3

... <здесь начало главы, находится на стр. 15—18 которые потерялись из библиотечной книги>

— А тага мезе азат?

Тя пингть машинась калкс кармась чёпафнема и комотнема сокаф кить эзга. Порговсь нежедезень кафцьке кенерьбакарензон ингольдень спинкатненди, ванць Шиндинать и шоферть ёткова. Люкась инголенза сембе паксясь, кода киноса полафнесь сельминголенза картинатне, ласьксть каршезонза телефоннай столбатне и кусторксне.

Кить туркс ётась плуг мархта гученичнай трактор. Шиндина кошардозе шоферть лоткамс и лиссь кабинаста. Валгсь Порговське. Тракторсь тожа лоткась. Трактористтне кафонест. Фкясь эздост — кодгемоньшка кизоса таза атя, бта кулуса почеряф кели сакалоц срафтф мяштенц келес. Картузфтома пряц пиндолдсь шить каршеса. Сон саворне аськолясь Шиндинать малас.

Шиндина аф аньцек изь карма атять сюцема кить коламанц инкса, но анокс пеедсь и нинге ширдекиге венептезе кяденц шумбраксомс.

— Аф тага кармать работама, Семён Прокопыч?

Тонац пеедезевсь.

— Деряй, кирдят! — и варжакстсь фталу, няфтсь пряса сери, кудряв цёрать лангс. — Сань унокозень варжама. Аньцек лиссь паксяв: курсста сась.

— Тя кона цёрать? — кизефтезе Шиндина.

— Омбоцеть, Максимть, кона работай «Возрождения» колхозса.

— Значит, атянц и алянц киге тусь?

Атясь комафтозе прянц, бта эрявсть ваномс кирзовай кямонза, и потмова кенярдезь азозе:

— Кода парнонянь, сави тяцка тонафтомс бораздас, — сон пеедезевсь и усанзон алда няевсть шура, но шумбра пейнза.

Поргов ванозе одс веляфтф бораздать, кизефтезе атять:

— Аф ланга сокатада?

Атясь васенда ванозе инженерть пильгста пряс, а меле шарфтозе прянц сокафть шири.

— Колмогемонь киза ни тяфтак каран, цёрай. Сёроть жиланзонды тяцка саты.

Поргов изь споря. Шиндина эряскодсь азомс:

— Тя ялгась — инженер, Москуста кучф лездома, Семён Прокопыч, — и шарфтсь Порговти: — Тя Бугрофнень алясна, районцонк инь сире механизаторсь.

Поргов и Бугров варжакстсть фкя-фкянь лангс. Атясь нльне кенярдсь, кодак кулезе инженерть фамилиянц. Исяк тейнза азондсть ни кой-мезе тя ломанть колга, а вов тячи сонць васедсь.

— Тя пара, сувада ширезон, кда токаттяда Карга вели‚ — весяласта мярьгсь атясь.

Поргов азсь спасиба.

— Цебярь атясь. Сонць тракторист, вете цёранза и, улема, колма уноконза — трактористт, — азондсь Шиндина Бугровть колга, мзярда озасть ни машинати.

Поргов пеедезевсь:

— Пара, а директоронтень мархта цють ашезь тргада.

— Кодама директоронь?

— Салмовть.

— Тяньге кулить ни? — рахазевсь Шиндинась. — Да, ульсь тев, нльне фкя-фкянь мяштьс кярьмотькшнесть. Эста Салмов сонць ульсь шумусь.

«Газиксь» шарсь кить эзда кержи шири, ётась коське лашмонь туркс. Пандонять пряста няевсь полевой стан, коса ряцок ащесть комбайнат, тракторхт.

— Ся машинатне, — Шиндина няфтсь полевой станть шири, — «Возрождения» колхозть, конань лангс фалу пеняцяй Лехов.

Поргов тись аф куликс.

А мзярда машинась лоткась стану, сон ванозень комбайнатнень и тяни аньцек пшкядсь Шиндинати:

— Значит, аф мялезт Карга велень председательть пеняцямац? А тевсь вдь афкукс стане ащи: ся колхозть фкя комбайнац анок‚ а тяса анокта вете ни.

— Тя тевсь синцень: механизаторхнень и председательть.

— Синцень ни? Исяк мон корхнень ся колхозонь механизаторхнень мархта. Сембе синь аф нолат, тевсна палозь палы кядьсост, а комбайнасна апак петть. А мезе синь тиихть, кда аш запасной частьт? А тяза, няк, мувсть. — И аф ламняс ащемда меле поладозе: — Лехов, монь койсон, аф зря пеняцяй.

Шиндина и Поргов нежедсть тракторнай будкать малас. Ламоль перьфпяльге машинада. Колма трактористт возясть колеснай тракторонь перьфке. Шумбракстомда меле фкясь эздост кармась пеняцяма райкомонь секретарти:

— Шиндина ялгась, вдь тя калада крандазсь, — няфтсь тракторть лангс, — кунаркиге эряволь ба ёрдамс: тейнза аш кодамовок частьт.

— Аф сяшкава нинге козятама, Бугров ялгась, штоба тракторхт ёрямс, — сетьмоняста отвечась секретарсь.

— Да, тя машинась сакалу ни, — кати шутендась, кати виденц азозе Поргов.

Алянц лаца кели коня, кудряв пря и ктмор шалхка Бугровсь варжакстсь ялганзон лангс, чипордазе сельмонц: де-мол, ширеньконь эса кирди аф содаф ломанць. И поладозе:

— Монга сяконь корхтан: тя тракторть сакалоцка шаржиясь ни!

Поргов мзолгодсь:

— А кда тя «шаржу сакалть» максомс эстейнть, колхозу, эста, пади, нинге кармаль работама?

— Ся тевсь лия, — Порговть апак шарьхкотть пшкядсь омбоце трактористсь. — Сон вов хоть и таштоня, — няфтезе гимнастерканц, — а мон каннеса. Служай азоронцты...

— Минь председателеньке Чуйкин тя трактортьке кошардольхце работама, кда сон улель минцень.

— Ага! — перязе сонь Поргов. — Кда улель тинцень, эста работаль ба? А кда государствать, то ёрдамс? Тя кода шарьхкодема?

Сембе рахазевсть.

— Анасть, пади, мисы директорсь? — пеедезевсь Порговське.

— А мес? Деряй, кальдяв улель, кда милезь колхозти? — пшкядсь колмоце трактористсь. — Тон ванка эмтеэсть пирьфонц, мзяра тоса ёряф комбайнада. А максолезь ба колхозу, минь Чуйкиноньконди, сон, содасак, кода работафтольхцень?

— Максыть любовай председателенди, и нолдасыне тевс! — аделазе Бугров.

Поргов варжакстсь Шиндинать лангс. Кафцьке пеедезевсть.

Срхкасть тума. Машинав озамстост Шиндина путозе кавлалонза сумканянц и кармась петнемонза касанц, оду сялгондозень шпильканзон. Тя ёткова нинге сяда вяри кеподсь сонь стирень уряднай мяштец. Порговсь эрязста озась эсь вастозонза.

— Борис Константинович, — эсь потмова пеедезь, пшкядсь Шиндина, — тяни аряда няфтьса ялгазень — колхозонь председательть Сараевать. Стирсь — ай-да ну! Тридцатитысячница. Сонь колхозсонза электростанциясь коданга тевс аф нолдави. Лездат тейнек?

— А мезе тиевсь электростанциясост?

— Мон, кода эряви, аф содаса‚ — азозе Шиндинась. — Но кафтошка ков мучендайхть мархтонза, коданга аф нолдави.

— А мон вдь аф электрикан, — пшкядсь Порговсь, — кржа шарьхкодян ся тевса. А кодама электростанциясна?

Шиндинать вастс станциять колга кармась азондома шоферсь.

— Меленцязост синь тисть привод и путсть динамо-машина. А нолдамать аф нолдави. Эмтеэсонь электриконьке якась, но мезевок изь ти: наверна, аф пчкяй динамасна.

— А может, мольхтяма, ванцаськ? — эняльдсь Шиндинась. — Кона мезне стирь прясонза нльне авардсь Сараевась тя станцияснон сюнеда. Визькс тейнза. Ушедозе, а аф аделави.

Поргов изь атказав.

Кодак лиссть велеть эзда, Шиндинась тага шарфтсь Порговть ширес и лятьфтазень «Возрождения» колхозонь механизаторхнень:

— Кулить, мезе корхтайхть? Сонь панароц рдазу, а ужяль. Мик тейст тракторть, и эста кармай машинась работама. А тяни, няйсак, аф пчкяй. Тяфтапнень мархта коммунизмать строямац ламос таргави, пяк ламос, Борис Константинович.

Поргов рахазевсь.

— А Леховонтень мархта изь сав тейть корхтамс машинатнень мимаснон колга?

Райкомонь секретарсь шарьхкодсь, што Лехов кенерсь ни Порговтиге панжемс потмонц модать и машинатнень лангса фкя азорть колга, виденцясь:

— Корхнеме. Сон пеняцяй, мес модась и машинатне аф фкя азоронь кядьсот. Нльне ёрай сёрмадомс Москуву, Цекати. Тейтьке азондозе тянь? Ну мезе аньцек аф сай ся председателеньконь прязонза?

— А может, тяфта лучи улель? Кадк фкянь кадяла пуроми вийсь.