25

— Месть кальхциясак кенкшть? — Лехов кизефтезе конюхть Тимкинть, кона омбоцеда ни панжезе правлениянь кенкшть.

— Ёрань сявомс тинь пси пачада ярхцама, — аф смендазь отвечась Тимкин.

— Значит, Порговть мархта ялгатада? Мярьгат, марса работаде?

— Аф работаме, а тонафнеме, комбайнеронь курсса марсолеме.

— А, деряй, тон комбайнерат? — дивандась Лехов.

Тимкин пеедезевсь.

— А тинь чаятада, шуфтонь пильге мархта и шачень? Колма кизот работань комбайнеркс.

— Шиндинатьке тердьк пачада ярхцама.

— Колмоцьке аряда. Тонга вдь молят?

— Спасиба. Пачада ярхцамась — аф кевонь каннема...

Правленияв сувасть сире Бугровсь, Поргов и Шиндина. Лехов азозе, местема сась Тимкин. Поргов варжакстсь Бугровть лангс, конань мархта срхкасть токть ванома. Ся таргазе кургстонза трубканц и пшкядсь:

— Мес аф молемс? Ломанць седи ваймот терди.

Пачада ярхцама тусть колмонест: Поргов, Лехов и Шиндина.

— Семьяце, Федя, оцю? — молемста кизефтезе Поргов.

— Ветенек. Мон колмонен, авозезе и палцезе. Тят пель, аф розарясамасть пачаса.

— Цебярь колхозниксь? — шутендамга Поргов кизефтезе Леховть. — Аф сави виздемс инксонза? А тон содасак, што Федя — цебярь комбайнер?

— А кинь сон содай? — пеедезевсь конюхсь.

— Тяда пичеде, тяни сембонь содасайне.

— Ашайка содат‚ — смелкстомсь Тимкин. — Минь велесонк, содасак, кодама ломатть улихть?

Лехов кеподезень конюхть лангс сельмонзон: васенцеда няйсы сонь тяфтама смелста.

— Ну, кит?

— Да сявсаськ Бугровть. Тя ломанць кшни покольста ведь нолдай, а сон кизоньберьф кудса рязонды и унокт ванни.

— Мес рязонды? Сон правлениянь член, токти ётафтоськ.

— Тя мезе — токсь?— спорясь конюхсь. — Кядезонза максомальхть сембе паксятне, и няелить, мезе сон тиель. А Спиридон атя? Кирдьсасть постуфокс, а содасак, што сонь лацонза киндинге исть вельхнев стружкаса кутт? Тя вдь Суксов сембонь панцезень. Винада башка Суксовти мезевок изь эряв. А тон тожа пезфтайть кяттнень строямати и сяда лама мезевок аф няят, аф кулят.

Шиндина шарьхкодсь, што Тимкин васенцеда панжезе потмонц, и кизефтезе Леховть:

— А семьянц конюхть содасак?

Лехов якстерьгодсь и азозе видеста, што аф содасы.

Тимкинонь кудоц пятистеннай. Аньцек сувасть васенце пяльксти, Поргов и Лехов абондсть: Лена кодась котф.

— Вона кие тяса эряй? — шумбракстомда меле пшкядсь Поргов и апак учсек васедемать эзда кафцьке Ленать мархта якстерьгодсть.

— Казнет аноклат? — кизефтезе Лехов.

Лена ашезь отвечав.

Варвара Степановна варжазе котфть и тевонь содайкс кизефтезе:

— Сисем сяймоса, што ли?

— Вейхксоса‚ —сельмонь апак кепотть отвечась стирсь. — Сисем сяймоса — тяйня.

Шиндинать мархта кармасть корхнема авань тевонь колга, а алятне ётасть тона куду. Фанарясь, Тимкинть авозец — сери, стройнай ронга ломань, Ленать лаца равжа шяярь — срхкафтозень пачанзон. Сон кенярдсь: пялост састь оцю конакт, а сяс, кода нарвай клотнась, эрязста шарсь пянакудть перьф.

— Дояркась кодай котф, а тракснень кие потясыне? — Поргов кизефтезе Леховть.

— Моннесь якась, вона сась ни‚ — отвечась Федя.

Куду сувась Тимкинть рьвац. Поргов варжакстсь лангозонза и дивандазевсь: колмоцьке аватне, кода фкя песта керфтольхть, аньцек тярясна сяда сирель.

Анна цюланца полафтозень щамонзон, нежедсь инжихнень малас. Поргов кизефтезе:

— Ну, кода траксонте тяни эряйхть?

— Баяравакс.

— А лофцсна прибавась?

— Лофцсновок прибавась. Да вдь тяни тейст тиф карда. — Анна комась мирденц пилес, мезе-бди тошкась и варжакстсь инжихнень лангс.

— А мезе стане? — кизефтезень Лехов.

Федянь ашель мялец азомс. Сувась Фанарясь.

— Монць азса: удовой Марфась ёрай кандомс алнят пуштомс.

Поргов пеедезевсь:

— Виде, исяконь правлениянкса Илья Борисович эряви каванямс, — и Леховть лангс гразясь сурса: — Школань директорсь‚ брат, азондозе тейне‚ кие Марфась. Сонь мирдец колхозса ульсь инь цебярь бригадирсь, сяс и афоль эряв учендомс, мзярда плотникне синць сявихть шочкт и доскат, а молелеть тоза тонць, ванолить куднянц и петьфтелить. И эста тевсь лия улель. Марфась вдь эняльдсь тейть?

Лехов пшкядсь Фанаряти:

— Марфа кадк каванясы Борис Константиновичень. Сон омбоцеда ни аралай эсонза.

Поргов ашезе шарьхкоде Леховть.

— Коса-бди седь лангса арать инксонза, — азозе Федя, — ярмакт максоть тейнза.

— Ах, вона кие Марфась? Шинжаромань мишендись? Содаса, содаса. Пади, кяж тейнза пандат?

Лехов ашезь отвеча. Сон варжакстсь омбоце куду панчф кенкшть шири. Тоса Шиндина каязень туфлянзон, эцесь котф васттнень ёткс и маштозь цяткофнесь эвгонть мархта. Алятне лиссть од кодайть ванома.

Шиндина нолдась од инголькс, путсь каямати од почконя, кундась эвгонти и люпштазе виде пильге шятямать, но сюре кись кода эряви изь панжев, а сяс каямась повсь лийфть кучкас.

— Няйф, Варвара Степановна, аф кядьгат якай тевс кярьмодеть: — пеетькшнесь Поргов. — Тя вдь аф карандашса тяштемась.

Варвара Степановнась визделгодсь.

— Тят пель, тят пель, Варвара Степановна‚ — указовась Лена. — А тинь тяда пееде, сон машты кодама!

— Минь вдь аф котфонь кодама тердедязь, — пшкядсь Анна, — аряда тона куду. — Сон кандсь тоза целай стопа пача.

Пачатне вельф удалафт. Вайса ватьфт кафцьке ширде да нинге парной лофца мархта.

— Суронь пачатне фалу удалайхть, кда каят ёткозост аф лама тозер почфкя‚ — азондозе Федярясь.

Лена кандсь бохарямста кельме боза, симдезень инжихнень и меки озась котф васттнень ёткс.

— А мон чаянь, тяни ни велеса аф котцихть котфт, — пшкядсь Поргов. — Пинге ни ёрдамс тя сире тевсь: рамаф котфсь сяда уцез.

— Эрь, ёрдасак. Ёрдалить, да аф ёрдасак, — васенда аф мяльвельде азозе Фанарясь, а меле сяда смелкстомсь, лядьсь мялезонза, што Шиндинась аф весть ни сашендсь пялест стиренц колга, кармась сяда видеста корхтама: — Вона Каргиттне рахсихть стирезень лангса, аньцек аш мезе тиемс.

— Тядяй, лоткак‚ — кардазе Ленась и эцесь котфонь кодама. — Визтть ломаньда.

— А мезе виздемс, или мезе салань? А тя кяжсь аф тячи, так ванды лиси‚ — и кармась азондома Шиндинати: — Минь ломанькс тиеме. Коли вешсь мокшень казнет‚ рамаме сюрет, кармаме котфонь кодама, а тяни тага якай велеть келес и корхтай, што сякокс аф сявса кудозон рьвянякс.

— Лоткак, тядяй, лоткак‚ — тяни кардазе бабать Аннась, няемок, што Лена аварьгодсь. — Мезенди сембонь азондсайть.

Но Фанарясь няезе, што Поргов и Лехов кулхцондозь, изь кирде:

— А мес ня ломаттненди аф азондомс? — и тага шарфтсь алятненди: — Меколи ся святошась, содасасть, мезе мярьгсь: кадк стирце лиси комсомолста и оду кстиндафты пря, эста сявсы рьвянякс. Вов мезе тиенди лимось-сюнось, пацяфтома, а лиенди.

— Лоткак, тядяй! — сяда пяк ювадсь бабать лангс Аннась. Ленась аньцек авардсь.

Поргов варжакстсь Шиндинать лангс, ёрась мезе-бди азомс Ленать инкса, но сянь вастс пшкядсь:

— Спасиба пачатнень инкса, бабай, тейнек пинге ни тумс.

Лехов тусь правленияв, а Шиндина Порговть мархта — токть лангс. Мзярда лядсть кафонест, Варвара Степановна уркстозе Порговть:

— Ленать тевс пяк тяйть эцекшне кяттнень.

— Мес?

Шиндина варжакстсь перьфпяльге и саворне азозе:

— Ленась колмоце ковсь ни пеки. А тон корхтат, овкстамс Каргиттнень. Ленась пяк кельгсы Каргинть, аф ёрай явомс эздонза. Сяс кадыть, синь синць пульхкяйхть.

Поргов арьсезевсь, а Шиндина срхкась меки правленияв, тейнза эрявсть васьфтемс комиссиянь члеттне.

— Борис, а Лена вдь тусь мялезт? — кизефтезе тумстонза.

Порговть крьвязсь шамац: шарьхкодсь, мес тяфта кизефнесы Шиндина — кунеляй.

— Да, стирсь мазы, — виденцясь Поргов и поладозе: — Но...

— Лоткак, лоткак, — Шиндина ашезе када сяда тов корхтама, — мон содаса, мярьгат: «Но тон тейне сембода мазыят». Тяфта вдь?

— Да, тяфта!

* * *

Тинголангса Порговть васьфтезе Бугров атя. Сон азозе, што тяза сашендсь «Возрождения» колхозста кузнецсна Никифоров, штоба сявомс кепотькс токть эзда: ёрайхть тяфтама жа тиемс эсь колхозсост.

— А коса сон?

— Председательснон Чуйкинть мархта тусь рысаконьконь ванома: ёрасазь рамамс, — кода-бди ужяльдезь пшкядсь Бугров атя. — Мярьгсь, курок сай.

Афкукс, Никифоров курок мрдась меки. Сон нильгемоньшка кизоса таза аля. Эсь колхозсост ащи главнай мастеркс: и токарь, и слесарь, и кузнец, и паяльщик. Лиякс мярьгомс, аш стама тев, конань ба афольхце сода эсь производствасост. Поргов няфнезень и азондозень тейнза эсь чертёжензон. Кузнецсь кизефнесь и сонць эсь лацонза рисовандась чертёж.

Обед маласта паксяста тяза сась кукурузань ваны комиссиясь: Шиндина‚ Чуйкин, «Мазы пакся» колхозста Сараева, фкя агроном, конань Поргов вестенге ашезе няенде, и Салмов. Синь ётксостоль Лехов. Сембе сизефт: няевсь, аф фкя част якасть кукурузать перьф, аф кржа ульсь корхнемада. Тяни псить эзда сембе сувасть утому и кармасть корхнема механизированнай токть колга. Тя пингть састь тяза Зобов Белкинть мархта и синьге шоворсть корхнемати:

— Пара, што сатодязь тязк, — пшкядсь Зобов. — Тяка ёткть ёратама ваномс и механизорваннай токонтенге. Пади, тясонга сави тяштемс акт, — шутендась сон.

— Ямада да столбада башка тяса нинге аш мезе мумс, — Порговське отвечась шутендазь.

— Э-э, брат, эрь шуфтоняса эряйхть моркт. Тяшка комиссиясь, кда эрявксты, кевса пожар маты.

Сембе рахасть Зобовть оржа шутканзон лангс. Атя прясонза пяк рахась Бугровське. Сон кунара ни кельгсы Зобовть оржа кяленкса и весялашинкса.

— Ну, кода кукурузасна? — кизефтсь Поргов.

Кивок изь ёра отвечамс. Салмов таргазе папкастонза актть, конань тяштезь паксяса, и венептезе Порговти. Актса нюрьхкяняста азф, што видефсь кальдяв сяс, мес правлениясь эсь пингстонза изь шарфта мяль тя пяк эрявикс культурать лангс.

— А мезе тиемс, штоба сон петеволь? — тага кизефтсь Поргов.

— Кукурузась мярьгсь, сай кизонда оду видемасть, — балалайкань струна лаца шуваняняста кайгозевсь Салмовть вайгялец и сязевсь: — Хи-хи!

Лехов стадонга аф весялаль, а тяни нинге сяда алу комафтозе прянц.

Тя ответсь изь ту Белкинть мяльска. Сон варжакстсь комиссиянь члеттнень ланга и сельмоса ёрась кизефтемдост: афкукс ли юмась кукурузась? Тянь няезе Салмов и азозе:

— Тяфта, парторг. Эряволь ладняс ваномс кукурузать мельге.

Зобов кяжиста шарфтсь Салмовти:

— Колхозть кальдяв кукурузац тейтьке сяпи тишекс арай. Тон мзярдонга ёрат отвечамс паксятнень инкса? Апак лотксек арнят колхозснень ланга, сводкат кочксят...

— Мон отвечан машинатнень инкса, — кода атякш комотсь Салмов вастстонза, — а машинаньке фалу анокт. А паксясь — вона кинь‚ — няфтсь Леховть и Чуйкинонь лангс.

— Вона кинь, — дразнязе сонь 3обов, — ванан-ванан, эсь тевцень аф содасак, баяркс арать. Аньцек критиковандама маштат.

Салмов сускозе кяленц.

Порговти чуднойкс арась комиссиять актоц, тоса ашель азф, мезе тиемс кукурузать мархта, и азозе эсь мяленц:

— Мон тяфта ванан: врачсь сярядить аф аньцек ванондсы, но и сёрматкшни рецепт, кодама лекарстваса эряви пчкафтомс. Пади, агрономияса аф тяфта эряй? — варжакстсь Сараевать лангс.

— Тянь шарьхкодьсаськ, Борис Константинович, — отвечась Сараевась, — агрономиясонга рецептт эряйхть.

— Месть тоса корхтамс, — пеедезевсь Зобов‚— синь тянь колга, няемс, ёфси ашесть арьсе. Мярьгсть, што кукурузась кальдяв и сяка. А Поргов ялгась лац арьси: мезе-мезе эряви тиемс. Кода, агроном ялгат?

— Мон корхтань Леховти, — мярьгсь Сараевась, — тяряфтость нилецьке пяльде ётамс сонь культиваторса, пади, кеподи. Вдь кукурузась ёрдафоль, ашельхть путфт эзонза кятть.

— Галина Васильевна, — тага пшкядсь Поргов, — минь якаме мархтот экскурсияв. Мезе тоса тиендихть, кода касфтсть стама цебярь кукуруза? Мяляфтсак?

— Мяляфтса, — бта сргозсь Сараевась. — Наксада назем ули колхозса? — кизефтезе Леховть.

— Наземть лангса тевсь аф ащи.

Сараевась азозе, што сон тячи ляды тязк и марса кармайхть арьсема, кода и мезе эряви тиемс.

Сембонь мархта срхкась тума Варвара Степановнаське. Прощандамстонза салаване кизефтезе Порговть:

— Тячи молят куду?

— Наверна, молян, а мес?

— Стак. Мон карман учемот.

— Аделасайне тевнень и молян.

— А Сараевась аф кирттянза тяса? Мон вдь шарьхкодьса, местема ляды тяза...

Поргов якстерьгодсь. А Шиндина озась Зобовть машиназонза.