| Пекшень дуткине // сборник Пурьгинень зэрть; автор: Артур Моро; 1927, 28 августа. | Мордовская библиотека |
| Книга: Артур Моро. Пурьгинень зэрть. — Центриздат, Москов, 1931. — с. 8—11 | |
| << Тумо ало << | >> Од пора >> |
|
Мон молинь вирев, Керинь дуткине, Озынь лей чирев, Лейсэнть уткине. Уткинесь укшны, Сэтьстэ гогорьди, Варминесь чейтнень Састо лыйневти. Чизэ валгумав Кияванзо тусь, Уткась ялгине Чей пулостонть мусь. Сынь вейсэ гогнозь Чейнетнень кадызь, Бойкасто лапнозь Пряст эйстэнь кекшизь. Варштынь леентень, — Сынь а неявить, Кунсолан эйсэст, — Сынь а марявить. Мейле дуткинем Курок теия, Моронь морамо Прям анокстыя. Од дуткинесэнть Карминь морамо, Дуткась ломаннекс Кармась кортамо. — „Вай, шачинь, касынь, Мон вирь потминес. Цеця крук куншкас, Покш лей чиринес. Ламо паро тевт, Тестэ мон неинь... Ламо мазый валт, Тестэ мон маринь... ... Троицянь чистэ, Од тейтерь, цёра, Монь алов озасть, Морынест моразь. Цецятнень лепштизь Раказь, пеедезь, Од пораст кортызь, Мерят, авардезь. Тейтернесь кармась Рангозь рангомо, Од цёрынентень Састо кортамо. — „Эх, Ваня, Ваня... Тон сюпав цёрат, Сюпавонь тейтерь Козяйкакс саят. А монь кацамак, Штобу ёмазан, Лейс, прок ёртсамак, Седе ваязан. Мон бедной тейтерь... Лангсон пеедят, Эрьва таркава Тон эйсэн маньчат. Прок цецякс лепштик Монь мазый чинем. Виензэ маштык Монь од седейнем”. Весе тумотне Пряст нуваргавтызь, Вирень нармутне Морост лоткавтызь. Нолдызе прянзо, Ваня думазевсь, Аламос аштесь, Мейле кортазевсь: — „Иля правт сельветь, Таня—седейнем, Иляк калавтне Монь поцо оймем. Мон тонь а каттан Вечна ёмамо, Цецякс а ёрттан Лейнес ваямо. Кадык родноен Беднойть а вечкить, Благой кельнесэст Сё тонь лангс мутить. Сюпав тейтерь ланкс Тонь а полавттан, Михалов малав Козяйкакс сайдян”. Таня пеедезь Ваня ланкс варштась, Леень педлейнекс Кавнест кутмордавсть. Кортамост кортызь Монь лопан ало, Мейле нармутне Кармасть морамо. Тумотне принест Верев кепедизь, Мазый чи валдонть Экшэзэст кекшизь. Не од ломатне Уткатне лацо, Гогнозь тусть кудов Пек весёласто”. Вана мезе тень Дуткинесь кортась. Вана кодамо Морыне морась. |
| 28 Август 1927 ие |
| << Тумо ало << | >> Од пора >> |
| Сборник Пурьгинень зэрть; автор: Артур Моро; 1931. | |