23

Омбоце шиня шобдавакиге Поргов срхкась Карга вели. Мастерскойса ванцть лангозонза и дивандасть, кода стане сон туй: цехнень эзга срафнефт кота ташта тракторхт, конатнень эряскофтозень петемаснон. Палакснень потмоста таргасть кота комбайнат, тяни учсть рабочайнь кятть. А мезе тиихть главнай инженерфтома?

Сонцьке Поргов тянь содазе, но тумс эрявсь. Азозе, кинди мезе тиемс, сонць срхкафтозень Андреевть и Бойкинть комбайнаста тормоснень ладяма.

Варвара Степановна тердезе Порговть боку, кизефтезе:

— Борис, тячи тон тозк удат?

— Тяни мон тоса уполномоченнаян, — отвечась, а сонць нльне кенярдсь тя кизефксти, чаясь, Шиндина скучендась тейнза и ёрай васедемс илять. — А мес? Пади, эряви самс?

— Стак, — малость якстерьгодсь Шиндина. — Ванды тоза моли комиссия, ванцазь колхозть кукурузанц. Варламов моньге кучсамань.

— Ну и пара‚ — нинге сяда пяк кенярдсь Поргов, — монга тоса улян. Илять няйхтяма.

— Ванды тоза моли комиссия, — оду азозе Шиндина, — Варламов мярьгсь Леховть колга кизефксть анокламс бюрос.

— Комиссия моли? — Поргов бта аньцек тяни кулезе. — Ну и мезе кда?

— Кукурузась пцтай марнек районца кальдяв, а бюрос тердьсазь аньцек Леховть, шарьхкодьсак? Ну‚ тоса корхтама...

* * *

«Якстерь тяште» колхозонь правленияса счетоводсь Ефим Леонтьевич Кячказов ськамонзоль, но таргась ветенкса. Сонь стамоль обуцяц: кодак сай шобдава, путы кургозонза катонь пильгошка цигарка и кармай нозома: фкясь аделави, крьвястьсы омбоцеть.

Ефимка (тяфта тейнза велеса сембе мярьгондихть) рузкс азозе Порговти, што Лехов и райисполкомонь председательсь Зобов тусть Пичень шяи, кода мярьгондсть велеть алуда пенцты. Тяса жа строяйхть од картт.

— Тон аф тястоннят? — кизефтезе Поргов счетоводть.

— Здешний, — тага отвечась рузкс счетоводсь, — но я много работал на одной лесничестве, малость отвик по родному говорить.

Поргов пеедезевсь.

— Ми хорошую машину купили, — оду кармась азондома Кячказов, — лесопилку, они пошли поставить его.

Поргов тусь Каргонь шяи, а Андреевть кучезе передвижной мастерскойть мархта комбайнатнень малас.

Од карттнень ваксста Порговть васьфтезе Белкин. Сон сялгозе шочкти узеренц, шумбракстсь Порговть мархта и азозе:

— Пуроптонь эстейне плотниконь бригада.

— И маштат?

— Хе-хе-хе! Тонга инженеркс ашеть шача, а тонадоть.

— А коса Лехов?

— Зобовть сявозе тракс удофтома васту, тостонь од картть няфтьсы.

— Кулине, пилорама рамаде?

— Зобов коста-бди сатозе тейнек. Тяни туй тевоньке.

— Ванан, тевонте строямать мархта тусь? — азозе Поргов и няфтсь карттнень перьф пульхкяй ломаттнень лангс.

Белкин аньцек яфодезе кяденц и изь ёра отвечамс. Поргов приметазе, што сонь аф озада седиец.

— Мезе тага лиссь колхозсонт?

Аф ламос ся изь кашторда.

— Ванды комиссия сай, кукурузаньконь проверясазь. Работамс тейнек аш ётка. Кажнайть тяфта новолихть кяденза, аф аньцек Леховть.

Поргов шарьхкодсь, што Белкинти тяни ужяль Лехов, нльне кенярдсь.

— Ну и кадк ванцазь, азсазь, мезе тиемс. Мес пельхтяда?

— Кукурузать аш ладоц, — нльне куфкстсь Белкин. — Но монь аф мялезон ся: кунара ни эняльдень Варламовти и Салмовти, штоба кучельхть специалист, ванолезь, мезе тиемс кукурузать мархта. Эста исть куль пилесна, исть няй сельмосна, а тяни стряндасть, салмокст вешендихть. Бюрос ёрасазь тердемс. Аньцек самодонт инголе звонясь тейне сонць Варламов.

— А токть лангса кивок ули?

— Аф содаса, вастозон путозь сире Бугровть. Содасак сонь? Ну вот, сонь тоса и вастоц. — Белкин няфтсь лаксеф шочкнень лангс и азозе: — Нят аноклафт тейнть токонди.

Обедта меле Поргов азондозе сире Бугровти, кодама кармай улема механизированнай токсь. Тяза састь Зобов мархта Леховське. Марса мерсезь токть и шавондсть пяльнят. Поргов няфнезе, коза эрявихть озафнемс столбатне, коза ладявихть сортировкатне. Тоса азозе Зобовти:

— Тяза как раз ладяйхть сортировканди минь ташта молотилканьке. Синь сякокс тевфтома ащихть пирьфсонк. А тяса кармайхть работама ряцок кафта агрегатт, кажнайть эса кармай улема молотилка и ВИМ. Сёрось элеваторть вельде куци вяри, тоса ункстави, а меле Бугров тозердасы рычагть — и омбоце транспортерть ланга сёрось туй сусеку.

Ластя ардсь комсомольскяй организациянь секретарсь Сараев Вася. Сон тердезе шири Леховть, корхтась пилезонза. Лехов сельгсь и яфодезе кяденц:

— Архт азк, сейчас молян.

А иляденьбяли велеть песта пес, алянек-аванек корхтасть плотникнень и председательснон колга. Финцне корхтайхть, што председательсь и плотникне аньцек сялондсть, омбонцне корхтайхть — тюрендсть. Сембе учсть, мзярда пуроми правлениясь.

Илять правленияв састь Лехов и Белкин. Шрать малас озсефт бригадирхне, кенкшть ширеса, голландкать фталу кокшкодсть сиретне: Бугров, Спиридон Спиридонович, Сараев, Каргин и лиятне. Качамсь лиссь кенкшкава, кода баняста.

Тяза састь Порговть мархта Шиндинаське. Ашель Зобов, тердезе сонь Варламов. Поргов и Шиндина озасть Леховть ваксс. Плотникне, конатнень сюнеда тячи пуромсть тяза ломаттне, озсесть серцек, фкя скомняс, эсь бригадирснон, коськана, сери Мезинть, перьф.

Лехов стясь, вадердазень фталу шяярензон и пшкядсь:

— Сембе содасасть, местема пуромоме? Плотниконьке няфтезь пряснон, кода эряви няфтезь... Торгавайхть колхозть имуществанц.

— Кона бригадась? — кизефтезе колмоце бригадань бригадирсь Кичапин.

— Сиресь, Мезинть бригадац. Тага Ульмов тешендай. Тяни сембе районца рахсема вастокс ульхтяма. — И азондозе, што Ульмов и нинге кафта ялганза сявсть стройкаста ниле шочкт‚ кафта доскат и вина лангс сиводсть удовой авать — Марфать кудонц петема.

— Минь строятама картт, а синь материалть эса симондихтъ. Тяфта, ялгат, тевсь аф туй‚ — меколи мярьгсь Лехов.

Сявсь вал Сараев Вася. Сон варжакстсь Лехов лангс и кяжиста пшкядсь:

— Тя тевсь, Илья Борисович, политическяй. Тяфта сон и эряви ваномс. Ульмофне ёрасазь калафтомс тевоньконь. Панемс синь колхозста!

Стясь вастстонза Ульмов, арась киякс кучкати:

— Тинь тевть путсасть тяфта, а минь лиякс. Сюреть кафта пенза, тон ёрасак салмокс пилети навамс фкя петь, а минь — омбоцеть.

— Тон, Ульмов, корхтак прибауткафтома, — пшкядсь кие-бди атятнень эзда.

— Да уш кода маштан, стане и шаштан. Ну и вот. Тон, Лехов ялгась, азоть фкя вал, бта минь‚ плотникне, кодама-бди шинкарканди миськ колхозть совестенц стакан винанкса.

— Кие мярьгсь, што мон шинкаркан? — шобдать эзда кулевсь авань вайгяль.

— Тон ожу, Марфа, ожу, — смелста отвечась Ульмов. — Вал макссть тейне, а аф тейть, и кадомак корхтан. — И тага председательти: — Корхтамдот инголе, председатель, эряволь... — и эзь кенерь азомс валонц, панжада вальмять пачк уфась стама вишке варма, цють изь мада толсь. Сембе сетьмость. Меле Ульмов тага кармась корхтама: — Эряволь васенда ладняс содамс тевсь, коза сявоськ вирть и мезенди. Кудбряц ломанть калады, иднянзон шулксыне. А тон, председатель, корхтат, миськ. Аф содасак, а корхтат. Портнойсь мярьгонди: колмоксть мерак, а весть керк. Ну, а комсомолть каршес отвечама аф карман, — Ульмов кяжвельде ванць Васять лангс, — сон шаба, а шабатне атякшекс комотнихть. И кадк кивок аф эвфнесаман, мон аф пелян. Узерезе оржа, и мархтонза коза кельк сявсамазь работама.

Лехов кяжиясь Ульмовть лангс, ёрась мезе-бди азомс, но тя пингть панжада вальмять пачк тага уфась вии варма, уназевсть правлениять каршеста топольхне. Квчядсь ёндол, торазевсь вишкста атямсь. Правленияса тага сетьмость, аньцек марявсь, кода вальмянь клянцненди эрьхтсть пиземонь васенце путерьксне. Атямсь торазевсь омбоцеда, а тусь вишке пизем. Вальмять ала кеподсь шум: кие рахась, кие пешкодсь: «Давай, давай, родимай!»

— Нинге кие кармай корхтама?

— Ков, чёртт, этцетяда?! — кенкшть лангста кулевсь сире алянь вайгяль. Сон сюцесь шабатнень лангс, конат кяшсть тяза пиземть эзда.

Правлениясь тяни ульсь ичезь ичф ломаньда. Пиземонь эзда кяшихне пеетькшнесть, шумнасть, шукиезь начка щамснон.

— Лоткада шумнамда! Кие кармай корхтама? — тага кизефтсь Лехов.

Фталдонь скомнять лангста кеподезе коськана ронгонц плотникнень бригадирсна Мезин. Сон лиссь толть малас, вийхца кеподезень ломаттнень лангс сельмонзон.

— Мярьгода азомс тейне фкя фактическяй вал. Сянь эзда, што плотникне якасть Марфать кудонц петема, убытка киндинге аш. Кудняц пяк ряса. Ну, азость, кие жа лезды Ляксееряти, кда аф минь, эсь колхозоньке?

Ня валхнень азомда меле кольсь сетьмось, корхтазевсть аф фкя вайгяльса. Голландкать фталда лиссь сире Бугров.

— Тон тяфта, кум, зря корхтат, — эстокиге перязе сон Мезинть. — Тонь бригадаце кармай Марфатнень и лиятнень кудснон петнема, Каргин эрь недляшине усксесы алашаса омба велень церькаву рьванц. А тейне лядонды цёранень мархта сявомс трактор, озафтомс бабазень и тумс базару. Эста мезе тяфта лисенди?

Мезинць варжакстсь Бугровть лангс.

— Тонь лацот лисенди стане, кум‚ Марфати и лия удовойхненди аф эряви лездомс?

— Мес аф лездомс? — изь макссе пря Бугров. — Лездт, но ули правления, ули председатель.

Ульмов ётась алятнень пачк и нежедсь Бугровти:

— Пади, тон, Семён Прокопьевич, кошардсамак кизефнемс председательть, кода веть удомс рьвязень мархта, а?

Сембе рахазевсть. Фталда кулевсть авань и шабань вайгяльхть.

— Тон тят безобразниченда, Ульмов! — пшкядсь Сараев Вася. — А то минь крафттядязь тяста.

— Тон тага эвфнесамак?! — Васянь лангс крназевсь Ульмов. — Азыне, што аф пелян эздонтт!

— Можешь тумс! — кяжияфтсь Лехов. — Архт, ков кельк. Архт!

— Кда эрявксты, туян. Но тячи мон нинге колхозникан. А тон тят тонафне ломаттнень мяштьс кярьмотькшнема!

— Кинь мяштьс кярьмотькшнень? Тон корхтак сяда видеста!

— Азса сяда видеста: мезенкса пикссить постуфть Спиридон атянь?

Шиндина эвотьфста варжакстсь Леховть лангс. Постуфсь эстокиге, кода пожарса эвотьф, лиссь. Сон арась Ульмовть каршес и валонь аф ужяльдезь ушедозе лаксемс:

— Тон монь зря тямак шорсе, язевай тя лоб! Коста сявить, што пикссемань?

— Атказат ни? Маряк, кенерсть ни вадемс нярцень? — мярьгсь Ульмов.

Мезе-бди ёрась пшкядемс Лехов, но сонь вастозонза отвечась Поргов. Сон стясь вастстонза и азозе колхозникненди:

— Тя зря. Зря ялгась корхтай. Ся пингть мон тосолень. Председательсь и постуфсь спорясть, но кядь кивок изь кепсе.

— Мон кулине, — малость эшендсь Ульмов, — ломатть няезь. Вона кизефтесть Суксовть, сон азсы.

— Ах, ломатть няезь?! — шуваня вайгяльса пешкодсь атясь и мезе ули виец эрьхтезе Ульмовть пилети.

Ся ашезь кенерь стряндамс, атясь каясь омбоце ширде.

— На! Мон няфтьса тейть, язевай тя лоб, кода кяльготкшнихть!

Ульмов ёрась кеподемс атять лангс кяденц, но Вася, кода ката, комотсь шрать ваксста и кундазе плотникть кяденц.

— Мон няфтьса тейть, лиме-сюна, кода кяльготнемс! — нинге сембе гразясь постуфсь.

Алятнень ламосна стясть вастстост и кургонь келеса рахасть. Шиндина эняльдсь Порговти, штоба куроконе кардамс и панемс синь тяста. Алятне, кода атякшень, кирдсть постуфть эса, а Ульмовти мярьгсть кадомдонза правлениять.

Ульмовть тумда меле сявсь вал колхозонь ревизионнай комиссиять председателец Сараев атя:

— Аф пара тев лиссь правлениясонк. Минь сюцесаськ Мезинть, тя виде. Может и тяфта эряви. Но давайте ванцаськ сонцень тевть. Вдь аф тячи‚ так ванды, аф ванды, так омботь‚ но Марфать кудоц эряви петемс.

— Монга эрян аф дворецса‚ — пшкядсь Лехов. — Куттнень колга сави учемс аф ламос.

— Минь содасаськ, Илья Борисович, — мольфтезе корхтаманц Сараевсь, — содасаськ, коса эрят, содасаськ. Деряй, сельмоньке аф няихть? Но тон сать тяза аф сускомонь кочкама. Сать тяза председателькс, народоньконь вятема. Так ульхть вожак. Тейнек фронтса замполитоньке лувондсь фкя книга, тоса тяштьф: «Дикай вирь потмос эрьгодсть ломатть. Ламос синь вешендсть, кода лисемс куду, но ки ашель. Сатозень синь шобдась, вачедот, ломаттне муцявсть, пульзясть. И вов эста фкя ялгасна таргазе эсь седиенц, кеподезе вяри, и палсь седиец валда толкс, няфтезе кить». Вов мезе тиенкшнихть ломаттне. Тонга стане, васенда лездт удовойхненди, валдоптк синь эряфснон. А колхозникне тонь аф юкстатядязь, парсь парса пандови.

Правленияв эрязста сувась сельсоветонь председательсь Бойкина и кенярдезь азозе народти:

— Оцю радость, ялгат! Партиянь Цекась и Правительстваньке валхтозь колхозникнень лангста сембе налокнень и обязательнай поставкатнень. Тяни аф налог, аф сиволь, аф лофца, аф модамарь — мезевок колхозникне пандома аф кармайхть.

Аф сразу пачкодсь тя радостсь колхозникнень пряс.

Васенда фкя ужеста, меле марнек правлениясь уназевсь кядень цяпамаса. Колхозникнень кенярдемаснонды ашель певок. Кой-кона аватнень тусть сельмоведьсна, и кажнайсь ёрась ваксстонцты панжемс потмонц.

Сембе корхтасть од законть колга. Тянь мархта и аделавсь правлениянь заседаниясь. Ломаттне ульцять келес, кода псьмархт, цильнясть, фкясь азондсь омбоцети.

Коса-бди ичкозе, казеннай вирть фталда, кфчядсь ёндолсь, цють кулевиста, но кувакаста торазевсь атямсь. Колхозть вельхксса менельсь сенемгодсь, пиндолгодсть тяшттне.

Лямболь весь пиземда меле. Модать эзда кеподсь шиньф.

Поргов тусь Шиндинать прважама. Велеса ашель кашт моли. Тяса тейст кивок ашезь шорсе.