12

Поргов аделазе эмтеэсть проверяманц, лядсь аньцек тяштемс кой-кодама справкат и можналь ни тумс. Салмов содазе, што машинатнень кальдяв работаснон инкса шумукс ляды сон. А сяс, пчкяль, туркс сязельхце Порговть. Эсь пачканза сюдось ся шить эса, мзярда эвондась тяза инженерсь. Конешна, Салмов афоль макса пря кодамовок инженеронди, кда аф Степашкин и Шиндина. Сят арасть Порговть шири, и тяни пельсь. Варламовть лангска сон обжавсь. Васенда тейнзонга ашезь кельгов Поргов, мзярда кулезень «Мазы пакся» колхозстонь дейканзон, а тяни мярьгат кургоц пандовсь, бта вайса вадевсь седиец. Путозень Порговть лангс кочкаф каготтнень сейфу и сяка!

А Варламов содазе эсь тевонц. Кодак аделавсь тундань видемась, пуроптозень кабинетозонза секретарьхнень, Салмовть, штоба синь пингстост корхтамс Порговть мархта тязк работама лядоманц колга.

Сон содазе, што кие изь сашенда районозост, сембонь тушендсь мялезост тя вастсь. Тяса Мокшеда башка лама эрьхкта, ули коса кунцемс калхт и якамс ружья мархта. Порговть мархта корхтамать ушедозе тянь эзда.

— Ули мезень лангса тяса работамс, — меколи азозе сон. — А народоньке, няить?

— Народсь тяса цебярь, — отвечась инженерсь и кармась азондома, кодама интереснай план Зобовть мархта няйсть фкя трактористонь кядьста, мзярда якась сон тона эмтеэсу. — Няемс, ся цёрась аф фкя киза ни работай механизированнай токонь тиемать лангс. Планоц пяк интереснай техническяй ширденге.

— Кие стамсь? — кизефтезе Варламов Степашкинть.

Степашкинть вастс эрязста отвечась Салмов:

— Мон содаса. Ся трактористсь ташта атякарь арни.

Поргов изь кирдев пеедемац:

— Кда районцонт сяда ламоня улель тяфтама атякарень арнида, эста аф кальдявста тульхть тевонте.

Варламов варжакстсь Салмов лангс, но мезевок изь аза. Ся сонць шарьхкодсь и эстокиге аралазень эсь валонзон:

«Возрожденияса» нинге ётай кизоня работась стама ток, кодама ёрай тиемс ся трактористсь.

Варламов тага кизефтезе ся ломанть.

— Фамилияц Мартынов, Иван Кузьмич Мартынов, — азозе Степашкин, «Память Ленина» колхозста.

Варламов думандась малость и азозе, што аф содасы ся ломанть.

Зобовда башка кивок ашезе сода Порговть потмонц механизированнай токнень колга. Аньцек сянди инженерсь панжезе потмонц, што колмошка киза ни арьси строямс ток, коза сёронь урядамста афольхть токсе ба ломанень кятть.

— Тейне-арам, Степан Иванович, — пшкядсь Степашкин, — эняльготтама Борис Константиновиченди, кадк лезды ся колхозти токонь строямаса, а меле строяйхть лиясовок.

— Давайте тяфта и тисаськ. Токсь — тевсь цебярь, но минь ёраме, Борис Константинович, мархтот корхтамс лиянь колга. Райононьке аф кальдяв, тусь мялезт, машинада лама и всякайхть. Мярьгомс, ули мезь лангса работамс тяфтама опытнай инженерти, кода тон. Механизаторхне районцонк, эк, васьфтедязь тожа цебярьста. Ну, мезе азат, Борис Константинович?

— А кодама работа макстада тейне? — меколи кизефтезе Поргов.

Варламов весялгодсь, тяни стясь, шаркстсь эсь кресланц фталу, нежедезень кенерензон.

— Тонць няить, што тя эмтеэссонк лама афсатыкста, а лисендихть синь сяс, мес аш главнай инженер. Тонь кяттнень коряс и гальцятневок, — Варламов варжакстсь секретарьхнень лангс. — Кода тинь ваттада?

Шиндинась аньцек якстерьгодсь и мезевок изь аза. А Степашкин отвечась кенярдезь:

— А, деряй, кальдяв улель? Борис Константинович тиель ба тейнек оцю лезкс.

— Усксаськ семьяцень, — тага ушедсь Варламовсь, — квартираньке ули.

— Монь семьязе аф кирдьсамань, — станяк жа саворста отвечась Поргов. — Ськамонза тядязе, а сон, ков кельк, моли мархтон.

— Эста аш месть думандакшнемс, — кенярдсь Варламовсь. — А ся планцень колга, конань азондыть Зобовти, тяса тисак, условият макстама. Сонцень Зобовть медьта тяк анда, аньцек макст мезе-мезе строямс. Ули нинге фкя строяеньке, сонь тожа содасак — ни Леховоньке.

Кодак кулезе Поргов, што Зобов пачфтезень Варламовти токонь строямаса сонь арьсеманзон, кеподезе прянц.

— Да, да. Мон содаса, мезь лангса колмоце кизось работат, — нльне прянь шнафтозь мярьгсь Варламов. — Ну, так вов, строяк, пожалуйста, лездыхне улихть, а Лехов клёксь эздост. Панда веляфты, хотя ся колхозса алаша пцтай аш мезьс кильдемс, а макст тейнза воля, завод ушеды строяма.

— Эсь алашац ули мезьс кильдемс, — эстокиге пшкядсь Салмовсь, — арни рысакса.

— Сон вдь минь стама. Няить, пингстот кона мезне сюцине, тозер аф види. Москунек-Саранскяйнек арнезень — сатсь кафта делянкат вирь, ускси кодама-бди трубат. «Возрождения» колхозть ёрасы ётамс. Сон тейть и лезды. Сявсак кядезт эмтеэсть, эста ули кода тиемс и токт, и мезе кельк.

Афкукс, тястонь васттне тусть Порговть мяльс. Сон бта меки мрдась эсь шачема вастозонза, да и ломаттневок, конатнень мархта савсь васетькшнемс, няевсть маластоннекс, роднойкс. Сон аф ламос арьсесь и мярьгсь:

— Мон, ялгат, лядолень ба тяза работама, кда нолдасамань заводсь.

— Тя сембе арьсеф, — кенярдсь Варламов и люпштазе кяденц.

Кабинетстонь часттне эрьхтсть кемгафтувксть. Сембе корхнематне, кода няевсь, аделавсть. Поргов прощандась райкомонь работникнень мархта. Мельганза лиссь Варвара Степановнаське. Степашкинть и Салмовть мезенди-бди кирдезень Варламов.

— Кодама шобда, — пшкядсь Шиндина омбоце этажса валгомстонза. — Борис Константинович, мусак эряма вастцень?

— А тон тожа куду?

— Саты ни тячи, — пеедезевсь Варвара Степановна.

Пачкодсть ульцять ужес, коса Порговти эрявсь шаркстомс Колхозниконь кудти, и Варвара Степановна тага весть пеняндась шобда веть лангс и венептезе Порговти кяденц.

Куду молемста и мянь матодовомонза Варвара Степановна сюцесь эсь прянц эса, мес лиятнень лаца аф машты алятнень мархта корхнема.

Порговть тумда меле колмоцьке варжакстсть фкя-фкянь сельмос, и Варламов шарьхкодезе Степашкинонь:

— Месть тон?

Ся аф сразу панжезе эсь потмонц. Варжакстсь эмтеэсонь директорть лангс и саворне, пцтай шабакс, отвечась.

— Ёран корхтамс мархтот.

Варламов цють няевиста пеедезевсь, но эстокиге кяшезе пеедеманц, видемсь креслать лангса, нежедезень моркшть лангс кенерензон, учсь, мезе азы сонь «види кядец», кода сидеста Варламов корхнесь Степашкинть колга.

Сон кельголезе Степашкинть. Тя ёфси од цёрась кодак нинге сась райкому, няфтезе прянц кода тевонь содай ломань. Мезе афоль мярьге Варламов, коза афолезе куча — сембонь тиендьсы, кода азф. Сяс Варламов тяни нльне дивандазевсь, кодак няезень Степашкинть сельмонзон и шарьхкодезе сонь пичеди седиенц.

— Давай, корхтак, Салмов аф шоряй тейнек.

— Тячи улень «Якстерь тяште» колхозса, — аф смендазь и комадонь прят ушедсь Степашкин, — колхозникне жалбасть...

— Тага мезе муть тоста?

— Кие макссь распоряжения, штоба сявомс тоста фкя самоходнай комбайнать?

— Мон, — апак арьсек отвечась Варламов. — А тон, улема, срхкать ни шумуяфтомс Салмовть?

Степашкинть коняс эвондась срмафкс, полафтсь шамац.

— А вдь тя кизефкссь ванондовсь бюроса! Бюрось комбайнатнень явозень.

— Тянь монць тиине, киньге лангс тят пеняця, тяфта эряви.

Степашкин сяда смелкстомсь.

— Но бюроть решениянц может полафтомс аньцек сонць бюрось, тяфта вдь?

— Ах, вона мезень колга тон корхтат? — дивандазевсь Варламов и нльне полафтозе ащема вастонц. — Значит, тон обжавоть, мес мон ськамон колайне бюроть решениянц, стане, што ли?

— Мон ашень обжав, но бюрось — бюро, Степан Иванович, и сонь решениянза...

— А кода тон чаят, Роман Романович, — лоткафтозе сонь Варламов‚ — монь улихть кодамовок праване эсь районцонк?

— Мон аф шарьхкодьса тя кизефксть, Степан Иванович, — сятявста мярьгсь Степашкин.

— Аф шарьхкодьсак, а сон простой: районть инкса отвечан мон. И сембе, кие эздонт мезе тии, и сяка лувксса тонга мезе тият: кальдяв или цебярь — сембонь инкса обкомсь кизефтьсамань монь, — Варламов бта лекция кармась лувома Степашкинти и Салмовти, фкять лангста омбоцеть лангс сидеста ётафнезе сельмованфонц. — Нинге войнать пингста фкя оцю работник тейне азозе: «Райононь жезлась максф васенце секретарти». Тяфта мярьгсь сонць Коломеев. Тон содалить ся Коломеевть? Сон ся пингть обкомонь васенце секретарькс ульсь. Бта атямоль республикаса, пильге сур лангса ащекшнеме инголенза. И, конешна, сонь мархтонза, чаян, тяфта изь корхне обкомонь омбоце секретарсь. Бывала, кода мярьги Коломеев, стане и тиф. А монь, няк, фкя комбайнанди аф сатни властезе, тяфта лисенди?

— Мон эста аф шарьхкодьса бюроть роленц, — эсь валонзон лангса ащесь Степашкин.

— Тага аф шарьхкодьсак? А мон тейть азса, дружок, нинге одат, — и меки озась вастозонза. — А вов кизошка-кафта работат райкомса, весть-кафксть сави тейть отвечамс кодамовок тевонкса, эста тонадат партийнай работати, кармат шарьхкодема, мезе стамсь отвечамась. Ашеть кяжия? — Варламов пеедезевсь, а сонь мельганза пеедезевсь Салмовське.

— Ну вот, пара, што ашеть кяжия. Тонафнек тевти, тонафнек. Зря мон аф тиян. Слава богу, монь опытозе саты, аф мярьктяма, сон пандошка, но вельфканза аф тон, аф лиятне аф комотевихть. Тяза пуромсь ни‚ — сур песа няфтезень шаржу прябоконзон, — аф фкя партийнай школа. Пади, зря тянь сембонь азыне тейть?

— Тянкса спасиба эряви азомс, а аф кяжиямс, — фатязе Салмов. И сонць полафтозе вастонц.

Степашкин ашезь шарфта мяль Салмовть валонзон лангс, сон ёрась мярьгомс Варламовти, што аф тянь эса васенце секретарть ролец. Сонь прясонза карань-каршек арасть Варламовть валонза и ся, мезьс тонафнезь сонь партийнай школаса.

Варламов жа надиясь, што пачкодсть сонь валонза омбоце секретарть пряс-седис, и полафтозе корхтамать:

— Ну‚ саты тянь колга, а то мольфтьса мялентень. Азк, Роман Романович, кода ащихть тефне тона эмтеэсонь зонаса? Проверяйть колхоснень? Урядамати аноклайхть?

— Улень аньцек Чапаевть лемса колхозса, — саворне азозе Степашкин и кеподезень Варламовть лангс сельмонзон. — Тоса сембе коммунисттне озасть канцеляриява и складга, сёронь уряцамати анокласть эстейст авторучкат.

— Ну и мезе тиеть?

— Партсобраниясь тись, аф мон, — марнек живолгодсь Степашкин, — кажнайти няфтсь васта производстваса. Содалить тостонь кузнецть Торновть? А тяни сон кадозень молатканц и клещанзон, тиевсь штатнай ревизоркс. То моли видефнень мерасыне, то кшить утомста ункстасы, а то кильди алаша и нешкопери моли. Аньцек тянкса тейнза тяштьфоль сядода лама трудоши. Мзярда азондозь тянь партсобранияса, нльне сонць Торнов рахась, а меле коммунисттнень кядьста анась прощения и мрдась меки кузенцяв. Собранияда меле омбоце шиня кемготува коммунист лиссть работама производствав, кадозь авторучкаснон.

Райкомста тумда меле Степашкин марязе прянц тёждяста. Сон васенцеда тяфта панжадонь седихть корхтась Варламовть мархта, хотя аф весть ни срхксесь корхтама. Тяни сон бта начка панар ёрдась лангстонза и тяка пингть сяда кассь и кемокстась.

* * *

Степашкинть тумда меле нинге ламос палсь Варламовть кабинетса толсь. Лядсть тоза кафонест. Варламов лиссь шранц ваксста, озась Салмовть каршеста креслати, кядьгопорьса шовазень сельмонзон, пшкядсь:

— Няить, кодама Степашкиноньке?

— А мон мезе корхнень тейть, Степан Иванович? — нльне кенярдсь тя корхтамати Салмов. — Сон нинге няфтьсы эсь прянц. Ну, тонга пара лекция тейнза лувоть. Кда аф дурак сон, то путсыне валхнень шалхка прязонза. Тейнза эряволь эрь валцень мяляфтомс. Коста сон няи тяшкава опыт тондедот башка? Мон ёрайне тянь азомс тейнза, да пелень: тага сялгады мархтон.

— Тон тят спорсе мархтонза. Сон од, горячай. Нинге лама аф содай. А вдь кодама-аф кодама, секретарькс прянц лувсы. Вов и псилготкшни. Ну кадк, меле тонады.

— Тянь мон содаса. Кадк моли лангозон, но мон аф кяжиян. А Порговть мархта парста лиссь. Кинь пряс саль, штоба тяфтама инженерть, конань зепсонза пандошка документ, можна тяфта шарфтомс? Кивок тондедот башка тянь афолезе арьсе. А Степашкин нинге споряй мархтот...

— Ну-ну, тон пяк ни фалендасамак‚ — Варламов эчке вайгяльса уркстозе Салмовть. — Кельгсак тон тяфта корхнемацень.

— Кельгса. Кельгса, Степан Иванович, видеста корхтамазень! — тяни ни иляназонь ляпе вайгяльса мярьгсь Салмов. — Ся, што тон шинек-венек работат, коса кельк и мзярда кельк азса. Аф стане, што ли? Тят лисе фкя ков работама, содасак, мезе лисель ба районцонк? Аньцек подхалимкс тямак лув. Тя лемсь тейне аф педи, содасамак монь. А тячи тяфта видеста корхтан сяс, мес нинге весть няине, кодама курок тон арьсят оцю тефт. Ну азк, кинди тяфта арьсеволь Порговть мархта тевсь? А вов нинге фкя пример: кие машты тонь лацот тяфта простойста корхтама Федор Михайловичень мархта? Кинди сафтови?

Варламов няйсы, што Салмов лама корхтай сонь колганза, но сюцемонза изь карма. Сон стясь вастстонза, сёлгозе панжада вальмять, пшкядсь:

— Партиясь, Карп Максимович, путомань тяза и кошардомань тяфта работама, а работасонк тонь мархтот нинге лама афсатыкста.

Салмов нинге сяда смелкстомсь:

— Да, афсатыкст работасонк (ули)хть. Но кодапт афсатыксне? А Ленин кода кор(хтал)ь? Сонга тяфта мярьгсь: ёмла афсатыкст кажнай тевса могут улемс. Но тихть тон, Степан Иванович, кодама-кодама оцю афсатыкс, и мон, сире коммунистсь, васенцекссь тейть азса тянь. Но тевсь — тев, Степан Иванович, тевда лама, а пряцень тожа кальдявста ванфтсак. Азса видеста, аф весть срхксень молемс и корхтамс рьвяцень, Василиса Михайловнать, мархта. Тон эряват ванфтомс, пяк эряват районти, эрь коммунистти, эрь ломанти!

Варламов путозень шовонезонза кядензон, нуваргодсь и пцтай атянь вайгяльса отвечась:

— Да, сиретькшнетяма ни, Карп Максимович, сиретькшнетяма, а работамс эряви. Партиясь надияй лангозонк. Вов касфттама од кадрат, кеподихть синь прясна хотя ба минь лафтувоньконь видева и эста можна тумс ваймама.

— Ха-ха! Од кадрат. А косот синь — од кадратне? Кинди полафтоват, мярьктяма, тон?

— Ну, саты, саты тянь колга, — кардазе Варламов, — аде вайматама. Ванды учихть эсонк од тефт.

Варламов таргазень зепстонза кольцяс повфтаф ветешка панжеманзон, проверязень, пякстафт ли сейфне, моркшсстонь ящикне. Меле ётазень сембе вальмятнень, шерьфтезень, парста ли сёлфкст, лиссть Салмовть мархта.

* * *

Варламов сась куду пяле веда меле. Сон афкукс тяни марязе прянц сизефста. Бта утясь алу кержи бокста мяштец, мезе-бди шокшсь седикуцюнясонза. Аньцек кенерсь калтадемс ортань кенкшкять, кудонголе крьвязсь электрическяй лампочка. Варламовть лядьсь мялезонза, што надияфнесь рьванцты и стирензонды самс куду шоподема ёткова, семьянц мархта марса ужанамс. Тячи синь тядянек-стирнек якасть вири панчфс, надияфнесть аляснонды кандомс цебярь букет. И вов колмоцьке стирнянза кунара ни матодовсть. Рьвац ськамонза ученды мирденц эса.

Василиса Михайловна аф мазы ломань: сонь шаманц колсезь лапш шалхкоц и эчке улоц, но сянкса вельф добрай седиец.

Зубной врачть Василиса Михайловнать Варламов васьфтезе тяста‚ мзярда кооперативнай школань аделамда меле Варламов сась райпотребсоюзу инструкторкс. Синь кафцьке эрясть частнай квартираса, фкя кудса. Васенда, кафта-колма ковшка, азоравать мархта корхтамста зубной врачть Варламов кизефнезе аф лемса, а сурса люпшнезе эсь шалхка пенц. Ётась аф лама пинге, сонць Варламов изь стрянда, кода кармась сявондема врачть кядьста лувомс интереснай книгат. Стирнясь азонкшнесь тейнза писательхьнень, художникнень, артисттнень колга. Варламов эсь потмованза сельмотькшнесь врачть содамошинзон лангс.

Весть, кода-бди илять, Варламов токадсь районнай куду лекцияс. Лекциять лувозе врачсь Василиса Михайловна. Варламов эста васенцеда кулезе, што цебярь пейхнень эзда ащи ломанть сембе шумбрашиц. Кулхцондсь мянь пес, апак лотксек ванць Василиса Михайловнать лангс. Тяса васенцеда няезе, што стирть шалхкоц кода и лиятнень, ёфси аф лапш. Эста врачть учезе сон; мзярда ся аделазе лекциянц, марса тусть куду. И хотя васень илядня изь сменда од цёра прясонза сявомс стирть кавлалда, но ётась аф лама пинге, и Степан Иванович и Василиса Михайловнась арасть миртть-рьват. Эстоньбере Сире ошеряйхне сельмотькшнихть тя павазу семьять лангс.

Эрясть синь афкукс парста. Ниле комнатастонь квартирасна фалу урядафт лац-ряц, нльне козяста.

Фкя-фкянь кяжияма Варламофнень кудса тожа аф эрси. Кажнайть тевоц ульсь марстонь тевкс.

Вов и тячиенге Василиса Михайловна ужинонь аноклама ёткова кизефнезе мирденц:

— Кодама инженер Москуста сась? Проверямонт, што ли?

— Мес проверямонк? А может, работама тердеськ?

— Аф работама, — тевонь содайкс азозе Василиса Михайловна, — кенерсь ни мумс мезе-бди эмтеэсста. Митричть рьвац тейне азондозе. Сон мес-бди пичеди мирденц инкса.

— Лядыкс сельмонц Митричть кивок аф таргасы. Месь пичеди? — кяжиясь Варламов.

— Директорсь сюцезе, мес сон няфнесь инженерти кодама-бди машинат. И тяни синь кафцьке трнатыхть инженерть эзда.

— Кшифтома конацка эздост аф ляды, месть пичедихть?

Василиса Михайловнась аньцек тяни шарьхкодезе, што мирденц вачсь пекоц, ашель мялец корхтамс. Лоткась кизефнемда и учсь, мзярда ярхцай.

Степан Иванович топодсь, шашфтозень ингольденза тарелкатнень и апак кизефнек азозе:

— Аньцек сейчас инженерть рьвяяфтыне.

Василиса Михайловна ашезе шарьхкоде мирденц.

— Салмовти и Митричти главнай инженеркс путоськ сонь, — весялгодсь Варламов. — Нинаське кочкась мархтонт панчфт? — и нежедсь тумбочкати, коса банкас путфтольхть ландышт.

Кочкась. Чяй, содасак, кодама сон кочкайсь. Мелавнятнень мельге ласькондсть Ленать мархта, — мяль вельде азондозень Василиса Михайловна стирензон. — Панчфта лама, минь ичкози ашеме яка, вирть крайге шароме: пелеме, шоподемс аф сафтама. А кда содалеськ, што машина токади, то сувалеме сяда фталу.

— Машинаса саде?

— Тят пеле, аф тоннеть эса, — пеедезевсь Василиса Михайловна. — Салмовть шофероц коста-бди ётась туване, ну и озафтомазь.

Варламов мадсь ловкс ащи чистай вастс, крьвястезе вастонц вельхксста лампочкать, сявсь кядезонза свежай газета и нинге изь кенерь рьвац урядамс шрать лангонц, сон няезе ни сисемце онть.