| Мокшэрзят, икелев! // сборник Пурьгинень зэрть; автор: Артур Моро; 1929, ноябрь. | Мордовская библиотека |
| Книга: Артур Моро. Пурьгинень зэрть. — Центриздат, Москов, 1931. — с. 22—24 | |
| << Эрямо бажить << | >> Мон учан >> |
|
Ламо иеть, Ламо сядо иеть, — Кода шачинек минь, — Кода мокш-эрзят эрить. Содасть вейке: Ваномс бояр мелеть; Содасть омбоце, — Кода сынст эйсэ керить. Содасть седе: Инязортнэ а вечкить Истят ломать, Кодат мокшот, эрзят, чувашт, — Сынст эйсэ повильть, Сынст эйсэ печкильть, Сынст эйсэ кармавсть Молеме кашт. Сынст эйсэ пансть, Кува ломать эсть чалксе, Кува овтнэ янгасть Сыдо иень пичеть, Кува ансяк вармась Вирь тёкшсэнть налксесь, Кува зверьтне сяторсть Ды чить, ды веть. Кува сильдейть, Кува пижолць нупонесь, Кува Сурась Ды Рав леесь сравтозь, — Тезэнь нолдась рунго Эрзя-мокшонесь, — Тезэнь ульнесть Инязорсо кравтозь. Инязортнэ керясть Эйсэст локшосо, — Сынь стувтовлизь Шачома келест. Ламо нейгак улить Эрзя-мокшосо — Эсь келень стувтозь, Ветить ташто коест. Читне певерить, Прок кивень петакт рудасс, Ташто иеть геверить Дарны чарыкс латкс. Вишка наротнэ Пашсть, прок мазы цецят лугас, Касы культураст Икельсь наротнэ ваксс. Вишка наротнэ Вирьтнень сявордызь кавтов! Вишка наротнэ Келейгавтызь Равонть. А кирьдить ней Локшо ало лавтов. Весеме лацо Тест чись валы валдонть. Истяжо сынь, Кода весе наротнэ, (Англичант, немецть, французт), Касыть бойка Прок паксясо сюротне, Витнезь, петнезь касыть, Прок пандо прясо кузт. Масторонть минь Сайсынек кедезэнэк, Резинкань алкс Чукацынек вийсэ. Ленинэнь тонавтумась — Минек заветэнэк, Ленин изнямонтень Вети минек эйсэ Ды мерсь кеместэ: — Эрямс тенек вейсэ!.. |
| Ноябрь. 1929 ие. |
| << Эрямо бажить << | >> Мон учан >> |
| Сборник Пурьгинень зэрть; автор: Артур Моро; 1931. | |