19

Колхозонь кузнецясь утопнень эзда аф ичкозе. Кузнецять перьф ащесть нилецьке комбайнатне, калафнеф сеялкат.

Фкя комбайнать пряса пульхксь Бойкин Андрей. Поргов шумбракстсь мархтонза шутендазь:

— Ванан, машиназт аф вадендят сняра вай, мзяра эсь лангозт?

Бойкин кенярдсь инженерть саманцты, пиндолгофтозень сахаркс акша пейнзон.

— Бта сонць шяйтанць пиза тись потмозонза. Васенда работась, сембе кенярькшнеме. А тяни тага кольсь-каладсь. Кода калада маци‚ нолдасак, и эсь шава пряц аф ускови. Нинге эмтеэсста самста вирняньконь ваксса колма шит нюрьгондень.

— Ванолесть моторть, — азозе Поргов и куцсь комбайнать пряс, кармась ванондомонза моторть.

— Ломаттнень председательсна маштыхть эмтеэсонь баярхнень мархта тошксема и цебярь машинат получакшнихть, а минь...

— Зря тон корхтат, Андрей, зря.

— Мес зря? Мон монць няендине, кода директорсь лиятненди тяшни записканят кладовои, и тоста лихнихть запасной частьт. А тейнек сембось аш: аш машинат, аш частьт. Кадса и вестенге аф кундан эзонза, кадк директорсь сявсы меки крандазонц, — коленчатай валть шарфнемста жалбась комбайнерсь.

Поргов рахась лангозонза и варжакстсь фталу‚ няезе Шиндинать, пеедезевсь:

— А-а, вов кие тяса ащи. А мон арьсень, мес аф нолдави моторсь?

— А тинь копорентень тясть ужяльде, ладняс мяндевода и нолдасасть, — каршезонза шутендась Варвара Степановнась. — Ванан, сурбентень пельхтяда токафтомс машинати.

Апак учсек рангозевсь моторсь. Сембе весялгодсть. Поргов варжакстсь Шиндинать лангс и кядьса няфтсь моторть лангс: ашезь кулев, мезе азсь.

— А вов срхкафтсак вастстонза, — мезе ули вийц пешкодсь Бойкин Порговть пилес, — и ушеды козома.

Поргов сембе ширде проверязе моторть, но мезевок изь му. Валгсь комбайнать лангста, кошардозе комбайнерть ётамс кузнецять перьф. Машинась бта капа шаштсь.

Варвара Степановна кармась азондома, местема сась:

— Тага почаксасть Леховть лангс. Варламов кучемань проверямонза. Ванк вов тя сёрмать.

— Мес аф машфтсасть районца клеветникнень? — кяжда мярьгсь Поргов сёрмать меки венептемстонза.

— Мон содаса тяштить‚ — лоткафтозе Шиндинась, — кядть колга содаф. Азондыне Варламовти, но сон куликска ашезь тий.

Поргов ванць комбайнать мельге, кода ся вийфтома шаштсь, и азозе:

— Мон аф шарьхкодьса Варламовть.

Комбайнась пачкодсь вастозонза, Поргов лоткафтозе и сувась комбайнать алу, проверязень тормоснень. Мзярда тердезе тоза комбайнерть, ся эрьхтезе кядьлапшса конянц, сюцезе эсь прянц, мес тнярс изь шарьхкодев.

— Ванды сай механик и лезды тейть, — азозе Поргов. Кодак лиссь сон комбайнать алда, Варвара Степановнась няфтсь щеканц лангс, кона вадевсь мазутса. Поргов изь шарфта мяль тянь лангс, кизефтезе Шиндинать, можна ли кучемс сельсовету сонь машинанц.

— Кучк, кучк, — пшкядсь ся, — а сонць шутендась: — Кодама мазыят тячи, вага тиемс эздот карточка и кучемс тядяцти.

Поргов тага изь отвеча, азозе комбайнерти, што эряви молемс сельсовету, звонямс эмтеэсу, кадк ванды сай тяза механик.

Бойкин и шоферсь цють аф ласькозь тусть машинати.

— Малость эшендеть? — обжафста кизефтезе Варвара Степановнась Порговть, коста лядсть ськамост. — Может, тяниенге аф отвечат?

— Тейне ашель ётка: заняфолень, — виноватонь вайгяльса пшкядсь сон.

Варвара Степановна аньцек тяфта корхтась, но афи обжафоль Порговть лангс. Меколанкт, ваномок, кода ся возсесь комбайнать перьф, кодама курок музе, мезе шорясь машинати, сонь кассь седиец. Нежедсь Порговть малас и, няемок, што маласост кивок аш, кельгозь пшкядсь:

— Нардак шамацень, Борис.

Ся таргазе руцянянц, нардазень кафцьке щеканзон.

— А вов тяста изь нардав, — Шиндина суронц токафтозе ранендаф вастти и эстокиге таргазе ожастонза эсь руцянянц, ашкодозе суронзон перьф и фкя кядьса нарнезе шаманц, а омбоцеть мархта кирдезе щекада.

Поргов марязе, кода парьхциень руцянясь казямста шашнесь щёкаванза, а стирень ляпе сурхне эждезь щёкапрянц. Сидеста шавсь сонь седиец.

Варвара Степановна нинге сяда маладсь тейнза. Поргов марязе, кода щека прязонза токасть сонь лямбе трванза, кенярдсь и изь стрянда сонцьке, кода ктмордазе Варвара Степановнань.

Варвара Степановнась сявозе Порговть мяштьста прянц и нльне эводсь, кодама вий сонь кошардозе Порговть палама. Вдь кда азолить тейнза ковда инголе, што сон васьфти аф содаф ломань и нюрьхкяня пингста сяшкава тонады ся ломанти, што сонць паласы, ня валхнень инкса сон сельголь шамазот. Райкомса работамда инголе, мзярда ульсь аньцек зоотехник, и эста, мзярда сась райкому, сон лувондовсь сембода скромнай стирькс. Пельсь лишнай валонь азоманц и зря пеедеманц. Аф стак тядяцка корхнесь, што тяфта прянь вятеманц сюнеда аф муви тейнза цёра ялга. И вов сон васьфтезе тя аф содаф ломанть, и тяни шяезь шяи инксонза седиец.

Аф весть Варвара Степановна корхнесь ялганзонды, што кельгомста эряви кулхцондомс аф седице, а пряце. А кинь кулхцондсь тячи сонць, мзярда палась аля?

Павазуста марязе прянц Порговське. Сонь щека-прязонза бта педстъ стирень лямбе трватне, палозь палсь палаф вастсь. Пади, мезе-мезе и эряволь азомс Шиндинати? А мезенди? Синь валфтомонга фкя-фкянь шарьхкодсть. Поргов палазе сонь кяденц и путозе эсь щёказонза.

Паксять ширде яфоди кожфсь канцсь кенери сёронь танцти шиненя. Поргов ашезе ноля стирть кяденц, тейнза-арам, аньцек кафонест синь ульсть сембе светть лангса. Тяни тейнза сембе мирсь ульсь — тя сонь Варац. Бта аньцек кафонестольхть сенем менельть ала. Поргов сявозе Варвара Степановнать кядезонза и, кода шабань, кармась палсемонза.

Аф весть Варвара Степановна корхнесь ялганзонды, што кельгомста эряви кулхцондомс аф седице, а пряце. А кинь кулхцондсь тячи сонць, мзярда палась аля?

Павазуста марязе прянц Порговське. Сонь щека-прязонза бта педсть стирень лямбе трватне, палозь палсь палаф вастсь. Пади, мезе-мезе и эряволь азомс Шиндинати? А мезенди? Синь валфтомонга фкя-фкянь шарьхкодсть. Поргов палазе сонь кяденц и путозе эсь щёказонза.

Паксять ширде яфоди кожфсь канцсь кенери сёронь танцти шиненя. Поргов ашезе ноля стирть кяденц, тейнза-арам, аньцек кафонест синь ульсть сембе светть лангса. Тяни тейнза сембе мирсь ульсь — тя сонь Варац. Бта аньцек кафонестольхть сенем менельть ала. Поргов сявозе Варвара Степановнать кядезонза и, кода шабань, кармась палсемонза.

— Саты, Борис, саты! Ломатть няйсамазь! Васеттяма меле‚ — эняльдсь Варвара Степановна. — А тяни архт.

Поргов бта кувака онда меле сргозсь, нолдазе Шиндинать и, кода иретьф, тусь паксять шири. Варвара Степановна кенярдезь ванць мельганза. А сон мольсь и, кода сюрьхцемса, сеендезень суронзон пачк кить трвава касы тише прятнень, розь панчфнень. Мялецоль сонь морамс, штоба кулельхце вайгяленц марнек паксясь. Сон валгсь лашму, коса лама тюсонь кудрянякс кассть варсиень прят, мадсь, келептезень кядензон, конянц нежедезе летьке модати и кармась кулхцондомонза паксять моронц. Аф нотаса, аф валса тя морось апак тяштть, аф стирень мазы вайгяльса, аф цёрань весяла гармонияса апак морак. Сонь содасы и морасы аньцек сонць кели паксясь. А морасы мазыста, седиень токазь. Тяк кельге паксять, и эста сон аф няфтьсы тейть эсь мазышинц, аф морасы тейть эсь моронцка.

Поргов конезень сельмонзон. Панчфнень прява пайгонякс дзинькиесть мешне, прамошне. Коса-бди ёфси маласа кочколдсь ёр, пефтома таргазе моронц жаворонкась, шнафтсть пря эсь басснон мархта грацне, варсихне, синьге моросна ладясь паксять мазы моронцты.

Ляйнять кувалмос велеть ширде кайгсь кшнинь цинькиема, шава боцькянь калдордома. Коса-бди цяфась алаша. Ня сембе звукне васенда марявсть башка-башка, саворне, аф ладнайста, но ков сяда кулхцондсь Поргов, тов сяда вишкомсь морось, сяда маземсь. Аньцек тяни Поргов содазе, што шава паксяса нльне тесналь природать ня моронзонды. И сяшкава тесна, што кда тя пингть моразеволь тяса стирень мазы вайгяль, сякокс сон аньцек шоряль паксять ня моронзонды.

Поргов кулхцондсь‚ и сельминголенза арась нюрьхкяня, но оцю эряфоц. Вов сон ёфси шабанякс сась паксяв алянц мархта уманяснон сокама... Тоса сонць пефтома паксява вятни комбайна... А вага танкац, конань сон получазе танковай школать аделамда меле... Инголенза арасть кафта стирьхть: васенда Анфиса, мельганза лиссь Варвара Степановна... Кафцьке мазыхть; кафцьке маластоннет.

Поргов эрязста стясь. Сон мес-бди визделгодсь, хоть кивок ашезень куле арьсеманзон. Варжакстсь перьфпяли и меки тусь кузнецять шири. Тяса кивок ашель, пиндолдсть шить каршеса машинатне, часовойкс ащесть и учсть Порговть эса.