13

Лама шит Поргов мастерскойсонга изь лисенде. Да и лисемска ашель кода: ниле токарнай станокнень эзда работасть аньцек кафттне, изь работа медьницкяй цехсь, коза тят кярьмоде, аф сатнихть инструменттне. Да нинге, кода грехонди, сярятькстсь Митричсь.

Поргов тонадсь заводстонь порядкатненди, сяс ёрась тясонга ладямс тевть стане, штоба мезевок афоль шорсе работаса, сембе, мезе эряви, улель тиф эсь пингстонза и цебярьста. Но мастерскойса исть сатне ломаттне. Сон мольсь Салмовти и кармась кизефнема тракторнай бригадань бригадирхнень колга: кит синь, конац сяда цебярьста работай, кинь сявомс мастерскои. Салмов кармась мянцемост суронзон:

— Ну, «Мазы паксяста» Бугровть содасак, — мзолгодсть трванза, — парста содасак сянь. — Мяндезе омбоце суронц: — Леховть мархта работай омбоце Бугровсь‚ сяда аргозсь. Ну, нинге кинь? Вообщем, кармат работама, сембонь няйсайть и тонадсайть.

Тяда меле Поргов кизефнезе тракторхнень лангса техническяй уходонь планть колга.

— Кармат работама и тият стама план, кодама тейть эряви.

— Планць эряви аф тейне...

— Содаса, содаса, Борис Константинович, кинди сон эряви. Но минь Митриченьке сонць целай инциклопедия. Планфтома содалезень тракторхнень, кода эсь вете суронзон...

А тракторнай бригадань бригадирхнень курок кармат содамост, тят пичедь, — меколи пшкядсь Салмов, — сразу мольфтьсазь кяльцень, а сембода пяк «Од веле» колхозста Офтин. Ватт, вандыкиге сай, кармай анама запасной частьт.

— Может, пуроптсаськ тракторнай бригадань бригадирхнень? — меколи кизефтезе Поргов. — Эряви корхтамс мархтост.

Салмов азозе, што ванды тя кизефксть путсы Варламовть инголи.

Шида меле Поргов учсь бригадирхнень эса. Сон ванондсь машинатнень колга справочникт, ёрась мяляфтомс основной детальхнень номерснон, лиякс мярьгомс, аноклась пря.

Бригадирхне пуромсть рана, аньцек ушедсь работама мастерскойсь. Пцтай кажнайсь усксь эсь бригадастонза кодама-кодама машинань кольф узел.

Салмов телефон вельде азозе Порговти, што совещаниять ётафтсы сонць и тердьсы Валамовтьке. Но целай кафта частт ломаттне учендсть, а Салмов ашель. Меле Поргов сонць кармась корхнема бригадирхнень мархта. Сувась «Якстерь тяште» колхозста бригадирсь. Поргов содазе ни, што тоса работай Бугровть аргоза цёрац. Сон бта алянц кеденц щафтозе эсь лангозонза: атять лаца жа кели сакал, аньцек аф шаржу, а кяшекс равжа и вайгялецка эчке — увназь увнай:

— Спасиба, Поргов ялгась, што сать эмтеэсозонк, тяни ули кинди кургоньке панжемс.

— А кие селгондозень кургонтень?

— Тя, пожалуй, виде, чёрт возьми, кургозе киндиге аф сёлгови, а вов аляцень тяса аш кулиец. Бульдозер целай недяля анцеме. Но Салмов куликска изь тие. А машинась ся пингть ащесь тевфтома «Возрожденияса». Председателеньке‚ — и мес-бди повсь Бугровть кялец.

— Корхтак, корхтак, — пеедсь Поргов, — тят пеле.

— А мезе корхтамс! Колхозсонк работасть кафта грузовой автомашинат, лангозост ули каготкя мянь Саранскяйста, и аф кунара меки сявозь. Кати мезе моли?

— А тяни, Анисим Семёнович, мон ёран кулемс тракторхненди предупредительнай ремонтть колга. Ули ли планонте?

Бугровсь меразе сельмоса Порговть и пейньбачк кармась азондома:

— Сядынголе тиенкшнеме платт, а тяни, маряк, тя тевсь сиредсь ни, лоткаме планонь тиендемда.

— Кода стане сиредсь? — дивандазевсь Поргов. — Деряй, машинатнень мельге якамась — сире тев?

— Минь планфтомонга содасаськ, пря уеньке ни тя тевса коськсть.

Порговть мяльс исть ту бригадирть валонза, но пря изь няфте:

— Тя эсь велосипедценди, Анисим Семенович, мзярда кельк, эста и тихть ремонт, а государственнай мащинати, мон чаян, эряви тиендемс планонь коряс. Мяляфтсак, мезе азф инструкцияса?

Бугров сяда лама изь споря. Учсь, нинге мезе азы инженерсь. Ся ванозень тяштьфонзон, кизефтезе:

— Значит, нильгемонь котоце номер машинати мянь сёксес кодамовок ремонт аф эряви, тяфта?

Бригадирсь шукадезе прянц.

— Кафцьке НАТИ-тне сёронь урядамста тожа аф лоткайхть, тяфта?

Бугров тага шукадезе прянц.

— Эста, пади, сави‚ — апак лотксек корхтась Поргов, — сёронь урядама пингста бригадастот сявомс кафта-колма шис фкя трактор «Возрожденияв»?

— Тя кода стане? — нльне эводсь Бугров. — Ёратада анцинять палканц нельгомс?

— Тоса ниле тракторсна лоткайхть.

Бугров кой-мзярс мезевок изь кашторда, тоса нюрьхкяняста мярьгсь:

— Лезттама!

Тянь мархта и аделавсь синь корхтамасна. Бугровть лисемста Поргов ванць сонь мельганза и пеедсь лафтунзон лангс: синь ульсть стама келихть, што цють тяльгсть кенкшть эзга.

Сувась Офтин. И Поргов нльне стясь вастстонза. Богатырьшка алясь ськамонза пяшкодезе комнатать. Шрать малас нежедемстонза читордсь бригадирть пильгала киякссь. Бта оцю гирят нюрьгсть Офтинть кяденза, малость шамордсь фкя пильгонц лангс. Кели щекапакарензон и лафтунзон коряс, мярьгат, богатырь. Сельмоширьхконза серийхть, тустт, коняц кели. Вадявста сеентьфтольхть фталу равжа шяяренза.

Поргов озафтозе бригадирть, а сонць ащесь стяда, радовандась лангозонза ваномста.

— Няемс, войнаса воявать? — кизефтезе сон бригадирть, кодак ся ладязе кода эряви пильгонь протезонц.

— К-кода жа, — повондсь Офтинть кялец кортамста. — М-малость к-сь-ськордамазь.

— Контужендафтолеть?

— Берлинть сявомста‚ — тага стакаста азозень валхнень Офтин, — мина п-прась ёфси ваксозон.

Поргов нинге весть меразе бригадирть пильгста пряс и лоткась кизефнемда.

Тракторхнень колга корхтазевсь сонць бригадирсь.

— Содасасть, што минь работатама фкя сменаса?

— А мес?

Офтин изь кенерь отвечамс, цингоргодсь телефонць. Поргов кулезе трубкать эзда Салмовть вайгяленц.

— Мезе тиендян? — пшкядсь Поргов. — Корхнян Офтинть мархта... жалбай, што работайхть фкя сменаса.

— А тон жалбаснон тяйть кулхцонда. Сяда лама кизефнек кядьстост, кадк сяда ладняс работайхть, — указовась директорсь.

Поргов бта кельме ведьса валовсь. Сяда лама изь карма азондомост бригадирхнень жалбаснон.

— Учтама аф ламос, — меколи азозе Салмов, — кда аф муви Варламов, карматама корхтама мархтост минць.

Поргов путозе трубкать, шарфтсь Офтинти:

— Корхтат, фкя сменаса работатада? А кие шумусь?

— Аш трактористоньке. И тя аф аньцек тячи или исяк. Лама ни киза аф сатнихть трактористоньке, тейнек аф молихть.

— Да-а-а, — таргазе Поргов вайгяленц‚ — тяфта тевонте ичкози аф туйхть.

— Монга курок туян, — тяни ни саворне корхтась Офтин, — кадса бригадать и туян. Лучи лия бригадаса озан тракторс. А то сокафтыхть алга, а горючай максыхть сняра жа, мзяра «Возрождения» колхозти. Тоса модась ляпе, а миньцонк равжа, севонькс ащи. Эрь ковня аф сатни нормась, сембода пяк тунда и сёксенда, хоть штанатнень мийть горючайнди.

— Ну, азолить тянь эмтеэсонь директорти.

Офтин яфодезе кяденц:

— Аф весть азфоль, да киньге пряц аф сяряди тянкса.

Поргов таргазе блокнотонц и тяштсь тоза: «Ваномс, кодамот горючайнь норматне».

Мянь обедта Поргов корхнесь тракторнай бригадань бригадирхнень мархта. Сембонди азондозе‚ штоба колма шиста кажнайсь тиель эсь тракторснонды техническяй уходонь план.

Сембода меколи Порговти сувась од Бугров, «Мазы паксястось». Сон инголькиге содазе, мезень колга кармай корхтама инженерсь, усксь мархтонза план, азондозе бригадаста эрь тракторть.

— Ну, а кода ся синнеф тракторсь? — кизефтезе Поргов.

Бугров шарьхкодсь, кодама тракторонь колга кизефни, саворне пшкядсь:

— Станяк ащи. Эста якась тоза Митричсь, тяшнесь всякай актт, гразясь. Кда аф азондсаськ видеть, директорсь сембонь озафтсамазь тюрьмав.

— А мезе ёрась азонфтомс кядьстонт? — ашезе шарьхкоде Бугровть.

— Да стак, дураконь баснят. Коста-бди сявозь, бта тон мархтонк веньберьф симондеть и бта ся тракторть лангса марса арнеме винанкса.

Поргов якстерьгодсь.

— Мон азыне сельмофтемти, — кяжиясь Бугров, кда синь Салмовть мархта каясазь зиянть тонь лангозт, максоснон таргасайне... Тяса сонць Салмов кода кавал лиенди.

Мзярда Бугров лемдезе Салмовть, Поргов срмазе конянц, бта кати-мезе юкстась. Лядьсь мялезонза директорть прянь вятемац райкомса, мзярда васенцеда васедсть. Эста Салмов пефтома синьгорясь.

— Может, карасть ни лангозт, Борис Константинович? Тон тяк сёпа. Мон вдь аф синь лямдост ярхцан. Тячикиге молян Салмовти, а кда эряви, Варламовтиге пачкодян.

— Мезе тиихть? — тись пря пеедикс Поргов. — Тя, наверна, сонць Митричсь ёрась тинь эвфтемс.

— Митричти тя афи арьсеви. Аф сонь кядьганза якай тя тевсь. Да сонь обуцяцка аф стама, сараз аф обжай. Тяза сюрьхцемонц пезфтазе Салмов. Ну, кадк тяряфты, Галина Васильевна мярьгсь, сембе мольхтяма Варламовти.

Поргов нинге сембе рахась.

— Тяда пель, почфтома пачат аф пицевихть, — мярьгсь сон, — юкстак тянь сембонь, Алексей Семёнович. — Ну, а кода электростанциянте? Работай?

— Работай, — весялгодсь Бугров. Кудста-кудс проверяськ электропроводкать. Веленьконь илять аф содасак, валда. Молелеть, ванолить вестьке.

Свадьбазонт молян, — пеедсь Поргов, — кулине, рьвяяма срхкать?

— Мон?

— Конешна, тон.

— Кинь лангс?

— Бта аф содасак?

Бугров якстерьгодсь и яфодезе кяденц.

— Тяк яфие, тяк. Мзярда свадьбанте?

— Вазонь нарама ковста, — визделгодсь бригадирсь, — ну, а кода тракторть колга тиемс? — меколи кизефтезе сон.

Поргов лоткась шутендама и азозе, штоба тракторть вандыкиге усколезь эмтеэсу.

— А Митричсь изь мярьге тракторть токсемда, корхтай, директорсь сонць максы распоряжения.

— Вов тейть и распоряжениясь. Сатыхть монь валне?

Прощандасть синь, кода кафта кунардонь ялгат.

— А свадьбав тердемак, тямак юкста, — бригадирть лисемста азозе Поргов.

Совещания таки ашель. Салмов ашезе му Варламовть, а соньфтемонза изь са сонга.