24

Лехов куду сувась саворне, штоба аф сргозьфтемс шабанзон. Кодак панжезе кенкшть, кудста яфодсь шамазонза лямбе кожф, кодама фалу маряви комнатаста‚ коса удыхть ломатть. Каязе костюмонц и аньцек тяни шарьхкодсь, што муськомкс начка панароц. Сон озась кенкш борафть лангс. Тяса сяда эшель. Каязень кямонзон, но удомац из са. Марязе, кода ровнайста тарксезь ваймоснон цёранза. Вальмять эзда серай валдсь прафтсь ёмлать, Мишкать, лангс. Удомбачк сон ёрдазе лангстонза одеяланц. Илья Борисович кеподезе кияксста одеялать, вельхтязе шабать и палазе.

Омбоце стенать ваксса ащесь синцень кроватьсна. Илья Борисович ёрась саворне пштедемс рьванц ваксс, но тага лядьсь мялезонза правлениянь заседаниясь. Сон меки озась панжада кенкшень борафть лангс. Виде, исть аза тейнза фкявок кальдяв вал правленияса, но и ширенцка ашезь кирде‚ апряказь, што сон, Лехов, аф лац тиенди, аф лезды удовойхненди. Илья Борисович кодама-бди сталма марясь седиенц лангса. Лятьфтазень заводстонь ялганзон. Весяласта прважазь сонь колхозу. Саранскяйса ламос корхнесь мархтонза обкомонь васенце секретарсь. Лехов макссь обкомти вал, работамс виень аф ужяльдезь, надияфтсь, што аф пацькасы партиять довериянц.

«А тяни, или афкукс сави тумс меки? Да‚ аф ладяй тяса морозе... Конашкава позор ули, кда сави тумс! Мезе азыхть ялгане? Кодама сельмоса эвондан заводонь партийнай собранияв?..»

Илья Борисовичть бта кие-бди тостядезе вастстонза, стясь и лиссь ульцяв, озась пиземса валф нарть лангс. Ульцять вярде пестонза, кузнецять ширде, кулевсть гармониянь вайгяльхть, а синь корязост кафта стирьхть полас-полас морасть сиде моронят. Ёфси каршесонза, ульцять тона бокса, чрназевсь кенкшкя, и увазевсь пине. Велеть песта пес сязсть кргапарьснон атёкшне. Нинге сяда кайгиста морасть ватракшне. Кода парной лофца, лоськиесь Леховть лангс лямбе вень кожфсь.

Тейнза салаване нежедсь Елена Петровна и озась ваксозонза.

— Ой, Илюша, тяса вдь начка, — сон палазе мирденц и эрязста кандсь тяза тоду и одеяла.

Елена Петровна ашкодозень кядензон мирденц кргас, кармась кизефнемонза и шабакс леснемонза:

— Ну, мезе тага лиссь? Мес аф срхкаф шапаксокс ащат? Ванка, кодама пара тячиень весь, ванка, кодама мазыста лиси ковсь...

— Да-да, мазыста, — рьванц лангс мялень апак шарфтт, отвечась Лехов.

Елена Петровнань кяденза новольсть мирденц кргаста.

— Илюша, тон вестенге ашелеть тяфтама пичефксу. Мезе мархтот?

— Стака, Ленушка, стака... А мархтон мезевок ашезь лисе, — Лехов палазе рьванц.

Токавсь лажатф авань седись. Сон люпштазе Леховть прянц эсь мяштезонза, и ся марязе, кода эрьхнесь рьванц седиец.

Велеть песа сембе нинге морась гармониясь, менельть кучав арась карьхкя пула тяштсь, куттнень вельхксс кеподсь шарышка ковсь.

— А мон тонь вастсот сельголень и тулень тяста, — бта удомбачк пшкядсь Елена Петровна. — Коськсь седиезе инксот. Аде меки ошу‚ аф юматама.

Лехов марязе, кода трнатсь рьванц мяштец, щёка-прязонза прасть лямбе сельмоветть.

— Зря корхтат, Лена, — сизефста пшкядсь Лехов. — Минь кудоньке тяни тяса. А пичедемацень тон кадк и ошть вестенге тяк лятьфне. Вов ётай аф лама пинге, и содасак, конашкава парста карматама эряма? Путтама цебярь куд‚ бокозонза — оцю веранда, усксаськ ошста тонь пианинацень. А меле ётай тага аф лама пинге, и панчтама тяза музыкальнай школа. А тон ся школаса кармат работама директоркс. Тоса строятама культурань куд. И тага тон кармат улема художественнай руководителькс‚ — и кемоста, кемоста тага палазе рьванц.

Елена Петровна рахазевсь. Вайгялец марявсь шабаннекс, мялезонзоль ся, мезе азондсь мирдец. Но курок тага шуфтомсь шамац, вадердазе мирденц щёканц и кизефтезе:

— Значит‚ аф лихтьсамак тя пизоть эзда?

Лехов тись пря рахайкс.

— А кинди ина строяса тяса цебярь кудть, музыкальнай школать, клубть? — лоткась рахамда и поладозе: — Тяни минь мархтот велень эряйхтяма. Ломатть тяза сайхть, а минь мархтот меки ошу ворьготтяма? Тя кода стане?

— Дуракта, пади, аф лама тонь лацот, штоба самс вели.

— А мес? Няить Порговть? Сон вдь инженер-машиностроитель, работась аф монь лацон заводса, вона коса, а сявсь да и лядсь вели. Мярьгат, дураконя сон?

Елена Петровна кеподезе прянц и варжакстсь мирденц сельмос:

— А мон тячи бта сонь няине. Ашезь сашенда тяза?

— Может и сон, шиньберьф велесонк, тяни тяза уполномоченнайкс кучф.

— А мес ашить терде ярхцама и удома? Кода аф визькс, Илюша? Кадк тяса кармай эряма, васта муви.

— Механизированнай ток строяй тейнек, — Лехов бта ашезень куль рьванц валонзон, — корхтай‚ лама киза ни работай тя проектть лангса.

— Кода стане Варламов кучезе тяза токонь строяма, а аф «Возрожденияв»?

Лехов саворне рахась.

— Варламов, наверна, Порговтьке лувондсы пялязкс, кода и монь. Кадк, мярьги, кафта аф ёнюфт марса возсихть.

Миртть-рьват рахазевсть.

Лехов азондозе рьванцты, кодама закон примась Партиясь и Правительствась колхозникнень эряфснон колга.

— Содасак, мезе тя? Тя од эра ушеды велеса, а тон ошу срхкат, — и тага палазе рьванц.

Елена Петровна сяда малас шаштсь мирденцты и лоткась корхтамда. Сон путозень трванзон Леховть казяма щёканцты и катонякс пштедсь ваксозонза.

— Ломатть стякшнихть ни, аде куду, — нуваргодомста корхтась Елена Петровнась.

Кармась варьхмодема. Вальмятнень алга, кода цильф, арнесть пинетне, то тяса, то тоса читордсть кенкшкятне, аватне лисендсть траксонь потяма, цингордсть ведаркасна.

Синь сявозь вастснон и сувасть куду. Шобдавань кельме кожфта меле пара ульсь мадомс лямбе вастс. Елена Петровна кодак путозе тодути прянц, эстокиге и матодовсь.

А Леховть стаки изь са удомац. Сон ащесь кунф и ванць потолокти, прясонза шарсть арьсемат. Аф ламнянь валдашкодсь кудсь. Вальмава няевсть, кода топольхнень пряста кеподсть грацне. Лехов сюдердазень рьванц шяярензон и стясь. Кенярдсь, ётась тя стака весь.

Конюховкать каршестонь шочкнень лангс озсефтольхть ни комозьшка атя. Баснясна сембонь ульсь фкя: налокнень валхтомаснон колга законць, эряфонь цебярьгодомась. Кажнайсь арьсезе ни, конашкава цебярьгоды эряфсь.

Отвечамок кой-кона кизефксснонды, Леховонь сембе нинге палсь седиец исяконь заседаниять инкса. Сон сюцезе эсь прянц, мес исяк тяфта путозе плотникнень колга кизефксть, каендась, мес ашезе кизефте тянь колга Порговтьке. А тяса нинге тячиень комиссиять самац лядьсь мялезонза. И тага кармась сюцема эсь прянц эса. Вдь кода видезь кукурузать, Лехов вестенге изь яка ваномонза, надиясь Суксовть лангс, а ся видефть шнакшнезе. «Да, Варламовть видец, — арьсесь эсь пачканза, — кальдяван председательсь, аф маштан тефнень вятема. Кодама чёртонь председателян, кда навайне шалхкозень фкя тевс, строямати, и юкстайне лядыкснень?»