17

Варламовть тумда меле аф председательсь, аф колхозникне ашезь сода, мезьста ушедомс корхтамаснон. Атятне ашкодсть цигаркат, оттне крьвястезь папироскаснон, и туцякс кеподсь вельхкссост качамсь. Ширеста ванозь можналь мярьгомс, што тя минутаня сембода эрявикссь нят ломаттненди ульсь таргамась. Аньцек таргамста алятнень ёткста кие-бди колазе сетьмоть:

— Бурясь тага ётась.

Лехов нежедсь Порговти и саворне азозе:

— Вов фалу тяфта. Сай, нолдасы фкя пильгонц машинаста и пужеды эсонк, но вестеньге аф азсы, кода и мезе тиемс, бта мон сембода злодей ломанецан. Пади, аф стане шарьхкодьса?

Поргов изь отвеча. Сон кодак ащесь нинге Варламовть пингста комадонь прят, станяк и лядсь, бта мезе-бди вешендсь модать эзда, хотя сембе учсть, мезе азы инженерсь.

— Неужели мезевок ашеде анокла сёронь урядамати? — кати кяжиста, кати обижафста кизефтезе Поргов Леховть.

— Кода ашеме? — Лехов нльне кенярдсь Порговть валонзонды. — Бестарканьке анокт, грузовой машинаньке кунара ни петьфт, аноклафт кяскафт. Заводоньке надияфтсть сёронь урядамати максомс кафта грузовой автомашинат, анокламе кота жнейкат...

Тя пингсь крандазса тяза сась колхозонь партийнай организациянь секретарсь Белкин. Конюхсь сявозе алашать, а Белкин лядсь алятнень ёткс.

Поргов содазе ни, што Белкин работай тингонь заведующайкс, а сяс шумбракстомста азозе, што тейст эряви корхтамс. Белкин нардазень кафта шири равжа усанзон, шукадезе малость кичкорготф лафтунц, пеедезевсь:

— Мон содаса тевть, Зобов азондозе. Кунара ни учтама эсонт.

Поргов кадозе Белкинть и тага корхтась Леховть мархта.

— Ну, а мес ина кяльцень сускить Варламовть мархта корхтамста?

— А мезе корхтамс? — Лехов тяни апак лотксек таргась, сускондозе папироскать пенц: — Васьфтсь паксяста кодама-бди «тюжя шяярь бригадир» и мархтонза корхтась колхозоньконь колга, — Лехов изь кирде, пеедезевсь: — «Тюжя шяярь». А кие ся «тюжя шяярсь»?

— Минь аш стама бригадироньке, — корхтамати шоворсь старшай конюхсь Каргин.

— Но кие-бди корхтась тейнза, Варламов сурстонза тянь ашезе потя.

Сембе алятне тифтень-тифтень кочказь велестост сембе од ломаттнень, кинь хоть малость тюжятольхть шяяренза, ёразь содамс, кинь васьфнезе Варламов. Лехов нинге сембе нервничендась. Сон нежедсь Белкинти.

— Андрей Васильевич, архт, пожалуйста, ваныть, мезе тиендихть машинаснон мархта комбайнерхне.

— Мон улень тоса, — шура корхтафса отвечась Белкин‚ — Бойкин нолдазе комбайнанц.

— Тяни нилецьке анокт! — кенярдсь Лехов.

Поргов аньцек пеедезевсь. Сон нинге исяк содазе, што тячи нолдави тя комбайнась.

— А Бойкинть лангс сякокс аф надиян, — Порговти мярьгсь Белкин, — тага мезе да мезе муй калада крандазонц эзда. Мезе-бди корхтась Бугровське, лемнезе комбайнань моторонц, бта аф пчкяй сцепленияц. Пожалуйста, ваныть тонць машинаньконь.

— Тяни минь аф нолдасаськ тяста, — кеняртьфста азозе Лехов, няемс, сонга содазе, што Поргов кармай тяса строяма механизированнай ток. — Тон, Андрей Васильевич, пожалуйста, тяйть кадонда покойс комбайнерхнень, а минь Поргов ялгать мархта тячи мольхтяма траксонь фермав. Молят, Борис Константинович?

— Траксонь тевса мон содаса аньцек лофцть и палть‚ — рахазевсь Поргов, — а сяда лама мезевок аф шарьхкодян. Пади, мон ванцайне комбайнатнень, а? Тейне сякокс эряви молемс тракторнай бригадав.

— Тракторнай бригадав молема кенерят, — эняльдсь Лехов, — аде мархтон фермав, ванат, мезе-мезе и лездат.

Няевсь, што Леховти аф сяшкава эряви сонь лезксоц фермаса, конашкава мялецоль молемс марса, а сембода пяк тяни, Варламовть мархта корхтамда меле. Поргов согласиндась.

Кемоньшка минутада меле кильтьфоль дрожкас серай рысак, кона куйнь кал лаца шуваняль и кувакаль, теланц келес бта серай марьхть петфнефт. Алашать тяза панезе средняй кизоса конюх, кона шамордсь фкя пильгонц лангс. Конюхсь валгсь дрожкатнень эзда, тона бокста шаркстсь тя бокти, и Порговть вакска ётамбачк варжакстсь сонь шамазонза:

— Мон коста-бди няендихтень тонь.

— Тя тон, Федя?

Конюхсь пеедезевсь:

— А мон сразу содайхтень, Борис. Аньцек чаянь, тон юкстамайть.

Ялгатне фкя-фкянь ашкордасть и паласть.

— Э-э, брат, тонь кемоста тяштензе Гитлерсь! — Федя няфтсь Порговть керф щеканц лангс.

— Тейтьке кадсь лятьфнембяль, — стакаста таргазе ваймонц Поргов и няфтсь ялганц шуфтонь пильгонц лангс. — Тожа куломозт аф юкстасак фашистть паронц. Деряй, тяса эрят?

— Тяса.

Рысаксь кштись фкя вастса, цють кирдевсь Леховти, а сяс Порговти ашель мзярда сяда ламос корхнемс.

— Няйхтяма нинге, Федя!

Алашась бурякс фатязень дрожкатнень и колмошка километра ардсь апак лотксек.

— Пяляскодоть, што ли, окаяннай?! — сюцезе Лехов алашать, мзярда ся сютямсь и кармась саворне аськоляма. Рысаксь шуказе прянц, токафнемок мянь дугати.

— Самай тя алашать инкса бюрось тернемазь, — азозе Лехов.

— Мес?

Лехов варжакстсь Порговть лангс и шарьхкодсь, што инженерсь сембе тевть аф содасы колганза, кармась азондома песта пес:

— Бта пяк лама пандонь инксонза. А кодама лама? Сембоц колма траксонь питнет. Ванк, кодама алаша сатонь. Госрассадникста, — и тага токазе алашать. Рысаксь сяшкава вишкста тусь ардома, мярьгат пиксокс таргавсь кить кувалмова, бта сонга шарьхкодсь и азорть лаца ёразе няфтемс Порговти эсь прянц.

Леховть толкс палсть сельмонза, апак лотксек корхтась алашать мархта:

— Э-э-э, милашка! А ну, няфтьк пряцень! Давай, давай, Эврик! Сембе сталмотне тушендыхть седистон, кодак озан тя нармонть лангс.

— Или пяк лама сталмодот?

— Лама, — аф мяльвельде отвечась Лехов, — пяк лама.

Кись валгсь паксяста лугав. Лехов кирдезе алашать, штоба афоль арда.

— Лияста вень-вень аф утцян. Тевозе кода-бди аф моли. Ванк тонць‚ — тяни марнек панжезе потмонц, — рамаме колхозти рысак — сюцемазь. Заводстонк усконь колхозу автобус — рахама вастокс арань. Срхкань строяма жуватань городок, азомазь Маниловокс. А меколи черттне шорямазь тя тозерть мархта. Ков аф шаркстан, бта кячкаст пезыхть бокозон. Молян райкому, карман мезе-мезе анама — машнихть лангозон, сюцихть эсон. Корхтайхть, тон эсь анаматнень мархта косьфтайть сембе начальникнень седиснон. Виде, анама якан сидеста, но вдь аф эстейне анан. Шарьхкодьк тонць, кда аф строямс, эста местема ина кучемазь монь тяза? Пади, аф стане корхтан?

— Маряк, аф тянь эзда ушедыть строямать? Сембе ня тефнень колга Варламовть кизефнить?

— Аф весть якань Варламовти, азонкшнине эсь планнень. Сон содасы, што ёратама тиемс цебярь картт. Азонкшнине и сяньге, што сай кизонда нолдатама карттненди электричества, ётафттама водопровод, усктама тяза цебярь породань жуватат.

— Ну, а сон мезе?

— Эста малость рахась лангозон, мярьгсь Манилов и сяка. Можбыть, чаясь, што ня сембе тефненди виеньке аф саты, седиеньке аф кеподи?

Мезевок изь отвеча Поргов. Сон мезеньге кальдяв изь няй Леховть тевонзон эса. Мезенкса тячи сюцезе сонь Варламов? А, пади, тяфта и эряви, сразу аф содави, кие эздост лац тиенди: Варламов или Лехов. Сон содазе сянь, што Варламов лама киза ни работай райкомса, оцю опытоц; содазе сяньге: Леховсь — председательсь од, изь кенерь кизовок работамс, лама ни тись эльбятькста. Эсь потмованза арьсезе, што, кда улель сон Леховть вастса‚ афоль рама рысак, афоль уска тяза автобус.

«А кода мон тиелень Варламовть вастса? — эстокиге кармась думандама Поргов. — Мезе мярьголень, кда тяфта тиель Лехов?» Аф ламос думандамда меле арьсезе, што сон сякокс тячи афоль карма сюцема, кода тись Варламов. «Мон сяволине ба Леховть «Возрождения» колхозу и мярьголень ба Чуйкинти: на, тонафтк тя ломанть, няфтьк, кода касфтомс тракснень лофцснон. А, может, аф тяфта тиелень? А, может, усколине тяза Чуйкинть? Кадк ся, опытнай председательсь, тяка жа тракснень лангса няфтелезе, кода касфнемс синь лофцснон?»

«Агитаторкс аралеть ба тон, Борис Константинович, аф секретарькс, — думандась меколи эсь колганза, — руководитель эздот афоль лисе. Сяс и аш месть корхнемс Варламовть колга». И аньцек тяни мес-бди кяжияста пшкядсь Леховти:

— Тон корхтат, кучедязь тяза, штоба тёждялгофтомс колхозникнень эряфснон. Но, деряй, маземи колхозникнень эряфсна, кда тон арнят рысакса? А кинь усксетяда автобуссонт? Лодырьхнень да мазы сельмоса ваныхнень, тяфта?

Лехов якстерьгодсь:

— Значит, кда улелеть секретарь, тон тянкса тожа сюцелемайть?

— А, пади, аф аньцек сюцелихтень, но и пиксолихтень. Пиксолихтень рысаконкса и автобусонкса, а шналихтень жуватань городокть инкса.

... Траксне ащесть Мокшеть сире китьксонц эса пря видева ведьса. Конат пельсть ведть эзда, сят шарондсть, тостиесть фкя-фкянь сюроса. Ведрашне кепсезь пулоснон и ёрасть ворьгодемда.

Кафцьке постуфне — кодгемоньшка кизоса атясь и кемготувошка кизостонь цёрокшсь — апак лотксек якасть стойлать перьф и юватькшнесть тракснень лангс. Мзярда-бди стойлась перяфоль олгса, но тяни траксне синнезь синь и кода повсь комотнесть перяфксть вельф. Фкя вастс, олгонь перяфть ужес, веляфтф усф аньцек шта лятьф пинем, но траксне ашесть ярхца: пуропне изезь кадонда синь покойс.

Лехов кати эстейнза, кати Порговти пшкядсь:

— Кодама тяса лофца?

— Тяса тонцень пуропне сифтядязь, — отвечась Поргов.

Шавсь пря рысаксь, эрьхнезе пеконц то фкя пильгса, то омбоцеса, тяльмокс яфиезе пулонц, апак лотксек цингордсть овозонза.

Цёрошксь панезень сембе тракснень ведти, нежедсь алашати и каль тарадса панцезень лангстонза пуропнень, сонць мезе-бди саворне корхтась алашать мархта. Атясь нежедсь алятненди и бта эсь прянц араламанкса пшкядсь:

— Вов, эрь шиня тяфта, хоть караул пешкотт.

— Тяфта и эряфтада! — кяждонза мярьгсь Лехов.

Атясь стяфтозе председательть лангс шаржу сакалонц.

— А мес шта тяфта эряфтама?

— Кода мес? — тяни сядонга кяжиясь Лехов. — Деряй можна, Спиридоныч, тяса кирдемс жуватать? Или аньцек тячи шачеть светть лангс? Мярьгат, аф стане корхтан?

— Знама дела, аф тячи. Ужяль жуватась, монць содаса, стака тейнза, а мезе тиян?

— А косот дояркатне? Мес траксне апак потякт?

— Знама дела, эрявольхть кунаркиге потямс!

Ливозьботмоса арась Лехов, апак лотксек савсь эстейнза эвфнемс пуропнень то сялдастонза, то щёкастонза. Атясь аердсь и тага юватькшнесь тракснень лангс.

— А минь правленияса спорятама, корхтатама: траксоньке кальдяфт. Мезень тяса лофца? Кода горюшатне кирдихть? Савихть сявомс вели. Вандыкиге сявомс. К черту тястонь цебярь кормать?

— Ну, мярьктяма, сявсаськ тяста стадать, а коса карматама ваномонза? Тянь колга арьсеть? Жуватась — аф кирьхкс, клеткас аф озафтсак.

— Мутама васта. А тяса тон сивфтсайть синь. Аньцек, аф содаса, кинди работада?! — сюцесь Лехов.

— Содаф, кинди — колхозти, — отвечась Спиридон Спиридонович.

— А кли колхозти, то мезе тон ванат, мезенди тяза путфат, сире клдом?!

Атясь кеподезень Леховть лангс понав сельмонзон, и почкодсть кяженза:

— А месть пешкодат? Месть сраминдасамак, язевый тя лоб?! Колмоксть надияфнень Суксовть вельде, кадк, мярьгонь, сай сонць. Ёрань ломанькс ваномс мархтот тракснень эряфснон. А тон мес ашеть няфне пря! Баярат?!

Атясь тяни эрязста путозе Леховть лафту лангс локшенц и нльне трнаты вайгяльса прибавазе:

— На, язевый тя лоб! Кода мяльце, стане и ваныть тракснень! — и сонць тусь пцтай ласькозь велеть шири.

Леховть матовсь кяжец.

— Тон, Спиридон Спиридонович, савор! Савор!

Поргов ванць постуфть и Леховть лангс.

— Тяряфтк, мрдафтк тяни! — мярьгсь сон председательти. — Сави эстейть лядомс вастозонза.

Лехов васенда кафксть-колмоксть аськолдась атять мельге, а меле пешкодсь:

— Спиридон Спиридонович! Спиридон Спиридонович!

Постуфсь изь ёра кулемска. Ашкоряфокс кеворсь лугать туркс. Лехов тяни тусь ласькозь, сатозе. Ламос мольсть ряцок, мезе-бди корхтась атяти. Но ся прянцка ашезе шарфне Леховть ширес, бта ашезень куль сонь валонзон.

Лехов лядсь атять эзда. Васенда аф ламос ванць постуфть копорьс, а меле саворне мрдась. Мзярда Спиридон Спиридонович кяшевсь кусторкснень фталу, Поргов азозе подпаскати, штоба ся афолезень кад тракснень, токазе алашать и сатозе атять:

— Озак, Спиридон Спиридонович, усктя куду.

Атясь васенда мезевок изь отвеча, нльне изь вана Порговть лангска, тоса обжафста азозе:

— Кемонце кизось ни ванан тракст, всякай ульсь: и цебярь, и кальдяв, но вестенге ашемазь сюце. А мезенкса сраминдамань тяни?

Поргов тись пря рахайкс:

— Виденц корхтат, Спиридонович. Кадк тяни председательсь сонць ванцыне тракснень, кадк хоть фкя ши марясы локшеть сталмонц. Сяльде вестевок аф кармай сюцемот! — и токазе алашать.

Постуфсь фатязе фкя вожиять:

— Мярьгат, афкукс, што ли, туян? Шарфтк меки!

Лехов учсь эсост стойлать маласа. Кодак валгсь атясь, сон нежедсь малазонза и эняльди вайгяльса пшкядсь:

— Простиндамак, Спиридон Спиридонович, — и венептезе кяденц, пяк кяжиянь: вдь траксне ужяльхть.

Солась атятьке седиец:

— Монцьке грехс сувань, тят кяжия, Илья Борисович. Или, чаят, тейне жуватась аф ужяль?

— Ну‚ мезе ина тихтяма мархтост?

— Содаф, мезе, — азоркс отвечась ся, бта тянь и учсь председательть ширде, — эряви тиемс карда. Вельтяф карда. — Постуфсь локша недьса кармась тяшнема модати. — Сембоц кемготува стропила эряви и колма-ниле усф слега.

Лехов и Поргов прощандасть постуфнень мархта. Кодак аердсть синь, Поргов рахазевсь:

— Тячи тейть сатсь! Ну, и сатсь! Васенда Варламовть эзда, а тяни Спиридон Спиридонович каясь. Тяфта сразу ёнияфттядязь.

Председательсь тозердазень вожиятнень, и алашась мезе ули вийц тусь ардозь. Мзярда лиссть лугатнень лангста, Лехов кирдезе алашать.

— Мярьгат, сатсь тейне? А мезе тият, тяфтама председателень должность...

Сяда лама Поргов изь карма пеедема. Сон содазе, што стакаль Леховти. Изь кашторда Леховське. Ламос тяфта мольсть кафта коммунисттне: фкясь эздост инженер, омбоцесь ульсь цехонь начальникокс. Синь ашесть сотце фкя-фкянь, вестенге ашезь куленде Карга велетьке. А тяни вов велень тефне васьфтезь синь и тиезь ялгакс. Кафцьконь кучезень тяза партиясь, и споряйхть, и сялондыхть‚ и пичедихть марса. Кизода инголе Лехов пичефксфтома работакшнесь заводса, аф пизем, аф пуропт исть шорсе сонь тевонцты. Сон эсь воля кадозе ся эряфонц, сась лездома. Но шуму ли сон, кда мзярс аф лисенди тевоц?

Велеть маласа Поргов кизефтезе:

— Илья Борисович, а кие ся Суксовсь?

— Васенце бригадань бригадироньке, а мес?

— Мон содаса, што бригадиронте, а кодама сон ломанць? Содасак?

Лехов изь карма ламос арьсема.

— Тяка велень, монь самозон работась председателькс, коммунист, няемс, заботливай, а мес?

— Стак, — отвечась Поргов и сяда лама изь карма корхтама, но мзярда сувасть вели, тага кизефтезе:

— Мархтот лац эряй?

— Бта лац. Мзярда сань, васенда нльне эрянь пялонза.