9

Салмов стакаль тячи шиц. Пингсь ульсь аньцек кемгафтувоце частсь, а тейнза-арам, ётась ни сутка, кода сон стясь пильге лангс. Сон тертьфтезе мастерскойста Митричть, а мзярс учсь саманц, прястонза исть тушенда Степашкин и Шиндина, конат аралазь райкомса Порговть. «Мон няфтьса, кие Поргов, — арьсесь сон. — Панчсайне сельмонтень. А то Салмов... Салмов...»

Директорсь кирдсь потмосонза кяж Варламовтьке лангс. Ся изь ара ширезонза, ашезе озафта эсь вастозонза Порговть.

Сон мековасу якафтсь кабинетонц туркс, апак лотксек шовсезе кафцьке кядьса шаманц, бта панць удоманц эса. Сон кяжиясь, мес ламос аш Митричсь. Ся аньцек кенерсь сувамс, Салмов кармась сюцемонза, мес сон директорфтома максси сведеният инженерти.

— Сон аф тушенды тоста, — дивандась Митричсь, — якай усадьбава, кода эсь переванза. Анокс сембонь содасы, коса мезе ащи, мярьгат сонць путозень сембе машинатнень вастоваст.

— А кда саль мировой шпион или диверсант, эста тожа нолдалить якама? — ювадсь лангозонза Салмов.

Митрич ашезе сода, мезе отвечамс. Ладязе конястонза равжа сотксть и малость пеедезевсь:

— Местема сай тяза шпионць?

— Тон, Митрич, политикаса мезевок аф шарьхкодят. А вдь воявать, кадыть тоза сельмоцень и сякокс кизефнят, местема сай тяза шпионць? Сай, да кода нинге сай! А тя, Поргов, содасак кие?

Митрич сяда тов споряма изь карма. Сон кулхцондсь, мезе азы директорсь, содазе, што Салмов фалу прянц лувондсы политическяй работникокс, хоть и грамотнайшиц аф оцю, семилеткада меле косонга изь тонафне. А войнать пингста работась управляющайкс «Заготскот» контораса. А, кодак Варламовть кочказь васенце секретарькс, сянь вельде Салмов повсь райкому. Кафкса кизот сон работась отделонь заведующайкс и секретарькс. Тяда меле райпартконференцияса секретарькс ашезь кочка. Но Варламов тага заботясь инксонза: путфтозе эмтеэсонь директоркс.

— Тон содасак, кие тя инженерсь? — тага кизефтезе Митричть. — Вдь аф содасак? А корхтат! Мяляфтсак, Рузаевкаста сашендсь тейнек инженер? — Митричсь люкштядезе прянц. — Ну вот, ся ульсь штука, а тя кафксть сяда штука! Рузаевкастось нинге од ульсь, лама изь сода, ито мянь тяза пачфтезе‚ — няфтсь сурса улонц алу. — А тя врьгазсь опытнай, сразу, эк, тонь кунданзе крючокозонза. Да и колхоснендиге навазе няренц. Кулить, мезе тись «Мазы пакся» колхозса?

— Мезе? — кеподезе прянц Митричсь.

— Э-э, брат, тя аф минь лацонк ломанць. Вдь минь тонь мархтот шинек-венек пульхктяма машинатнень перьф и аф анатама питне, а сон аньцек токафтозень сур пензон колхозть электростанциянцты, эстокиге фатясь кядьстост курмозь ярмак. Райкомсь кучсемань тоза, монць ваныне. Кафта шит апак лотксек симондсь тостонь трактористтнень мархта, а ирецтонь прят тракторса ков-бди якасть и тапазь сонь. А тейть кода тоста пачфтезь тракторть колга?

— Тракторть, корхтайхть, Каргин тапазе.

— Няйсак, тясонга тонь тапарянзе. Вдь кинь-кинь лангс эряви веляфтомс грехсь.

— Тя, пожалуй, зря, — оду пшкядсь Митричсь. — Инженерсь тяса аф виноват. Сашендсь тяза Бугров и сембонь азондозе. Синь нинге вов мезе корхтайхть: тракторть инкса шумусь мастерскойсь, каннезе тяза сязьф шатунть гайканек-шпильканек, ванондозе Поргов. Корхтай, тоса ашельхть шплинтт.

— Ха-ха-ха‚ — рахазевсь Салмов. — Тяни шарьхкодеть, мезе синь ёрайхть тиемда? Значит, муворуфне аф синь, а минь тонь мархтот? Тя ловкайста тиф! Пяк ловкайста! А тон верондат? Ванан, ванан, шабакс ащат, Митрич. Деряй, ашезь шарьхкодев эсь кавоськасот, што синь тяфта следснон эса тапаряйхть? А, пади, тон афкукс сявсак тя зиянцнон эсь лангозт, а? — тяни ни лия вайгяльса кизефтезе Салмов. — Кда тяшкава ляпе седице, то сявк. Эста минь мисаськ тракскяцень, пальталень-калмоча, и пандсак тракторть питненц. Давай, тисаськ тяфта! Тейне вдь сяка, кинь зепста сявомс машинать питненц.

Митричсь сускозе сур пенц и кулхцондсь, тейнза изь шарьхкодев‚ мес тяфта корхтай мархтонза директорсь.

— Вов тяфта тевсь, Митрич. Шарьхкодеть, мезе тиенди тонь орёлце? А то корхтат: Поргов — орел! Орел! Вов тейть и орел! — таргась папиросат, сявсь сонць и венептсь Митричти.

— Митрич‚ — тяни сятявняста ушедсь Салмов, — мон тердихтень, штоба кафонек арьсемс, кода тиемс документтнень синнеф тракторть колга. Корхтак, тят корхта, а тевсь аф мазы: тракторть боконц меки аф пандсак. Вдь минь тонь мархтот кафонек отвечатама эмтеэсть работанц инкса, а тракторсь ульсь ёфси од.

— Аф одсь тапаф. Тапаф кемгафксувоце номерсь, сонь мотороц...

— А мезе мотороц? — Салмов ашезе капа корхтама. — Кемгафксувоцеське работась парста.

— Работамать работась, да коленчатай валоц эллипс мархтоль. Тон мяляфтсак тя машинать? — приметамок директорть кяжи сельмованфонц, Митричсь ёфси саворне, пцтай тошказь кармась азондомонза машинать историянц: — Тя вдь самай сонь петеськ Васенце Майнь карша. Ну, а коленчатай валсь изь пчкя, ёраськ кадомс петемда. А эрявсь рапорт максомс, мяляфтсак?

Салмов малость абондсь, но эстокиге стряндась.

— А комиссиясь примазе?

Митричсь люкштядезе прянц.

— А мезе нинге эряви? Акт ули и пара. Кода и мзярда ульсь петьф машинась, тянь аш месть лемнемс, ули актоньке и пара, шарьхкодеть?

Салмов нозкстась папироскастонза, сельгсь вакссонза ащи корзинанцты и кармась корхтама:

— Тракторть кальдявста петеманц колга тевсна аф лиси! Тонь аф максте сивомс тейст. Тя вдь тонь лангозот каясазь пократнень, шарьхкодеть? Монь тевозе вдь ширеса, максан приказ, и виноватть кядьста бухгалтериясь чакадьсы тракторть питненц. Но мон, корхтан, обжамс аф максте. А тон тонць вов мезе тихть: ванды стяк сяда рана, озак грузовой машинас и архт «Мазы пакся» колхозу. Тоса проверяк тракторть синнеманц колга тевть, ладняс корхтак тостонь цёратнень мархта, и кадк азондсазь, коза веть синь арнесть винанкса. А тон сембонь тянь тяштьсак тейне докладнойса. Шарьхкодеть? Ватт, инженерть тяк ужяльде. Ужяльдьсак — тонць поват бедас! Мон вдь азондыне, кода синь ёрасазь вятемс тевть. А Каргинти тяфта и лятьфтак: кда азсы педа-песс, эста араласа, судс аф максса, шарьхкодеть?

Митричсь тага люкштядезе прянц. А Салмов тяни нльне анокс гразясь:

— Эста минь лиякс карматама корхтама инженерть мархта! А то тон вдь аф содасак, мезе сон корхтась райкомса? Тейтьке кемоста тоса сатсь! Тя афоль эряв азондомс тейть: беспартийнаят, но мон содаса, што тон киндиге кургцень аф панчсак.

Дзиннякодсь телефонць. Салмов сявозе трубкать, кулхцондсь и кувакаста таргазе:

— А-а, Григорий Григорьевич! — сон марнек велясь креслать лангс, мековасу якафтозень сельмонзон. — Прязе шары, брат, тефнень эзда. Мес? Коданга аф аделави видемась. Спасиба, мольхтяма. Тон катт колма ломаненди, да, катт. А? Машинат? Норавак... Митрич, коса работайхть минь грузовой машинаньке?

— Карга велеса вирь усксихть.

— Алло, Григорий Григорьевич, омботь — кафта кучан. Ладна, спасиба.

Салмов путозе трубкать и эстокиге макссь распоряжения:

— Митрич, ванды тят кучсе Леховти кафта машинат, кирдить и кучить синь плодопитомнику.

— Лехов тага кармай шумнама, — азозе Митричсь, — тоса вдь работайхть Саранскяйнь распоряжениять коряс.

— Кадк шумнай. Сон аньцек сашендсь, максонь бульдозер, ужяльдине. А кармай жалбама, лиякс карман мархтонза: кадк карьса ровнайгофтсы площадканц. А тон азк Леховти, што машинатне эстейнек эрявихть. Ну, сембе. Шарьхкодеть, мезе ванды эряви тиемс?

Митричсь комадонь прят лиссь кабинетста.

— Тяк юкста, ванды ранане стяк! — ювадсь мельганза Салмов.