2

Васьфтезе сонь Митричсь: тяфта тяса мярьгондсть мастерскойнь заведующайти Кузнецовти. Тя ульсь аф сери, тюжя шяярь, средняй кизоса аля. Корхтаманц ашезе кельгонькшне, тонадсь тиемс сянь, мезе азыхть тейнза. Поргов шарьхкодезе, што Митричфтома тяса мезевок изь тиендев.

Митричть пингста тиф тя мастерскойсь, получафт и путнефт вастоваст тястонь сембе станокне. Кадондозень ня стенатнень аньцек войнань кизотнень пингста, мзярда эсь передвижной артиллерийскяй мастерскойнц мархта ётазень войнань сембе китнень. Ёфси Берлинть ала юмафтозе фкя сельмонц, и тяни конянц туркс сотф равжа соткс.

Кизефтьк эмтеэсса любовай ломанть, и кивок аф азсы, кода Митричть лемоц. Мярьгихть тейнза «Митрич» и сяка. А сяс, мзярда Поргов кизефтезе Митричть лемонц, ся якстерьгодсь и изь му, мезе отвечамс.

— Корхтан, кода лемце? — оду пшкядсь Порговсь.

Митричсь тага кафта шири шарфтозе прянц, бта ёрась кинь-бди кядьста кизефтемс эсь лемонц.

— Кузьма... Кузьма Дмитриевич, — меколи эрязста азозе и сонцьке нльне пеедезевсь. Порговтьке изь кирдев рахамац.

Мастерскойнь тефнень колга Кузнецовть басняц нюрьхкяняль:

— Работама... Мезе мярьгихть, сянь и тихтяма...

Порговсь азозе, кие сон и местема кучф.

— Тя пара, — Митричсь кенярдсь, што Поргов — инженер и сась Москуста, сельхозмашиностроениянь оцю заводста. Кенярдембачк нльне изь шарфта мяль сянь лангска, што инженерсь кучф синь работаснон проверяма, и оцю мяльса кармась азондома станциянь машинатнень работаснон колга.

— Апак петть комбайнада, маряк, нинге лама? — Поргов няфтсь мастерскойть фтала рядс латцеф машинатнень лангс.

— Комбайнада? Колмогемоньшка.

— Можнат ваномс?

— Ваномс? Можнат. — И сявозе мархтонза инженерть.

Финц комбайнатнень валхтфтольхть моторсна, омбонцнень ащесть ширеса хедерсна, а кой-конатнень нльне штадотольхть «ирдезсновок». Пцтай эрь машинать перьф шарондсть механизаторхт.

Поргов нежедсь фкять малас.

— Бойкин, — шумбракстомста азозе ся фамилиянц.

Цёрась ульсь аф сери, нинге кода эряви исть келем лафтунза, лангсонза военнай гимнастёрка. Поргов путозе чемоданнянц и озась Бойкинть каршес.

— Нинге ламос сави тя крандазть ваксса рязондомс? — кизефтезе комбайнерть.

Бойкин аф сразу отвечась. Сон васенда моцькяталхксса нардазень кядензон, ётафтозе начка коняванза ожанц, таргась сигарета и отвечась:

— Кизефнида лама, а лездомати киньге аф пезы шалхкоц.

— Кизефнемась, мон чаян, сяда тёждя лездомать коряс, — пеедезевсь инженерсь. — Мезе эряви машинацти? Сюлонза-пярмонза целайхть?

Бойкин шарьхкодсь‚ што Поргов — ломанць аф начальник‚ сяда смелкстомсь‚ крьвястезе сигаретанц, пухадсь и озась Порговть ваксс.

— Марнек ёрдамаль ни тя калада крандазсь, — машнезь пшкядсь комбайнерсь, но аф ламос ащемда меле отвечась кизефксти: — Аф сатнихть подборщикти ниле пружинат, вов и рязондан... А вдь сурхнень аф путсайть пружинатнень вастс? Но обидна ся: петемс аш мезьса, а директорсь сяконь содай: пани эсонк, штоба сяволеськ колхозу комбайнать, сводкац аш мезьса пяшкодемс...

Поргов кеподезень сельмонзон Митричть лангс. Ся шарьхкодезе инженерть, эстокиге отвечась:

— Частьт аш. А сурне моньге аф пчкяйхть пружинанди, — пеедезевсь сон. — Но комбайнать сявоманц колга приказть, маряк, максозе директорсь.

Митричсь кеподсь масторста синтьф пружина пе, няфтезе Порговти:

— Штукась аф кодама, а инксонза фалу пичедихть. Деряй, аф тиевихть тяфтапт эсь республикасонк?

Поргов сявозе Митричть кядьста пружина петь, ванозе сембе ширде.

— Конешна, тиевихть. Тязк, эсь мастерскойсонт можнат тиемс. Тинь ашеде тяряфне?

Бойкинць стясь вастстонза, пильгалонза шовазе сигарета петь, смелкстомсь Порговть ингольде:

— Пружинада ламоль складса, да сембонь максозь Чуйкинти. Ся машты мархтост корхтама. А мезе минь?..

Тя пингть инженерть и Митричть перьф пуромсть ляды механизаторневок.

— Ну, а тага мезе аф сатни комбайнатненди? — кизефтезе Поргов Митричть.

Механизаторхне варжакстсть фкя-фкянь лангс, учсть, мезе кармай корхтама Митричсь. Но изь кирде фкя таза цёра:

— Монь комбайнастон срадсь аккумуляторсь.

— Коли срадсь, ёрдак.

— А директорсь зиянть каязе ни лангозон...

Ти ёткова апак приметак нежедсь тага фкя ломань. Сон кундазень фталу кядензон и кулхцондсь, мезе корхтайхть механизаторхне. Сяльде нежедсь инженерть малас.

— Шумбрат, Поргов ялгась, — пшкядсь сон и кяденц максомста азозе: — Лехов‚ Илья Борисович.

Поргов шамас коре содазе Леховть. Тя самай ся тысячниксь, кода тейнза мярьгсь Колхозонь кудста дежурнайсь Зинась, но тись пря, бта мезевок изь сода. Да и Леховське тяни ульсь ёфсьи аф ся ломанць, конань васьфтезе Поргов седть песа. Ванць Лехов видеста, няемс, аф хитрай сон ломанць.

— Тейне-арам, минь няендеме мархтот? — кизефтезе сонь Поргов. — Седть песа тя тон улеть? Ну, ульхтяма знакомайхть.

Лехов визделгодсь, верса валовсь шамац.

— Значит, Москуста кучедязь? — ёразе куроконе полафтомс корхтамать.

Поргов дивандазевсь, коста Лехов семботь содасы сонь колганза? Кизефтезе:

— Тон, брат, кенереть ни куляксамс, киян мон?

— Зинась вдь минь велень... колхозницаньке. — И Лехов, кода кунардонь содаф ломань, эсь баснянзон мархта марнек занязе Порговть. Сон то азондсь, то сонць кизефнесь, а меколи ни панжезе потмонц, местеме эряскодсь тяза: — Тейне мярьгсть, што тон инженерат, а сяс эняльдян, ванк фкя комбайнаньконь моторонц. Кафта шит цёратне возсихть перьфканза, а тев аф лисенди.

Поргов изь кирде, малость ангордазе сонь:

— Ха, автобусса стирень усксема маштат, а тя аф петеви...

Комбайнерхне рахазевсть.

— А, деряй, кальдяв стирьхнень мархта арнемась? Тоза лама ёнь аф эряви, — шутендась Леховське. — Стирсь и панчфсь — фкат: касфнек мяльцень лангозост, мзярс панжихть.

— Виде, Илья Борисович. Тяйть макссе стирьхнень о6ижамс! — пшкядсь фкя комбайнерсь.

— А мес тонць тяшкава заботендат комбайнать колга? — рахсемда меле кизефтезе Поргов. — Улихть эмтеэсонь руководительхть, кадк синь прясна и сярядихть.

— Э-э, Борис Константинович, — ёфси полафтсь Лехов, — кда надиямс минь эмтеэсоньконь лангс — комбайнафтома лядат. Директорти мезе! Сонь прязонза пизем аф прай. Может, аф стане корхтан?

Аньцек тяни Поргов пильгста пряс ванозе Леховть. Сон пиджакфтома, парьциень тюжя панароц цебярьста гладендаф, равжа галстукоц педезь петьф мяштезонза. Леховть аккуратнайшиц пяк тусь Порговть мяльс. «Улема, аф кальдяв тя тысячниксь», — арьсесь эсь пачканза и ушедсь корхтама Леховть мархта аф моторть колга, а кизефтезе, костонь сон и мзяра пинге ни работай председателькс. Леховсь отвечась аф мяль вельде:

— Саранскяйста сань; сёксенда топоди киза, кода мольфнесайне районнай руководительхнень мяльснон, — и эстокиге шарфтозе тя корхтамать: — Борис Константинович, может, ванцак комбайнаньконь?

Поргов согласиндась.

— Митя, няфтьк! — кенярдембачк эряскофтозе Лехов комбайнерть.

— Мезе-бди моторонц мархта тиевсь, — азозе таза од цёрась и свозень сембонь комбайнанц ванома.

Порговсь каязе равжа кителенц, чемоданнястонза таргась апак модеряк комбинезон. Мзярс сон наряжакшнесь, механизаторхне ванондсть панжада чемоданти, кона пяшксель кодама-повсь инструментта. Поргов сявсь разводной ключ и кизефтезе Леховть:

— Значит, тя тонь тряйсь? — люкадезе прянц комбайнать шири.

— Кафцьке минь.

— А конац нинге?

— А ся, конань ваксста аньцек аердоме.

Поргов куцсь комбайнать лангс и кошардозе комбайнерть шарфтомс коленчатай валть, а сонць кармась проверямост свечатнень.

— Тя сембе проверяф, — шарфнема ёткова азозе Митя, — искрац ули.

Ванондома меле Поргов кошардозе валхтомс блокть головканц.

Митянь хоть и мольсь ни мялец сталмотнень кепсемаснон эзда, но Порговти ашезь карма перечендама. Тердезе Бойкинть, и кярьмодсть гайкатнень ораткшнема.

Митричсь, кода няевсь, моторть инкса лувозе эсь прянц виноватокс, кармась азондома, мзярда сонь петезь и кода проверяфоль, и тяка ёткть пеняцясь, што целай киза ни эмтеэсса аш главнай инженер:

— Кучсесть Рузаевкаста фкя од цёра; цебярьста кярьмотькшнесь тевти, но исть ладя директорть мархта, савсь тумс сянди. А мон, деряй, кенерян сембе вастова?

Поргов токазе Митричть лафтути:

— Арядовака ванцаськ эмтеэсонь «калмолангть...»

Мастерскойнь заведующайсь эстокиге шарьхкодсь, кодама «калмолангонь» колга корхтай инженерсь, и сявозе тапаф и сире машинатнень ванома. Мархтост тусь Леховське.

Палакснень потмоса ащесь тракторонь оцю прицеп, фкя петьколенц эса ульсь шары, а омбоцесь пезфоль модати. Аф ламняда сяда ичкозе няевсь рассадань озафнема машина, конань лангста нинге изь валга заводонь сенем краскась, но кшнинь частьтне кенерсть ни тавадовомс шямоньца. Тянь ваксса валяндась тракторнай копнитель, кона тожа заводста ускомдонза меле изь няенде пакся. Тязк жа кода-повсь ёряфтольхть всякай шарыхть, рамат и нинге кодама-бди кшнит, конат киндинге исть содав, кодама машинастоннельхть.

Лехов васенцеда няезе тя «калмоть», а сяс и ванондсь тянь лангс седиень палозь. Но нинге сяда пяк торхцадсь седиец, мзярда синь пачкодсть синнеф тракторхненди: фкясь — шарыфтома, омбоцесь — моторфтома, колмоцесь — радиаторфтома. Сембонь эса валонды пиземсь, сивонди шямонць.

— А нинге коса улихть синнеф-тапаф машинат?

— Аряда, няфтьсайне, — виздезь отвечась мастерскойнь заведующайсь.

Пирьфть тона песа кепотьф прят ащесть сложнай молотилкат, ташта комбайнат, конат бта пеняцясть, мес рана синь ёрдазь тевста. Няевсть нинге кодама-бди синнеф машинат, но тоза Поргов и Лехов ашесть кенерь молемс: Митричть инкса сась мастерскойста ломань, и синь мрдасть меки.

Лехов васенда мольсь апак каштортт, а мзярда аердсь эздост Митричсь, кяжвельде пшкядсь:

— Вов тя «калмотнень» колга тейть, Борис Константинович, эряви пачфтемс куля Москуву.

— Москусь содасы ни, — спакойна отвечась Поргов.

— А то вдь тястонь директорсь стама трали-валихть тиенди...

— Кодапт?

— Мезе кельги, сянь и тии моданьконь лангса. — И няемок, што Поргов ёрасы содамс тя «азорондамать», кармась азондома лац-ряц: — Ня шитнень минь колхозсонк цють ашезь тргада фкя сире колхозник мархта, фкя-фкянь сивос кунцесть. А лиссь сембе шумсь сяс, мес директорсь кошардозень трактористтнень, штоба сят двоендалезь лов алу сокафть. Корхтай, тяфта ульсь арьсеф планца. А фкя колхозник — сире Бугровсь, Митя комбайнерть атяц, корхтай: «Аф эряви двоендамс: тундась коське, эряви аньцек ётамс культиваторса». Директорти эряви пяшкодемс планоц, а атясь корхтай, кадсамасть вачеда. Ну и кярьмодсть фкя фкянь мяштьс.

— Ну и мезе?

— Атять видец ульсь. Тевсь пачкодсь райкому, районцта кучсть кафта агронопт, и сят азозь, што двоендамась косьфтасы модать.

Поргов и Лехов пачкодсть мастерскойть ваксс, озасть калада сеялка лангс и нинге ламос корхнесть паксянь тефнень колга.

— Ванат, кода моли тевсь, — панжадонь седихть азондсь Лехов, — эмтеэссь сонць азорондай модать лангса, а колхозсь — сонць. Фкясь корхтай: «Мон азоран сяс, мес моннет машинатне». А омбоцесь мярьги: «Монь модась». А коса кафта азорхт, тоса кафта мяльхть, шарьхкодьсак тянь?

Поргов изь отвеча. Сон кодама-бди пролоп песа каразень кяме прянзон и эсь пачканза арьсесь Леховть валонзон колга: «Модать лангса кафта азорхт... Кафта мяльхть»...

— Может, мон аф стане корхтан? — сязезень арьсеманзон Лехов. — Но, тейне-арам, эряви ладняс ваномс эмтеэснень работаснон. А вдь тон как раз тянкса и кучфат.

— А кода тон арьселить ба тя тевть? — кизефтезе Поргов.

— Мон?..

Лехов тожа изь эряскода отвечама. Поргов шарьхкодсь, што председательть прясонза кодама-бди оцю план, но аф смендай азомс.

— Корхтак, корхтак, тяйть ниленде валхнень, — мзолгодсь Поргов.

— А тейне аш мезенди нилендемс, — тяни сяда смелкстомсь Лехов. — Тянь колга нльне ёрань тяштемс Цекав, но тейне Салмов мярьгсь тяфта: «Пряда вельф пилетне аф касондыхть». А вдь пара улель, кда сембе машинатнень максомс колхосненди, а? Кадк эста ськамонза колхозсь и азорондай модать лангса: сокасы и видесы. Может, зря корхтан?

Поргов стаки ванць кяме прянзон лангс. Сонь прязонза исть тяльгонде Леховть валонза. Васенцеда пилезонза пачкодсть тяфтама валхт-мяльхть машинно-тракторнай станциятнень колга. «Сембе машинатнень максомс колхосненди»... Тянь Порговсь эсь пачканза азозе, и сельминголенза арась палакснень потмоста ёрдаф од копнительсь. «А ёрдалезь ли тяфта колхозса? — арьсезень сон, и мянь сецикуцюнязонза токась сярятьфсь сембе ёряф машинатнень инкса. — Конашка парши юмси-арси! А вдь муволь васта ня машинатненди колхозса». Поргов варжакстсь Леховть лангс и пшкядсь:

— А, может, и видеце. Ёрать тянь колга тяштемс, а мес ина? Эводеть? Монь койсон, тяштемс эряволь ба кунаркиге. Партиять пиленза и сельмонза — тя минь сембе народоньке. И кда тон аф кармат сёрмадома, омбоцесь, колмоцесь‚ эста мезе лиси?

— А мон тяштян! Кадк мисазь колхосненди машинатнень.

Тя пингть гаражть фталда лиссь Бойкин. Сон вешендсь эсост.

— Головкать валхтоськ! — бта рапорт макссь Порговти.

— Ну и мезе муде? — пеедезевсь Поргов.

— Митричсь кандсь ни од прокладка, головкати повондсь ведь, нльне цилиндратне шямониясть.

— Вольна! — пеедезевсь Поргов.

Комбайнерсь шарьхкодсь, мес пеедсь Поргов, кундазень кядензон фталу.

— Значит, мувсь туфталсь? — кенярдезь кизефтезе Лехов, и, токамок механизаторть лафтути, поладозе: — Архт, Андрей, минь курок мольхтяма тейнть.

Бойкин военнайкс шаркстсь крутаста и тусь ласькозь.

— Пара цёрась, — мельганза няфтсь Лехов. — Тя ськамонза вете паксят урядай.

... <здесь конец главы, находится на стр. 15—18 которые потерялись из библиотечной книги>