27

Райкому молемс Лехов кильтьфтезе рысакть, но молемаснон сон ашезе эряскофта, вестенге ашезе токсе алашать. Лисезь велеть и мянь пандти куцемс мезевок изь кашторда, ащесь комадонь прят, сяконь аньцек содась, суронзон ёткова шарфнезень вожнятнень, нльне юкстазе, што вакссонза парторганизациянь секретарсь.

Белкин содазе, мезе тиендевсь тя пингть председательть потмоса. И кати изь мушенда сон эрявикс валхт, штоба весялгофтомс Леховть, кати эстейнзонга ульсь мезень колга арьсемс бюронь заседаниянь карша, но сонга изь тяряфне корхтама. Сидеста тозерявсть сонь лафтунза, бта меки мрдасть фронтонь сярятьфонза.

Валгсь шись, и тумонь порать ширде каршезост яфодсь ару кожф. Кати илядень кожфсь сргозьфтезе Леховть, кати сизесь сонь пряц стака арьсематнень эзда, но вдруг шарфтсь Белкинти:

— Мярьгат, аделавсь кукурузать назёмондамац? — кизефтезе сон и изь карма ответонь учема, тага кизефнесь: — А вдь тяни аф сяшкава пелькс комиссиять актоц, кода тон чаят?

Белкинти изь арьсев сразу тя тевсь, ашезе сода, пелемс актть эзда или аф, сяс баснять шарфтозе:

— Мезе тяза уль, а кукурузась урядаф. Кулить, мезе колхозникне тисть тячи паксяса работада меле?

— Аш. А мезе?

— Пуромоме тумстонк кить трвас, ну и Бугров атясь сембонди азсь спасиба парста работаманкса. А колхозникне фатязь сонь и давай кукафнемс, синць пешкодыхть: «Ура!», «Ура!».

Тонга поволеть коморозост, аватне вешендедязь: «Коса Леховоньке, коса Леховоньке», да‚ эк, тон ашелеть. Ну и вастозот кярмодсть тейне, комозьшкаксть ёрдамазь вяри‚ — кайгиста рахась Белкин, а меле азозе: — Мезе тяст корхне колганк, а парот минь колхозниконьке, пяк парот!

— Мярьгат, повондоде Бугровть мархта колхозникнень коморс? — марнек весялгодсь и нльне рахась Лехов.

— Ну и повондоме.

— И моньге вешендемазь?

— Виде ваймот корхтан, вешендедязь.

Лехов тозердазень вожиятнень, и бурякс сурдазень синь рысаксь. Сон весяласта корхтакшнесь алашать мархта, кошярязе ардома. Мянь лугатненди валгомс ардсть, а кодак кись кармась кичкоряма эрьхкнень и шяйхнень ёткова, Лехов кирдезе алашать, тага кизефтезе Белкинть:

— А вдь пяк цебярь тефт можнат тиемс минь народоньконь мархта, а?

— Народсь — золота.

— Мярьгат, кукафнедязь тинь? — стаки рахась Лехов.

— Кукафнемазь, кукафнемазь.

— Карга велети эряви куроконе строямс клуб, больниця, баня, — марнек юкстазе Лехов пичефксонц, — эста велеряйнеке аф тяфтапт кармальхть улема, толс эцельхть тевть инкса. А строямс тянь сембонь ули кода. Видеста азыть, народоньке — золота. — Корхтамста палсть Леховть сельмонза, пеедсь кругоц. — Может, аф тяфта корхтан? — лемдезе сон эсь валмуворксонц.

— Мес аф тяфта, тяфта‚ — отвечась Белкин и сонць куфкстсь: — Тя сембе пара, а вов мезе карматама корхтама бюроса?

Лехов бта тозердавсь. Сон крутаста шарфтсь Белкинти, мярьгат эводсь ня валхнень эзда.

— Мезе кизефтихть, сянь и астама. А пелемс аш мезьда, — и аф ламос ащемда меле сонць кизефтезе: — Афкукс, а мезе кармайхть кизефнема кядьстонк? Кода путф колганк кизефкссь бюроса, тон аф содасак?

— Кие содасы, кода, — оду пичекстсь Белкин.

Тага сетьмость кафцьке.

— Арьсетяма мархтот строямать колга, — меколи азозе Лехов, — а вдруг тячи сявсамазь и паньцамазь, а?

«Якстерь тяште» колхозть колга кизефксть бюроса кармасть ванондома меколи, пялеветь малас.

Варламов ащесь кувака моркшть песа, конань перьф озсефтольхть бюронь члеттне: Зобов, Степашкин, Шиндинась, Алексеев, Салмов‚ Чуйкин и прокурорсь. Моркшть пенц занязь райкомонь отделонь заведующайхне, а кабинетть стенанзон кувалмова стулхнень ланга озсефт райкомонь инструкторхне и пропагандисттне.

Мзярда сувасть Лехов и Белкин, сембе варжакстсть лангозост. Леховонь сакалонза нарафт, сенем костюмонц алда няевсть парьхциень тюжя панароц и сенем галстукоц. Белкинць щаф военнай гимнастеркаса, галифе сенем брюкаса, кямоса. Озафтозь синь ёфси шрать малас, Варламовть мархта карань-каршек.

Варламов ванондсь кодама-бди каготт, тоса кеподезе прянц, важнайста пшкядсь:

— Давай, Лехов ялгась, азондыть, кода молихть тевонте.

Лехов стясь вастстонза, мяштень зепстонза таргась записной книжка и ашезь кенере азомс фкявок вал, Варламов калтадезе моркшти карандашенц:

— Тячиень шить самс тридцатитысячникнень бюрос ашеськ терне‚ лувондоськ одкс, ну а тяни кой-конат эздост кенерсть ни сиредемс и лама ни тисть кальдявда. Карматама мархтост васетькшнема тя моркшть ваксса. Вов тячи кулхцондсаськ эздост васенцеть, Лехов ялгать, — тага варжакстсь Леховть лангс, поладозе: — Давай, Лехов ялгась, корхтак.

Леховть бта сотовсь кялец. Ванозень сембонь шамаснон, панжезе и меки сёлгозе блокнотонц, варжакстсь эсь кядензон лангс, конат нежетьфтольхть шрати.

Сембе ащесть бта шуфтомфста, Шиндина марязе прянц стане, пчкяль сонць Леховть вастс ушедоль корхтама, азондольхцень колхозонь тефнень. Сеелькс копорьгодсь Белкин, апак лотксек якафтозень сельмонзон Варламовть лангста Леховть лангс.

— А сон содасы, мезень колга корхтамс? — пшкядсь Зобов.

— Ну, кие ина содасы, кда аф сон? — малость пеедезевсь Варламов. — Хоть кой-кодама цифрат хозяйствастост вдь мяляфты.

И хотя Варламов няевсь Леховти пяк сятявста, вежлявста, кодамокс сон вестенге ашезе няенде тнярс, сякокс марязе прянц стане, бта сонь тага сюцезь. Кодамовок цифрат исть пов прязонза.

— Кие аноклазе тя кизефксть? — Степашкин шарфтсь Варламовти.

— А мезе анокламс? — Варламов полафтозе вайгяленц, валонзон эзда марявсь аф оцю кяжня. — Сембе содасаськ тя колхозть. Азость, кие эздонт изь васетькшне Леховть мархта? — И тага кеподезень колхозонь председательть лангс сельмонзон: — Лехов, тон хоть малость аноклать тя докладти?

— Мон аф содаса, мезень колга корхтамс, — тяни виденцясь Лехов, и кайгсь вайгялец, бта учениконь, кона ашезе тонафта уроконц. Но курок юксовсь кялец, и кармась азондома, мзяра колхозсь видесь кедида, кодама срокста, кода синь кочкфт. Азозень, мзяра урядаф лятьфта, кода аноклайхть сёронь урядамати. Корхтась сон записной книжкафтома.

Вельмось Белкинцьке, сон саворне пеедсь.

Варламов лоткафтозе Леховть:

— Ня цифратнень минь сембе содасаськ, — пшкядсь сон и ламос ванць Леховть сельмос.

— Да, ня цифратнень эзда каньцкстасть ни пейньке, — эстокиге пшкядсь Салмов.

— Вагот цифратне, кядьсонк, — Варламов кеподсь моркшенц лангста каготт. — А тон азк, мес ашить пяшкоде тозер видема планть, кода уратфнесть траксонтень, мес юмась кукурузанте, ну и тяк юкста азомс сяньге, кода явость колхознай тишеть? Тейть, дорогой, ули мезе азомс. Тон шарьхкодьсамак монь?

Лехов абонтф сельмоса ванць Варламовть лангс. Тейнза мезе-бди салава азсь Белкин, и сон ушедсь тишеть колга азондома:

— Мон кода эряви аф содаса законть, но колхозса тейне азозь, што кемонь проценттнень можнат явомс. Вов и явоськ.

— Тя виде, тяфтама закон ули‚ — эстокиге пшкядсь Зобов. — Ся тишесь колхозникнень.

Кой-кие пеедезевсь. Зобов варжакстсь лангозост:

— Мес пееттяда? Мон лац корхтан. Кемонь процентонь тишесь колхозникнень, и сон аф эряви кирнемс!

Алексеев тяштсь Зобовти каготкя, азозе, што колхосненди Варламовть и сонь, Зобовть, лемста кучф телефонограмма, коса мярькф аф явондомс ся проценттнень. Зобов лувозе и кафта пяли шукадезе прянц, няфтезе, што тяфтама телефонограмма изь кучсе.

Степашкин и Алексеев варжакстсть фкя-фкянь лангс: Варламовть мархта синь корхнесть тишеть колга.

Зобовть корхтамда меле Варламов срмазе конянц:

— Азондк, Лехов, мес юмась кукурузанте, кода траксонтень муцясть?

— А тяни синь лофцта потнихть сембода лама районца, — сетьмоста пшкядсь Чуйкин.

— Тя тяни, — азозе Варламов, — мзярда мон азыне, мезе тоса эряви тиемс. А инголе мзяра потнесть?

Белкин варжакстсь Леховть лангс и пеедезевсь.

— Пеедят, Белкин ялгась, кенярдеть Леховть тешканзон инкса? — кяжияфтсь Варламов. — Минь вдь тоньге кизефттядязь.

Лехов кармась азондома кукурузаснон колга, но сонь тага кафксть-колмоксть лоткафнезь то Варламов, то Салмов.

Тяфта кулхцонтфоль Лехов. Кармасть корхнема бюронь члеттне. Васендакиге стясь Салмов. Корхтамста сон азондсь страшнай валхт: лафча, апак пяшкотть, сязьф, бюрократ, чиновник. Салмов нльне тяряфнесь Леховти сотомс дояркать Ленать, но эстокиге лиятне кафта-колма вайгяльса уркстозь сонь. Салмов апряказе сянкса, мес Лехов кржа эряй колхозса, апак лотксек якай ошева, вешенди кодама-бди товархт и материалхт, арни рысак лангса да автобусса.

Чуйкин кяжиста сонь перязе:

— Мезенди тянь лятьфнесак? Минь колхозсонк колма рысакт. Да, деряй, тя кальдяв? Кда Лехов мисы рысакснон, минь тячикиге рамасаськ. А автобусснон лангс минь тожа сельме каятама.

— Варвара Степановна‚ — тага ушедсь Салмов, — тон тоса сидеста эрят, азк видеста, Леховти вятеви колхозсь?

— Вов тянь колга и эряви арьсемс‚ — эстокиге фатязе Варламов. — Кода тонць ванат, Лехов ялгась, кирдихть лафтуфне тя сталмоть эзда?

— Мон ашине шарьхкоде, Степан Иванович, — трнаты вайгяльса азозе Лехов, — кодама сталмонь колга корхтатада: работать или сюцемать?

Варламов тяни стясь вастстонза, шашфнезень ингольденза каготтнень и карандашнень. Сон ашезе кельгоньде, кда кие-кие азы каршезонза вал. Кунара ни кивок ашезе колсе сонь тя обуцянц. А тяни мувсь ломань — Леховсь, конац бта коня ланга эрьхтезе Варламовть.

— Няесть, ялгат, кода шарьхкодезе Лехов бюроньконь? Кие тонь, Лехов, сюцензе? Бюрось: мон, Салмов, Зобов и лиятне?

Леховть вастс отвечась Салмов:

— Монь койсон, аш месть муцямс колхозть, аш месть муцяфнемс пря эстейнза Леховти, тяса аф заводонь цех.

— Заводонь цехть тяк токсе, тон сонь аф содасак! — кяжиста пшкядсь Лехов.

— Давайте ладняс арьсетяма Леховть колга, — сетьмоняста пшкядсь Варламов. — Кие кармай корхтама? Роман Романович, кармат?

Степашкин тя ёткова мезе-бди рисовандась кагод лист лангс. Сон кеподезе прянц и бта сяда таргавсь стаконга кувака шамац, нинге сяда потму ваясть оцю сельмонза.

— Минь ванондсаськ Леховть тевонц или «Якстерь тяште» колхозть отчётонц? — кизефтезе Варламовть.

Сембе, кие ульсь бюроса, шарфтозь пряснон Степашкинть шири. Варламов отвечась аф эстокиге. Сон бта эводсь. Варжакстсь настольнай лампать вельф Степашкинть лангс и сонць кизефтезе:

— Мон аф шарьхкотте, Роман Романович, мезе тон кизефнят?

— Монга тяса мезевок аф шарьхкодян, Степан Иванович. А штоба шарьхкодемс, монь койсон, кой-мзярс тяза эряви лядомс аньцек бюронь члеттненди.

Варламов тись мзолдыкс:

— Мон аф содаса, мезе ёрат, Роман Романович? Но... — и аф ламос повсь кялец. — Ну давайте, ялгат, арьсетяма Степашкинть предложениянц колга. Кода ваттада?

Кивок ашезе ученда, што Степашкин тяфта кармай эсь прянц вятема, сяс киндинге изь смекав, мезе азомс. Варламов аф ламос учсь и тага пшкядсь:

— Тяфта уленкшни партияньконь эряфса, мзярда сонь башка членонза кепсихть бунт.

Степашкин стясь вастстонза и кода-бди кардазь мярьгсь:

— Степан Иванович, ня валхнень вастсна закрытай бюроса.

Варламов ётафтсь голосования. Степашкинть предложениянц каршес кивок изь голосованда.

Мзярда шамсь кабинетсь и лядсть аньцек бюронь члеттне, Варламов кизефтезе Степашкинть:

— Может, Роман Романович, бюроть тон вятьсак? — корхтамста трнатсь.

— А мес мон?

Варламовть да и лядыхненге нервасна, няевсь, струнакс таргафтольхть. Сон макссь вал Степашкинти и мярьгсь, штоба азондольхце, мезенди эрявсь сёлгомс бюрось.

Степашкин бта тянь и учендсь.

— Монь койсон, Степан Иванович, аф правильнай линия вяти Леховть колга...

Варламов лотафтозе сонь:

— Кда ни сёлкфтыть бюроть, эряви васенда азомс, кодама кизефкс ёрат путомс тяса.

— А, протокол эряви? Ну, эста сёрмадсаськ тяфта: «Заводста кучф кадратненди райкомть аф партийнай отношениянц колга».

— Ну, тя пяк ни!... Минь корхтаме аньцек Леховть колга, — мярьгсь Зобов.

— Тя безобразия! — ювадсь Салмов и шарфтсь Варламовти: — Мес тяшка воля сявсть?!

Варламов лофташкодсь, но мезевок изь аза. Степашкин шарфтсь Зобовти:

— Мес аньцек Леховть? А коса Рузаевкаста кучф инженерсь? А кодама документт сейфса кирдевихть Порговть каршес? Деряй, Цекать Сентябрьскяй Пленумоц тяфта кошардомазь работама?

Варламовть ловкс акшемсь шамац, стясь вастстонза, тятярьгодсь и прась моркшть туркс.

Сембе эводсть. Путозь сонь диванть лангс, Степашкин юксозень Варламовть пунянзон, панчфтозень сембе вальмятнень. Шиндинась начфтозе кельме ведьса эсь руцянянц и путозе Варламовть коняс. Варламовть шаманц келес тусть ливость.

Аньцек тяни сембе шарфтсть мяль, кода шумнасть кенкшть фтала. Содафоль, што тоса мольсь бюроть заседаниянц пец. Степашкин кошардозе Алексеевть азомс сембонди, што кодамовок бюро аф ули, и кадк туйхть куду.