СИВСЬ СЫРЕ НЕЖЕСЬ ^*)

Валськень чизэ пейдезь варштась Кузьм-атянь вальмава. Эзь пейдезевть ансяк сонсь Кузьм-атя, мадезь масторо. Алонзо чавонь пулт ацазьть. Груша тейтерезэ чевтень кис ацынзе. Тусь таго Груша — аютко, сиведезь эри Бука Стёпань кецэ.

Терявтнесь Кузьм-атя стямо, эзь кепедевть рунгозо — исеньде стакалгаць. Ванькс ой лацо лепштявсть сельмстэнзэ кавто сельветь, кеверсть кснавкс сакалозонзо — кершавсть. Мазый сэнь толнэкс кармасть паломо чи валдонть каршо.

Совась Микит-атя. Кода нужась а муськи Микит-атянь, сон яла пейди. Нужаськак лиясто пейдезеви, ансяк аламот.

— А изьняват яла куломантень? — эзь кенерьть совамо, пейди Микит-атя.

— Тарнан яла... а максан пря, — лаци эсь прянзо Кузьм-атя. Сонсь ёжонзо беряньстэ марясы. А эжить кодаяк пильгензэ. Васня пильге лапкатне яла, кельмезь аштесть, ней кельмесь верев куземе кармась.

— Кинень зняро паро-чинть кацак? — таго пейди Микит-атя.

— Эх, цёркай, мон паро-чинть кувалт пек эзинь жадаяяк, — радувась Кузьма-атя кортамо. Адя яла сельме икеле ломань неяви, сэретьксэськак истя а маряви. — Весе паро-чим ульнесь шумбра-чисэ. Весе пиньгень печтия роботазь. Роботась — весе паро-чим ульнесь... Ней вана ансяк кальдявт тевтне.

Эзь аште кувать Микит-атя — аютко. Эзь карма кирьдиманзо Кузьм-атяяк. Сонсинзэяк шумбра-чисэ истя аволик кирть.

Обеттэ мейле седеяк кальдявгаць Кузьм-атя. Новольсть сёлнонзо. Келеськак икелень коряс а велявтневи. Кельмесь яла кузи верев.

— Эх, Кузьма, эрявсь, эрямот! — корты эсьтензэ чаво кудосо Кузьм-атя.

— Иля ризна, эщо стятано! — лаци эсь прянзо эйсэ. — Минь эщо эрятано...

Совась Ига-баба содавтомонзо. Серьгець ават. Кузьм-атянь кепедизь эзем пряс. Пек амельсэ тозонь маць Кузьм-атя. Яла теке кепедизь. Седеяк ловташкаць атясь. Таго ськамонзо кадызь.

Совсесь Петра, пилиця ялгазо. Аштесь истяк, апак корта. Тусть апак фатя Петрань сельведензэ. Ваны Кузьма-атя лангозонзо. Соракацть турванзо. Эль-эль пшкадевсь:

— Тон мекс, Петра?

Петра седеяк уракаць. Пакшакс чаманзо кекшизе.

— Иля аварьть, Петра... Пиланть саик... Мезекс сон Грушанень... Ялгакс киньгак муят... Ильаварть... Мон эщо пичкан...

Певерить Петрань сельведензэ, прок варяв зепстэ кснавт. Вете иеть вейсэ пилясть яла ласт. Мельс туекшнесь атясь. Знярдояк а машнетиль лия лацо. Тонавтызе Петрань паро пильщикекс. Пароль роботамось мартонзо — шождыне. Сон а капшавты — теи ламо. Машць атясь роботамо.

А муи валт Петра. Юксевсь-калаць сельведь кептерезэ. Талакавтызе Кузьм-атяньгак.

— Кудынезень совак эрямо... яла теке чаво ули. Михал уш нать а сы...

«Нать виде кулан» — думазевсь Кузьм-атя.

Марясь попось. Габордынзе нуланзо-валанзо. Сась Кузьм-атянень. Кода а кода шабракс ульнесь. Совась попось, Петра визьделгаць. Потомсь аварьдимась.

— Берянь нать ёжот, Кузьма Иваныч, — кевксни попось...

— Калдоргадынь, бачка.

— Причастятан дай, Кузьма. Ломанесь тон чесной ульнить, чеснасто куломскак эряви. Путынзе нуланзо-валанзо столанкс.

Кузьм-атя таймаскаць. «Нать виде кулан» — таго думазевсь.

— Мон, бачка, а причастян. Церькував аламот якинь, сестэяк истяк... Мельсэньгак арасель... Кадык истяк кулан... а эряви.

Абунгаць попось, вал а ушодови. Кармась токшеме нуланзо-валанзо.

— А эряви, бачка. Иля заботяяк, — таго пшкаць Кузьм-атя. Лоштязь-лоштявсь попось. Пуромкшность шабрат. Ига-баба рость туекшнэсь уш. Кенкш удалдо попонть вастызе лисемстэ. Лотказевсь. Попось апак корта ютась ваксканзо. Тусь велень кувалт „Тетянь кады“ куростонть. Прок чавкат, вадов мельга чийсть эйкакшт.

— Тынь ков? — пижакаць лангозост сыре баба.

— Кузьм-атя попонть панизе! — кальдерцть эйкакшнэ.

Попось эзь варштаяк, ювсо ютась, прок пельсь удалдо кияк кундасы.

Кузьм-атянь кудозо пешксе. Петраяк эщо тоско. Кузьм-атя терьдизе малав:

— Петра... цёрам, кулыньдерян, калмамак. Саик уш те мелявксонть эсь лангозот. Ярмак пустас иля ёмавтне. Моли... кодаяк. Лазонь пилямонь кис Стёп-атянь кецтэ саик эстеть, маштови.

Чокшнэ малав Кузьм-атя седеяк новольсь. Шкань-шкань келезэяк кундатомо кармась. Кудо потмось яла пешксе. Пси, — ойметькак а таргави. Весе „Тетянь кады“ курось промсь. Орта лангоськак пешксе.

— Попонть панизе. „Проч, мери, тестэ. Чинетькак илязо ульть“ — кортыть, прок пешть чулгонить, ушосо аватне. Конат эсть ульне, сетьненьгак ёвтнизь.

Кузьм-атя кунст ашти эзем прясо. Ансяк косто-косто сельмензэ каясынзе народонть ланкс. Прок мурьни, мейсь промсть. Весенень виськс — сельмест алов нолдасызь.

Народонть юткова совась Груша. Лоткась тетянзо икелев. Чоп эзь меневть, аютколь. Ломань кецэ роботазь олясь аволь тоньсить... Прамозот роботак, кияк а мери — лоткак. Радувась Кузьм-атя. Эсинзэ ломань ули. Типельдеме кармасть сельмензэ. Сырьгиксэль.

— Ну, эйднем, мон калдоргадынь... Тон аштек, иля аварьть... — Пульзявсь Груша икелензэ. Вадяшкавтни Кузьм-атя прянзо эйсэ...

— Иля пельть, эйднем. Шумбра ломань ковгак а ёми. Кода седеезэть пек стака, сестэ роботас кундак. Роботась стака горяньтькак паньсы... Мон весе пингем истя эрия, аваткак истямоль. Савиньдеряй теть неемс лелять — Михалонь, мерть тензэ: пек, мерть, неиксылиньзеть... Эрясынк кодаяк пингенк.

— Михал сась! Михал сась! — шалакаць народось. Вирень шалт лацо тусь валось кудованть. Кузьм-атянь пилескак пачкоць. Сырть тейсь кельме рунгозо. Ваны, вешни сельмсэнзэ.

Кирвайсь Кузьм-атянь поц толнэ, эждеме кармась.

— Михал... цёрам, тон?

— Мон тетяй, — комась. Начксть Михалонь сельмензэ. Прок нарушной кенерсь кулома ланкс тетянстэнь.

Кепедевтизе седе верьгакс Кузьм-атя прянзо. Ваны. Эщо яла а кеми. Сисемь иеть Михал арасель. Ливчакадозь лацо марясы ёжонзо. Озамс мелензэ саизе, пекезэяк маряви вачозь ашти. Вейшсь симемс.

— Мон эщо, Михал, пичкан... Минь эщо роботатано... Пек учинь эйсэть, — вельмиясь атясь.

— Кельмсинь аламодо, — кунцезь, кунцезь ёвтни валонзо эйсэ Кузьм-атя. Сонсь яла новоли Михалонь кедензэ ланкс.

— Минь эщо роботатано...

Чиремсь Кузьм-атянь прязо цёранзо беримас. Конявсть сельтне. Не валтнэ марто кулось. Кадовсть тарказонзо кавто од вийть — Михал ды Груша...

---

^{*) Те сезевксэсь саезь „Шудожов“ ёвтнимасто конань эйсэ эщо сёрмадан.↩}

---