8

Лехов шобдаваньберьф ученды Салмовть эса. Эмтеэсонь работникне азозь, што сон тусь райкому, курок сай, и директорфтома тейнза кивок аф максы бульдозер.

Курокста сей сась Сараеваське. Сянди эрявсь тракторнай прицеп.

Ня кафцьке предсецательхне фалу ванцть фкя-фкянь мельге, кода кажнайть моли тевоц. Карга велесь — Сараевать шачема вастоц. Сон кафтонь-крда кенярькшнесь «Якстерь тяште» колхозть эрь сатфксонц няемста.

— Учан, мзярда тердьсамак од кудонь бозас? — пшкядсь Сараева Леховти, кодак васедсть синь эмтеэсть конторасонза.

— Кодама од куд учат?

— Бта ломатне афи содасазь тонь тефнень? Целай ош строят жувататненди.

— Хоть тон афолеть рахсе, Галина Васильевна, — обжавсь Лехов. — Сембе эводсть строяманьконь эзда, кой-кинь нльне пеке урма музе. — И малость кяжда прибавазе: — Ну, кадк эвотькшнихть, а жуватань ош сякокс строятама, вов аньцек бульдозер аф сатови, эряви ровналгафтомс площадкась, и ушедсаськ.

— Лац тиеде, што фкя вастс кочкасасть жуватань карттнень. Волковаське пяк шнадязь.

— Ну, спасиба! Кафта ломатть мувсть, конат кирдьсазь ширезень, — пеедезевсь Лехов. — А то хоть тя светть кадк...

— Лоткак, лоткак прянь шнафтомда. Тон лучи азк, кода арьсесть ведень колга тевть? Сембе карттненди, содасак, мзяра ведь тялонда эряви?

— Муйть мезенкса пичедемс‚ — весялгодсь Лехов, — тийхть Саранскяйса договор, сайхть и пялихть артезианскяй эши. Минь кафта тифттяма.

— А ярмакт коста? Стак вдь синь аф тиихть?

— Банкаста. Ссуда кодама кельк максыхть, аньцек строяк. Тейне вов тяни бульдозер — и тевоньке туй, — пичедсь Лехов.

— Бульдозер тейть максыхть, исяк илять няине: «Возрожденияса» аделазь силосонь траншеяснон, стак ащи машинась. Тон, маряк, силосонь траншеятнень аноклайть ни?

— А минь тихтяма цементнайхть, ниле аноклатама, фкять тиезе ни тонь аляце, содасак, кодама мастеркс арась сон? Нинге тонць сиводьсак.

Эвондась Салмов. Сон, кода цятнась иретьф, ётась председательхнень вакска и сувась кабинетозонза. Мельганза сувась Лехов. Сон надиясь, што ули свободнай бульдозер, и азозе, мезе кармайхть тиема.

— Бульдозерсь заняф, — керозе Салмов.

— «Возрожденияса» аделазь ни тевснон, — пшкядсь Лехов, — тейнек сембоц кафта шис.

— Мон тондедот парста содаса, заняф или аф. Заявканте тяса ули?

— Кунара ни кучеме. Эряви ушедомс строительстваньке, а площадкась ровнайгофтомс аш мезьса.

— А монь кодама тевозе? Заявкантень ванцаськ и азсаськ. — Салмов люпштазе шра лангстонь кнопкать. Сувась секретарец. Салмов тертьфтезе Сараевать. Лехов ащесь и ашезе сода, мезе тиемс.

— Давайте куроконе‚ — Салмов эряскофтозе Сараевать. — Мезе тейнть эряви?

— Тейнек эряви прицеп.

— Ну и мезе кда эряви?

Сараева абондсь. Варжакстсь Леховть лангс, кона тоже ащесь нолдаф прят.

— Максоледе тейнек тракторнай прицеп, вдь получаде?

— Кенереде ни кулемс? Вов тя да-а! — дивандась Салмов. — Сембоц колмоце шись, кода састь прицепне, нинге минць ашеме кенере лангозост ваномс, а тинь вешсасть ни. Кадость хоть кельми заводонь краскасна.

— Эряви прицеп...

— Тага мон виноватсь. Фкять площадкац тячикиге эряви ровнайгофтомс, омбоцеть — коськи модац, — тяни мзолгодсь Салмов, — а директорти анокс эряви содамс, кинди мезе эряви? Звоняк ванды, Галина Васильевна, или вандыда меле, — тяни марнек ляпомсь Салмов, — эста, пади, мезе-мезе тийхтяма. Тонга звоняк, — шарфтсь Леховти, — шида-кафтта меле звоняк. Аньцек исяк сань Саранскяйста, аф содаса, коса мезе тиендеви. Ськамон, хоть пачк сязефт.

Кафцьке председательхне, кода салфтома суськсть, нльне апак прощандак лиссть директорть кабинетста. Лехов кяжиясь и тердезе Сараевать райкому, жалбама.

— Мешть тяк кяжияфта, а то пупатанза, — отвечась Сараева. — Лучи шида меле звонятама.

Лехов яфодезе кяденц и прощандась Сараеватъ мархта.

Аф стама Лехов ломанць, штоба учемс, мзярда кие мезевок максы. Мезе тейнза эряви сатомс, кода мярьгондихть, модать алда таргасы.

Сёксенда, мзярда Леховть кочказь председателькс, колхозть жуватанзонды ашельхть концентратт, шавотольхть колхозть сёронь сусеконза. Лехов шинек-венек ашезе кадонда покойс Варламовть, аф весть якась Саранскяи, но сатсь кормат и видьмот.

Нинге сяда лама забота тись эстейнза и райкомти, мзярда колхозса ушедсть строяма животноводческяй городок. Апак лотксек Лехов сявондсь сёрмат Варламовть и Зобовть кядьста вирень колга. Атказасть тейнза Саранскяйста, мянь Москуста добувась кафта делянкат. Усксь распоряжения, конань коряс сявозень районть колма ковонь сембе фондонзон жестенди, аноклась вельхкст жуватань карттненди. Салмов кода изь противонда, сякокс Лехов сявсь эмтеэсса колма грузовой машинат вирень усксемс.

Районца и Салмовть, и Варламовть мольсть мяльсна Леховть пефтома анаманц эзда. Аф весть Варламов сюцезе тяни эсь прянц, мес макссь воля Леховти строямаса. «Мезе тият? Мезе тиф, ся тиф! Да кие содазе, што Лехов ушеды тяшкава оцю тев? — Варламов тяфта арьсесь Леховть колга, — бзмолды, бзмолды и лоткай, ярмакт вдь аш.» А сон ярмакта мусь, вирьге мусь.

И вов тяниенге Салмовть кабинетста Лехов тусь Варламовти, и ся хоть эряскодсь тумс колхозу, сякокс савсь звонямс Салмовти бульдозерть и тракторнай прицепть колга. Лехов ашезе юкста соседонцка.

Мзярда Салмов азозе телефонца Варламовти, што бульдозерсь работай «Возрождения» колхозса, а тракторнай прицепне нинге апак кочкакт, ащихть ящикова, Лехов аф пелезь, аф виздезь азозе Варламовти, што Салмов зря ордаткшни: бульдозерсь аделазе работанц, а прицепнень синць трактористтне кочкасазь.

Лехов азсь спасиба‚ сявозе запискать и эрязста срхкась тума, но лоткафтозе Варламов:

— Озак аф ламос, — мярьгсь сон строгайста. — Строямать строят, а тундань видема планть колга арьсят мезевок?

— Тяни минь листяма планть коряс, — Лехов ёразе кенярьфтемс секретарть, — планоньконь пяшкодьсаськ.

— А мезьса?

— «Возрождениянь» колхозникне лездсть: пандомда макссть сяда центнер люкшя видьме и аф лама модамарьня, листяма ломанень рядс.

— Тозерда мзяра видеде? Планць апак пяшкотть?

— Да, тяса малость...

— Люкшяда ёрасак андомс рабочай классть, а аф тозерда? — кяжиясь Варламов.

— Кода мярьгомс? Люкшя ямть кивок аф ёрдасы пиленц вакска, сембе кельгсазь. Пади, аф стане корхтан?

Леховть мекольдень валонза исть ту Варламовть мяльс. Сон ашезень кельгонде ломаттнень, конат лама корхнихть мархтонза.

— Ня шитнень сай станцияв тозер, тон сяват тоста сяда центнер видьмонди.

— Поздаськ ни, — нльне эводсь Лехов, — кода колхозникне, но синь...

— Мезе синь? Аф ли кошардсамак кепказень валхтома колхозниконтень инголе, эняльгодомс, штоба видельхть тозер? Планть содасак? Ну вот...

— А люкшя видьмоть?

— А люкшя видьмоть макск меки.

Лехов абондсь, ашезе сода, мезе отвечамс. Варламов эряскодсь тума. Лиссть синь мельцек апак каштортт.