4

Колхозти макссть лем «Мазы пакся», маряк, аньцек сяс, мес ащи сон вельф цебярь вастса. Велесь виденяста таргаф плотинать види ширдень беряконц кувалмос, а кержи ширдень беряксь ацазь-ацаф од вирняса. Кемоньшка метрань сереса плотинась ащи центральнай седькс «Возрождения» и «Мазы пакся» колхоснень ёткса. Сонь фталонза нежекс нежетьфт эчке и сери топольхть, конатнень фкя-фкянди токсеф тарадсна комафт плотинать вельхксс. А сяс тяса фалу эше, кода туннельса. Вирня ширдень берякса колхозть одс строяф меленцяц.

Шиндина и Поргов лоткасть колхозонь правлениять инголи. Эстокиге каршезост лиссь богатырьшка цёра, шама пакарензон и кудряв прянц коряс няевсь, што тя тожа Бугрофнень плямаста. Сонь мельганза курокста лиссь серес аф оцю, акша стирня.

Тя и ульсь Сараевась. Няевсь сон ёфси шабакс. Акша паргана шяяренза стядотольхть и молемста люкасть кожфть эзда. Щаф кели, сёрмав юбкаса, нюрьхкяня ожа мархта тюжя кофтаса. Порговти няевсь сон сёрмав мелавнякс. «Мелавнясь» эрекста нежедсь Порговть малас, кфчядезень сенем сельмонзон и венептезе кяденц:

— Галина Васильевна, — азозе лемонц и эстокиге поладозе: — Велеса тяфта ни эряй, ваймамонга ашедязь када. А тя вов тракторнай бригадань бригадироньке, — няфтсь кудряв пря цёрать лангс, — Бугров фамилияц. — И Сараевась мес-бди якстерьгодсь.

Бугров азондозе, мезе тиендеви электростанциясост, и тусть ваномонза.

Шава меленцять инголе шарсть тувот, почаксасть сараст, а синь ётковаст чильнясть кирьхкст, бта сялондсть сараснень и тувотнень мархта пяярьф зёрнатнень инкса.

Бугров сувась меленцянь кияксть алу, тоса шуфтонь эчке валти тифоль динамань приводсь. Мельганза сувасть Поргов, мельниксь и Сараева. Вяри ськамонза лядсь Шиндина. Меленця алдонь ведть эса, сваятнень ёткова, кода ваномань пачк, васедсть Сараевать и Порговть ванфсна. Сараева нолдазень сельмонзон алу. А Поргов эстокиге кизефтезе:

— Галина Васильевна, мзяра озафтоде ярмакта тя одс строяф паршити?

— Сяда тёжятть, — кода-бди виздезь азозе ся.

Поргов люкафтозе прянц:

— А мезе сон максы колхозти? Кептерь качам?

Сараевать мяльс ашесть ту ня валхне, отвечась обижафста:

— Мезе тият? Кинь конашка трубац, сняра и качамоц. Лиятне, пади, бредникса кунцесазь качамснон, а тейнек кептерьске саты.

— Мон аф сянь колга корхтан, што лама ярмакта ётафтоде, — Поргов кармась прянь парондома. — Вов Мокшесь эряволь ба перямс, ся уш тевонтень якафтольхце.

— Мокшеть перямс капитал эряви, а минь мезе? — изь кирде Бугров.

— Аф ськамонт.

Мельниксь пеедезевсь:

— Мокшеть перямс... Вага сяканяшка штуканясь и то аф нолдави тевс, а то нинге Мокшеть перямс... Тон азка тейнек: мезевок лиси минь затеяньконь эзда?

— Ванцаськ, кда мезевок аф лиси — ортанц вадьсаськ кяшеса, — шутендась Поргов.

Сембе куцсть вяри. Поргов ванозе динамать.

— Мзяра вийдонза?

Бугров кеподезе кепкань козыреконц сяда вяри, кенярдембачк отвечась:

— Сембоц кемгафтува киловатт, пустяшнай тев.

Сараева аф ламняда весялгодсь. Потмозонза эвондась кодама-бди надиямаши. Пяк ни сон пичедсь электростанциять инкса. Вдь нинге тялонда надияфтсь валдоптомс колхозникнень кудснон электричестваса. И надиясь эсь лангозонза, што тянь сон тисы. Надиясь сяс, мес эсь сельмонзон мархта няендсь тяфтама жа электростанция Горьковскяй областьса. Тоза кучсезь сонь практикас сельскохозяйственнай институтса. Кой-кит колхозникнень эзда анокс рамасть ни радиоприемникт, электрическяй утюкт, плиткат. Колхозникне верондасть эсь председательснонды, содазь, што сон хоть од, но коза суски, меки пейнзон аф таргасыне.

Да, Сараева пичедсь, пяк пичедсь. Кинь аньцек сон ашезе терне станциять ванома. Тиезь сонь синць, тястонь трактористтне, конат исть сяв тянкса кодамовок питне, но тейст изь нолдав. Сашендсть лия колхозонь электрикт, ульсть тяса и эмтеэсонь специалисттне, ванондозь, но мезевок исть мушенда.

Сараевать аф весть ни сюцезе Варламов, што сон аф эсь тевозонза кундась, што колхозса улихть тяда эрявикс тефт. Сараевати сельмоведень тумс визьксоль сембонь эзда. Сяс тяни пчкясь сонць илештельхцень кядензон и кармаль ба лездома инженерти. Но тонац, кода нарошна, кяжияфнесь:

— Пади, тинь, Галина Васильевна и Варвара Степановна, тутада тяста? А то щамонте модярявихть: тяса пульда лама.

— Аде тутама, Галя, — ордатфокс пшкядсь Шиндина. — Няйсак, мольфтеськ ни мяльснон.

Бугров кеподезе прянц и веркс якстерьгодсь.

— Тя вдь стак, Варвара Степановна, — эряскодсь ляпофтомс Порговть валонзон и варжакстсь Сараевать лангс.

Стирьхне мзолгодсть. Шиндина мярьгсь шоферти анокламс машинать и кармась прощандама.

— А кода Поргов ялгась? — кизефтезе сонь шоферсь.

— Минь тейст тяни аф эряфтама, — шутендась Шиндинась и лиссь меленцяста.

Сараевать колхозу самдонза меле Бугров Алексей аф содавомшка полафтсь: шинек-венек кармась работама, штоба косонга и мезенксонга афолезь уркста. Васенда тянь няезь трактористтне. Синь эсь ётковаст пеетькшнесть, што Алексей пильгонек-прянек пезсь кельгомань болотас, сяс и тяшкава старандай. А тоса тянь кармасть содамонза сембе велеряйхне и Лёшатнень оцю семьясновок. Вов мес Алексей сяшкава якстерьгодсь, мзярда Поргов мярьгсь тейст тумда меленцяста.

Кодак лядсть аньцек алятне, Поргов щазе комбинезононц и кошардозе Бугровть нолдамс ведть. Тя пингть тяза сась равжа цёра, тракторист, кона сембода ламоть тиезе динамать путомста.

Бугров нежедсь контрольнай щитти, шарфтозе рубильникть, и контрольнай лампочкась крьвязсь.

— А вов кодак максат нагрузка, эстокиге, кода чахоточнай, кармай лякома, — пеняцась Бугров.

— Макст нагрузка! — кошардозе Поргов.

Аньцек кенерсь Бугров шарфомс омбоце и колмоце рубильникнень, лампочкась кармась «лякома»: то озай валдоц, то меки кеподи. Равжа трактористсь динамать колга азсь пф цебярь валхт, лядыхне рахазевсть.

Обед маласта меленцяв меки сась Сараевась. Сонь лангсонза крепдешиновай платья, пильгсонза читордсть лакированнай туфлят.

— Мес ламос аф мольхтяда обедама? — азоркс пшкядсь алятненди.

Бугров нльне эводсь, мзярда няезе Сараевать тяфта наряжафста. Сон содазе, што Сараевась тяфта якай аньцек районнай совещанияс и райсоветонь сессияс, коза синь кафцьке кочкафт депутатокс. Сон васенда варжакстсь Галина Васильевнать лангс, тоса ётафтозень сельмонзон инженерть шири да ванць стане, мярьгат тя инжись сась павазонц нельгома.

И, меколанкт, Сараева озадонь седихть ванць Алексейнь кельгоманц лангс. Аньцек лияста, ётамбачк, вадердасы кядьса сонь щёканц и апак каштортт туй ваксстонза.

Весть Алексейнди сашендсь аляц. «Тядяце кучемань, — видеста корхтась сире Бугровсь. — Деряй, тейть ялга председательсь?»

Алексей комафтозе прянц и виденцясь:

«Кельгса, аляй, седиге-ваймова кельгса!»

Атясь кяжиясь: «Лоткак дураконякс пряцень вятемда, лоткак. Месть мельганза усксеват? Сякокс тонь аф кельктянза. Браттне рахсихть лангсот. Тяк сраминда родоньконь-пляманьконь!»

Кда тяфта корхталь Алексейнди чужой ломань, сон кати-мезе тиель ба мархтонза. А тяни кирдсь, мзярда аляц аделасы апак арьсек изгордоманц.

Бугров атянь вете идензон эзда Алексей ульсь мекольденнесь и сембода кельговикссь. Шабакс пингстонза алянь-брадонь келеса ванозь сонь мяленц, кажнайсь каннесь тейнза танцти сускомня. Сяс мянь тянемс Алексейть цебярец и кальдявоц марявсь Бугрофнень марнек семьяснонды.

Бугров рьвяяфтозень ниле цёранзон, кафта уноконзон. Синь пялост любовай стирсь мольсь рьвянякс. И Семен Прокофьевичень касондсь седиец. А тяни кумбряшка стирнясь Алексейнь тиезе ёшмокс сокаф паксяса, марнек седиенц косьфтазе.

Но Алексей алянц ашезе кулхцонда, сяконь содай: «Галина Васильевнань, аляй, седиге кельгса...»

Алянц сашендомда меле Алексейсь кафта шишка иретьфокс якась, васта изь мушенда эстейнза и сяда пяк лажаткшнесь Галина Васильевнати, мзярда хоть пяле ши ашезе няенде.

И вов тяниенге, меленцяса, Галина Васильевна вятезе прянц стане, бта мялецоль азомс: «Мезе ёран, сянь и тиян!»

Поргов шарьхкодезень «азорхнень» ёткстонь тапоркснон. Но мезевок ашезь кашторда тянь колга. Сон нюрьхкяняста мярьгсь Галина Васильевнати:

— Обедома молемс аш ётка, — и комась калафнеф динамать вельхксс.

Частта меле Сараева кучсь ярхцамбяль меленцяв. Но тевсь ашезь ладяв ярхцамда меленге: аньцек путсазь динамать, нолдайхть ведь, и меки лякозеви лампочкась.

Сембонь кольсь мяльсна, срхкасть ни куду, сюцесть омбоце эмтеэсонь директорть эса, кона максозе тейст аф пчкяй динамать. Но изь аерда машинать ваксста мельниксь, апак лотксек ванць шнать лангс. Сон няезе, кода комотнесь шнась, мзярда ётнесь сонь стафксоц динамать клокшка шкивнянц ланга, и тя пингоня кирендсть обороттне.

Сембе согласиндасть атять мархта. Кенярдсть, работасть эрязста. Ши валгома инголе ульсь путф лия шна, и кодак нолдазь ведть, лампочкатне палсть ровнайста, приброхнень стрелкасна ащесть сятявста, няфнезь токть напряжениянц.

Бугров и Поргов варжакстсть фкя-фкянь лангс и пеедсть, тейст нльне аф пара ульсь: шиньберьф возсесть, а зиянть музе простой мельниксь. А атясь, шамордомок фкя пильгонц лангс, прянь шнафтозь шарсь перьфкаст: «Вов кие инженерсь!»

Озадонь седихть нилецьке алятне ашкодсть мельникть кисетста цигаркат и апак лотксек ванцть приборхнень мельге.

Но вов сразу меки кармасть комотнема стрелкатне, шарьхкодевсь, што мезе-бди тага тиевсь. Срхкасть ведть пякстама, штоба нинге весть ладняс ваномс динамать, но ашесть кенере: меленцяв алашаса ардсь Сараева:

— Пожар! Пожар велеса! — эводембачк пешкодсь сон.

Бугров тозордазень рубильникнень, а мельниксь пякстазе ведть.

Пинге аф ламняда качады кудть перьф пяшксель народта. Кодами-бди баба азондсь, што сон няйсь он и анокс содазе: велеса тиеви пожар. Кой-кона аватне сюдозь электричествать, сатсь эздост Сараеватиге.

Кудть вальманза тапафт. Азорава бабась озаф тодувонзон-вастонзон лангс и кайгиста явси. Сонць азорсь шаронды мековасу и эводемать эзда апак лотксек мторды: ‹Ничево‚ ничево...»

Пожарть эзда зиянць ульсь аф оцю. Галина Васильевна пильгонь-прянь синдезь вешендсь ни ломатть, штоба урядалезь атятнень-бабатнень кудснон стане жа, кодама и ульсь. Тяка ёткова сюцесь эсь прянц эса, мес электропроводкать ашезе тифте настоящай электриконь кядьста, а надиясь старшай классонь ученикнень лангс.

Мзярда ни Сараева сембе тевонзон ладязень, сон нежедсь Порговти и аф смелста кизефтезе:

— Ну, кода, Борис Константинович, ладявсь станциясь?

Поргов пеедезевсь:

— Кли токть эзда крьвязсь целай куд, маряк, ладявсь.

Галина Васильевнавок пеедезевсь:

— Спасиба. Аряда ужнама.