18

Обедама Порговть сявозе Лехов эсь пялонза. Эрясь сон пцтай велеть песа ширемф кудняса, кона ащесь ськамонянза. Аньцек нежедсть кудть малас, лиссть каршезост кафцьке шабанза. Фкяти ульсь сисемшка киза, а омбоцесь кизошкада сяда ёмлаль. Шабатне кенярдсть, кярьмодсть аляснонды и кода маштсть, стане комотнесть перьфканза. Эстокиге шабатнень мельге эвондась сёрмав пине лефкс, сон тожа комотнесь азорть инголе.

Лехов палазень шабанзон, сюдердазе пине лефксть:

— Ну, аряда ярхцатама!

Кенкшева сувамста Порговти савсь комамс: пяк алняня. Куднять потмоцка изь шнафта пря наряжафшиса. Киякс доскатне пялес наксатт, пянакудсь ширемф, аф оцю вальмянятне цють кирдсть вастсост. Кудть потмоса эзепт ашельхть, аф кода мокшень кудса, фкя стенати нежетьфоль комод, кона ацафоль кружевань вельхтердаса. Комодть лангс марафтольхть патефоннай пластинкат, кафта склянканят одеколон и коробка пудра. Тяса жа ащесь оцю ванома, конань пачк склянкатне и пудрась няевсть кафтонь-крда. Кудть кучкаса ащесь клеёнкаса вельхтяф шра, перьфканза ладяфтольхть ниле венскяй стулхт. Наксада куднять нинге мазепнезе ся, што пянакудть каршец перяфоль мазы ситцань занавескаса и штаф кияксть кувалмос ацафоль половик. Апак штукатурендак стенатне петфнефтольхть сенем шпалерса. Вальмятнень вельхксса нюрьгсть эсь кодаф кружевань занавескат, вальмя ланкнень эзга — аф кунара озафнеф панчфт. Стенатнень кувалмос ащесть кафта кроватть.

Алятнень васьфтезень Леховть рьвац, Елена Петровна — серес аф оцю, кеме ронга, равженя. Кодак няезе Порговть, сон визделгодсь, мес щаф ожафтома сарафанца и кяпе. Кядьлапшензон мархта кяшезень лафтунзон и эрязста лиссь кудста. Меки сувась сон панчфу платьяса и тапочкаса, инголенза кенерсь ни сотомс ситцань фартук и аньцек тяни, якстерьготф шамат, нежедсь Порговть малас и кармась знакомондама.

— Кодама шта варма пачфтсь тяза ошень ломань? — шутендась Елена Петровнась.

Тусь Порговть мяльс Елена Петровнать корхтафоц. Валхнень азондозень аф ламняда шалхконьбачк и фалу мзолдсь.

— Или кись тейнек перяф колхозу? — кядень штамста мярьгсь Поргов.

— Кись панжада, да шарыенте мес-бди аф тя пяли шарыхть?

— Тя зря тон, Елена Петровна‚ — шутендась Порговське, — мон шачень велеса и велень эряфть эзда аф атказакшнян.

— Монга кенерень ни велень эряфть эзда сускомс и фталу апак варжакснек тячикиге ворьгоделень тяста.

Лехов азозе рьванцты, кие тя Поргов, и поладозе:

— А тон, Борис Константинович, тяфта кяжияфтсак Ленать эсь лангозт. Сон кельгсыне сятнень, кит сялдсазь велень эряфть. — Но кодак рьвац лиссь бохаряму, сон азондозе: — Курок киза ни топоди, кода саме тяза, а сон сякокс ризнай, кие аф сай ошста, кода маластонь раднянди кенярди.

— А кода аф ризнамс? — нинге сувамста пшкядсь Елена Петровна. — Ваность, кода эрятама! А вдь ошу кадоме дворец. А тяса мезе? Эрятама, бта кардса, аньцек аф шужярь потмоса.

— Лена!.. — уркстозе Лехов.

— Мезе Лена? Мольсь мялезе. Работат шинек-венек, а колгат фкявок цебярь вал аф кулендян. Туян, кадк лучи пилене аф кулихть, сельмоне аф няихть. — И кармась капшама мргаса.

Поргов кизефтезе Леховть:

— Ётай кизоня колхозсь оцю доход получась?

— Аф, котошка сяда тёжянь.

— А угодияда артельса мзяра?

— Сокафта кафта тёжяньда лама и пцтай кафта сядот гектар луганьке.

— А коста получафоль сембода оцю доходсь? Каньф виденттяда? Пяк оцю доход максси колхосненди каньфсь, содасак?

— Содаса. Но минь колхозсонк...

— Аф кельгсазь каньфть? Видеде мзяровок?

— Аньцек лемонкса: комсь котува гектар.

Поргов варжакстсь Леховть лангс:

— А мезьса ёратада кеподемс колхозонтень доходонзон? Вдь ярмакфтома ичкози аф тутада, содасак?

Лехов пеедезевсь, комафтозе прянц и пеель нярьса каразе моркшть. Аф ламос ащемда меле вийхца лихтезень арьсеманзон:

— Минь чаятама мумс эстейнек лихтибря... ёратама кочкамс и салыяфтомс кафта сядошка боцькя панга, и, чаятама, тевсь лиси. Аньцек ладняс арьсемс сави.

Порговсь аф курок отвечась. Сон малость думандась, пейньбачк пеедсь. Лядьсть мялезонза райкомса корхтаматне, мяляфтсы: эста рахсесть Леховть лангса панкнень колга.

— Значит, ёратада панжемс пангонь завод и эста козякоттада?

Лехов якстерьгодсь, визделгодсь.

— Мон содаса, кой-кие рахси. Пялязкс лувсамазь тянкса, но мон аф пелян, эрь тевса тяфта уленкшни. Васенда одть эзда эводихть или рахсесазь, а меле...

— А колхозникнень кизефнить? Синь согласиндайхть пангонь заводонь строяма?

— Мес аф согласиндайхть? — обжафста отвечась Лехов. — Ярмакнень аф эстейне сявсайне, — и ваномок Порговть сельмос, прибавазе: — Кие кода тяза корхта, а мон содаса, што доход сяфтяма сняра жа, мзяра «Возрождениясь» сявонди каньфонц эзда. Прязень максса керомс, што сяфтяма.

Поргов изь кирде, рахазевсь.

— Ого! И тон верондат, што ярмаконте шачихть? Содасак баснять, кода врьгазсь кунцесь калхт пулосонза?

Елена Петровна якась кудть туркс мековасу: путсь шрать лангс куцюфт, тарелкат, кандсь шаваняса кельме квас, но сонць апак лотксек варчсесь алятнень лангс, ёрась шарьхкодемс, мезе корхтайхть и мес рахась инжись. Поргов приметазе тянь и лоткась рахамда. Сон стясь вастстонза, ётась кудть кувалмос.

— Тон тят кяжия лангозон, Илья Борисович, тя мон стак пеедян, цебярь настроениязе. Может, и панкневок максыхть доход колхозти, но, монь койсон, каньфсь сяда надежнай усфсь. Варламов содасы арьсемацень?

— Содасы.

— Тинь споряма озаде или завтракама? — уркстозень Елена Петровна, сонць путсь кажнайть инголи тарелкаса окрошка.

Ярхцамста исть кашторда, но аньцек путозь куцюснон, Елена Петровна кизефтезе мирденц:

— Няине, тага сашендсь азоронте. Наверна, сюцензе?

— А кда аф сюцемс минь, цебярьге аф няят эздонк. Тевса всякай эряй, — пеедембачк отвечась Лехов.

— Аф кельгса мон сонь, кода матрама кев, шинек-венек арни и сяконь вешенди, кинь мезенкса сюцемс, — обжафста корхтась Леховть рьвац.

— Лена! — уркстозе Лехов. — Аф весть тейть корхнень тянь колга.

— Месть уркснесамак, Илюша? — сядонга обжавсь ся. — Секретарь сон тейть. А тейне — простой ломань, а ломаттне всякайхть эряйхть. Тонь колгат вдь корхтайхть? А мес эсон уркснят? — сон путсь шрать лангс рястаф модамарьхть и котлетат, каясь кажнайти кружка кельме лофца.

Азорсь сивсь фкя котлета, симозе кельме лофцть и стясь.

— Ну, мон молян пуроптсайне правлениянь членоньконь и плотникнень. Мезе-мезе эряви арьсемс тракснень копга‚ — азозе сон Порговти. — А тон, может, мадат аф ламос, ваймат?

Поргов атказась, кизефтезе, кода мумс синь токснон.

— Токсь и комбайнаньке — пцтай тязкот, варма меленцять фталот. Тоса Белкинть мусак. А меле тейне няфтьсак планонтень?

— Кодама план? — кизефтезе Поргов и пеедезевсь.

— Тейне азозь, што минь колхозозонк карматада тиема механизированнай ток. Зря корхтан? Сонць Зобов мярьгсь.

Поргов тяни нюрьхкяняста азондозе, мезе ёрайхть тиемс синь колхозозост.

Лехов прважазе сонь пцтай токснон лангс.

* * *

Партийнай организациянь секретарсь Белкин тячи васенцеда васедсь Порговть мархта, но колганза лама ни кулендсь. Синь тяни марса ётазь шава утопнень и озасть мекольдеть борафонц лангс. Белкин аф пяк корхтафкшу ломань. Сон фронтса контужендаф, тейнза стака азомс васенце валсь. Поргов таргазень механизированнай токонь чертежензон и келептезень кияксти.

Чертешнень ванондомста Белкин кармась пеняцяма, што синь хозяйствасна пцтай сембода лафчсь районца и што тяфта кальдявста эряйхть лама кизот ни.

Поргов приметазе, што корхтамста нльне тозерявсть Белкинть лафтунза. Но мезе изь азонда, а Леховть ашезе лемне, бта ся аш колхозсостка.

— Азк видеста, Андрей Васильевич, тонць, кода парторганизациянь секретарь, верондат председателентень виензонды? Надият лангозонза?

Белкин кафта шири вадердазень равжа усанзон, отькорьста варжакстсь инженерть лангс:

— Кода мярьгомс? Бта цебярь кожф уфай эздонза, тевть кельгсы, но...

— Корхтак, корхтак, тяйть капие валхнень.

— Мон аф капиесайне, — пеедезевсь Белкин. — Вов карматада мархтонза работама и няйсасть. А стак алясь пара.

— Мон кизефнеса аф кода алянь, а кода председателень?

Белкин крвястсь папироса и, кирдемок коморсонза, отвечась:

— Тевть кельгсы. Но тевть кельгомац и сонь содамац — тя, монь койсон, аф фкя лацот. — Меколи марнек смелкстомсь. — Содасак, Борис Константинович, фкя сире ломань весть тейне мярьгсь: мзярда катось ёрай кундамс шеер, сон аф шумнай. А Леховть планонза оцюфт, валдонза лама, а тевоц моли кальдявста. Бта кальдяв плотник: шуфтть эса керы, а узеренц эрьхнесы аф фкя вастс. Пади, ошста сафне фалу тяфта тиендихть?

Порговть киськордавсь седиец, но эстокиге стряндась, што сон сонць кошардозе тяфта корхтама. Белкин тожа шарьхкодсь:

— Обжавоть, Борис Константинович? Афоль эряв тяфта корхтамс председателеньконь колга? Тят кяжия, минь вдь ломаттне—велеряйхтяма, хитрайста корхтама аф машттама, а стак, кода повсь шарфтсаськ кяленьконь, лапоттяма, мезе аф эряви.

Порговть нльне начксь коняц. Обидна ульсь, мес Леховть колга тяфта корхтай парторганизациянь секретарсь. Тейнза-арам, Лехов — ломанць аф зряшнай, мезевок аф ужяльди тевонц инкса. Но мес изь му яння колхозникнень седис?

— Леховть тевонзон инкса вдь тонга отвечат. И мон тонь вастсот афолень карма пейнь карама.

Белкин обжавсь.

— Районть келес минь колхозоньке арась бта ёшма паксяса, сембе корхтайхть колганк. А мес? И мзярс тя нинге кармай улема?

— А кинь учтада тевонтень ладяма? Деряй, районцта сай?

— А кие ина?

— А Лехов? Тон? Мезе тон учат? Ванондат ширеста, мезе лиси Леховть эзда, тяфта?

— Тяфтамс аф тяфта, — обжавсь Белкин. — Мекольдень вете кизотнень миннеса полафтсть вете председательхть. Азк, ичкози тяфта туят? Ванк, кода эрятама. Кодак туй пизем, ярхцамста куцювозон ведь шуди, галошт кудбряньке. И ванк, кода эряйхть минь соседоньке, «Возрожденияса». А моданьке мархтост фкя лацот, и колхозникне тоса аф кафта ваймосот. Мархтост фкя пизем начфнесамазь, фкя мани косьфнесамазь, а эрятама аф фкя лаца. Мес тяфта? Кие тянкса отвечай? Или сявк «Мазы пакся» колхозть. Тожа аньцек киза, кода сась председательсна да ёфси од стирня, няемацка аш мезе, а сельминголенк полафты велесна. Ня шитнень нолдасть кудгаст электричества. Синь рысак исть рама, автобуссновок аш, но ули кшисна, валтт кудсна.

— Значит, Лехов карьготьф пракста? Аф пчкяй?

— Мес карьготьф пракста? Работай, шави пря, а тевоц кода-бди аф лисенди. Лияста нльне ужяль ломанць. Вдь фкя лацот мархтонза партийнай билетоньке, но мезе мон тиян? Корхтамс тейнза аф смендан, чаян, сонць аф шаба.

— Пара, што хоть тянь шарьхкодьсак, — пеедезевсь Поргов. — А кли фкат партбилетонте, лездт тейнза.

— Аф содаса, кода нинге лездомс. Мезе мярьги, сянь тиян.

— Эх, Белкин, Белкин, «мезе мярьгомать» кадк тисы рядовой колхозниксь, а тон сяфть кядезт узерь и кярмотть плотничемдама. Вов тя ули лезкс.

— А кда аф маштан узерть кирдема?

Поргов рахазевсь:

— Моньге тядязь шачфтомань аф инженеркс и аф танкистокс, но тейне ульсь сембоц комось киза, мзярда Советскяй властсь макссь капашка танка. Наверна, тонга улеть войнаса?

— А мес мон? Или попть казанц ваныне? — шутендась Белкин. — Гаубичнай полкса тюрень.

— А вдь войнада инголе тожа ашить сотце пушкать. Няить, мезе тиеме фашисттнень мархта? Ну вот, а колхозса узерьда эводеть.

— Мес эводень? — азозе Белкин и стясь вастстонза. — Тейне эряви молемс правленияв, наверна, заседания кармай улема.

— Тяфта ни работаме мархтот? — азозе Поргов, няфтсь чертеженц лангс.

— Сяльде аф карматама споряма и сразу сембонь арьсесаськ. А тячиень корхтаманкса спасиба. Может, кой-мезе аф стане азонь, тят кяжия.

Поргов тусь комбайнатнень шири, а Белкин видеста перетнень фталга эряскодсь правленияв.