31

Варламов лиссь роботама и васень шинякиге музе Порговть, кизефнезе, мезе усксть эмтеэсти заводста. Сон сельмонзон мархта няезе, кода шяняды вагранкаса чугунць, кода валыхть мастерскойса детальхть колхозонь веялкатненди и жаткатненди. Тяда меле кафта шиста ётазень сембе колхоснень, васетькшнесь председательхнень мархта, пельсь: изь лисе ли мезевок соньфтемонза колхозса.

Варламов содазе эрь колхозть розь паксянц, тяни ётась кажнай межава, лотксесь пезонза, сязендсь розьбрят, люпшнезень зёрнатнень. Розть потмоста лисендсь туста лофца.

«Якстерь тяште» колхозса улемста Варламов васенлакиге сувась животноводческяй городокти. Ванозень тоста буровой вышкатнень, коса увнась двигатель, шарсть модати пезф трубатне. Шабакс няеви мастерсь няфтезе тейнза, кода шави ведсь модать алу шувф эшить ээда, конанди ладяфтольхть ни трубат. Сон жа азозе, што тяста туйхть «Мазы пакся» колхозу, што Сараеваське тись фкя эшиенди договор. Тяка ёткть мастерсь жалбась, што тя кржа, колма эшинкса обидна усксемс Саранскяйста тяшка вастс машинаснон.

— Леховда ёню ломань, маряк, аш тя районца, — меколи мярьгсь мастерсь. — Содасасть‚ кодама цебярь тев сон тись фермаснонды? Тии автопоилкат, и траксснон лофцсновок ламода касы.

Мастерсь ашезе сода, кинь мархта корхтай. Варламовське мезевок изь кашторда, аньцек ванць рдазу шама мастерть лангс и пеедсь. Ся таргась зепстонза папиросат, пиндолды штаназонза нардазень суронзон и васенце папиросать венептезе Варламовти. Варламовть ашель мялец таргамс, но интересонкса сявозе. Цёрась крьвястсь сардоня и карнась азондома:

— Мон работань Оренбургскяй областьса. Тоса председательхне жалбайхть обкому, мес ашеме кенерькшне. А ётафтомазь тяза и «карьсемазь», нормазень цють-цють пяшкотькшнеса. Сик арнян районцта районц. Вага сань тя районти, пялян колма эшихть и сави тумс. Кода-бди аф шарьхкодьсазь тя тевть. Тяса маласа ули «Пиче кура» колхоз. Ведьсна аш‚ тялонда траксснон симома панцесазь целай вайгяльбе. Председательсна Валдаевсь. Содасасть сонь?

Варламов азозе, што содасы. Сон ванць мастерть лангс и приметазе, што нинге вестенге апак нарактольхть сянь сакалонза, аньцек ёжа понат кассть. Кизефтезе:

— Мзяра кизодот?

— Комсь фкие курок топоди. Мон техникум аделань. А кальдяв Валдаев председательсь? Эсь колхозниконза рахсихть лангсонза. Леховть лаца ба тоза председатель, эста сяда пароста туль тевсна. — Варламов ванць, кода шары буровсь, кода саворне озайхть модать потмос трубатне, а мастерсь апак лотксек корхтась и корхтась: — Монь тернемань Лехов колхозозост механикокс, синь синцень ули автобуссна, но аф нолдасамань трестсь, а то салень ба. Пряц работай сонь... Трубанкса тусь. Водопроводонди уски трубат. Может, и автопоилкат саты.

Мастерсь няезе, што кить лангса ащесь Варламовть машинац, и шарьхкодсь, што сон кодама-бди руководитель, ёрась жалбамс Варламовти:

— Ванды молян «Возрожденияв»‚ тостонь председательти‚ может, хоть ся кафта-колма эши пяльфти. Ся вдь козя колхозсь?

Варламов аньцек шукадезе прянц, сон саворне рахазевсь.

— Тостонь председательть аф васькафтсак, сон зря ярмаконзон аф навасыне, — азозе Варламов.

— Ся кда аф шарьхкоди сон, кадк мярьги. Мон кунаракиге жалбалень райононь васенце секретарти, да сон сяряди. И исть мярьге тейне молемда, корхтайхть, сон мезевок аф тии, аф кельгсыне ня тефнень.

— Кие тяфта мярьгсь? — визьдембачк рахазевсь Варламов.

— Корхтасть тяса.

— А кие?

— Сараеваське тяфта мярьгсь. Корхтай, Варламов сире пингоннекс ваны ня тефнень лангс.

Варламов ванць мастерть лангс, и нльне мес-бди коськсь кургоц. Сяда лама изь карма кизефнема, лиссь навесть алда. Ламос кайгсь пилесонза мастерть шабань вайгялец, бта стаки азондсь сонь колганза аф цебярь валхт.

Тяда меле кодамовок колхозу Варламов изь моль, хотя срхксесь тяста сувамс «Мазы паксяв», Сараевати. Кяжиясь. Бта лакай ведь каясть потмозонза.

Сувась райкому, изь мушенда васта кабинетсонза. «Лафчста сотф тяльмось калады, — эстейнза мярьгсь Варламов. — Мон кафцьконь, кода эряви, примайне району, — думандась Леховть и Сараевать колга, — инксост шинек-венек старандан. А синь? Хе, аф кельгсайне од тефнень! Коста тянь сявозь? Сраминдамазь тясонга».

Варламов аф весть ни срхксесь тяштемс серма заводу, коста кучфоль Лехов. Кадк сайхть партбюростост, хоть ванцазь, кодама чудак кучсть председателькс, но кирдсь, учсь, может, петеви Лехов. А петемовать вастс вона мезе лиссь сонь инксонза бюроса. Варламов озась и тяштсь заводонь партбюроти.

Омбоце шиня шобдава Варламовти звонясь телефонца Поргов, азозе, што частта меле «Якстерь тяштть» токонц лангс Зобов пуроптсыне колхозонь председательхнень, ванцазь механизированнай токть, аф моли ли сонга?

Васенда атказась Варламов, азозе, што аш мзярда, но аньцек путозе телефоннай трубкать, сонь инголенза бта ащесь бурильнай мастерсь, пилесонза кайгсь сонь колганза вайгялец: «Аф кельгсыне ня тефнень». «А может, инженерське тяфта мярьги?» — Варламов думандась и кеподезе телефоннай трубкать, звонясь Порговти, штоба ся пяле частта меле суваль тяза, марса молихть «Якстерь тяште» колхозу токть ванома.

Пяк кенярдсь Поргов. Сон нльне звонясь Каргав, азозе, што сай тоза сонць Варламовсь.

Машинаса ардомста Варламов кизефнезе Порговть, кода моли запасной частень валомась, работай ли электросварочнай агрегатсь, мес пяк курок сон прважазе тяста тядянц, а меле кода-бди ётамбачк кизефтезе, мезе отвечасть министерстваста сонь жалобанц каршес.

— Азозь, што сай тяза комиссия. Минь вдь кой-кона трактороньке ащихть аварийнай положенияса, — виденцясь Поргов.

— Мярьгат, жалбать? — Варламов тись пеедикс.

— А тя аф жалоба. Тевсь моли машиннай паркть ванфчтоманц колга.

Пачкодсть. «Якстерь тяштть» тинголангоц пяшксель ломаньда. Мярьгат од кудонь позас пуромсть колхозонь председательхне и плотничнай бригадань бригадирхне. Сембе ёрасть эсь сельмосост няемс, эсь кядьсост щупамс тястонь механизированнай токть.

Лехов ашель кудса, изь са нинге Саранскяйста. Ломаттнень пуроптозень тяза Зобов. Бугровть и Белкинонь пефтома кизефнезь инжихне, кода тиф тя, кода ся.

Кодак нежедсть Варламов и Поргов, председательхне вешсть Порговть кядьста чертёшт.

— Чертёжсь вага. — Поргов няфтсь Белкинть и Бугровть лангс. — Синь ветень-крда полафтозь чертёжнень. Ушеттада строяма, тиньге полафтсасть, нинге тяда цебярь ток тихтяда.

Порговть кизефнезь нинге сянь колга‚ кармай ли тейст лездома эмтеэсонь мастерскойсь токонь тиемста.

Отвечась Варламов:

— Кие кода машты, и Чуйкин лама ни кой-мезе сявсь мастерскойста. Тяда уда и тиньге.

— А минь виреньке аш, — пшкядсь Валдаев, — мезьста тиемс?

Поргов келептезень кядензон:

— Вирезе‚ брат, моньге аш, но тяса ули вирень азор...

— А кие? — Валдаев кенярдсь. Сон ашезе шарьхкоде Порговть шутендаманц.

Фталда пшкядсь Зобов:

— Деряй, можна Валдаевть кучемс вири? Сон эрьгоди тоса.

Сембе рахазевсть. А 3обов аф ламняда кяжиясь:

— Тон, Артем Васильевич, местема сать тяза?

— Кода местема? — ся озадонь седихть варжакстсь Зобовть лангс. — Получайне телефонограммацень и сань.

— А местема?

— Леховть токонц ванома. Ломаттне местема састь? Стане и монга.

— А мес ськамот? Тон афкукс ёрат строямс ток и или монь телефонограммазень пяшкодить?

Валдаев ашезе сода, мезе отвечамс.

— Фкявок шочка кизоньберьф ускоть вирьста? — сембе нинге кизефнесь Зобов.

Валдаев якстерьгодсь. Сон то комафнезе прянц, то тага ёрась пеедезевомс.

— А мес аф самс? — саворне пшкядсь «Мазы пакся» колхозста Бугров‚ — может, ломанць чаясь, тяса кодама-кодама магарыч кармай улема?

Сембе рахасть, но саворне: пельсть Варламовть эзда. Варламов ся пингть якась токть кувалмос, фкя столбать эзда омбоцети, кядьса ванондозе трансмиссиять, ёфси изь шорсев Зобовть и Порговть корхтамаснонды.

— Улель виреньке, миньге тиелеме...

— Ладна, вирь макстама, — шоворсь тевти Чуйкин, — кучт делянказонк кафта машинат, вирсь тоса анок керф.

Валдаев, кода алашань мимста, эрьхтезе Чуйкинть кяденц:

— Пара! Ладяме! Мон кучан.

Нолдазь тракторть. Кармась работама механизированнай токсь. Бугров атя кандсь утомста пяле кяскав розь, каязе сортировкатненди и кафта-колма минутада меле ся розсь пачкодсь меки утому. Сембе шназь токть.

Мзярда инжихне озсесть машинаваст, Варламов токазе Белкинть лафтути:

— Значит, тон тяни плотникат? А зря туть токть лангста, сёроть ваксса тейнек эряви кирдемс надежнай ломань.

— Бугровсь — ломанць содаф, — спокойна отвечась Белкин.

— Кулине, петевсь кукурузанте?

— Спасиба Сараевати, лездсь. Тяни кукурузась тусь ходс.

— Коса Лехов?

— Саранскяи трубанкса тусь.

— Мес аф озафтови сон тейнть вастозонза? — кяжиясь Варламов. — Тага кадозе колхозть? Мезе кельги, сянь тии, вов так аля!

Белкин ашезь отвеча, пельсь: Варламов кармай сюцемонза.