7

Вейхкса частста шобдава райкомть инголи лоткась машина. Валгсть Поргов, райкомонь инструкторсь, и мельгаст лиссь шоферське, кона саманьберьф азондсь всякай анекдотт. Тяни, кодак варжакстсь ульцять кувалмос, эстокиге лоткафтозе инструкторть:

— Тс-с. Ватт, кие моли дрожкаса? Копорь ширде содасак?

Порговське варжакстсь ся пяли и кизефтезе шоферть:

— Кие ся авась?

— Тяса ули Венераньке, — аф сразу отвечась шоферсь и сонць кати Порговти, кати инструкторти пшкядсь: — Эх и мазы, окаяннайсь, зря ашеськ сата.

— А кие сон?

— Ули тяса зоотехник, работай «Возрождения» колхозса. Фамилияц Волкова. — И тага кармась шнамонза авать.

Поргов ванць авать шири и уркстозе шоферть:

— Озорниктада, идолхт, стаки тетьксесайнть сельмонтень од аватнень лангс.

Шоферсь пиндолгофтозень сельмонзон:

— Сембонь аф сембонь, а тя авать лангс можнат тетьксемс.

Аньцек кенерсь Поргов сувамс пирьфи, сонь васьфтезе коськана, оцю сельме од аля. Ся лиссь райкомста и эрязста аськолясь Порговть каршес.

— Степашкин, — азозе фамилиянц, — райкомонь омбоце секретарсь. Кафта шит ни вешенттяма эсот, коданга аф муват. Ну, аде, сувак.

Поргов знакомондась Степашкинть мархта и сразу тусь мялезонза. Вайгялец Степашкинть эчке, но кайгсь мазыста, а сембода пяк, мзярда сон рахась.

Поргов няфтсь эсь комбинезононц лангс:

— Ёрань каямдонза тя кедть.

— А мес? Аф рьвяянь ладяма сать, тяфтанга пара, — шутендась Степашкин.

Приемнайса Салмов шумбракстсь Порговть мархта, азозе, кие сон, и сембе сувасть Варламовть кабинетозонза.

Просторнай комнатать кияксонц келес ацаф якстерь ковер, кона пяк ладясь менелень тюсса архтф стенатненди. Варламовть моркшенц каршеса ащесть кафта креслат, шавфт равжа дермантинца. Кабинетть фкя стенанц кувалмос ладяф диван, ужети стяфтфт кафта оцю сейфт, фкяти нежетьфоль ётай кизонь каньфонь комор, омбоцеть пряса коське клеверонь пусма. Вальмянь стенать кувалмова ащесь сенем сукнаса вельхтяф кувака моркш и латцефт стулхт.

Стадонга аф сери Варламовсь тя оцю и сери кабинетса няевсь ёфси ёмланяста. Сон стясь вастстонза, лиссь кабинетть кучкас, венептезе Порговти кяденц. Секретарть гимнастеркань воротниконц вельф нюрьгсь улалоц. «Ершекс» нараф равжа шяярензон ёткова шуроняста пиндолдсть шаржонят.

Корхтась сон сидеста, равжа сельмонза апак лотксек пиндолдсть сембонь ланга.

Порговть озафтозе креслати, а сонць занязе эсь вастонц, нежедезе копоренц.

Аньцек кармась инженерсь азондома, коса сон ульсь и мезе няйсь эмтеэсса и колхозса, Варламов лоткафтозе сонь:

— Тянь сембонь минь содасаськ, пожартьке кулеськ, — трваванза ётась мзолфкя. — Нльне кулеськ сяньге, кода штасть электростанциять нолдаманц.

Варламов корхтась, а Салмов рахась. Порговти сёпомс ашель кода, аньцек виденцясь и дивандась, кодама курокста сембе пачкодсь секретарти.

— Тяса вдь аф кода ошса, — шнафтсь пря Варламов, — эрь аськолксцень народсь мерасы.

Сембе ульсть весялат. Салмов апак лотоксек то стякшнесь вастстонза, то меки озась, а меколи сонга изь кирде:

— Народоньке эмтеэсса цебярь, сембе кенярдсть, што сась инженер. И аньцек аст вал, тракторонцка макссы.

Порговти исть шарьхкодев Салмовть валонза, но сякокс синь колгаст азозе мяленц:

— Механизаторхнень мон содасайне, — ниге сембе пеедсь сон, — парста содаса тя народть. Мзярда-бди монць работань комбайнеркс.

— Ну эста нинге сяда пара, — апак лотксек мзолдсь Салмов, — сразу фкя кяль муят мархтост. Тяни няить, кода миннетне гуляндайхть? Кажнайти мезецка аф ужяль, нльне тракторть тапазь.

— Тракторть колга, Карп Максимович, аш месть лятьфнемс, — Варламов лоткафтозе Салмовть и эстокиге шарфтсь Порговти: — А тейнть васенда самаль райкому. А то, няйсак, кода лиссь? Минь мезевок аф содатама: кият тон? местема сать? Ломаттне всякайкс васьфтедязь. А райкомса марса арьселеме, кода пяшкодемс тейть максф тевть. Райкомсь, браткяй, райком, ваксканза аф эряви ётнемс. Райкомса и корхтамаль минь афсатысоньконь колга.

Поргов апак каштортт венептезень Варламовти документонзон.

— Тяса кивок ашель, — тяка ёткть азозе сон, — муйне аньцек Шиндина ялгать и якань колхозу сонь мархтонза.

Мзярс Варламов ванондозень Порговть документонзон, кабинетса ашель кашт моли. Сембе ванцть Варламовть лангс, конань шамаса то фкя, то омбоце вастса тозерясть саннятне. Аньцек тяни Поргов приметазе, што Варламовть сельмужензон эзда сявомак алу таргавсть мянькст, а сельмокедензонды бта петфтафт кяскавнят.

Лядьсь Порговть мялезонза фронтонь танковай бригадань командирсна, конань шамаста няендсь тяфтама жа китькст и кяскавнят, мзярда ся ульсь пяк сизеф и апак удок.

Кабинету сувась Шиндина. Сонга нежедсь моркшть малас, озась Степашкинть ваксс, и ся кармась мезе-бди тошксема пилезонза.

Варламов ванозень Порговть документонзон и мзолгодсь:

— Вов тя тев. Сяда сиденяста ба кучсельхть тейнек тяфтама специалист. Надиятама, лездат?

Порговть колга ня сембе валхнень Варламов азозень ланга кеняртьфста, нльне стясь вастстонза, омбоцеда люпштазе инженерть кяденц.

Кда тяда инголе, мзярда Варламов корхтась Порговти, што эряволь ба васенда няфтемс пря райкому, Поргов марязе прянц кяжияфста, аноколь отвечамс Варламовти, што сонь улихть праванза любовай пингста проверямс эмтеэсста любовай машинать, то тяни сон аньцек пеедсь и эсь пачканза шназе Варламовть.

Варламов меки озась вастозонза, пшкядсь:

— Тя эмтеэсоньке, Борис Константинович, оцю, машинада эсонза лама, но тейнек коданга Саранскяйста аф муйхть главнай инженер. Кургоньке аш кинди панжемс, вал аш кинь кядьста кизефтемс.

Поргов надияфтсь, што тя тевса сон лезды.

— Эста давайте аф карматама лама корхтама, а дружнайста кярьмоттяма тевти, — мярьгсь Варламов.

Салмов кулхцондсь и кирендсь. Кели, нюрьхкяня шамац палсь толкс, мековасу якась эскокс оржа шалхкоц. Сон сяка тев вадерязень фталу ливоськотф шяярензон. Изь ту мялезонза, што Варламов лиякс шарфтозе тевть. Вдь аньцек Порговть самда инголе, мзярда Салмов азондозе, мезе лиссь «Мазы пакся» колхозса, Варламов кяжиякшнесь, сюцесь инженерть эса, нльне азозе Салмовти, што сон прважасы Порговть меки, коста сась, да нинге тяшти Министерствав, штоба афольхть кучсе тяфтама проверщикт. Салмов тяни хоть фкя сельмоса ёразе няемс Порговть документонц, содамс, мезе тоза тяштьф, мес тяшкава курокста полафтсь Варламов.

— А минь, деряй, мезе-мезе кальдяв азоме? — пшкядсь Салмов и сембонь ланга ётафтозень ёмла сельмонзон‚ — аньцек спасиба мярьктяма Порговть саманц инкса. А кда мезе азоме, то аньцек сонь эсь валонзон колга. Вдь кеподсь марнек сембе районць. Кие-бди азозе, што инженерсь тракторхт кармай мишендема. Эк, исяк веть нльне трактор тапасть. Тянь колга и корхтаме.

Исть ту сембонь мяльс Салмовть тапаряф валонза. Степашкин крхкаста таргазе ваймонц, бта сялгозь сонь, и комотсь вастстонза, пятнань-пятнань якстерьгодсь шамац. Сон ёрась мезе-бди азомс Салмовти, но Варламов шарьхкодсь, чакадезе моркшти карандаш пенц:

— Поргов ялгати, улема, эряви ваймамс, а тинь баснянте ламос аф аделави. Архт ваймак, Борис Константинович, а меле работать колга корхтатама.

Што Салмов аф пара мяльса васьфтезе Порговть, тя няевсь сембонди. Шарьхкодсь сонць Порговське. Но тейнза изь содав, мес эмтеэсонь директорсь эсь тапаряф валонзон ёткова омбоцеда ни лятьфнесы тапаф тракторть? Васенда ёразе кизефтемс тянь колга сонцень директорть, но кизефнемонза изь карма, Варламов сатомшка кемоста уркстозе сонь.

Порговть тумда меле кабинетса кивок мезевок изь кашторда, но сембе содазь, што корхтамс Салмовть колга эряви. Варламов стясь, ётась кабинетть туркс и келес панжезе фкя вальмять. Кельме кожфсь, кода ляпе кядьса, вадердазень сембонь ливоськотф шамаснон‚ шерьфтезень шяярьснон. Кожфть эзда кажелгодсть шра лангстонь каготтне‚ бта тошказевсть синь вальмалдонь шуфттнень лопаснон мархта. Кабинету лийкстась тюжя мелавня, сон шарозень сембе стенатнень и озась тона кизонь коське клеверонь пусмоть лангс.

Шиндинась нюрьхкя ожастонза таргазе руцянянц и нардазе конянц. Кабинетть келес яфодсь цебярь духонь пожфкя. Алятне сембе варжакстсть наряжаф Шиндинать лангс.

Сетьмоть колазе Варламов:

— Исяк мон калякондань обкомса Фёдор Михайловичень мархта. Сон тейне тяфта мярьгсь: «Надиятама лангозонт, Степан Иванович, паксянь тевса». А мон аф пелезь отвечань: «Надияда, Федор Михайлович, моронь кукафтыкс республикаса, может, аф арафтама, а ломаньда аф ляттама». Тяфтама вал максонь.

— Кодама тяса моронь кукафтома?! — кяжвельде азозе Салмов. — Сандяряй тейнек нинге фкя тяфтама проверяй, сембонь вайгяленьке кашкомихть.

— А мон, чаян, Поргов тейть аф шоряй, — кяжвельде отвечась Степашкин. — Мес тага тяшкава эводеть?

— А монь койсон, кивок тяса изь эводе, — весяласта пшкядсь Варламов и сязевсь корхтамац: тейнза звонясть телефонца.

— Шумбрат, — аф ламос кулхцондомда меле пшкядсь сон трубкати. — Ну?.. Рьвязень, што ли, тейть кильдса товаронкса? Потребсоюзса азорсь тон? Тон. И мук, мезьса ускомс товархнень! — и ёрдазь путозе трубкать.

Варламов шашфтозень инголенза мараф газетатнень, полафтозе якстерь эчке карандашть вастонц и сембонди пеняндась:

— Кода пацяфтома кирьхкст, чёрт возьмиснон! Мон работань потребсоюзса войнать пингста, ито вестенге изень яка райкому алашанкса, а тевозе мольсь синдедост лац, — сон тага нежедсь панжада вальмяти и пшкядсь Салмовти:

— Пади, тонга, Карп Максимович, стак ашемда псилготкшнят? Мезе корхтась и кода корхтась инженерсь, кивок кода эряви афи содасы. Васенцеда няйсак, ломанть, а тиендят стане, бта сон тонь врагце.

Изь кирде Степашкинцьке:

— Аф пара тяфта, Карп Максимович, аф лац вятить пряцень инженерть мархта. Ломанць кучф оцю заводста, явоштозь сонь оцю тевста, а минь тяса...

— А содасак, мезе сон тись тячи веть «Мазы пакся» колхозса? — Салмов варжакстсь Степашкинть лангс.

Степашкнн ашезе сода, мезе тись Поргов колхозса, а сяс сразу ашезе му, мезе отвечамс Салмовти.

— Тон нинге тонць аф содасак, — Степашкинть вастс отвечась Варламов‚ — кати шуму сон тракторть инкса‚ кати аф. А кда ломанць мезевок аф содай?

— Содай. Синь марса тоса симондсть, марса и тиезь тевть, — спорясь Салмов.

Шиндина спокойна кизефтезе Варламовть:

— А мезе тоса тиевсь?

— Тон шумусят‚ — пеедезевсь Варламов.

— Мес мон?

— Мон стак, стак. Тят эвотькшне‚ — эстокиге шутканьбачк мярьгсь Варламов.

— Фкя инженерсь сай, тии всякай тешкат, — прянь няикс мярьгсь Салмов‚ — омбоцесь кармай синнемост тракторхнень. А кие отвечай инксост? Монь прядон фкя и партбилеттонга фкя.

— Дайте проверясаськ! — пшкядсь Степашкин.

— Тя эряви проверямс, Степан Иванович, — сяда смелста мярьгсь Шиндина и тяни ёфси лия вайгяльса пшкядсь Салмовти: — А Рузаевкаста кучф инженерть лангс лама тят почеря, минь аф шабатама.

Салмов лофташкодсь.

— Корхтамс можна, а тевсь мезе няфни? Вдь тонць, Варвара Степановна, азондыть, кода торгавась Поргов машинаса колхоснень эзга. Минь тожа аф шабатама, шарьхкодьсаськ, мезенди тянь тиендьсы сон. Ёрай сатомс авторитет эстейнза. Шарьхкодеськ политиканц.

— Тя мон эсьстон корхтань машинатнень колга, — рахазевсь Шиндина, — а‚ деряй, аф тяфта? Мезенди кирнемс ташта машинатнень усадьбаса, кда механизаторхне эрь совещанияса корхтайхть, што можнат нолдамс? Но, тейне-арам, аф машинатне китнефтьсазь, Карп Максимович, телацень. Тон аф васенцеда ни калгода васта ацат специалисттненди. А мес аф кельгсайть синь? Вов тянь каршес пинге ни мумс ответ.

— Мес аф кельгсайне? — пидевсь Салмов.

— Лоткада, лоткада! — кардазень Варламов. Кивок специалисттнень аф обжасыне!

Варламов валдонза меле Салмов ёфси мирнайста пшкядсь:

— Тя клевета, Шиндина ялгась, што аф кельгсайне специалисттнень.

— Мон эсь копорьсон маряйне тянь, мзярда работань эмтеэсса зоотехникокс.

Варламов ашезень када сяда тов споряма:

— Арда ярхцада и срхкада колхоснень ланга, — озадонь седихть мярьгсь сон. — Тяни кажнайсь эздонт должен кафта-колма колхозса улемс эрь шиня, штоба сельмоньке везде ваноль, видема планць эряви пяшкодемс.

Срадсть кабинетста аф сразу. Лиссть Степашкин и Шидинась, а Салмов аф ламос лядсь.

— Пади, тумс тейне, Степан Иванович, работаста?

— Мес?

— Деряй, тон аф шарьхкодьсак, мес? Аф кельгсамазь нят, — няфтсь кенкшть лангс, кона аньцек сёлговсь Степашкинть и Шиндинать мельге, — школьнай тетрадьказост тяштьф аф стане, кода мон работан. Но тейнть содаф, кие тя Поргов и местема сась. Содак‚ — тяни тись пря рахайкс, — Порговть мархта шувф лоткти васенцакиге ваят тон. А сон шуви, обязательна шуви.

— Нарвайсь, брат, аф содасы, мзяра лефкстонза, а мон аф содаса, кие кинди шуви лотка. А сялгадомс Порговть каршес тячи — ашель кода. Тон ашить няй, кода ванць минь лангозонк Степашкин? Няить, кода араласы? Кодак кулезе, што сась Москуста инженер, кенярдсь, нльне кадозень колхоснень, ардсь тяза. Тяк юксне: сразу мяндьсак — сялись синдеви, а саворне — поюста шары тият.

Салмов шарьхкодезе Варламовть, што сон эсь кинц ашезе полафта, аньцек кичкорясь аф ламода.

* * *

Шиндинась мес-бди кальдявста марязе прянц. Мезецка изь сяряде, а изь мушенда эстейнза васта, мярьгат стака кев матразе седиенц. Аф ламос ащесь эсь кабинетсонза и тусь куду. Ашезень сода, коза путомс кядензон кудсонга. Кярьмоди фкя тевти, кярьмоди омбоцети, а тевсь сонць прай кядьстонза. Пилесонза кайгсть Варламовть кабинетста вайгяльхне, сельминголенза нетьказкс мянцевсь Салмов.

«Вов нинге ломанць, туткодомаце сай эздонза»‚ — арьсесь сон эсь пачканза. Тоса сявсь тоду и тусь садозост, мадсь сянгяряса наряжаф марлю алу. Сон ёрась тяса юкстамс сембонь, мезе ульсь тячи райкомса. Ванць кярьксокс недяф панчфнень лангс, конат люкасть шить каршеса.

Шиндинать эсезост кармосесть ни концевома сельмонза, но меки лятьфтазе райкомстонь спорть, сельминголенза появась лофташкотф Порговсь, сонь пукшу, вии кяденза, кели лафтунза. Ёфксстонь богатырькс Шиндинати сон няевсь Салмовть каршеса. И сякокс ся, кода вень сяське, врьгятькшнесь лангозонза.

Шиндинась кельгсыне вии ломаттнень. Сонь сонцень аляц ульсь сери, вии. Мянь войнав тумозонза, кодак сай работама вастста, связень контораста, коса сон ульсь старшай монтёркс, сявсы кядезонза Варань и, кода ёмла иднянь, люкафнесы вяри-алу. А войнав тумстонза, мзярда аноколь ни ки лангонь сумкац, сон нардазень Варань сельмоведензон, палазе и мярьгсь: «Каст оцюняста, оцюняста?» «А мезе азоль тяни, кда няелемань тяфтама оцюста?» — и тяфтак арьсезь матодовсь.

Онцтонза сон эрьгодсь шобда вирьса. Каршезонза тифтедсь офта. Варвара Степановна эводсь и мезе ули вийц юватькшнесь. Шуфттнень ёткса тихтедсь Поргов и рахась Шиндинать лангс. Тейнза пяк визьксоль Порговть эзда.

Сргозсь. Панжезень сельмонзон и ламос изь веронда, што кодамовок офта и Поргов маласонза ашель. Станяк апак каштортт ащесть марлюфне. Эздонза аф ичкозе клокнась нарвайсна, цифнясть перьфканза лефкскятне. Шиндинась стясь, и тейнза чуднойкс няевсь нарвайсь, кона мезе ули вийхть старандась почаксамс модать, тарксемс лефксканзонды сукст, инжат.

«Нарвайтьке ули семьяц», — мзолгодсь Шиндина и срхкась «Возрождения» колхозса эряй Волкова Ася ялганц пяли. Но эстокиге лядьсь мялезонза, што Ася тусь тячи Москуву, велень хозяйствань Министерствав терьдезь кодама-бди планонь тиема.

Шиндина тусь лия колхозу.