35

Ётасть колма шит, кода нолдафтольхть «Якстерь тяште» колхозса лафетатне, тяни лятьф розсь эрявсь кочкамс и тялямс. Механизаторнек-колхозниконек ёрасть куроконе няемс подборщикть работанц, мянь тнярс пельсть, аф кочкави сёрось. Кода оцю праздниконди анокласть колхозса вандыень шити, аф весть ни оду ванондозе Поргов Бугров Митянь подборщиконц.

Омбоце шиня варьхмодема ёткова сась шачема велезонза Бугров Алексейське. Сонга ёразе ваномс, кода ладямс подборщикть. Мельганза эвондась тяза омбоце бригадирсь — Офтин.

Аньцек кенерсть комбайнать лихтемс паксяв, ардсы ластя сельскяй Советонь дежурнайсь и азозе Порговти, што сонь куроконе тердезе райкому Варламов. Тиемс ашель мезе: савсь тумс.

Райкомста Порговть васьфтезь кафонест: Варламов и партиянь обкомста саф инструктор. Васенда кизефтезе инструкторсь:

— Кода тефне? Мялезт ли тяса работамась?

Поргов содазе, што тяфтама курокста сонь тердезь аф сянкса, штоба аньцек кизефтемс, кода молихть сонь тевонза. А сяс ашезь эряскод отвечамс. Аф ламос арьсесь и мярьгсь:

— Пади, сразу карматама корхтама, местема тердемасть? Монь эсон колхозса учихть, эряви эряскодомс.

— Ну, тяфта аф пара, аф пара‚ — мзолгодсь Варламов, — вдь Василий Иванович сась обкомста, как раз тонь докладнойцень коряс. А кодама ломатть пуроптоде колхозу? Мон малость кулине Зобовть эзда, сонга тоза тусь. А содамать аф содаса...

— Мон киньге ашень терне, — азозе Поргов, — мольсть тоза Бугров Алексей, Офтин, Степашкин Алексеев мархта, васьфтине Зобовтьке. Лия ломатть тоса аш.

— А содасак, што колхозста ломаттнень кочксемаснонды максси разрешения аньцек райкомсь? — кизефтезе инструкторсь.

— А мон, Василий Иванович, азыне ни: киньге изень терне.

— Тянь сембонь тиендьсы Зобов, — поладозе Варламов. — Сон пяк ни кельгсы ломанень пуропнеманц. Аньцек кодама-кодама атя тии узерь кячке, Зобов пчкясь няфтельхце сембе народти... Кельгсыне ня тефнень...

Поргов марязе прянц аф лац.

— Значит, бригадирхнень тонафтыть стане, штоба кулхцондоледязь аньцек тонь? — тага кизефтезе инструкторсь. Тондедот инголе лиссь тяста Валдаев. Азондозе, кода Офтин сонь тернезе подборщиконтень ванома. Валдаевти аш ётка, а Офтин корхтай, што сон отсталай руководитель, бюрократ, чиновник, мезьска аф тонафни, Валдаев аварьди тя тердемать эзда. Пади, тяфта афоль эряв?

Поргов пцтай кяжда мярьгсь:

— Мон мезевок аф содан!

Инструкторсь ламос азонкшнезе Порговти, кие стамсь колхозонь председательсь и кода эряви ванфтомс сонь рабочай пингоц.

— Давайте ня корхтаматнень кадсаськ сяда мельденди‚ — обжавсь Поргов. — Тейнь куроконе эряви тумс: механизаторхне учихть эсон.

Варламов и инструкторсь варжакстсть фкя-фкянь сельмос.

— Может, нолдасаськ тячи, меле ванцаськ докладнойнц? — Варламов кизефтезе инструкторть.

— Кадк туй, — кяжиясь инструкторське.

— Архт, Поргов ялгась‚ — сятявста пшкядсь Варламов. — Но нинге весть азса, што колхозонь руководительхнень лангса азорсь райкомсь и аньцек сон может пуроптомс синь, и сембода пяк тяни, сёронь урядамста.

Порговть сась прязонза мяль: кяжияфтомс тердиензон, азомс тейст видеть. Сон стясь и мярьгсь:

— Кальдявоц мезевок аш, кда састь ломаттне, кадк няйсазь, кода работай подборщиксь. Вдь лама вастова лафетатне аф работайхть: пелихть аф кочкави жнивать лангста розсь.

Варламовть тозердавсь фкя кургужец:

— Тя зря, зря, Борис Константинович, тон корхтат минь районнай партийнай организацияньконь лангс. Тонь валхнень эзда, Борис Константинович, лисенди, што минь тяса сембе букакс нежедеськ сюроньконь, вийхца аф ёратама примамс раздельнай уборкать? Бта аф мялезонк Цекать указаниянза? Мон тяфта шарьхкодихтень тонь, и, наверна, Василий Ивановичське тяфта шарьхкодензе...

Поргов срхкась ни сялгадома, но кодама-бди вий лоткафтозе. Сон аф ламос учсь, мзярда озай седиец, тоса видеста варжакстсь Варламовть сельмос:

— Мон, Степан Иванович, аф партийнай организациянть колга корхтан, а кой-кона ломаттнень колга. Валдаев, корхтатада, сашендсь жалбама, а вдь сон афи ёрай фкявок шужярня керомс лафетаса. Ичкоздень колхосне тожа аньцек лем тисть лядемати, а тевса учихть розть коськоманц и эста ни нусазь комбайнаса. Тяни Леховське эводсь, пяк ни лама прафтсть розьда лафетатне.

— Лехов — ся да‚ — фатязе Варламов. — Монга содаса, што Лехов эводсь, а лядыкснень колга... Мон аф содаса, Борис Константинович, коста сявондьсайть сведениятнень?

— Бригадирхнень мархта корхнян...

— А монь кядьсон улихть сводкат! — кеподезе вайгяленц Варламов и кармась сюволяма моркшенц лангса.

— Ладна, Степан Иванович, — аф ламос ащемда меле мярьгсь инструкторсь, — кадк туй Поргов ялгась, а мон васенда ётан колхоснень ланга, тоса азсайне эсь мяльнень сонь докладноенц колга.

— Коса-бди тяса... — Но Варламов кодамовок сводка изь му. Стясь вастстонза и Порговти венептезе кяденц:

— Эста архт, Борис Константинович, кли ни пуроптость ломаттнень. Бригадирхненди аст кафта-колма валня сёронь урядамать колга, кадыть явафтсазь удомаснон.

Поргов лиссь райкомста. Сон кунара ни ашезе марьсе тяшкава кальдявста прянц, кода тячи. Тейнза пяк обидналь, што Варламов инструкторть ингольде корхтась аф виде ваймот, ёрась няфтемс районцтонь тефнень и эсь прянц ёфси лиякс. Тоса яфодезе кяденц и озась эсонза ученды машинав.

Мзярда пачкодсь комбайнать малас, ащесть ни шужярень кафта копнат. Синь фталдост лиссть сембе ломаттне и кармасть кизефнемонза подборщикть колга: конань сереса эряви лядемс жнивась? Можна ли пула ширде ушедомс розь валкатнень тялямаснон?

— А мон коста содаса? — пеедезевсь Поргов. — Мархтон марса тя тевсь изь шача и вестенге изине няенде.

Жнивать серенц колга корхтасть лама. Зобов мярьгсь, што жнивать серец должен улемс комсь-комсь ветие сантиметра. Кой-конат корхтасть лиякс. Зобов и Степашкин синць ункстазь жнивать и азозь эсь мяльснон:

— Тяфта и сембонди эряви азомс‚ — мярьгсь Степашкин, — што лафетаса нумста аф пяк алга керомс шужярсь, эста сяда курок коськи жнивать лангса розсь, и сяда тёждя кочкамс подборщикти.

Нежедсь Шиндина. Поргов аф азомшка кенярдсь. Мекольдень пингть пяк шуроста синь васетькшнесть: Шиндина тожа кучф уполномоченнайкс. И Варламов мярьгсь, штоба сембе уполномоченнайкс прявок афольхть няфне райцентрав. Поргов кенярдсь нинге сяс, штоба панжемс Шиндинати потмонц, кода тячи тернезь райкому и кода мархтонза корхнесть Варламов и обкомонь инструкторсь.

Мзярда ломаттне кармасть тушендома, Порговти нежедсь Лехов и эвотьфста азозе:

— Борис Константинович, тячи получань заводстонк сёрма, тяштихть, што райкомсь жалендай лангозон. Тоста кучихть комиссия, ёрайхть мезе-бди проверямда.

Поргов аф ламос арьсесь и мярьгсь:

— А тон тят пель. Алаша вдь ашеть сала?

Лехов кемоста люпштазе Порговть кяденц:

— Тя виде. Пула пезон тяса кивок изь шятя. А кда мезе — сявса семьязень и фю-ю-ю! — тяста.

Шиндинать мархта Зобов озасть машинав. Степашкин мезе-бди корхнесь Бугров Алексейти. Тоса тердезе Порговть.

— Тон кулить, што тя бригадиронте, — Степашкин няфтсь Бугровть лангс‚ — ёрай тумс колхозста?

Поргов пеедезевсь.

— Тон тят пееде, сон афкукс тона эмтеэсу ёрай ётамс.

Порговть полафтсь шамац.

— Ну, кадк туй, вармань кантф щепкакс кармайхть тоса лувомонза. А мес тяса, тюнголгодоть, што ли?

Бугров якстерьгодсь. Инксонза отвечась Степашкин.

— Няйсак, Сараевать мархта тевсна коданга аф ладяви. Мон корхтан: лоткак мельганза панцемда, тят шарфне лангозонза тняра мяль. Эста Сараеваське лоткай няренц кепсемда. Лия стирьхть аш, што ли?

— А тоста меки аф ворьгодят? — сембе нинге кяжиста корхтась Поргов.

— Лучи кев сялдазозон повфтан и вона, — Мокшети‚ — саворне пшкядсь Алексей. — Кудсонга пиле потмонень пялезь, фалу сюцихть эсон.

— Тейть корхтан, кадк сонь, ёрдак прястот, — тага указовась Степашкин, — и ватт, мезе лиси, сонць мельгат ласьки.

— Кати... Аф стама стирсь сон. Вона Борис Константиновичень мельге ласьколь, пяле веконц максольхце.

— Сон тейне стаконга аф эряви! — сяда пяк кяжиясь Поргов. — Аф содаса, мезец тейть пяк питни. Мелавня и сяка, — тяни рахазевсь сон.

— Ну, кода, ётафтсаськ? — кизефтезе Степашкин.

— А вастозонза кинь?

— Гурьяновть, помощникозень. Сон пара цёрась, — кенярдсь Бугров.

— Макст Салмовти заявления, а мон корхтан мархтонза‚ — меколи азозе Степашкин.

— Спасиба! — кенярдсь Алексейсь.

Мзярда тусь Степашкин, Поргов путозе кяденц Бугровть лафтунц лангс:

— Тонь вастсот, Алексей, мон вестенге афолень варжакста ся шяйтанть лангс!

— Монга лоткан. Вов туян и вестенге шамазонза аф варжакстан. Кадк мезе кельги, сянь и тии.