5

Ужинть срхкафтозь Бугровть квартирасонза Сараева пяк кеняртьфоль, сяс, маряк эсь лангозонза и сявозе шяняфксонь пуштоматьке. Наряжаф тяни сон лиякс: платьянц лангс сотф кружева акша фартуконя, прясонза панчфу руцяня, пильгсонза танкеткат. Сон лама корхтась, пеетькшнесь. Поргов, меколанкт, вятезе прянц стане, бта сонь афи няйсы: корхнесь алятнень мархта. И аньцек ётконь-шовор кепсезень сельмонзон весяла председательть лангс.

Азоравась, конань ширеса эряй Бугров‚ крьвястсь керосинавай лампа и кармась сингорямост алятнень:

— Шяняфкста ярхцамкста сяда ладяль ба электричествась.

— Пади, нолдасаськ? — кизефтезе Бугровть трактористсь.

— Аф эряви‚ — кардазе Бугров. — Ладняс эряви ваномс проводкась, а то марнек велеть плхтасаськ.

Кие-бди чакась вальмяти. Сараева аерфтозе занавескать, кармась ванондома ульцяв: кивок изь няев. И аньцек Сараева путозень шяняфкснень шрать лангс, вальмяти чакасть омбоцеда. Бугровть мархта Сараевась лиссть ушу.

Азоравась бохарямста кандсь кукшень боза. Аф лама пингонь ётазь сувасть Бугров и Сараевась. Кие чакась вальмяти — ашезь аза. Сараева эряскофтозень конакнень ярхцама. Порговда башка колмоцьке алятне варжакснесть фкя-фкянь лангс и пеедсть. Сараевась тожа мес-бди мзолдсь. Тоса тошказе азоравать, и ся аф пелезь, аф видезь лихтсь пяле литра вина.

— Тя мезенкса? Пожаронь тиеманкса, што ли? — шутендась Поргов. Алятне рахазевсть. Бугров каязе винать ниле стаканга.

Нльне эводсъ Сараевась, мзярда Поргов шашфтозе ингольденза стаканть и азсь спасиба. Алятне тожа абондсть, кармась эняльдема. штоба симоль сон хоть фкя рюмканя. Но Поргов виде ваймоса мярьгсь:

— Монь лангозон, ялгат, тяда вана: винада мон аф симондян. А кружка боза каяда тейне. Кунара ни ашине варчсе мокшень бозать.

Сараева путсь инголенза кружка боза: шову, туста. Поргов симозе бозать и шназе:

— Вельф цебярь!

Кенкшти апак стукак сувась сери цёра — тюжя вильветкаса, туста равжа сельмоширьхконзон алда ёндолкс налхксть сельмонза. Сон ётась шрать малас и сембонь мархта шумбракстсь кядень максозь. Порговть мархта шумбракстомста азозе лемонц:

— Каргин, Николай Иванович, трактористан, работан ня цёратнень мархта. Тонь жа содате: инженерат, сать Москуста.

Сараева толомсь. Бугров эстокиге кармась корхтама Каргинти, штоба ся туль тяста.

— Галина Васильевна‚ — шарфтсь Каргин Сараевати, — тон эводеть самазень эзда? Мон содаса, што колайне тинь мирнай компаниянтень. Но цыц! Тяда пель Каргинть эзда. Сон эсь тевонц содасы. А сань сей аф тюрема-сялондома, а эсь виназень мархта, — и таргась зепстонза бутылка.

Няевсь, што Каргин пяк симф, да и сонцьке тянь ашезе кяшенде:

— Тячи комлянь... но цыц! Тямасть сюце, пяк ни стака седиезон, — и эрьхтезе мяштенц клокса.— Тон, инженер, содасак, мезе стамсь обидась? — кизефтезе Порговть и сонць отвечась: — Тянь содаса аньцек мон... Тинь, ялгат, монь простиндамасть, но нон сань...

Бугров лоткафтозе сонь:

— Местема сей эрьгаскодоть, Николай? Мес ашить полафта напарникцень? Мезень тяфта праздникце?

— Кие мярьгсь праздникозе? Горязе! Оцю горязе! А напарникть колга тон тят толкава, тя тевсь минь. Может, мон тяда меле вете суткат карман работама, шинек-венек. Содасак тянь? Мон содате тонь, Алексей, тонцень седисотка ризф, стане вдь?

Вастстонза стясь трактористсь, кяжде тозердазе ирецта ялганц лафтуда:

— Коля, симоть и суск кяльцень!

— А тон симдеймать? Пади, мон эсь горязень эса симондян?.. А тонь, инженер ялгась‚ — меки шарфтсь Порговти — учихть эсот Карга велеса... А кие учи, тянь тонць содасак. — Каргин мчкорфтозень пейнзон, озась скомнять пес, нежедезень кенерьбакарензон шрати и аварьгодсь.

Поргов апак каштортт стясь вастстонза. Бугров уркстозе Каргинть:

— Лоткак фокусничендамда! Кулить, мезе мярьгонь? Архт куду и матт!

— Мон туян, аньцек тон, инженер ялгась, тямак обжа. Тейне вдь сембонь азондозь Карга велеса, кие и кода тонь тердензе тоза инжикс...

Поргов шарьхкодсь, што Каргин корхтай ся Ленань колга, конань няезе Леховть автобусса. Сяс и пеедезевсь, весяласта мярьгсь:

— Тон шабат, што ли? Визделеть ба‚ мезе аф эряви корхтамацень.

Сараева, кода катоня, стяфтозень пилензон, кулхцондсь Каргинть эса и апак лотксек варжакснесь Порговть шири.

Каргинть лангс тага ювадсь Бугров. Ся стясь вастстонза, яфодезе кяденц и тятярдезь лиссь кудста.

— Пяк оцю воля максоть тейст, — кяжвельде пшкядсь Бугровти Сараева, а меле кармась кизефнемонза Порговть, коста сонь содасы Каргин.

Поргов сонць кармась рахсема:

— Ванан, ванан, тинь сембе трактористонте — Онегитт да Ленскяйхть, анокт фкя-фкянь каршес лисемс дуэльс.

Трактористти тя арась чуднойкс, рахазевсь. Сон, кода якстерь кумбря, нежедсь Порговти и кармась азондома бригадаста эрь трактористть колга, кие кодама стирь кельги. Бугров васенда пеедсь, а меле кардазе сянь корхтамда.

— Месть тон? — трактористсь тись пря обжафокс. — Тонь колгат вдь аф азондан!

— Ну и лоткак, кли мярьгсть! — кяжиясь и нльне якстерьгодсть Бугровське.

Ся лоткась корхтамда, ашкодсть мельникть мархта цигаркат и срхкасть тума. Стясь вастстонза Порговське.

— Ну, кода тяни району прважасамасть? — кизефтезень сон азорхнень. — А то монь азоравазе, Зинаида Васильевнась, сюцесамань ламос юмсеманкса.

— Зинать эзда тят пеле, — эстокиге пшкядсь мельниксь. — Сон минь раднякс, чяй, Галина Васильевнать сазороц.

Поргов меразе сельмоса Сараевать, бта васенцеда няезе.

Сембе кармасть Порговть корхтамонза, штоба афоль ту ве лангс, шобдава висазь сонь машинаса. Поргов согласиндась. Азоравась матозе сонь Бугровть мархта кудонголи.

Шобдава Бугров сргозсь рана, но пельсь, каба афоль сргозь Порговське. Сяс ламос ащесь кунф, арьсекшнезе эсь эряфонц.

Шинь стяма ёткова тяза ласьксь Бугровть помощникоц — Гурьянов и нинге куцемать песа ювадсь:

— Алексей Семенович, кудсат, што ли?

Бугров и Поргов кеподезь пряснон. Бригадирсь эрязста щазень рабочей брюканзон и кяпе лиссь помощниконц каршес.

— Беда, Алексей Семенович‚ — кашкомф вайгяльса пшкядсь ся, кодак панжезе Бугров кудонголь кенкшкять‚ — Каргинть мархта зиян тиевсь...

— Мезе тага?

— Веньберьф сокась, а варьхмодема ёткова моторть блокоц сязевсь.

Бугровть нльне пидевсь седиец, марнек акшемсь и ашезе сода, мезе азомс.

— Эмтеэсу звонямс? — кизефтезе помощникоц.

— Звоняк и куроконе ласьк тракторти, мон содаса, кода сокась... Ну архт, и учемасть тоса.

Ся тусь ласькозь, а Бугров сувась кудонголи, сембонь азондозе Порговти и кизефтезе:

— Району ётамста, пади, ванцаськ, мезе тись Каргин?

Кодак ётазь плотинать, Бугров шарфтозе машинать кержи шири, вирнять вакска. Тяста ушедсь одс сокаф парина паксясь. Бугров и Поргов маладсть колеснай тракторти, кона, бта лисьф потмот, ащесь боразданц лангса, алдонза модась валф автолса. Машинать ваксса, кода кулофонь вельхксса, каршек ащесть Каргин и алняня, таза цёра — бригадирть помощникоц Гурьянов. Каргинть лаца соньге акшель шамац. Синь, кола судса, учсть приговор Порговть и Бугровть ширде.

Апак каштортт Бугров варжакстсь блокть бокста варяти. Поргов кармась кизефнемонза Каргинть, кода тиевсь авариясь. Каргин виздсь Порговть эзда илядень «геройксшинц» инкса. Сон корхтась ноласта, пелезь Поргов ванозе тракторть и азозе, што сави калафнемс моторсь.

Бригадирнек-помощниконек кярьмодсть Каргинти лездома. Поргов сонцьке изь кирде: сявсь ключ, кармась ораткшнема гайкат.

— Минь минць сембонь тисаськ, Борис Константинович, — пшкядсь Бугров.

— Тят вадендев, — кардазе бригадирть помощникоцка.

Аньцек Каргин работась комадонь прят, нльне пельсь васедемс инженерть сельмованфонц мархта. Палсь сонь потмоц, содазе, што аф лац сон тись исяк, Бугровть квартираса. Кода электричестваса сонь тозерязь, кда кие мезевок кизефнесь кядьстонза.

— Кунара моторсь панчсефоль? — Поргов кизефтезе Бугровть, мзярда нолдазь картерть эзда автолть.

— Ковшка, кода лиссь капитальнай ремонста, — эряскодсь азомс Каргин.

— Коса тиезь ремонтть?

— Эмтеэсса, миньфтемонк, эста сокаме ни‚ — отвечась бригадирсь.

Столбань серес кепотьф шись пидесь аф кирдемшка. Колмоцьке ливоськодомозост работасть тракторть перьф. Аньцек вирть ширде шуроста яфотьф тундань ару кожфкясь эшеньфнезень копорьснон, петнезень мяльснон.

Поргов мярьгсь Бугровти, штоба моторть калафнемста ладняс ванолезь, мезе тиевсь шатунть мархта, кона сязезе блокть, и сонь станяк — шпильканек, гайканек сяволезь ба эмтеэсу, пачфтелезь Митричти.