22

Мастерскои Салмов кармась сувсема сяда шуроста и шуроста. Аньцек кой-коста ётамбачк няфнесь тяза пря, ванондозень цехнень, корхнесь рабочайхнень мархта и сяка. Сядынголе тейнза пефтома звонцесть колхозста, анасть кядьстонза то запасной частьт, то кодама-кодама машина. Эста сонць кандозе тя оцю сталмоть, кода сон мярьгонкшнесь звоняматненди. Тяни сембе тя тиендеви тракторнай бригадань бригадирхнень и эмтеэсонь главнай инженерть ёткса. Бригадаста максыхть заявкат, Поргов ванондсыне синь и мезе эряви, сянь максы.

Васенда, мзярда лоткасть звонцемда, Салмов изь мушенда эстейнза тев, салаване жалбась, што сонь обжазь, а меле тиевсь райкомонь штатнай уполномоченнайкс, недялянь-недялянь Варламовть мархта марса якась велетнень ланга.

Салмов тяни шавсь кафта нумолхт: сяда малас арась Варламовти и учсь, кода хитрай ката шеерть эса, аф пови ли нинге кодама-кодама скандальнай тевс Поргов, конань лангс ашезь лотка пейнь поремда. Сон ванць Порговть сембе тевонзон мельге. Ваны и тяшни, и ваны. Мезе тяза уле, сон тяни ёрась няфтемс, што инженерсь сась тяза аньцек оцю карьеранкса, а кодак тянь лихтьсы, пандсыне Степашкинть и Шиндинать кургснон, штоба лоткальхть Порговть араламда.

Тячи Салмов сась мастерскои апак кульхть, апак няйхть. Порговть кабинетс пуроптозень сембе рабочайхнень, апак каштортт таргась папкастонза каготт и важнайста азозе:

— Монь кучемань тяза райкомсь, эряви мархтонт ваномс фкя сёрма. — Тяда меле мековасу шарфтозень кядьстонза листкятнень и пееньбачк пшкядсь: — Ломаттне синць мезевок аф тиендихть, и миньге пульхкфтсамазь.

Механизаторхне учсть, мезе кармай азондома директорсна. Салмов ушедсь лувома партиянь Цекать лемс кучф сёрма. Тяштись жалбась Цекати, што колхозонь модать лангса тиевсть кафта азорхт: сонць колхозсь и эмтеэссь. Фкять — модась‚ омбоцеть — машинатне. И кальдяв ся, што конацка эздост кода эряви аф отвечай сёронь касфтоманкса, жуватань раштафтоманкса, што ня кафта азорхне сидеста спорсихть, фкя-фкянь лангс жалбайхть, а тевсь тянь эзда аф цебярьготкшни.

Сяда тов сёрмаса азонтфоль, кода синь колхозсна спорясь тя тунданя машинно-тракторнай станциянь директорть мархта (азфоль Салмовть лемоц, но сон сёпозе тянь) модать двоендаманц инкса.

Мекольдень валхнень кулемдост меле рабочайхне варжакснесть фкя-фкянь ланга, саворне пеедсть, няемс, шарьхкодезь, кодама колхозса ульсь тя тевсь.

— И кие, чаясасть, сёрмать тяштиец? — Салмов кеподезень ломаттнень лангс сельмонзон. — Лехов! Тя ломанть аф мялезонзот эмтеэсне. Сон эняльди Цекати мимс колхозти машинатнень. Вов давайте азость мялентень, кода тинь?

Салмовда меле васенда кивок изь кашторда, бта абонтфтозень синь сёрмась.

— А мезе азомс? — меле кизефтезе сонь Поргов.

— Кода мезе? Цекась сёрмать кучезе Варламовти ваномс. А Варламов кизефнесамазь минь. — И тяни нльне пеедезевсь Салмов. — Лехов, улема, арьсесь тяфта: кучи тоза сёрма, и сразу мисазь тейст машинат-<...>

... <здесь часть главы, находится на стр. 129—130 которые потерялись из библиотечной книги>

<...> колхозса, сявомок кядезост машинатнень, поюста дугат кармайхть мяндема.

— Сявк сонцень жа Леховть...

— Эста ни кяденза сонь юксовихть, — эстокиге пшкядсь Салмов.

— Да, эста ни сонць азор, — азозе Варламов. — А тяфтама Леховда районцонк, деряй, кржа? Леховсь эряви тердемс и азомс, кадк аф кунци аф эсь тевозонза, аш месть няренц навсемс тоза, коса аф кизефнесазь.

— Кальдяв сон мезевок изь тие, — пшкядсь кие-бди.

— Тиемать изь тие, — Варламов кяжиста варжакстсь ся пели, — а няйсасть, мзярнек пустас возсетяма сёрманц перьф?

— Ладна, давайте аделасаськ, — мярьгсь Варламов, — кучсаськ ня корхтаматнень Москуву, и кода кельгост. — И Порговти: — Да, Борис Константинович, тнярс минь одкс лувондодязь, а тяни тонадоть ни. Дайка, тон озак уполномоченнайкс «Якстерь тяште» колхозу. Сякокс тоса пульхкат токть мархта, сияк ватт Леховть мельге.

Бюронь члеттнень эзда кой-кинь аф мялезостоль, што главнай инженерть кучсазь уполномоченнайкс, но тянь арьсезе Варламов, кие мезе азы тейнза?