14

Мекольдень шитнень, мзярда ушедсь работама мастерскойса Поргов, бригадирхне фалу пульхксть тяса. Фкясь эсь трактористонзон мархта петсь трактор, омбоцесь шарсь токарьхнень перьф, колмоцесь получась запасной частьт.

Поргов синь ётксост ульсь кода орел сенем менельса: фкяти азсы, омбоцети няфтьсы. Сембе вастова сатсь содамашиц и опытоц.

Стака кевкс Порговть седиенц лангса ащесь тракторхненди предупредительнай ремонтонь тиемась. Тяни шинек-венек работась сянь лангса, штоба арьсемс эрь машинать петемань шинзон, частонзон, содамс, кие и коса кармай петема.

Ваймама шиста Поргов сргозсь рана, нинге изь няфте пря шинясь. Васта лангса арьсесь, мезьста ушедомс тя оцю тевонц, надиясь, што тячикиге аделасы сонь, а ванды ни кемокстасы планть директорсь, и сембе механизаторхне кярьмодихть тя тевти.

Порговть мялезонзоль ся, што тя оцю тевса кармай лездома тейст Шиндинась. Варвара Степановнась станяк и азозе, што кармай мольфтема оцю массовай работа. Эрь тракторнай бригадась и мастерскойнь рабочайхне сявихть эсь лангозост социалистическяй обязательстват.

Поргов анокс няезе, кода мастерскойть ваксс тифтеди оцю, мазы доска, коза Шиндинась сонць эрь илядня кармай тяшнема од цифрат, сембе кармайхть содама, кона бригадась моли инголе.

Мекольдень пингть Поргов эрь шиня васетькшнесь Шиндинать мархта мастерскойса. Варвара Степановна шобдаванц тяса ушедсы и иляденц аделасы, ков афоль ту, коста афоль са, аф ётни мастерскойть вакска. Аньцек тяни шарьхкодсь Поргов, што сон сонць эрь шобдаваня и илядня ученды тя ломанть эса, ёрасы кулемс сонь вайгяленц, няемс сонь ликанц.

Инженерсь тяни уркстозе эсь прянц, мес ламос тарксеви вастонц лангса и стясь. Шаманц штама изь лисенде, изь карма токсема «азораванц» Зинать‚ кона стирь-пара прясонза кельгозе тя частоня удомать.

Пильге сур лангса ётась коридорга, саворне лиссь и эряскодозь тусь мастерскои. Тяса яфодсь шамазонза вайнь и керосинонь шинесь, а сяс марязе прянц стане, бта ащесь оцю заводонь цехса. Ёрась озамс работама, но бта стафоль копорец, сотнефтольхть казьфонза. Мастерскойть ваксса тись шобдавань физзарядка. Сон кунара ни тяфта тонафтозе эсь теланц.

Кивок изь шоря тевонцты. То лувондозень эсь тяшнефонзон, то кагодонь оцю листс тяшнесь всякай клеткат, рисовандась шарынят и кубиконят. Эрь тракторсь ащесь сельминголенза, няезе эздонза афсатыксть‚ бта панчсезе сонь потмонц, ванць и тяшнесь, мезе эзозонза эряви тиемс.

Тиемок план, сонь прясонза ащесть тракторнай бригадань бригадирхне, ёрась кажнайть мяляфтомс, арьсемс, конань коза саты вийц, кинди эрявсь кучемс механик, кинди аньцек слесарь.

Арьсемок эмтеэсонь сембе тефнень, комболгодсь сонь седиец, пяк ни ламоль тевда. Сон нльне обжавсь директорть лангс, лоткась ся тяза сувсемда. «А может, кяжиясь? — думандась сон. — Ну кадк». Арьсесь: вандыкиге моли Варламовти, азондсыне тейнза эмтеэсонь сталмотнень, и марса арьсесазь, кода и мезе тиемс. Тяни эрявсь тейнза ладняс думандамс, кодама кизефкст кеподемс Варламовть инголе. Зепстонза лихтезе записной книжканц и тяштсь: «Варламовти: 1) предупредительнай ремонтонь планц; 2) ёрдаф тракторхнень и комбайнатнень нолдамасна; 3) горючайнь норматне».

Поргов тага комась работанц вельхксс. Мзярда шись лоткась ни ульцять ширде ваномда, сувась инксонза райисполкомонь шофёрсь. Поргов мес-бди кенярдсь. И хотя апак аделаколь тевоц, пара мяльса срхкась.

Зобов аделазе седть тиеманц, и прястонза исть тушенда механизированнай токне, арьсесь кеподемс кемоньшка колхоз тя тевти. Порговть сон васьфтезе райисполкомонь крылецть лангса.

— Борис Константинович, азк видеста, кодамовок кицень-янцень ашине кола?

— Деряй, начальникне колсихть кит-ятт, Максим Сафронович? — шутендась инженерсь. — Синь эрь валсна эхярь ётть-прят. — И кабинету сувамста ни виденцясь: — Спасиба хоть лихтемайть, мольсь мялезе ськамон ащемать эзда.

Кабинетса синь озасть фкя-фкянь каршес. Азорсь маразе трубканц цебярь табакса. Сон тячи няевсь ёфси лиякс: лангсонза серай од гимнастерка, воротниконц ала акша подворотничоконя, а мяштьсонза палы «Красное Знамя» орден. Уряднайшинц сюнеда Зобов няевсь ёфси одста, тазаста, хоть и тейнза ведьгемоньда лама киза. Инженерсь няфтсь Зобовть мяштьста орденть лангс, кизефтезе:

— Тонга улеть тоса?

Зобов ванондсь кодама-бди кагод и бта стак ащемда отвечась:

— Кулендить, кода тапаськ немецнень Яссенскяй группировкаснон?

— Кода жа! Виде, мон эста кислородта никссень, но кулендине.

— Кода стане, кислородта?

Поргов няфтсь щёканц лангс.

— Да-а‚ — пшкядсь Зобов и куфкстсь, — баняса эшелямста тяфтама шрапт аф тиендевихть. — И ваномок Порговть шамас, поладозе: — Героическяй минь поколенияньке. Кодамовок писателенди аф сёрмадови сембе, мезе няйсь и тись минь народоньке революционнай тевса.

— Чаят, аф юкстасамазь? — пеедезевсь Поргов.

— Месть тон‚ брат? Кодак сай ся пингсь, мзярда модать лангса аф кармайхть содамонза, мезе стамсь войнась, эста путсазь минь орденоньконь и медаленьконь оцю музейс и ломаттне...

Саворне чакасть кенкшти.

— Сувак, сувак! — пшкядсь Зобов.

Кабинету сувась серес аф оцю ава. Сонь якстерь марькс ащи шамац няевсь нинге сяда мазыста парьхциень якстерь руцять эзда, сюрелдатне нюрьгсть авать мяштенц и лафтувонзон келес. Авась аф смендазь ётась сянгяря дорожкать кувалмова, васенда венептезе кяденц Зобовти, меле Порговти.

— Кода тефне? — кизефтезе Зобов.

— Молихть, сельмонь апак кепотть отвечась авась.

Зобов азозе Порговти:

— Тя Карга велень Советть предедателец, Бойкинась. Инголе ульсь трактористка, аньцек тунда кочказь.

Авась нинге сядонга пяк якстерьгодсь, комафтозе прянц, пуворязень суронзон.

— Мон тейть сань, Максим Сафронович, — Бойкина вихца азозень валонзон и аньцек фкя секундас кеподезень алятнень лангс сельмонзон.

— Корхтак, корхтак, Вера Михайловна, тят визде, тя ломанць минцень, Поргов ялгась, эмтеэсонь од главнай инженероньке.

Бойкина варжакстсь Порговть лангс и меки комафтозе прянц, сонць стаки пуворязень суронзон, няевсь, шяйсь потмоц. Ёрась мезе-бди азомс Зобовти, но изь сменда. Меколи каладсь кургоц, и тусть сельмоведенза.

Зобов стясь вастстонза, нежедсь Бойкинати:

— Месть тон? Мезе мархтот?

— Валхтомасть работаста‚ — аф ламос ащемда меле кулевсь сонь вайгялец.

— Мес?

Тага трнатозевсь Вера Михайловнать улоц, и сяда лама мезевок изь азов.

— Э-э, тяфта аф эряви тиендемс! — весяласта мярьгсь Зобов. — Деряй, можна сельсоветонь председательти авардемс? А кда мархтот марса аварьгодан монга, эста мезе лиси? Кафта председателень вайгяльса, содасак, коза кулефтяма?

Бойкина сельмоведьбачк мзолгодсь.

— Тон азка, кие обжанзе? — апак лотксек кизефнесь Зобов.

Вера Михайловна руця песонза нардазень сельмоведензон‚ крхкаста таргазе ваймонц и, лоткамок авардемда, пшкядсь:

— Мон кунаркиге азыне, што председателькс аф пчкан.

— Конешна, аф пчкат, кда кармат авардема, — нинге сембе шутендась Зобов.

— Небось, аварьгодат...

— А мес?

— Монцень дуракозе...

Поргов шарьхкодсь, што авась визди эздонза, а сяс стясь, ётась кабинетть тона ужезонза, коза путфоль электростанциянь макет. Эсонза няфтьфоль пакся, вирь, Мокша ляйть китьксоц, конань туркс тифоль плотина, фанераста строяфоль электростанция. Сембе макетть келес мековасу мольсть столбат, пряваст таргафхтольхть провотт.

Зобов кадозе Бойкинать, нежедсь Порговти, люпштазе кнопкать, и живолгодсь сембе макетсь: сенемгодсь клянцьста тиф ляйсь, цифгоргодсть электростанциять потмоса и столбатнень прява пяштешка лампочкатне.

— Тяфтама межколхознай электростанция карматама тиема Мокшеть лангс, — азозе Максим Сафронович и кадозе Порговть.

— Мирдце, мярьготь, обжанзе? — нежедсь эсь шранц ваксс.

— Сядынголе ёфси аф тяфтамоль‚ — сяда смелкстомсь Бойкина. — Мзярда работань трактористкакс, недялянь-недялянь фкя-фкянь ашеме няенькшне, но кальдяв вал изь мярьгонде, а тяни кеденц потмоста лиссь. Весть кода-бди сась эмтеэсста и кода взафтф пине. Корхтай, кодама-бди пяк важнай инженеронь пингста монь сюнедон сраминдазь ялганза.

— Няемс, пяк кельктянза сон, кли тяфта вачкаты инксот? — пеедезевсь Зобов. — А тон тяйть куль сонь сембе валонзон, тийхть пря, бта аф марясак, мезе корхтай. Вдь глухойти атямське аф пелькс.

— Да, тяйть куль. Содасак, мезе корхтай? Бта мон усксеван Леховть мархта. А сяс бта Москуста саф инженерсь нльне мярьгсь тейнза: «Эх, Андрей Андреевич, комбайнерсь тон цебярят, а рьвяце кядьсот аф кирдеви». Ну и кармась бушевандама. Саты, мярьгсь, Советса работамда. Кда лувсамак кудса азоркс, то пильгцень тяк шятне тоза, ся аф тонь тевсь.

— Да кодама инженер тонафтозе? Сявомс ба палка да ся инженерть киськть ланга...

Поргов кулезень Зобовть валонзон, нежедсь шрать ваксс.

— Наверна, ся инженерсь мон? — приметазе Зобовть сельмонь кончтаманц, поладозе: — Но монь пингстон эмтеэсса кивок тяфта ашезь корхта мирдценди.

— Ага, — бта кенярдсь Зобов, — мувсь крнять эзда сюре песь. Тяни орадсаськ. Значит, тинь рахседе Бойкинть лангса?

Бойкина пряста пильгс меразе Порговть и абондсь. Зобов лоткась пеедемда, стясь вастстонза.

— Тят лажна. Ванды сявса Порговть, и мольхтяма велезонт, минць корхтатама мирдцень мархта. Чаян, сонць меле шарьхкодсы, што зря тиенди. Ну а кода тевонте колхозса?

Вера Михайловна кеподезень 3обовть лангс сельмонзон, нинге сяда весялгодсь и смелкстомсь:

— Колхозса молихть. А пожарнай чан ульцяв Лехов нинге изь ти. Тага сюцесамак?

— А мезе корхтай Лехов? Мес аф тии?

— Мезе? Работай, шинек-венек карттнень перьф возяй, сонцьке, кода палф пцяника арась, марнек коськсь строямать эзда, кудсонга аф эряй.

Зобов няезе, што ладявсть баснясна, крьвястезе трубканц. Вера Михайловна поладозе:

— Моледа, обязательна моледа, лездода.

— А мес? — малость эвотьфста кизефтезе сонь Зобов, няемок, што Бойкина мезе-бди кяльбрясонза кирди, аф ёрай азондомс. — Мезе-мезе лиссь?

Авась тага комафтозе прянц, пувордазень суронзон.

— Лисемать мезевок изь лисе, мон стак тердедязь, а мольхтяда, всякай кульхтяда-няйхтяда.

Зобов изь карма сяда тов кизефнема, содазе, што Порговть пингста председательсь мезевок аф азы, а сяс тага надияфтсь, што ванды или омботь обязательна моли.

— Поргов ялгатьке сявк, — варжакстсь инженерть лангс, пеедезевсь.

— Соньге сявса.

Бойкина срхкась. Мзярда нежедсь кенькшти, азозе:

— Суван Варламовти, анан автомашина, корхтайхть, састь од автомашинат.

— А мес тон? Кадк веши сонць Лехов.

— Ся пели молеманц. Сонь аф кельгсы Варламов.

— А коста содасак, што аф кельгсы? — рахазевсь Зобов.

— А кие тянь аф содасы? Сембе содасазь. Мархтон телефонца корхтамста мярьгсь: «Аф машина, а калада крандаз ужяль тейнть максомс».

— Ну, тя зря, зря корхтат, — нльне аф ламняда кяжиясь Зобов. — Исяк илять ванондоськ спискать, кинди мимс машинатнень, и тинь колхозонте тяштьф тоза васенценнекс. Зря тяфта арьсетяда Варламовть колга. Лехов сонць шуму‚ — и Зобов шарфтсь Порговти: — Заводста усксь ташта автобус. Варламов кошардозе максомс автобусть меки заводу, визькс, корхтай, ся колхозса автобусть кирдемац. А мезе тись Лехов? Мярьгат, кулхцондозе Варламовть? Аш! Сон тяштсь Москуву сёрма, можна ли колхозти кирдемс автобус? Ну и, конешна, тоста отвечасть Леховть пользас. Или вов нинге фкя тев: Варламов изь мярьгонде Леховти ушедомс животноводческяй городоконь строямать, а мярьгсь — петемс-пандомс сире карттнень и мзярс пара. Ня валхневок ётасть Леховть пилензон вакска. А вдь вяри ведьт стака уемс? Тяфта и Варламовть мархта спорямаське.

Бойкина яфодезе кяденц и лиссь.

— Борис Константинович, аде ванды марса Каргав, ванцаськ тевснон, — пшкядсь Зобов.

— А мон местема?

— Кода местема? Тоса кармат механизированнай токонь тиема. Деряй, Варламов тейть мезевок изь корхта? Давай звонятама Варламовти, — сявозе телефононь трубкать.

— Тячи аф мусак, наверна.

— Кинь, Варламовть? Хоть и недляши, сон сякокс эсь кабинетсонза. Тянь ширде Варламов...

Варламов отвечась, азозе, штоба инженерть мархта синь сувальхть ванды.

— Мярьготь, аф мусаськ, — трубкать путомда меле пшкядсь 3обов. — Сон кулы, беднайсь, кабинетозонза. Ну, ванды тердемазь, ёрай ваномс тонь проекттнень. А содасак, мзяра механизированнай токта ёратама строямс? Тя эмтеэсонь зонаса — кота и тонань эса — ниле.