26

Поргов эряскодсь комбайнатненди; кафксть ни кучсесь инксонза механиксь‚ Андреев, штоба няфтемс моторть.

Сараевась и Лехов тусть колхозонь правленияв, тердезь колмоцьке бригадирхнень, Белкинть и кой-кона коммунисттнень, комсомолецнень вожакснон Васять и марса арьсесть оцю план, мезе ванды тиемс кукурузань паксяса.

Сараевась кизефнесь, мзяра ломань может лисемс ванды паксяв, мзяра колхозть культиватордонза, мзяра машинада и алашада лиси назёмонь усксема. Кизефнесь стане, бта сон тяса председательсь. А ломаттне кулхцондсть эсонза.

Меколи Сараевась сембонь седиснон озафтозень тяфтама валса:

— Видефсь эряви кафта пяльде ётамс культиваторса, эрь корянть перьфонц ацамс назёмса, ляпофтомс мотыгаса. Метеорологическяй сводкатнень коряс ня шитнень тага ули пизем. Вов и туй тевс кукурузась! Минь колхозстонк сай трактор, лезды.

Алятнень лаца ащесь и ванць аканц лангс Васясь. Сонь пцтай шабань кургужензон эзда можналь няемс: «Вов кодама монь аказе, ванода!»

Думандамок тяфта, Васясь кирдезе прянц сериста, а шаманц стройгайста.

Меле корхтась сонць Лехов.

— Ванды шить мархта стятама и листяма паксяв, кеподемс эряви сембе велес однек-сиренек. Ломаттненди эряви ладняс азомс, кодама оцю тевс ванды кундатама. Эрь ломанти эряви сявомс ведарка и мотыга.

Суксов пеедезевсь и комафтозе прянц.

Сараевась, кода салмоксса, сялгозе сонь:

— Суксов пееди лангозонк. Вдь тейть, Суксов, кунара тиемаль тя тевсь. А ванды тонга получат бригадацти участка и тисак!

Аканц лангс ваномок, Сараев Васявок изь кирде:

— Мес Суксовть кядьста аф кизефневи ответ? Тя кукурузась вдь сонь паксясонза? Сонь! А мес изь яка видефть мельге?

— Тянь колга, Вася, оду корхтатама‚ — пшкядсь Белкин.

Поргов ламос кирдевсь комбайнатнень ваксса. А мзярда сась правленияв, Сараевась кирдезе сонь:

— Борис Константинович, минь срхкафтоме оцю тев. Кулить? Вов и лезтт тейнек: тийхть кукурузань паксяти карта, явк сонь колма бригадава, а эрь бригадань участкать — кемонь звенанди.

Поргов шарьхкодсь, што тя простой тев, Сараевась соньфтемонзонга тёждяста тисы. И, пади, нльне атаказаль, кда афоль эняльгода Леховське:

— Борис Константинович, тят атказа, лезтт.

Савсь лядомс. Пяле вети Лехов нувсесь, нувсесь и тусь куду. А Сараевась сяда сидеста кармась варжакснема Порговть лангс. Тяни «мелавнясь» няевсь тейнза кели паця орёлкс. «Вов кодамат стирсь, — эсь пачканза думандась Поргов, — аф стак богатырьшка аля косьфтат».

Поргов эрь мезне марязе эсь лангсонза сонь сельмованфонц, но содайкска ашезь ти: эряскодсь аделамс тевонц. Порговть тяфта прянь вятемац, бта ношка пеель, ётафнесь Сараевать крганц ланга. Тоса ашезь кирде:

— Борис Константинович, простиндамак монь, ёран кизефтемдот...

— Пожайлуста, пожайлуста, Галина Васильевна, — но прянц Поргов ашезе кеподе.

— Азк, Шиндинать пяк кельгсак?

— О, Галина Васильевна, вельф кельгса! И сонга монь кельгсамань, — Поргов венептезе чертёженц: — Вов тейнть монь лезксозе.

— Спасиба, Борис Константинович, — и Сараевась арьсезевсь: «Тумонь ломань! Ну, ащек, мон варжате лаксемс...» — А верондамс тянди или аф? Пади, панжадонь седихть азсак, а? Ха-ха-ха!

Поргов нльне юкстазе, што каршесонза ащи ся сятяв «мелавнясь», конань сон няендезе «Мазы пакся» колхозста. Сон мезевок изь отвеча. Сараевась нарошна то морась саворне Порговть чертёженц ванондомста, то мезе-бди корхтась. Поргов сяда пяк кяжиясь, стясь вастстонза и азозе:

— Ладна, саты, пинге ни молемс мадомс.

Сараевась стаки рахась кургонь келес:

— И аф виздят тяфта корхтамацень? Шиндинать эзда, наверна, пелят. Тейнза тяфта аф мярьгондят?

Поргов тожа арьсесь: «Пачк няеват, стирь...»

— Борис Константинович‚ весь пяк шобда, алязень пяли, надиян, прважасамак?

Поргов кеподезень лафтунзон:

— А кда Варвара Степановна кульсамазь?

— А монь кодама тевозе? Мон аф сондедонза сирян, — кармась латцемост кудрянзон, сотсь прязонза сенем панчфу косынканя и варжакстсь Порговть лангс, бта нарошна няфтсь тейнза пря.

Порговсь аньцек тяни приметазе, што шамас Сараевась ульсь ёфси аф коськана, кода арьсекшнесь сон колганза тяда инголе.

Лиссть ульцяв, и Сараева кундазе Порговть кавлалда. Поргов мольсь, кода пленц повф.

А Сараевась нарошна лама корхтась, апак лотксек пеедсь и лятьфнезе Шиндинать. А мзярда пачкодсть, Сараева, кода мелавня, комотсь куцемаснон лангс, арась Порговда сериста и кядьлапшса саворне токазе сонь щёкада:

— Муцявоть, Борис Константинович? Ну, тяни архт, ваймак.

Поргов тусь Леховть пяли и ламос ашезь матодов: пайгонякс горнясь пилесонза Сараевать вайгялец.

* * *

Нинге шинь стяма ёткова Лехов колмоцьке бригадирхнень мархта лиссь паксяв. Велеть кувалма фкя-фкянь мельге пефтома ломань мольсь, кядьсост мотыгат, ведаркат или кептернят. Сембода рана стясть трактористтне. Мзярда председательсь и бригадирхне нежедсть кукурузати, синь аф весть ни ётасть культиваторснон мархта кукурузать туркс. Фкя тракторть эзда омбоцети якафтсь Бугров атя. Механизаторхне сонь кулхцондозь. Культиваторхнень мельге пульхксть грацне и псьмархне, бта синьге лездсть ломаттненди.

Леховсь кенярдсь.

— «Мазы паксяста» сась трактор? — кизефтезе сон тракторнай бригадань бригадирть Бугровть.

— Сась, молодецт цёратне!

Лехов няезе, што тяса тевсь ладяф, кадозень паксяв Бугров атянь и бригадирхнень, а сонць мрдась меки вели, штоба тоса ладямс назёмонь лихтемать. Тя тевть сявозь эсь лангозост комсомолецне и од ломаттне. Леховонь самс автомашинатне и подводатне прважаф тольхть ни назём мархта.

Частта меле кукурузань паксяса ломаньда ульсь кода базарса. Культиваторхнень мельге мотыгаса ляпопнезь кукурузань юрхнень перьфснон, ведаркаса и кептерняса каннесть назёпт. Ичкози кулевсть стирьхнень моросна. Сонць Лехов якась мековасу: то туй паксяв, то меки мрдай вели. Парста маштсь тевть вятема Бугров атя. То указовай бригадирхненди, то няфтьсы аватненди, кода мотыжендамс. Сонь мархтонза марса указовась Сараеваське.

Поргов мольсь фкя культиваторть мельге и ужялькшнезень ся кукурузань нетькснень, конат аф ровнайста видефть сюнеда повондсть культиваторть пейнзон алу. «А, пади, и лиси тев»‚ — арьсесь сон.

— Привет, Борис Константинович!

Сон варжакстсь и няезе Сараевать. Ся мольсь омбоце культиваторть мельге. Поргов нльне кенярдсь, мес Сараевать мархта изь васеде сельмода сельмос. Виздсь мезе-бди.

Аньцек кенерсь народсь кода эряви кундамс работати, эстокиге няевсь, што аф кенерькшнихть назёмонь усксихне. Аватне то фкя, то омбоце вастса ащекшнесть тевфтома.

Кодак эвондась тяза Лехов, поназь сонь омбоце бригадань аватне:

— Илья Борисович, моронь морама, што ли, пуроптомасть тяза?

Лехов содазе Фанарять вайгяленц, конань ваксса прянь апак кепсек работась Лена стирец.

— Назёмонь усксихне аф кенерькшнихть, Фанарясь щакай, — виденцясь Лехов.

— Лиси, што ли, мезевок кукурузать эзда? — тяни кизефтезе председательть кодама-бди акша шама ава, конань Лехов вестенге ашезе няенде работама вастса. — Кда путолеме тняра вий модамарьхнень перьф‚ пользада сяда лама улель.

— Зря тонь ашедязь кизефне Москуса, — отвечась Фанарясь акша шама авати.

Штоба полафтомс корхнематнень, Лехов сонць кармась кизефнемост аватнень:

— А тинь азосте вов, мес паксять крайге кукурузась сяда пара, а кучкаса кальдяв?

Аватнень эзда кие-бди пелезь пшкядсь:

— Кие сашендсь видемстонза, ся содасы, мес...

— А мес?

Аф ламос ащемда меле Фанарясь кармась азондома:

— Пакся крайгянь бороздатненди кайсеме назёпт, а кучкав — ашайка.

— А мес тяфта?

— Бригадирсь тяфта мярьгсь, — аф пелезь, аф виздезь азозе бабась.

— А тон афолить лихне кяльцень, — Фанарять уркстозе акша шама авась.

Фанарясь кяжиясь:

— Тейть как раз сускомаль кяльце, Наста. А то сембонди указоват, сембонь эса тонафтат, а тонць паксяв кить аф содасак.

— А тонь копорезт медаль лаподихть, што ли?

— Кинь тяфтама авась? — кизефтсь Лехов.

— Шкайсь максомань, а эрян Карга велеса, — отвечась сонць споряйсь.

— Тя Микитать рьвац! — азозе кие-бди.

Лехов арьсезевсь, кодама Микитань.

— Ульмовть, — оду азозь аватне, — плотникть.

— А-а-а! Вона тон кинь. Фкя песта керфат мирдцень мархта, ёфси фкя песта. Тя самай тон панцесак бригадирть вальмалдот? Содате, содате.

— Кадк работай ся, кинь кши сускомоц аш, — аф пелезь, аф виздезь Микитарясь спорясь Леховть мархта, — а тейне колхозонтень эзда пакарь аф эряви.

— Визделеть, Наста, ломаньда, — тага пшкядсь Фанарясь, — кие жа трясамазь, кда аф колхозсь?

— Ой-ни, муйть тряеньконь! Мезе мон получан колхозстонт? Тонь стирце работай дояркакс, козякододе, што ли? Потяйхть лофца, коса лофцсь? Ётай веленьконь вакска, кода Мокшеть ведец, и лоткай ошу: рабочайхненди да служащайхненди.

— А тонь тарваскяце хоть ули?

— Монь мирдезень узерец тарвазда оржа, — сембе нинге изь сютям Микитарясь.

— Да вдь мирдцень оржа узеренцка рабочайхне тиезь!

— Лоткак, Наста, лоткак! — кардасть эсонза сембе аватне. — Кадомасть корхтатама председательть мархта тевонь колга.

Микитарясь потась аватнень фталу. Аватне полафтозь басняснон:

— Азк тейнек, Илья Борисович, афкукс, што ли, сембе налокнень валхтозь? Минь мезе-бди кулеме, а толконц аф содасаськ.

Леховть озась седиец, вясялгодсь. И аньцек кармась азондома Партиять и Правительствать постановленияснон колга, ардсь назём мархта машина. Аватне эряскодсть назёмонкса, а Лехов мельгаст ювадсь:

— Виде, налокне колхозникнень лангста валхтфт! — и тусь Сараевати.

— Аф кенерькшнетяма, — азозе сон, — аватне сюцихть.

— А назёмонь каяйхть нинге муят? — азоркс кизефтезе Сараевась.

— Ломатть мувихть, конюхонек, плотниконек кеподелине.

— Лоткафтк вона ся машинать, — Сараева няфтсь грузовикть лангс, конань аньцек шамдозь.

Сараевась озась и тусь вели, а пяле частта меле «Мазы пакся» колхозста састь колма грузовой машинат, кажнайть эса ульсь вете-кота яля, кядьсост кшнинь цянгсна.

Тя лезкссь нинге сяда виияфтозе паксяса работать. Кажнайсь ёрась сяда лама тиемс омбоцеть коряс, пцтай эрь авать работась шабац. Паксять келец няевсь стане, бта сянгяря моряса мацихть эшелясть. Тяни сембе — и руководительхне, и колхозникне — надиясть, што тячи сембе тя кукурузась ули мотыжендаф.

Работама ёткова Сараевати нежедсть ават.

— Азк, Галя, ков тага кяльготнесыне шабатнень тинь Васянте?

Сараева васенда ашезень шарьхкоде аватнень.

— Целинав, што ли? — шарьхкодсь Сараева.

— Да, да. Целинав. Коса ся?

— Сибирьса, Казахстанца. Но синь кивок аф кяльготнесыне. Кие кельги, ся моли, вийхца киньге аф сявихть.

— Вона моннесь, мяряльясь‚ — жалбась фкясь цёранц лангс, — прянь-пильгонь синдезь срхкай. Мон авардян, а сон рахай лангозон.

— А тон, Алдакай, тяк кирне, кадк туй, — Сараевась сявозе авать мотыганц, кармась мотыжендама. — Тоса эздонза лиси настоящай ломань, и тоньге мельганза терттянза.

Авась куфкстсь и сявозе Сараевать кядьста мотыганц.

— Эрь ни, мезе шта монь колган корхтат? — рахась авась. — Ков монь, мокшавать. Тейнек валга аф азови. Вона, мон якань Пензав туганозень пяли. Шабанза, ведьматне, покрашкат, а рузкс лочазь лочайхть валхнень эса! Сят аф юмайхть козонга.

Сараевась рахазевсь.

— Мярьгат, рузонь шабатне рузкс лочазь лочайхть?

Вдруг паксяса жалакодсть сембе ломаттне:

— Ура! Ура!

— Ха-ха-ха!

— Ай-да, Бойкина!

— Сельсоветсь сай боцькя лангса!

— Ха-ха-ха! Ха-ха-ха!

Афкукс, ульсь мезь лангс рахсемс. Бойкина паксяв ведень ускомс сявозе пожарнай сарайста сембода нола алашать. Председательсь озась ластя боцькять лангс и сязи алашать эса илиса, штоба рабочайхненди куроконе ускомс ведь. А алашась куликска ширезонза аф тии: моли нувазь и яфиесы пулонц.

Мзярда боцькя ведть кружазь ломаттне, Бойкина тердезе Леховть шири и салаване азозе:

— А тейть, Илья Борисович, усконь калонь пакарь... Райкомса кулезь ни правлениянь скандальнай заседаниять, да нинге Салмов максозе комиссиять актонц кукурузаньконь колга. Варламов эряскоды куроконе ваномс тя тевть бюроса. Вов тейть телефонограмма... Тячи иляденди тердихть тонь и Белкинть.

Лехов лувозе каготкять, и кельмось марнек потмоц. Сон апак каштортт озась назёмонь ускси машинас и тусь вели. Сусксь седиец, шарсь пряц, ашезе сода, мезе тиемс. Правлениять каршеса няйсь дрожкас кильтьф алаша.

Шрать ваксса ащесь Степашкин и кизефнесь счетоводть Ефимкать эса, мезе тиенди народсь паксяса. Степашкин азозе Леховти, што Лухоминскяй эмтеэсста ётамбачк ёрасы ваномс, кода строяви механизированнай токсь.

Афкукс Степашкин сась аф тянкса. Тейнза звонясь Варламов, азозе, што тячи бюроса кармайхть ванондома тя колхозстонь тефнень. Содазе, што Леховть лангс райкомса пуромсть лама сёрмада, докладнойда, справкада и актта. Содазе сяньге, што Варламов аф лямбе седихть корхни Леховть колга. Кулезе сяньге, што Леховть лангс прибавасть тага кафта тефт: правленияса скандалсь и кукурузать колга актсь.

Степашкин тяни ёразе эсь сельмосонза няемс, эсь пилесонза кулемс мекольдень кафцьке факттнень, штоба бюроса аф эльбядемс тя председательть колга, аф обжамс зря Леховть.

Лехов жа Степашкинть саманц шарьхкодезе эсь лацонза. «Материалхт кочкай», — думандась сон. Сяс мархтонза корхтамста ёрась ащемс пейнь сускозь, учемс, мезе кармай кизефнема. Озасть правлениянь крылецть пес Степашкин кармась кизефнемонза, мезе лиссь правлениянь заседанияса. Корхтамста трнатсь Леховть вайгялец, бта кев люпштазе кргапаренц.

— Ну, тят эвотькшне, тят. Азондк лац-ряц, — сятявста корхтась Степашкин.

— Мон правленияса аф ськамонолень, тосоль Шиндинась, Поргов.

Нльне кенярдсь Степашкин, кодак кулезе, што тюремать пингста тосоль Шиндинась. Сон весялгодсь.

— Ну и кода лиссь?

Тяни Лехов кармась азондома, фкявок валня изь мянде.

— Плотникнень колга аф лац тиеть, — меколи мярьгсь Степашкин, — шочкнень сявозь, штоба петемс сиротатнень кудснон, а тон кеподеть шум.

— Тейне корхтасть ни. Малость эряскодонь. — Тяни васенцеда пеедезевсь Лехов. — Омбоце весь тянкса аф удан.

Срхкасть токть ванома. Молемста Степашкин фалендазе Леховть кардонь тиеманкса.

— Кинди кода, а монь мялезон карттне. Ванат лангозост, и седице касы, афкукс, кода жуватань городок. Аньцек аделак, тяк када тевть пяле ки лангс.

Лехов яфодезе кяденц и мезевок изь аза. Ёфси лия сон кирдсь прясонза, Степашкинти ёразе панжемс тячи потмонц, азомс тяста туманц колга арьсеманзон, конат мекольдень шитнень кувондасть сонь потмозонза. Эрявсь путомс тевти пе: или работамс, или тумс меки ошу. Но, кода нарошна, Степашкин пефтома кизефнесь жуватань городокть, токть и лия тефнень колга, азондсь, мезе нинге эряви маластонь пингть тиемс колхозса.

— Туй тевце, туй. Тят пеле.

Пачкодсть кукурузати. Степашкинть мялезонзоль, мзяра народ тяса работасть, бта пожар матсть. Паксять пялец тифоль ни.

Сельминголест повсь Марфась. Сон прянь апак кепсек мотыжендась, а мархтонза стирняц ласькондсь, каннесь ведаркаса назём, марась нинге апак мотыжендак кукурузатнень перьф.

— Лама тиеть? — кизефтезе сонь Степашкин.

— Пцтай кемонь соткат, — Марфать инкса отвечась бригадирсь Кичапин.

Степашкин и Лехов варжакстсть фкя-фкянь лангс.

— Кда сембе тяфта работальхть‚ — пшкядсь Степашкин, — тячикиге аделалесть.

Бригадирсь фалендась, што тячи сембонь тисазь.

Мзярда лиссть кукурузать лангста меки кити, тумстонза Степашкин кизефтезе Леховть:

— Тонцень изь моль мяльце тяса работамс?

Лехов ёрась азомс эсь арьсеманзон, но меле рахазевсь и сонць изь стрянда, кода азозе:

— Тевда лама, аш мзярда молемс мялезти.