф?

Ня валхне ульсть азфт стане, бта Чуйкин оду ушедозе Порговть планонц колга корхтамать. Варламов стясь вастстонза, шашфтозе моркш лангста фкя вастста омбоцети карандашть и цють аф рахазь отвечась:

— А кие кирнедязь? Эряви петемс тракторсь — петесть, эряви омбоцесь... петесть омбоцеть.

— А Поргов мезе ёрась тиемс тракторхнень мархта? — тага кизефтсь Чуйкин.

— Сон сразу нильгемонь ёрась лоткафтомс, — эряскодсь азомс Салмов.

— Аф сразу, а кафта очередьса, — азозе Поргов.

— Тон, Чуйкин ялгась, няить сонь планонц? — кизефтезе Варламов.

— Мон ашине няй и няемс тейне изь эряв: содаса, што тоза тяштьфоль ниле тракторхт минь колхозстонк.

— Мезе азолеть, кда сразу ниле айгорхнень калафнелезь? Мезь мархта лядолеть?

— Эста калафнелезь и тяни улельхть анокт ни, лангозост надиялеме. А тяни учтама, мзярда синць каладыхть...

Варламов споряма изь карма, аньцек азозе инструкторти, што Степан Степанович Чуйкинти изь пачкоде ся пелемась, конань няезь синь Порговть планонц эзда.

Тумстонза Поргов кизефтезе Варламовть, можна ли лядомс кафта-колма шис.

— Хоть и аф кунара рьвяять, но колхозу эряви тумс, — бта шутендазь пшкядсь Варламов.

— Монь тяса тевдон лама‚ — мярьгсь Поргов и варжакстсь Салмовть лангс. Салмов эводсь, што лятьфтасыне кольф кафта тракторхнень.

— Нльне тят и кизефне, — эстокиге пшкядсь Варламов, — деряй, можна тя пингть кадомс колхозсь уполномоченнайфтома? Тячикиге архт и кодак молят, лоткафтк Леховть строяманц, саты ломаттнень кирнемс, сёрось кенерсь. А то вдь Лехов, содасак, кодама?