1

Кемоньшка киза Поргов ашель Мордовияса. А тяни кучф сон Сире ошу. Кинь кувалмос ардомста апак лотксек ванць автобусонь вальмава и кенярькшнесь седиец, няемок мокшень велетнень, тундань сянгярьготф паксятнень и вирьхнень. И хотя сякотольхть китне, конатнень эзга яксесь инголе, исть полафта ляйхне, паксять келес якасть тейнза содаф сяка жа машинатне, кить кувалмова лама вастова ингольцекс жа каргокс — фкя-фкянь мельге таргавсть модамарень путыхне, но Порговти сембось тяса аф содамшка полафтсь. Ошса эрямда меле вирьхне няевсть сяда оцюста и мазыста, паксятне — кувакаста и келиста, то тяса, то тоса карксафтольхть вирень сянгяря карксса.

Тя кизонда аф тунданнекс пидесь шись. Автобусса опаналь кожфсь, а машинась изь эряскода: стакаста мольсь шувару киге. Малаткшнесь Мокша ляйсь, аделсевсь стака кись.

Автобуссь лоткась Мокшеть туркс тиф седть пес. Поргов валгсь сембода инголи и тёждяста-тёждяста таргазе ваймонц ару кожфса, ламос ванондсь ляйть кувалмова. Вдь нинге шабакс пингстонза кулендсь Мокшеть колга кувака ёфкст и мазы морот. Сяс, маряк, соньге Мокшесь васьфтезе весяласта: васенда ливозю конязонза яфодсь кельме кожфкя, а тоса, бта конаконь кельги щака, панжада седихть тердсь эсонза ару веденцты. Эшеляйда пяшксель, а сембода ламоль шабада. Пайгонякс циннясть синь вайгяльсна. Яксяргокс эрекста чёпафнесть, фкя-фкянь валондсть ведьса. Тя пульхкомать эзда ляйть вельхксса хрустальнай паморьксокс цифтордсть ведень путерьксне.

Кенярдсть лямбе ведти оцюфневок. Синь уендсть, чёпафнесть и рахасть. Ламосна мадонфтольхть ни лямбе шуварть лангс.

Поргов кайсезень щамонзон и эрязста сувась ведти. Уемок шабатнень ёткова, сон лятьфтазе эсь идькс пингонц, мзярда тяфта жа эшелякшнесь Парьхце ляйса, конань беряксонза шачсь и касозе серенц. Эшелямда меле сон озась седть пес и кельгондезе тястонь природать. Ляйть фкя берякованза, панда шамать эзга, таргавсть Сире ошть кичкор и тяйня ульцянза, саттнень потмоста цють няевсть кудбрятне, панда алдонь перетне.

Ичкози таргавсть ляйть омбокса ровнай лугатне, а синь песост сенемаза стенакс няевсь вирсь.

Порговть малас нежедсь велень ава, валхтозе лафту лангстонза кептернянц и аф смендазь пшкядсь:

— Рамак пуштф шинжарманят.

Поргов рамась шинжаромат и аньцек кенерсь урядамс шинжароманзон, седть пес нежедсь ёмла автобускя, конань эзда лиссть колма алят и сисемшка стирь. Алятне кармасть эшеляма, а стирьхне локстикс недявсть берякть кувалмос шамаснон штама.

Аф лама пингта меле автобусстонь ломаттне кармасть срхкама. Стясь шинжаромань мишендиське. Но ёфси нярялонза сёлговсь автобусонь кенкшкясь. Авась кумбаравкс педсь машинати, кармась эняльдема и юватькшнема, што сонга колхозница и сембонь лаца улихть праванза арнемс колхозонь автобусса. Но каршезонза кивок изь отвеча.

Мзярда автобуссь срхкась тума, Порговти ужялькс арась авась; арась машинать каршес:

— Озафтость ломанть, месть рахсетяда лангсонза?

Порговть каршес лиссь шоферсь. Тейнза ульсь колмогемонь ветиешка киза, Порговть лаца жа средняй сереса, кядьсонза кедень крагат, урядафста ащесть кудряв шяяренза.

— Эй, аля, — пшкядсь шоферсь эчке трванзон пачк, — аердт, а то машинась тапатанза! — и лоткафтозень сельмонзон Порговть щекастонза шрамть лангс, кона якстерь китьксокс таргаф сельме ужестонза сявомок, аф ламос арьсесь и поладозе: — Няйсак? — кядьса няфтсь машинать бокста досканять лангс, коза тяштьфоль колхозть лемоц. — Шарьхкодить, кинь автобуссь? А колхозсь усксесыне сятнень, кие цебярьста работай. Пади, аф стане корхтан?

Порговсь сразу изь му, мезе отвечамс. А авась сяда смелкстомсь:

— Илья Борисович, мес апрякат эсон? Кинь кодама тевоц, кода трясайне шабанень? Коста ина аляфтома сатови тейне трешник? — и пчкоргодсть сельмоведенза.

— Тейне тяйть няфне сельмоветтнень, — кяжияста ювадсь шоферсь, — кли трешникт добуват, пантт антобусть инкса.

Автобусстонь ломаттне сетьмоста ванцть Порговть лангс: кивок ашезе сода, кие сон.

— На, пандк кицень‚ кадк озай седиец! — кяжиясь Порговське. Сон трагась ярмак и венептезе авати.

Авась абондсь, ашезе сода, мезе тиемс, якафтозень мековасу сельмонзон: то Порговть, то ярмакть лангс, руця песа нарнезе шаманц.

— На, сявить! — оду пшкядсь Поргов.

Авась аф смендазь сявозень ярмакнень. А шоферсь лоткась спорямда, озась вастозонза и пшкядсь:

— Сувак ина!

Вальмава варжакстсь стирь. Сонь туста равжа сельмоширьхконзон алда лаймарькс пиндолдсть сельмонза, крута улоц и аф ламняда кепотьф шалхкоц пяк ладясть круглай шаманцты. Якстерь и сенем ожнаста недяф крганяц мазепнезе нюрьхкяня сялдазонц. Стирсь варжакстсь Порговть лангс и бта пидезе сонь эсь мазышисонза. Поргов комафтозе прянц.

— Лена, тердьк кяжи цёрать конакокс! — рахазевсь омбоце стирсь.

Ленась саворне пеедезевсь, и крьвязсть мазы загакс ащи щекапрянза. А кодак дуборгодсь машинать мотороць, сон весяласта ювадсь:

— Аде, щеняй, мархтонк, Карга вели сяфтядязь!..

— Ха-ха-ха! Озак, озак, щеняй!

Стирьхне нинге мезе-бди юватькшнесть, но срхкась машинась, и дуборфсь пандозень синь вайгяльснон.

Поргов куцсь панда пряти и нинге весть варжакстсь автобусть мельге, кона сенем покольнякс шарсь лугатнень ланга мянцеви кить эзга.

Колхозниконь кудсь ульсь тязк. Сонь котоцьке валманза ванцть ляйть ширес. Аньцек строяф пичень кудть шамастонь досканзонды равжа краскаса тяштьфоль: «1954 кизоня».

Кенкш лангса Порговть васьфтезе ёфси од стирь — дежурнайсь. Сон нардазень кургонц перьф петфнеф канцёр кеттнень и азозе, што вастт аш. Поргов таргазе командировочнай удостоверениянц, путозе шрать лангс. Каготть лангс дежурнайсь варжакстсь туркс сельмот, но кодак нязе, што Порговсь кучф Москуста, пшкядсь:

— Ламос саде? — и изь карма ответонь учема, сидеста поладозе: — Афи содаса, мезе мархтот тиемс?

— Мезе кельк. Чяй, капстанди аф тапасамак, парьс аф салыяфтсамак? — пеедезевсь Поргов.

Весялгодсь стирське. Сон таргась шраста книга и кизефтезе, кода Порговть фамилияц и лемоц, хоть и тя ульсь тяштьф удостоверенияса.

Тяштема ёткова дежурнайсь аф весть кепсезе прянц и кфчиезень тяйня, оржа сельмонянзон Порговть рубецю щёканц лангс. Меле вятезе Порговть фталдонь комнатати, няфтсь кровать:

— Тяса удось гербовщик, кафта недялянкса анокс пандозе питнеть и тусь велетнень ланга.

«Гербовщик» валть кулемста Порговсь шарьхкодезе, што дежурнайсь — мокшень стирня. Шинь пидеф, нинге пуворксу кяденза няфнезь, што сон аф кунара озаф тя шрать ваксс.

— Мезень шта тешкат тиендсть миннетне седть песа? — тага лочазь лочазень валхнень дежурнайсь. — Няить мазы Ленаньконь? Велеса сембе од цёратнень косьфтазень. — Сон корхтась сяшкава сидеста, што кивгоркс ашкотф трванза бта афн токсесть фкя-фкянди.

Порговсь шарьхкодсь, што тя стирть эзда салава шеерга аф цильнязеви. Кизефтезе:

— Ленась тинь велень?

— Минь.

— А тонь кода лемце?

— Зина.

— А аляцень?

— А мезенди тя? Велеса отчествас коре аф корхнихть: Зина и сяка!

— Маряк, кеме колхозонте, Зина, кли ули автобусонте? — ёфси ялгакс кизефтезе Поргов.

— Каймоц да ваймоц — вов сембе козяшиц. Зато председателеньке, няить, кодама? Или аф сонць шоферондась?

Поргов азондозе, кие вятезь машинать.

— Ой, тя самай сонць,— пайгонякс циннясь Зинать рахафоц. — Заводста кучф, тысячник.

Порговсь аньцек люкштядезе прянц, бта пидевсь Зинать валонзон эзда. Сонцьке ашезе шарьхкоде: кати кяжиясь, кати обжавсь колхозонь председательть инкса. Сяда лама корхтамонга изь карма, тяни марязе ки лангонь сизефшинц, ёрась куроконе мадомс ваймама. Кодак Зинась кадозе ськамонза, Поргов велясь кроватти.

Тяни озась седиец, што пачкодсь вастозонза, и арьсесь, мезьста ушедомс МТС-ть тевонзон ванондомасна. Лядьсть мялезонза обкомонь васенце секретарть Кочуринть валонза, кона сонь мархтонза корхнемста эняльдсь аф аньцек проверямс МТС-ть работанц, но и лездомс.

Поргов ашезь матодов. Стясь и тусь партиянь райкому, штоба азомс, местема сон тяза кучф.

Райкомса кивок ашель. Дежурнайсь азозе, што сембе работникне срадсть колхоснень ланга и мянь вандыс киньге аф муй. Штоба аф юмафнемс пингть, Поргов сявозе аф оцю чемоданнянц, конань мархта изь явонда заводсовок, и тусь МТС-нь мастерской.