33

Шиста-шис учсть сёроть кенереманц. Колхоснень эзга оду и оду ванондозь комбайнатнень. Варламов эрь шиня проверякшнезень, вастоваст ли райкомонь уполномоченнайхне. И вов тя пингоня весть обедта меле Зобов звонясь Порговти «Якстерь тяшти»:

— Тячи кодама шись, Борис Константинович?

— Ёткши.

— Тон содасак «Возрождения» колхозть прудонц?

— Содаса.

— Содасак, што тоcа лама калда?

— Кулендине.

— А содасак, што Чуйкин тердемазь ульмама?

— Тянь аф содаса‚ — пеедезевсь Поргов.

— Ну, вот содак: Яшать кучса инксот. Коса улят?

Поргов ашезе сода, мезе отвечамс: сон аф кунара корхтась телефонца Варвара Степановнать мархта и надияфтсь илять васедемс.

Зобов тага кизефтезе:

— Кулхцондат, што ли?

— Да, мон аф содаса, кода...

— Кли аф содасак, кизефтьк Варвара Степановнать.

Порговть крьвязсть щёканза. «Деряй, содасы сон минь якаманьконь?» — арьсезевсь и эстокиге пшкядсь:

— А мес сон эряви кизефнемс?

Зобов ктназевсь:

— Хе-хе-хе! Чаят, кивок аф содатанза? Соньге тердьк. Учте. Звоняк.

Поргов абондсь. Кда сявомс мархтонза Варвара Степановнать, сон, Варвара Степановна, визделгоды Зобовть эзда. «Васенда тейнза мезевок аф азан, — арьсесь Поргов, — мярьган: аде марса Зобовть мархта мольхтяма колхозу и сяка»...

Мзярс арьсесь-тись, звонясь Варвара Степановна:

— Ну, мес аф отвечат Зобовти? Ломанць учи.

— Содасак, Варюша, — Поргов ёрась сяда хитрайста отвечамс, — Зобовть кялец виде ломанень... Нинге мезе-мезе азы тейть...

— А мезе азы?

— Мярьги: куледязь-няедязь...

— А мон сонь свадьбазонк тердине ни... Мезе тяда меле азы?... Аде, аде, мон тейтьке кой-мезе азан.

Изь ёта частовок, Порговть ускозь райисполкому. Зобовть кабинетса учсь Варвара Степановнаське. Кафцьке весялатольхть.

— Тинь кодак васедеде Варвара Степановнать мархта, — фалендась Зобов, — колмоце шинякиге тейне пачфтезь, што тинь... А тон, милайняй, кяшендят эздон, — токазе Порговть лафтути.

Поргов варжакстсь Шиндинать лангс: «Виденц ли корхтай Зобов?»

— А монь лия аш ёнень кизефтема вастозе, — мярьгсь Варвара Степановнась.

— Ну, срхкаме! — пшкядсь Зобов, штоба лоткафтомс тя баснять.

— Минь, Максим Сафронович, аф ламняс мольхтяма фкя вастс, — бта алянцты пшкядсь Шиндина. — Сембоц вете-кота минутас.

Зобов варжакстсь частонзон лангс и шукадезе прянц, но Шиндина изь карма ответонь учема: сявозе Порговть кядьта, и лиссть кабинетста.

Лоткасть Порговть квартиранц инголе. Шиндина азозе Яшати, штоба ускольхце тяза Зобовть, и тяста марса туйхть «Возрожденияв».

Квартираса кулевсь стирень морама.

— Тя мезе тяфта тиендеви квартирасот? — Шиндина полафтсь шаманек-пиленек.

Поргов нльне эводсь:

— Мон монцьке мезевок аф содан...

Квартираса азорондась Зина. Ся комнатаса, коза путф Порговть кроватец, фкя ужеса стенаста стенас таргаф карькс, лангозонза повфтафт Порговть цебярь панаронза, а вакссост авань кафта платьят и парьхциень кафта комбинацият.

Шиндинать и Порговть сувамда меле Зинась лоткась морамда. Сон муськсь муськопт, кенерьбакарь видева кяденза навафт сапонь шовти. Мзярда Поргов нежедсь малазонза‚ Зинась кеподезень сельмонзон, апряказе:

— Колмонь-нилень ши кармать ни юмсема, куду аф няфнят прявок. Кодама ломань тяфта тиенди?

Поргов няезень Зинать равчста архтф сельмоширьконзон, штатолкс пиндолды сельмонзон.

— Киннет авань щапне? — кяжвельде кизефтезе Зинать.

— Монь. А кинь ина? — дивандазевсь Зина. — Гладендань тяса и повфтайне. А мес? — налхкфтозень Порговть лангс сельмонзон.

Кой-мзяра пинге инженерсь ашезе сода, мезе азомс.

— Тяфта аф пара, Зина. Содасак... аф пара.

— А мес? Синь киндинге аф шоряйхть, а кудти ладяйхть, бта аф шава мархтост.

Поргов ашезе сода, кода сяда пяк кяжиямс, а сяс азозе, штоба Зинась урядальхцень тяста эсь щамонзон, и сонць лиссь кудста. Варвара Степановна ащесь омбоце комнатаса и порендезень кенжензон.

— Кие тейть тя нармонць?

Поргов келептезень кядензон:

— Ну, мезе тият глупай стирнять мархта?

— Глупай ли? Аф тондедот дн ёню?

Порговти чуднойкс арась Варвара Степановна. Сон вестенге ашезе няенде тяфтама кяжиста: тейнза-арам, Шиндинать сельмоширьхконза валгсть сяда алу, улоц нинге сяда кирсь, а сяс няевсь сяда мазыста, сяда кельговиста. Поргов аноколь ни ктмордамс сонь, но вальмала кулевсь машинань сигнал. Варвара Степановна мирнайста, но пеняндазь пшкядсь:

— Ватт, ня глупайнятне тяфтама тефт тиендихть, кодапт тонь прязтка аф сайхть.

* * *

Чуйкин правленияса ашель. Варвара Степановна лядсь вели, а алятне тусть Чуйкинть вешема. Музь сонь лугатнень лангста.

Поймать келес мараф тишень капатнень ёткова сембе сокаф, юрнек тарксефт кальхне, и кусторксне марафт маронь-мар.

Порговть кольсь-каладсь мялец. Сон лятьфтазе шабакс пингонц: тундаста сявомок сёксеть самс яксесь эсь лугаснон ланга. Тоса кассть тяфтама жа кальхть, кочксесь ётковаст шукштуруфт, инезихть, пизелхт. Лугатнень сон лувондозень святой вастокс. А сяс‚ кодак васьфтезе Чуйкинть, ичкозде ювадсь:

— Мезе тиеть лятьфнень мархта, сире клдом?

— А тон содасак, кодама сура касы тяза сай кизонда?

— А мес сура, а аф каньф? — кизефтезе Зобов. — Мзяра сандеде?

— Сяда ведьгемонь гектар, ёрасаськ тячи аделамс.

Мокшеть берякованза колма вастова работасть сандихне. Ломаттнень ёткова мековасу пульхксть алашат, «опафнесть» гусеничнай тракторхне.

Чуйкин мархта Зобов фкя-фкянь ётазь шнасть модать эса. Арьсесть, што колхозсь тяни получай сяда ведьгемонь гектар пяк цебярь мода.

— Содасак, мзяра тише получакшнеме ня лугатнень эзда? — Чуйкин кизефтезе Порговть. — Кота, сисем центнерхт гектарста. Деряй, можна тянкса кирнемс тяфтама модать?

Поргов согласиндась. Чуйкин сявозень инжихнень прудснон шири. Ётамбачк няфнезень сортоучасткаснон, коса касфтсть видьмот.

* * *

Шись веляфтсь ни валгома ширезонза. Прудть берякста пяштерькснень цильфсна пцтай кафтонь-крда сяда кувакаста таргавсть ведть ланга.

— Калсь как раз тя пингоня кармай сявома, — мярьгсь Зобов, и шоферонц мархта эрязста аноклазь ульмотнень.

Чуйкин изь сяве ульме, кармась пеетькшнема:

— Молян аноклась коське пенгянят калонь пуштомс.

— Тон тят рахсе, — мярьгсь Зобов. — Калхт кундатама.

— Пенгат минцьке кочкатама, — тяни пшкядсь шоферсь, — аноклак тейнек кргань начфтомс.

Чуйкин яфодезе кяденц, пеедезевсь и тусь.

— Эвфтить Чуйкинть кргань начфтомать колга, — шоферти пшкядсь Зобов, — пелян, тяни аф мусы сон кинц.

— Чуйкинть эвфтьсак? — рахазевсь Яшась. — Чаят, аноклай? Муйть кинь эвфтемс.

— Может, васенда эшелятама? — кизефтезе Поргов Зобовть.

— Месть тон? Наверна, вестенге ашеть кунце калхт? Эшелямать эзда ватракшневок туйхть тяста.

Калонь кундайхнень ёткса ашель кашт моли. Сятявста ащесь ведське, аньцек кой-коста колсезь ваномакс пиндолды лангонц зеркальнай карпне.

Аф ичкозе эздост ульмоснон вельхксса нюрьгсть колма сире колхозникт. Мзярс шоферсь аноклась ульмотнень эса, Поргов якась атятненди, ванозе, повондыхть ли калхт.

Зобов тяза сашенкшни эрь кизоня кафксть-колмоксть и калфтома вестенге изь тушенда. Сяс и надиясь кундамс тячинге.

Яшась няезе, што Поргов калонь кундайсь од, няфтезе тейнза, кода щафнемс ульмоти суксть.

Колмоцьке сетьмость. Аф лама пингта меле жолякодсь ведсь, и эстокиге Зобовть ваксс шлёпадсь килограммда оцю кал. И тага аш кашт моли. Колмоцьке учсть эсь калснон. Но калсь мольсь аньцек Зобовти. Кафта-колма минутада меле сон таргась нинге сяда оцю. Поргов кадозе вастонц, нежедсь Зобовти и ванць, кода сон путсы суксть и кода сельги суксть лангс. Тяда меле сонга тись стане. Но сякокс фкявок кал ашезь кунда. Ёрдазе ульмонц и тусь ведть маластонга. Сон керсь пяштерькскя и кармась эзонза тиендема уряднай китькскат. Тейнза нежедсть вете цёрокшкат и кармасть анцема ульмонят. Поргов явозень жестень коробканяс урядаф ульмонянзон.

Нилетне кенярдсть и тусть ласькозь фкя-фкянь ётазь, а ветецесь — вейхксошка кизоса акша пря цёрокшкясь лядсь ваксозонза. Сон васенда ванозе мазыста тиф пяштерьксонь байдеконять, тоса аназе ваномс Порговть мянцеви пеельнянц. Пеельнясь, афкукс, цебярь, недец, кода сиянь калня, пиндолдсь. Пяк тусь шабать мяльс пеельнясь. А Порговть мяльс тусь сонць цёрокшкясь: сельмонянза валдонят, улоняц нюрьхкяняня и круглайня, бта нарошна шаманц коряс тиф шалхконяцка.

— Кода лемце?

— Борька.

— Э-э, да тон тёскат тейне!

— Тя тонь, щеняй, пеельнясь?

— Монь. А мес? Мялезт?

— Пяк мялезон, — отвечась Борькась и сурса варжазе пеельнять оржанц. — А монь аш пеельнязе, бабазе аф рамай. Варжаса, кода лакси?

— Ну, лаксек.

Шабась кенярдсь и кувака илиенцты кармась керсема стама жа китькскат, кодапт керсефтольхть Порговть байдеконянцты.

Поргов ванць шабать рдазу пильгонзон лангс, а тюжя майканц алда няевсть сонь ирдезонза.

— А миньцонк тяфтяма пеельнят аф мишендихть. Синь аньцек ошса мишендьсазь, да-а? — кизефтсь Борькась.

— Да, аньцек ошса, — кода оцювонди отвечась Поргов.

— Тядязти кучан сёрма, кадк сон рамай тейньге тяфтама пеельня.

— А коса тядяце?

— Москуву тусь.

— А коса аляце?

Борькась тись пря аф куликс: эрязста лаксесь.

— Аляце ули? — тага кизефтезе Поргов.

— Монь аш алязе‚ — аф мяльвельде отвечась Борькась. — Сон ульсь герой, а Гитлерсь шавозе. А тон аф героят, щеняй?

— Мон аф героян.

— А пеельняса можна налхкомс?

— Налхк, — мярьгсь Поргов и мес-бди ужялькс арась тейнза цёранясь.

Борькась кармась пезнемонза пеельнять модати:

— Фкя, кафта, колма, ниле...

— А куду аф поздасак?

Борькась содазе, што ялганза тусть ни, но тейнза ужялель кадомс пеельнясь. Эняльгодсь:

— Щеняй, кадк вандыс тейне пеельняцень. А ванды шобдавакиге кандса.

— А коста мусамак ванды?

— Мутя, тон азк, коса эрят. Макссак, а? Мон ванды кандса.

Поргов сюдердазень Борькать акша шяярнянзон и мярьгсь:

— Сявк аф вандыс, а прокс эстейть!

Шабать крьвязсть сельмонза. Варжакстсь Порговть лангс и спасибань апак аст тусь ласькозь.

Поргов ванць мельганза и арьсесь: «Моньге тяни тяфтама улель ба... Эх, Анфиса, Анфиса»... — и нежедсь калонь кундайхненди.

Састь Чуйкин и Варвара Степановна. Синь нинге ичкоздекиге кизефтезь калонь кундайхнень, кода моли тевсна. Поргов таргазень ведьста Яшать калонзон и няфтезень:

— Вагот синь!

— Ого-о! — кенярдсь Шиндина. — Ухада ярхцатама.

— Мес ухада? — мярьгсь Яшась. — Тяса ули мезе рястамска.

Сембе нежедсть Зобовти. Ся бта шуфтомсь фкя вастс: ванць ведти. Чуйкин апак кизефтть таргазень ведьста сонь калонзон. Кувака пикскас недяфоль колмошка килограмма кал.