| Сыре пиче, автор: Наумов Т. // сборник Васень сятк, 1929. | Мордовская библиотека |
| Книга: Васень сятк. Эрзянь морот ды ёвтнимат. Пурнынзе А. Дуняшин. — СССР-энь Наротнэнь Центрань Издательствась, Москов, 1929. — с. 183—186 | |
| << Янксимат (М. Янина) << | >> Сивсь сыре нежесь (Ф. Чесноков) >> |
|
Т. НАУМОВ
СЫРЕ ПИЧЕ Чикор-р! тейни сыре пичесь, Пуви варма кельме ёндо. Сыре пиче! Нупонь ланксот, Цецят, тикшеть Тондеть оргоцть. Аштят ськамот Виренть ютксо, Виренть ютксо Пандо прясо. Тарадонзо кирьмавсть, меньдявсть. Ташто судзо порксневсь-сезневсь. Сыре пиче, Од килейтне Ашо киськест Тондеть кекшить, Аштить вейсэ, Пейдезь касыть, Пандо прясо. Ламо кизэть, ламо телеть Ютасть мейльсек сыре пряват. Сыре пиче, Ламо неить Тон эрямсто Знярс мендявкшныть Виев вармас. Ламо ломать Моргот алга Ютасть капшазь. Зняро кизэть, зняро телеть Ванат тестэ — пандо прясто? Сыре пиче, Неявсть тестэ Ласте ломать Ружья марто, Паньсть эрзятнень, Чавсть мокшотнень. Толсо лемдясть Эйсэст попнэ. Соракадыть, сире виевкс, Пандо прясо, вирь пулосо. Сыре пиче, Верьгиз лацо Вачо ломать, Керязь ават Эйкакш марто Верь сельвецэ Рангозь кулость. Юрцто панизь Крёстонь кисэ. Ламо пряват ёндол марто Пурьгине-пельть лайшезь ютасть Сыре пиче, Неить тестэ Кода боярт Эрзянь веренть Потясть-костясть. Роботасо Чинек-венек Нарьгазь, чавозь Эрзят эрясть. Чопуда венть пензэ валське, Лиси чизэ панезь машцы. Сыре пиче, Неявсь тестэ Пандо прясто Кода капшазь Оргоцть боярт. Кода моданть, Кода виренть Эсь кирьдизэс Саизь эрзят. Лембе вармась тонть лукусты, Сыре пряват валашкавлезь. Сыре пиче, Неень ломать Тестэ неят, Раказь-пейдезь Роботасо. Коллективсэ Моро марто Тевтне молить Одонь койсэ. Потмот наксаць, сыре эрявкс, Варма сырьгась, прыть, тарадов. Сыре пиче, Од килейтне, Од тейтерьтне Тонть таркасо, Ашо киськеть Пейдезь касыть, Тонть таркасо, Сыре пиче. ★
|
| << Янксимат (М. Янина) << | >> Сивсь сыре нежесь (Ф. Чесноков) >> |
| «Сыре пиче», автор: Наумов Т. // сборник Васень сятк. Эрзянь морот ды ёвтнимат. — 1929. | |