| Батракнэнень ды беднякнэнень // сборник Пурьгинень зэрть; автор: Артур Моро; 1929, июнь. | Мордовская библиотека |
| Книга: Артур Моро. Пурьгинень зэрть. — Центриздат, Москов, 1931. — с. 14—16 | |
| << Од пора << | >> Эрямось паро >> |
|
Мон аволь вишкинян, Мон аволь пек покшан, Мон аволь берянян, Мон аволь паран. Мон шачинь эрзязсто, Мон истяжо мокшан. Мокш-эрзянь паксява Мон гайнезь моран. Мон содаса, ламо Улить бедной кудот, Содаса батракнэ Велесэ ламо: Кизна витьнить крандаст, Тельня витьнить нурт. Кулаконь кардайсэ Шканть панить калмос. Сынь тукшныть робутав Чугунка-ки лангов. Сынь якить ошова Робота вешнить. Сынст эрямост черьки Кузезь крута-пандов. Стяко шкаст истяня Ансяк ёмавтнить. Кунсолока батрак, Кунсолока бедняк! Кодамо масторсо Тон эрят. Властентень помогат, Велень ялгат средняк. Велесэ мартонзо Од пингень теят. Сонзэ марто вейсэ Кетте-кецек кундазь, Вишка хозяствасто Коллективт строяк, Эрямостот машты Аразьчись прок ундось, Седейга пижакадт. „Сокиця эряк!” Государствась тонеть Максы ламо паро, Государствать тонеть Машинат максы, Штобу боруцядо Велень кулак маро. Вейсэнь роботадонк Масторось касы. Вейсэнь робутасонк Тынь, соканть, тападо! Вейсэнь робутасонк Кулаконть кравтынк! Тракторонть удало Паксясо лакадо, Тракторонть моросо Лепштязенть стявтынк! |
| Юнь. 1929 ие. |
| << Од пора << | >> Эрямось паро >> |
| Сборник Пурьгинень зэрть; автор: Артур Моро; 1931. | |