| Макар Евсеич // сборник Монь вайгелем; автор: Илька Морыця; 1931, май. | Мордовская библиотека |
| Книга: Илья Кривошеев. Монь вайгелем: Морот 1924—1934. — Саранск: МордГИЗ, 1935. — с. 28—29 | |
| << Мирэнь мирэсь одыяты << | >> Наянна >> |
|
Марявлить!?.. А марят... Седейзэнь токатотсь, Пси кев прок марятотсь Кандома кулясь — „Макар Евсеич кулось”... * * * Малиновой чи. Руця ни касы. Цеця-нарт луга мазый моросо Тапарды валот; а синьди корот... Ламонь улькст ёвтыть эрзядо трудот. Ведьбайге були гайги балясо, Пиже вирь чии пиже палясо, Тонь кувалт, дедай, моронть мораса; Тонь кувалт, покштяй, седейс марявтса. Остаткинеде маринь вайгелеть, Остаткинеде кортынь икелеть, Чи валгомат самс кирдить ве думне, Мадема чить пес пурныть толгине: Кодамо узор вель—велинева, Кодамо чамо сон кудынева Ашти-чи каи эрзянь кельнева, Керькс-наряд саи мокшонь пелева. Ламо тол парго кирди вал-пизэть, Конань тон пурныть сизьгемень кизэть; Ламо сэльть молить инь-сурбунасо, Вал-лувот перька сядо срунасо. А кишти моро пильгень каямсо, Сон моры, нудей, потмо горясо... Остаткань пелеть тонь вастытинь мон Саранской ошсо советэнь промкссонть, Тон ульнить сестэ тыща нарядсо, Конань невтить тон эрзянь велестэ, Конань кандыть тон мокшонь пизэстэ Конань аравтыть мастор келесэ... Эзь келев пингеть кавтоне иес... Тон келеть-валот брудяволь велес... Ведьбайге були гайги баллясо, Пиже вирь чии пиже палясо... Тон теветь-валот эрзя марясы. | |
|
| << Мирэнь мирэсь одыяты << | >> Наянна >> |
| Сборник Монь вайгелем; автор: Илька Морыця; 1935. | |