32

Карга велеса тага од тев. Колма машинаса тяза састь райцентраста судьят-заседательхть и кармасть судендамонза Леховть. Обвинителькс озафоль районнай прокурорсь. Маласонза ащесь Салмов. Судти тертьфтельхть колма свидетельхть: тракторнай бригадань бригадирсь Бугров, фкя тракторист и фкя колхозник.

Колхозса кода эряви ашезь сода, мезенкса судендасазь председательснон. Кивок изь лисе тячи козонга работама. Школась стенакс шавфоль: пяшксель кулцондыда. Сембе корхтасть судть колга. Финцне азондозь, што Леховть судендасазь плотникнень мархта сялондоманкса, омбонцне коста-бди кулезь, што юмасть утомста тозер видьмот. Лехов сонцьке педа-пес ашезень сода судонь тефнень. Нинге ветешка недяляда инголе весть тернезе прокурорсь, кизефнезе мекольдень тозерть видеманц колга, но эстоньбере вестенге мезевок тейнза исть лятьфне. Аньцек обвинениять эзда сембе кулезь, што Леховть кядьста ёрайхть судендамс колма центнерхт тозер, конань сон видефтезе кемонь гектар лангс. Судьять кагодонзон коряс Леховть сембе шумушиц ульсь сянь эса, што сон ёразе кяльготнемс Варламовть и Салмовть, а тянь вельде марнек государствать. Июньцта, коста кошардозь колхозть тозеронь видема, сон видефтсь эрь гектарти сембоц колмогемонь килограмма видьме, а меле тяка жа тозерть лангс видефтсь люкшя.

— Лувсак ли эсь пряцень виноватокс? — кизефтезе судьясь Леховть.

— Да, — пшкядсь сон.

— Мезьса виноватат?

— Афолемаль виде тозерсь ёфси. Вона Сараева лац тись: соньге кошярязь, но сон изь виде ёфси.

— А кие тонь кошардонзе? Мезенди видить тозерть? — эстокиге кизефтезе прокурорсь.

— Салмовть эзда получань телефонограмма, а кучфоль телефонограммась...

Салмов эстокиге шарфтсь судьяти:

— Кизефтесть обвиняемайть, мзяра видьме эряволь видемс эрь гектарти?

— Фкявок афоль эряв видемс! — ломаттнень ёткста ювадсь Бугров атя.

Ламос таргавсть кизефксне. Салмов и прокурорсь сембе тевть шарфтозь сянди, што Лехов виноват, мес тозерть ланга оду видесь люкшя.

Салмов мярьгсь, што сон сяда товонга кармай сембе ширде ванфтомонза революционнай законность. Лятьфтазе тундань скандалтьке, мзярда тя колхозса ашезь пяшкодь эмтеэсть мархта договорть, исть карма двоендама лов алу сокафть. Гразясь, што сяда товонга фкявок поблажка аф тии, эрь саботажникть макссы судс.

— А комиссиясь минь ширеньконь кирдезе! — тага ювадсь Бугров атя.

Леховть кядьста судендазь тозер видьмотнень питнеснон и, тяда башка, пандомс видемань сембе работатнень. Судсь цють изь пута штраф Бугров атянь лангс, мес судть молемста ламоксть юватькшнесь.

Салмов кеняртьфоль. Сон содазе‚ што тяда меле лядсь аньцек валхтомс Леховть работаста и сембе. Лядондсь тиемс нинге фкя аськолкс: кода-кода урядамс кинц лангста Порговть. Сон надиясь, што Варламов тя нармонтьке педа-пес шарьхкодезе и курок тожа каяфсты кеденц. А тоса и Степашкинтьке шалхкалонц сон нардасы: тонафтсы, кода моленькшнемс сире работникнень каршес.

Салмов содазе сяньге, што ня шитнень сай обкомста ломань и проверясы Порговть докладноенц и няйсы, што тракторхне сембе рабтайхть, што Поргов — клеветник, смутьян и аньцек эсь кеденц инкса ёразень лоткафтомс тракторхнень ремонтс.

«А тяфтама документ минь тихтяма! — арьсесь Салмов. — Мезе эста азы Степашкин?» — и шовазень кядензон.

Леховть лангса судть куляц фкя шиста ётазе марнек районть. Степашкин сембода ичкоздень колхозста звонясь Варламовти. Ся азозе, што кода эряви, аф содасы тя тевть, но недляшкада инголе кулендезе прокурорть эзда, бта Салмов ёрасы аф кадомс Леховть тевонц.

— А мес тя тевсь максф Салмовти? Кадратне — тевсь райкомть, — нльне кяжиясь Степашкин.

— А мес? Кадк Салмов эсь зонасанза азорондай, — ёфси озадонь седихть корхтась Варламов. — Минь стадонга инксост сембонь тиендьсаськ.

Степашкин шарьхкодсь, што Варламов содазе судть колга тевть, тага кизефтезе:

— А, пади, бюроса ваномаль Леховть тевоц?

— А мезенди сембонь сявондемс бюроть лангс? — тись дивандайкс Варламов. — Судське минцень организациясь. Тевть ванозь закононь коряс. Мес тон пелят? Партияста Леховть ашезь пань, работаста ашезь валхта.

Степашкин сяда лама кизефнема изь карма. Сонь мялезонза пяк изь ту Варламовть корхтафоц. Сяка илядня вешезе Алексеевть и азондозе сембонь, кода корхтась Варламовть мархта.

— Тяфта стака работамась, — жалбась Степашкин. — А мезенди ина бюрось?

Алексеев азозе, што Варламовть каршес мезевок аф тиеви.

— А мон сёрмадан обкому‚ — дасадявсь Степашкин. — Вдь ётасть ингольдень пинкне, или аф шарьхкодьсы сон?

— А мезе тият? Сон васенце секретарсь, минць кочкаськ сонь. Тишеть колга эста корхтаме, а телефонограммась станяк лядсь.

— Но вдь васенце секретарькс кочкамста минь эсь ёненьконь тейнза ашеськ макса? Секретарьда сембоц ниле, а бюронь членда вейхкса, кажнайть сонцень ёнец, сонцень арьсеманза. Мес тяфта тиенди сон?

Алексеев аньцек кеподезень лафтунзон, тейнза изь шарьхкодев, кода стане Степашкин аф пели корхтаманц васенце секретарть кувалма?

Степашкин сась райкому. Сонь прястонза изь тушенда Леховть судендамац. Ся илядня пялеведа ламос палсь сонь кабинетсонза толсь.