21

Порговть квартиранц штама-урядама сашендсь Сараева Зина. Сон, кода азорава, ванондозе, коса мезе ащи, эсь лацонза урядакшнезе Порговть вастонц, ведь мархта банканяс путнесь моркшть лангс панчфт, нльне муськомонзонга муськондозень.

Поргов изь шарфне тянь лангс кодамовок мяль. Комнатанза урядафт, муськомонза муськфт — и пара. А мзярда тянь колга кармась синьгорямонза Шиндинась, сон шарьхкодсь, што Зина афкукс лама мяльда шарфни, сидеста васетькшни мархтонза. А штоба тянь колга мезе-мезе мярьгомс Зинанди, сон пельсь: обжави. Да и изь веронда, што Зинась мезе-мезе кирдель прясонза.

Весть кода-бди Зина кандсь панчфт, а Поргов пеедезевсь:

— Зина, а кда минь тонь мархтот фкя-фкянди тонаттама?..

Зина якстерьгодсь и нолдань нярьхть кизефтсь сонць:

— А тон пелят, да? Маряк, аф эряви сашендомс? — и маземсь шамац. — Кда ни лишнаян, кунара азолить, афолень сашенда.

Поргов няезень Зинань летьке сельмонзон.

— Сашентт, сашентт, Зина, мон пеетькшнемга... — Поргов эрязста тусь работама.

Эстоньбере Зина нинге сяда смелста кармась сашендома Порговть пяли, шистонь-ши ётафнезе тяса пингонц.

Тя историять кулезе Галина Васильевна и сась сазоронц варжама. Сась ся пингть, мзярда Зина срхкась Порговть квартиранц урядама.

— Аде, акай, аде, ванцак, кода эряй инженерозе, — Зина кядьта сявозе Галина Васильевнать.

— Аньцек мондедон сире, а то кошардолине кельгомон, — пеетькшнесь Зина аканц инголе.

— А мон тяфта аф маштан, — куфкстсь Галина Васильевна.

— Да, аф маштат, а Лёшать косьфтайть. Сёмаря баба воражья вешенди, ёрай цёранц явштомс эздот.

— Аф ащи седиезе тейнза, Зина. Бта кельме кев потмосон.

— Пяляскодоть! Стама цёрать и аф кельгомс... А мезе ина тейть эряви? Цёрась мазы, тевса толкс налхкихть кяденза, панци мельгат, а тон... кати-мезе нинге вешендят.

— Лучи тят корхта колганза, Зина.

Галина Васильевна ванондозе Порговть квартиранц. Меколи сельминголенза моркш лангса рамкаса повсь Порговть портретоц. Сон сявозе кядезонза, и сянь бта пеедсть лангозонза сельмонза. Галина Васильевна эсь потмованза корхтакшнесь Порговть мархта.

Приметазе тянь Зинась, нльне крьвязсь и кати кяжиясь, кати обжавсь, но сявозе аканц кядьста Порговть карточканц и путозе вастозонза.

— Тяк токсе, акай. Борис Константинович кельгсы, штоба эрь вещаняц ащель вастсонза.

Галина Васильевна ванць сазоронц лангс и васенда ашезе шарьхкоде, мес тяфта полафтсь сазороц? Но шарьхкодемс аф стакаль. Эсь седиенц коряс содазе, мезе Зинать потмоса. Сон рахазевсь кургонь келес.

— Зина! Тон вдь мярьготь, сон сире?! А мес ина кяжиять? Ой, Зина, Зина, няйсайне, коза шавихть мяляпне. Азк, кельгсак сонь!

Зинась аварьгодсь, а меле сельмоведьбачк рахась. Кати кяжвельде, кати кенярдемда, шабакс ёрдазе аканц шамас руцянц.

— Месть визделгофнесамак?

— Дураконя, сон тейть аф ялга, — лоткась рахамда Галясь. — Кулхцондомак монь, тяйть пяярде зря сельмоветтнень, тяк коськфне седицень. Кадыть прястот ня арьсематнень. Тя иможсь аф тонь. Поргов — инженер, а тон кият? Месенди сон мархтот?

Зинась кулхцондсь, и снавкс кеворсть сельмоведенза. Кармась урядамост вальмя ланкнень, мянць кядьстонза и паморсь панчф мархта банкась. Тяни Зинати мувсь туфтал, аварьгодсь вайгяльса.

— А мезенди, акай, тон сонь кельгсак? Ули Лёшкаце и саты.

— А мон аф эцекшнян, — цють кулевиста азозе Галина Васильевна, сонць комафтозе прянц кяшезень руцяняса сельмонзон, и сидеста шерьхкозевсть лафтунза. Акат-сазорхт ащесть фкя-фкянди кундафста и кафцьке авардсть. Мезенкса авардсть, содазь синць.

— Ну вестьке хоть палазе инженерце? — меколи пеедезевсь Галясь.

— Кода аф виздят, акай? Деряй, сон тяфтама ломанць? Да сон авада пели, киньге малас аф шашни.

Галина Васильевна рахась.

— Тя, пожалуй, видеце. Сон, афкукс, авада пели. Наверна, кда няфтемс тейнза авань сорочка, кудонцка кадольхце, — и тага рахась. — А может, афкукс, тонады? Тяряфтка.

Тяни весялгодсь Зинаське. Сон рахась марса аканц мархта.

Зинась ся веня пяк лама думандась. Аф весть весялготкшнесь сонь потмоц, кодак лядендсь мялезонза Поргов.