Т. Раптанов, Монь эрямом

Т. РАПТАНОВ

МОНЬ ЭРЯМОМ

Вай, эрзянь цёрат,
Вай, эрзянь ават,
Тынь кулсономизь
Мезе мон ёвтан.
Мон ёвтан тыненк
Кода мон шачинь;
Кода мон шачинь,
Кода мон касынь.
Монь авам ульнесь
Эрзянь авине,
Тетям монь ульнесь
Эрзянь цёрака.
Ранаяк сонзэ,
Цёранть, урьвакстызь,
Пек рана сонзэ,
Алянть, законизь.
Ве иень ютазь,
Алят, мон шачинь,
Ве иень печкезь,
Патят, светс лисинь.
Шачума таркам
Ульнесь банясо —
Содов банясо
Олгине ланксо.
Васень кундыцям
Ульнесь бабине,
Эрзянь велесэ
„Содыця“ ломань.
Рудазов карькссэ
Почом сюлмизе,
Ношка пеельсэ
Сонзэ печкизе.
А кувать, патят,
Монень савсь аштемс
Авань берюмсо,
Седей ёжосо.
Шачмодон мейле
Колмоце чистэнть
Авам тусь паксяв
Кизэнь роботас.
Ёкстась кургозон
Панкс поцо поревкс,
Сонсь монь каимем
Керень лавсинес.
Сестэ мон карминь
Нужань нееме,
Сестэ мон карминь
Берянь кирьдеме.
Ламо судалон
Карвот бизнэкшнэсть,
Эйкакшонь верем
Ламо поцекшнэсть.
Ютакшнось кизэсь,
Сакшнось телень шка.
Эрзянь кудотнень
Лов валякшнынзе.
Пек стака ульнесь
Се шканть ютавтомс
Душна кудосо
Реве левкс ютксо.
Вишка бараннэ
Кочкерекшнымем
Ды сёрмав вазнэ
Монь начтакшнымем.
Касынь-кепетинь —
Чийнеме туинь.
Эйкакшкинесь мон
Вельть бойка ульнинь.
Монь рана, алят,
Тевс кучокшнымизь;
Ранаяк, патят,
Кундавтокшнымизь.
Кавксо иесэ
Локшине марто
Паксява якинь
Сада ванкшномо.
Се кизэнть, алят,
Кувать а стувца
Август ковонь чинть
Превстэнь а ёрца.
Сайкшнызь кудосто
Тетянь седеем
Инязоронь кис
Васов туреме.
Сестэ тетясто
Минь кадовкшнынек
Сазоронь марто
Авань кедне ланкс.
Истя эринек
Минь колмо иеть.
Нилецестэнть уш
Сась тетям кудов.
Се чистэнть монь ланкс
Чипайсь пейдезевсь,
Невтизе монень
Мазый чаманзо.
Тетянь перькава
Кармасть промомо
Велень ломатне,
Бедной цёратне.
Сынест сон ёвтнесь,
Кода ёртызе
Трудиця наротсь
Ине-азоронть.
Велесэ тевтнень
Эрзянь цёратне
Кармить эсь вийсэст
Парсте ветямо.
Се иестэнть мон
Карминь якамо
Паро кудынес —
Велень учильняс.
Ней мон прядыя
Тонавтнима шкам.
Учильнясо монсь
Эйкакшт тонавтан.

* * *
Истя мон шачинь,
Истя мон касынь,
Истя мон лисинь
Валдо, паро чис.

★

Монь эрямом, автор: Раптанов Т. А. // сборник Васень сятк, 1929.	Мордовская библиотека
Книга: Васень сятк. Эрзянь морот ды ёвтнимат. Пурнынзе А. Дуняшин. — СССР-энь Наротнэнь Центрань Издательствась, Москов, 1929. — с. 169—173

<< Тундонь чи (К. Петрова) <<	>> Тюма (А. Горбунов) >>

<< Тундонь чи (К. Петрова) <<	>> Тюма (А. Горбунов) >>
«Монь эрямом», автор: Раптанов Т. А. // сборник Васень сятк. Эрзянь морот ды ёвтнимат. — 1929.