| Од пора // сборник Пурьгинень зэрть; автор: Артур Моро; 1928. | Мордовская библиотека |
| Книга: Артур Моро. Пурьгинень зэрть. — Центриздат, Москов, 1931. — с. 12—13 | |
| << Пекшень дуткине << | >> Батракнэнень ды беднякнэнень >> |
|
Ах, од пора! од пора! од пора! — Пиже роща, цёков, Киняль лей. Тонь эйстэ восёлгали од цёра; Тонь эйсэ од тейтерень седей. Тундокс неяви сёксесь тонь эйсэ: Пельть арасть, чись менельсэнть раки! Зняро тол! пулты тол монь седейсэ. Мазы-тейтерь, прок пава, яки. Эрзянь тейтертне морыть гай морот, Одирьвакс балалайкась урни. Мон а кирьца ней, нужа, тонь корот! — Марясак, кода, трактор зэрни? Ней содасак, што лиякстомсть шкатне. Содасак, што пингесь ней, паркстомсь: Гайнить сиясо валозь лугатне, Сыретненьгак эрямост откстомсь. Саты янгить монь эйсэ тон, нужа, Кемготово иес, прок, шайтян! Иля меша тон монянь ней, — ужо!.. Мон касынь, мон виеван — цёран! Санган валнови вересь пси ловсокс. Вакссон тейтересь зэхель моли. Монянь охота теевемс ёвксокс, Конасто эрзясь радость муи. Монянь охота пургине лацо Чопудась эрзятнестэ громамс, Эрзянь масторонть наряжамс сацо, — Орёл лацо садтнэнень совамс. Мейле садтнэстэ вешкемс цёковнэкс, — Вирьпулосто чудизэ сырне. Эфигениякс*) укшнозо ковнэсь Пельтнень ланга июнень вене. Ах, од пора, кодамо мазыят! Ах, од пора, кодамо парат! Весэмеде, тон, светсэнть виеват: Эрьва мезес ломаненть ветят! |
| 1928 ие. |
| *) Эфигениясь — седикелень, Крымень султанонь (инязоронь) пек мазый тейтерь. Конатань коряс кортыть ёвкссо, легендасо. Эфигениядо сёрмаць, легенда Дуняшингак (эрзянь журналист).↩ |
| << Пекшень дуткине << | >> Батракнэнень ды беднякнэнень >> |
| Сборник Пурьгинень зэрть; автор: Артур Моро; 1931. | |