20

Райкому сась телеграмма. Партиянь обкомсь мярьгонди кучемс райононь сяда цебярь колхозникнень, механизаторхнень и колхозонь председательхнень Зубавинскяй райононь «Якстерь поляна» колхозу экскурсияс, коса шувару мода лангса цебярьста касфтыхть кукуруза. Варламов получазе сонь илять. Ашезь ту мялезонза тя кулясь. Зубавинскяй райкомса секретарсь од, кржа нинге опыттонза. Варламов обжавсь, мес обкомсь синь кучсыне ся району. И хоть сон кельгсы дисциплинать, вал изь прафне обкомонь распоряжениятнень каршес, сякокс тячиень телеграммась калонь пакарькс педсь клдомазонза: «Курок кенери сёрось, а минь коза-бди арнема кучсамазь...». Сон стясь моркшенц ваксста, ётась мековасу кабинетонц туркс, лоткась фкя вальмять каршес и занавескать вельф варжакстсь илядень зарять лангс. Варжакстсь — куфкстсь:

— Тага аф ули пизем...

Варламовти эрявсь, штоба ванды улель стама вишке пизем, конань пингста кивок няренцка афолезе лихне ульцяв. И сонга ваймяль ба хоть фкя ши. Хоть фкя ши афоль сялонкшне колхозонь председательхнень мархта. Вдь эрь председательть работаса улихть афсатыкст. А тейнза, Варламовти, эрявихть афсатыксне мумс, няфтемс и сюцемс муворуфне. Председательхне аф фкат, финцне, кода Валдаев и Моськин, сонь эрь валонц эса кулхцондыхть, нльне шарьхкодьсазь сельмованфонц. Омбонцне, кода Чуйкин и Тимофеев, мезе-мезе да тиихть соньфтемонза. А Лехов ёфси ни пичефксокс тейнза арась. Вов сяви и тяниёк сувай райкому и кармай изгордома: дай тянь, дай тонань...

А кда аф максат, сон туй обкому, сёрмады Москуву...

А тяса нинге Степашкин, эрь тевти навсесы няренц. Ломанць нинге мезевок изь няенде, аф содасы тевть, изь тонада партийнай работати, а мялец, штоба сонь фалу кизефнелезь... Чуднойхть ня од работникне!..

Варламов звонясь Зобовти и Салмовти. Но сят ашельхтъ. Телефонти кярьмодсь райкомонь дежурнайсь. Варламовть лемста сон кеподезень пильге лангс колхоснень и сельсоветтнень, штоба мумс и тердемс райкому Зобовть и Салмовть.

Салмовть музь колхозста, азозь, што комсь минутада меле ули райкомса. А Зобовть колга пачфтсть куля: колхозста тусь лесничествав, а тоста — области, штоба сатомс одс строяви школатненди и больницяти вирь.

— Аф Зобов, а омбоце Леховсь, тьфу! — Варламов сельгсь, озась шранц ваксс и кармась телефонограммань сёрмадома:

«Кой-кона колхозонь председательхне вешендихть кодама повсь туфталхт, штоба абазламс артелень паршить. Тяфта, «Якстерь тяште» и Чапаевть лемса колхозонь председательхне Лехов и Травин кодамовок указанияфтома явозь ни кемонь процентонь тишеть... Лиякс мярьгомс, ня председательхне тисть антиколхознай, антипартийнай тев. Райкомсь мярьгонди, штоба колхозникненди явф тишесь улель кочкаф меки».

Телефонограммать алу путсь кафта фамилият: «Варламов», «Зобов».

Тоса тердезе дежурнайть и мярьгсь:

— Срочнай. Тячикиге пачфтьк!

Кабинету сувась Салмов. Варламов азондозе тейнза, кода Лехов и Чапаевть лемса колхозса явозь кемонь процентонь тишеть, кармась пеняцяма:

— Беда, аф кенерькшни сембонь мельге ваномс, а эстедон башка аш кинди ваномс колхоснень мельге. Зональнай секретареньке, кода виндряфт колхоснень эзга, аф мушендыхть эстейст тефт, и омбоце секретареньке... — Варламов кеподезень лафтунзон.

Салмов тяконь и учсь, штоба Варламов жалбаль райкомонь работникнень лангс. Сон ванць Варламовть сельмос и пиндолфтозень эскса пяльфокс ащи сельмонзон, мзолдсь.

— А кда сярятькстат, Степан Иванович, эста и ёфси прянц лангс стяфтсазь районть.

Варламов ашезе аза, местема тердезе Салмовть, а венептезе обкомста кучф телеграммать.

— Мольхтяма, ванцаськ, — мярьгсь Салмов телеграммать лувомда меле. — Кинь кучтама экскурсияс?

— Мон аф содаса, мезьс ёрасамазь тонафтомс минь Зубавинскяй районца? Кда кучелемазь Украинав или Ставропольяв, эста лия тевсь.

— Монга тяфта арьсян, Степан Иванович, — эряскодсь азомс Салмов. — Ну, мезе тоса няфтихть тейнек?

Варламов аф ламос арьсесь и решительнайста азозе:

— А кучемс эряви.

— Обязательна эряви. А то Федор Михайлович апрякатанза... Сон, няить, кодама ломанць, порядкать кельгсы.

Аф ламос кафцьке исть корхта. Мезе арьсесь тя порава Варламов, кивок ашезе сода, но Салмовть пряса мезевок ашель. Сон ванць райкомонь секретарть кургс и учсь, мезе ся азы, штоба куроконе отвечамс.

— Ломаттне маштыхть эсь пряснон няфтема, — кувакаста ваймонц таргамста азозе Варламов, — няйсак, Зубавинскяй райкомсь. Аньцек цють кеподезе прянц фкя колхосна, эстокиге пачфтезе обкому и‚ пожалуйста: тоза кучихть ни экскурсияс. А минь? Деряй, кржа цебярь тевда «Возрожденияса»? Деряй, аш мезе тоса няфтемс лия райоттненди? — Варламов яфодезе кяденц. — Аф тяфтапт минь колхозонь председателеньке.

— Тя тонць шумуват, Степан Иванович, аф кельгсак, штоба минь колганк корхтальхть.

— Тя виде. Фалендамазень аф кельгса. Мезе аф кельган, сянь аф кельган. А Чуйкинть колхозса улель мезе няфтемс.

— Эстейнек, конешна, аш местема Зубавинав молемс?

— Конешна. Мзярда молемс тняра тевть эзда? — согласиндась Варламов. — Руководителькс кучемс Степашкинонь или Шиндинать.

— Кадк Степашкин моли. Мезе тии тоса Шиндинась?

Салмов ёрась тумда ни, но Варламов лоткафтозе и венептезе Порговть докладноенц тракторхнень петемаснон колга, кона тяштьф райкомонь бюронь члеттненди и обкому. Салмов аньцек варжакстсь и шарьхкодезе, мезень колга докладнойсь, шамац сюворгодсь.

— Стаки ащи эсь валонц лангса? Няйсак, месенди? Тя докладнойть, Степан Иванович, кадк ладняс лувсы Степашкин, пади, хоть тяста шарьхкодьсы, кода ёрай заботендамс районть колга шнаф инженероц. Мон, Степан Иванович, анокс содайне, што тя ломанць карьеранкса тяза сась. Вов тяшти лангозонк колма-ниле докладнойхть и касфтсы эсь питненц. Обкомса мярьгихть: Поргов — ломанць прогрессивнай, а минь тонь мархтот лувсамазь консерваторкс. Вов ватт, кда аф тяфта лиси тевсь.

Варламов пеедезевсь:

— Ётась ни ся пингсь, Карп Максимович. Тя мзярда-бди тяфта корхнесть, киносонга няфнелезь: руководительсь нежедьсыне пильгонзон и бта аф ёрай сувафтомс тевс од техникать. Тяни аф сят ни врематне, партиясь ёрдазень ся налхкшнень.

— Кода тянди мярьгомс, Степан Иванович, — карась тяка лазфть эса Салмов, — кодама ломань сай обкомста Порговть докладноенц проверяма. Угадяй Порговть лаца жа новатор кавычкаса и стане шарфтсы тевть, стама панкс стай копорезонк, што республикать келес карматама няевома. А проверяма обязательна сайхть.

Варламов срмазе конянц:

— Но минь тожа аф исяк шачеме, — и Салмовть инголи путсь тага ниле листкат, конатнень эса Поргов анай Варламовть кядьста разрешения, штоба петемс разнай колхозга вете тракторхт. Докладнойса азф, кда аф петемс ся тракторхнень, то может тиевомс авария.

Салмов алашакс цяфазевсь:

— Ха-ха-ха! Ха-ха-ха! Кодама страшнай сон ломанць! Шарьхкодьсак, мзярда мусь пинге петемс тракторхнень? Ломатть ня шитнень ушедыхть нума, а сон тракторхнень калафнесыне. А кие тянкса кармай отвечама? Варламов и Салмов! Ну и ломань, ёжу. Хитрайста тифт планонза.

— А, пади, лацкас ванцасть ся тракторхнень? — Варламов сельмоса няфтсь пиле докладнойхнень лангс. — Пади, афкукс эрявихть петемс?

Салмов яфодезе кяденц:

— Бригадироньке соньфтемонзонга, мезе эряви, тисазь. А ся машинатнень мон содасайне. Кемот нинге. Но тага молян и ванцайне. Озафтса седиенц. Ну и ломань токадсь, ну и Поргов.

Варламов путозень докладнойхнень сейфу, ся папкати, коса ащесть Порговть лангс Митричть и Салмовть докладнойста. Ся папкась тяни ламода эчкомсь.

* * *

Степашкин пелендсь — экскурсияв аф кочкавихть ломатть. А мзярда пуромсь нилегемоньда лама, сон кенярдсь. Мархтонза сявозе Порговтьке, кона аньцек экскурсияв тума шиня получась квартира. Поргов эняльгодсь Сараева Зинати, штоба самозонза штальхце и урядальхце квартиранц.

— А кие ина, кда аф мон, тянь тисы, — азоравакс мярьгсь 3инась. — Ков кельк архт, тоньфтемот сембонь тиса.

Экскурсиястотне удость тоса аф фкя ве, кода мярьгсь тейст Варламов, а кафта, кирдезень синь обкомонь омбоце секретарсь, конац сонць вятнезень экскурсаттнень тона колхозть паксянзон ланга.

Меки састь сембе весяласта. Лама няйсть и кульсть. Васьфтезень синь сонць Варламов и хотя аф мялезонзоль, што ётафтсть колма шит, но пуроптозень и кизефнезень, тусь ли мялезост.

Сембе азсть спасиба райкомти кучемдост.

— Ну и пара! — мярьгсь Варламов. — Ювандеде-явандеде и саты, аф фалу праздник. Тяни кярьмодеда, ялгат, тевс. Ёфси маласа сёронь урядамась, а апак тик тевдонк лама.

Тянь мархта аделафоль корхтамась экскурсиять и передовой опытть колга. Тяса Варламов апряказень синь кальдявста работаманкса, лемдезень Леховть и Чапаевть лемса колхозста Травинть, сюцесь колхозонь тишеть явоманц инкса.

— Сембе получасть телефонограмманьконь? — меколи кизефтезень председательхнень.

— Тянь колга минь и ёратама корхтамс, — эстокиге стясь и азозе Степашкин. — Минь кизефнеськ тя тевть тона районца...

— Кие тинь? — пеедезевсь Варламов.

— Колхозонь председательхне, Степан Иванович, и миньге Алексеевть мархта.

Тяни изь кирдев Варламовть рахамац. Рахамста сурса няфтсь Степашкинть лангс:

— Кулесть, мезе корхтайхть райкомонь секретареньке? Кали аф содасак, Роман Романович, што тишеть колга директивась максф райкомть и райисполкомть лемста? А тинь ёратада корхтамс директивать колга? А тинь шарьхкодесть телефонограммать политическяй значниянц? — кизефтезень Варламов председательхнень. Тишеть и секретарьхнень колга Варламов корхтась стама вайгялься, што тяни киньге изь са каршезонза пшкядемац, пельсть.

— Шарьхкодеськ, — саворне пшкядсть кафта-колма ломань.

— Ну, пара, што хоть председательхне шарьхкодемазь, — озась Варламовть седиец и шарфтсь Степашкинть мархта Алексеевти: — А тинь мархтонт давайте корхтатама илять, ладна?

Тянь эса аделавсь совещаниясь. Степашкин и Алексеев кода салфтома сусксть. Синь нинге самстост арьсезь экскурсиять аделамс лиякс. Надиясть, Варламов пуроптсыне сембонь и азсы, мезе эряви тиемс тяда меле синь районцост, штоба Зубавинскяй районть коряс касфтомс цебярь кукуруза. Нльне кафцьке анокласть, мезе азыхть экскурсиять колга синь. Но Варламов сембонь тиезе лиякс, эсь лацонза.

Апак каштортт Степашкин мархта Алексеев лиссть залста и тусть Варламовть мельге кабинету.

Варламов кяжиель кафцьконь лангс. Степашкин тожа нервничендась. Сон арьсесь‚ мес Варламов бюроть лемста ськамонза примси кодама кельги решеният? Коса жа марстонь руководствась? Кинь мархта примафоль ся решениясь, штоба июньцта тозер видемс?.. Степашкин кяжиясь Зобовть лангска, мес сявок согласиндакшни Варламовть мархта.

Алексеев ламода сирель Степашкинть коряс. Сон ульсь ни Советскяй Армияса политрукокс. Эрь тевса прянц вятезе спокойнайста, изь эряскода валонц азомста. Сонь лангозонза ваномок, Степашкин сютяпнезе эсь прянц.

— Ну, давайте, корхтада, — пшкядсь Варламов вастозонза озамда меле.

Степашкин содазе, што корхтамс сави тейнза, кода омбоце секретарти.

— Минь срочнай телефонограммать колга ёраме...

— Содаса. Но мес сон аф мялезонт?

— Тона зонаса нинге апак урядак пцтай кафта тёжятть гектар лятьф...

— Тожа содаса.

Степашкин аф ламда прибавазе вайгяленц:

— Кода синь урядамс?

— Тянь колга тинь тейне отвечада. Тинь кафцьке секретарьхтяда...

— Тона зонати аф пчкяй ся телефонограммась, — видеста азозе Степашкин, — аф тяфтама телефонограмма тоза эряви, а савихть прибавамс проценттне. Кадк касы тишень урядайхнень интерессна.

— А коста сяфтяда тяфтама закон? Правительствась нинге изь нолда.

— Эста тишесь юмай, Степан Иванович, — пшкядсь Алексеев.

— А кда юмай, минь кой-кинь кизефтьсаськ.

— Тейне или любовай председательти можна максомс выговор, а тише аф ули! — спорясь Алексеевське.

— Шарьхкодьса тяньге, но закоттнень аф мон нолясайне, — станяк жа крутаста корхтась Варламов. — А мзярс кемоньга аф макстама.

Варламов стясь вастстонза, навазень зепозонза кядензон, ётась кабинетонц туркс, кода фалу тиенкшни спорямста, нежедезе копоренц сейфти и пеедембачк кизефтезень секретарьхнень:

— Значит, тинь саде кеветие процентонь анама?

— Минь аф анама саме, — кяжиясь Степашкин, — минь, бюронь кафта члеттне, саме тя кизефксть оду арьсемонза. Ся решениять примасть кафоненть Зобовть мархта, сон эряви полафтомс.

Варламов саворне сась моркшенц ваксс и няевсь, кода тозерявсть пилензон ваксса саниятне. Нежедезе креслати копоренц.

— Тя решениять примайне мон, ськамон примайне, и сонь кивок аф полафтсы. Мон ванфтсайне государствать интересонзон, а аф колхозникнень зепснон. Аф лац тиень: жалбада.

— Мес жалбамс? Минь бюроса ванцаськ, приматама лия решения.

— Бюроса аф ванцасть‚ — керозень кафцьконь Варламов.

Алексеев бта шуфтомсь вастозонза. Сон вестенге ашезе няенде Варламовть тяфтама кяжиста. Сотцезе, што сон корхнесь фалу савор, пцтай пялес шутендазь. Но стане уленкшнесь, мзярда кивок ашезе токсе сонь властенц.

Аф ламос кивок изь кашторда. Степашкин марязе прянц сяда тёждяста, бта сталма веляфтсь эсь лангстонза.

Мекольдень пингть аф весть сашендсь прязонза, штоба видеста корхтамс Варламовть мархта, азомс тейнза, што аф мялезонза тяфтама порядкатне, мзярда Варламов, кода мялец, стане и азорондай райкомса. Но кирдсь, ашезе панчсе потмонц. И вов тячи почкодсь, азозе видеть.

Сяда башка, тейнза пеняцясь Поргов, што сон сёрмадсь сёрма бюров, а ся сёрмать Варламов кирнесы сейфса. Инженерсь вешсь бюроть ширде лезкс, штоба ванолезь сонь планонц. Но мес бюрось аф содасы ся сёрмать? И вов тяни сусксь Степашкинть седиезонза сёрмаське.

— Степан Иванович, а мес аф ванондови бюроса эмтеэсонь главнай инженерть докладнойц?

— Кодама докладной? — оду крьвязсь Варламов.

— Тракторхненди предупредительнай ремонтонь тиемать колга. Ули тяфтама докладной райкомса?

— Мон содаса, Роман Романович, кодама кизефкст эрявихть ванондомс бюроса, — седиень вачкатозь мярьгсь Варламов.

— Но миньге ёратама содамс‚ — спокойна пшкядсь Алексеев.

— Давайте лоткафтость тя баснять! Аф мялезонт указанияне, жалбада. Сявода и жалбада. Шарьхкодесть тянь?

Тевсь мольсь скандалонди. Степашкинть мархта Алексеев срхкасть тума. Варламов ашезь карма кирнемост.